Read Akha Daˬyeˬlaˇ 10 Bible Online

Daˬyeˬlaˇ 10 - Akha bible

Daˬyeˬlaˇ 10

¹(Sahˬ paˬ Guˇluˆ Paˇshaˇ miˇ kʼahˬ-ahˇ uˆ lahˇ-euˬ smˇ kʼoꞈ tiˬ kʼoꞈ-ahˇ, Beˬteˬshaˬzaˬ lehˇ kuˇ-eu Daˬyeˬlaˇ-ahˇ, dawˬ pah mehˬ le-euˬ meh. Dawˬ kʼoeˇ dawˬ tsaˬ-eu dawˬ pyeuꞈ-eu meh. Ehˇ kʼawꞈ, gʼoˆ shaw nya-eu gʼaˇ duˬ maˬ awˬ-a. Yaw sahˇ laꞈ kʼoeˇ ya siˬ ya mawˇ-eu jeˬ laꞈ kʼoeˇ, dawˬ kʼoeˇ-euˬ dawˬ tsuiꞈ aˬ yawꞈ-ahˇ ehˇ mehˬ nehˬ le-euˬ meh.)

²Aˇ yamˬ kʼoeˇ yamˬ-ahˇ, smˬ jaw keuˆ ni ngaˇ tsawˇ ngoeˇ ngoeˇ-euˬ ma.

³Aˇ yamˬ kʼoeˇ smˬ jaw maˬ dzeuˇ-iˇ kʼoeˇ keuˆ ni, ngaˇ dzaˇ yaw kuiˇ maˬ dzaˬ-ehˇ, aˬ gaꞈ dzaˇ uiˇ maˬ dawˇ-eu uˬ taꞈ, uˬ duˬ kʼawꞈ maˬ kaˆ ni jawˇ-euˬ ma.

⁴Tiˬ kʼoꞈ laꞈ kʼoeˇ ba la yaw beh siˬ nyiˬ tseˇ oeˬ nah-ahˇ, Tiˇgaˬliˇ lawˇ baˬ baˬ ma-euˬ lawˇ dzeˇ-ahˇ ngaˇ yawꞈ luꞈ-eu ma.

⁵Ngaˇ haw daˆ gʼeh leꞈ ngeh, shawˇ jehˆ ni gʼeh-eu saˬ paˇ neh guꞈ taˬ-euˬ mehˬ tsoeˬ dm-awˇ, maˇ jawˆ ni gʼeh-eu shuiˇ joꞈ paꞈ paꞈ luꞈ-eu tsawˇ haˬ tiˬ gʼaˬ-ahˇ ngaˇ mawˇ-euˬ ma.

⁶Aˬ yawꞈ-euˬ gʼawˇ mawˇ kʼaˬ lo sehˇ loꞈ-ehˇ yaw shehꞈ bya-awˇ, aˬ yawꞈ-euˬ myaˆ pyawˬ mˬ myawꞈ myawꞈ-eu loꞈ-ehˇ naˇ guiˇ guiˇ laˇ-awˇ, aˬ yawꞈ-euˬ myaˆ nuiˆ miˬ dzaˬ miˬ lmˇ loꞈ-ehˇ nyehˆ-eu meh. Aˬ yawꞈ-euˬ aˬ kuiˇ aˬ laꞈ-aˬ, jeˬ juˇ taˬ-euˬ guiˬ shuiˇ loꞈ-ehˇ guiˇ nyiˬ ni gʼeh-awˇ, aˬ yawꞈ-euˬ teˇ saˇ tsawˇ haˬ aˇ maꞈ maꞈ ma uiˬ leˇ-awˇ guˇ gaˇ duˇ-eu ma.

⁷Yaw sahˇ laꞈ kʼoeˇ kʼoeˇ loꞈ-ehˇ ya siˬ ya mawˇ-euˬ-aˬ, ngaˇ tehꞈ ma. Ngaˬ nehˬ-ehˇ jawˇ luꞈ-eu tsawˇ haˬ deuˬ tiˬ jeˬ-iˬ maˬ ya mawˇ-aˬ. Ehˇ kʼawꞈ, aˬ yawꞈ maꞈ tsawˬ guˆ-iˇ-awˇ cehˆ zaꞈ jiˆ-euˬ meh.

⁸Ngaˇ tiˬ gʼaˬ tehꞈ-ehˇ kʼoeˇ gaˇ jawˇ yaꞈ-awˇ, zahˬ dui dui leˇ paˬ-ehˇ gʼeh-eu ya siˬ ya mawˇ-eu kʼoeˇ hmˬ-ahˇ haw hawˇ-ehˇ jawˇ-euˬ ma. Ngaˇ gʼaˬ tiˬ pawꞈ-iˬ maˬ ahˇ-ehˇ pyeuꞈ-iˇ-awˇ, tsawˇ haˬ tiˬ gʼaˬ-iˬ ngaˬ-ahˇ maˬ haw siˬ nya paˬ-ehˇ, myaˆ pyawˬ pyuˇ pya ni pyeuꞈ-iˇ-euˬ ma.

⁹Aˬ yawꞈ-euˬ teˇ saˇ ngaˇ ya gaˬ ngeh, miˇ tsa coˬ dzeh-awˇ, moꞈ tsahˬ-ehˇ maˬ noeˬ ni ga-euˬ ma.

¹⁰Kʼoeˇ naˇ, aˬ laꞈ tiˬ laꞈ ngaˬ-ahˇ ciˬ tuˇ le-awˇ, ngaˬ-euˬ aˬ laꞈ hawˇ-eu aˬ kuiˇ pawˬ tsuiꞈ yaw dzuˬ dzuˬ-euˬ ma.

¹¹Mˬ taˆ gʼaˬ kʼehˇ kʼoeˇ gʼaˬ ngaˬ-ahˇ, “Daˬyeˬlaˇ-oˇ, Miˬyehˇ nawˬ-ahˇ gaˬ-eu meh. Tuˇ-awˇ, ngaˇ ehˇ gaˇ yaw muiˬ paˬ-ehˇ naˇ haˬ sheˇ. Nymˬ-mˇ ngaˇ nawˇ jawˇ gaˇ oe-eu lehˇ oe-euˬ ma” lehˇ ehˇ laˇ ngeh, ngaˇ yaw dzuˬ dzuˬ dzuˬ-ehˇ gawˬ yawꞈ yawꞈ-euˬ ma.

¹²Aˬ yawꞈ ehˇ-eu, “Daˬyeˬlaˇ-oˇ, taˬ guˆ. Nawˇ zaˬ siˬ tsawˇ gahˇ za nya ni nui ma nahˬ yu ni taˬ ma lehˇ noeˬ tsehˆ dahˬ beh ngeh nah neh, nawˬ-euˬ guiˬ lahˬ shaˇ dawˬ-ahˇ Miˬyehˇ naˇ haˬ geuꞈ-euˬ meh. Nawˬ neh guiˬ lahˬ shaˇ-euˬ gaˇ kawˆ ehˇ kʼoꞈ nehˬ le-eu lehˇ ngaˇ oe-euˬ ma.

¹³Paˇshaˇ miˇ kʼahˬ-ahˇ haw piˇ luꞈ-eu mˬ taˆ gʼaˬ kʼehˇ kʼoeˇ gʼaˬ, nyiˬ tseˇ tiꞈ nah keuˆ ni ngaˬ-ahˇ laˆ tsoeˬ nehˬ laꞈ-euˬ meh. Kʼoeˇ ngeh, mˬ taˆ gʼaˬ kʼehˇ deuˬ laꞈ kʼoeˇ yaw huiˬ tiˬ gʼaˬ pyeuꞈ-eu Miˇkeˬlaˇ-aˬ, ngaˇ tiˬ gʼaˬ tehꞈ-ehˇ Paˇshaˇ miˇ kʼahˬ-ahˇ shaˬ luꞈ gaˇ ya mawˇ-awˇ, ngehˬ gʼeh le-euˬ meh.

¹⁴Aˬ kaˇ mehˬ hu paw nawˬ-euˬ tsawˇ jeuˬ kʼoeˇ taˆ aˬ joˆ-ehˇ pyeuꞈ laˇ-eu gaˇ kawˆ nawˇ gʼoˆ shaw nya ni ngaˇ ja mehˬ le-euˬ ma. Heu-aˬ, aˬ kaˇ mehˬ hu paw pyeuꞈ laˇ-eu gaˇ kawˆ-ahˇ taꞈ leˇ-eu yaw sahˇ laꞈ kʼoeˇ ya siˬ ya mawˇ-eu jeˬ meh.”

¹⁵Aˬ yawꞈ kʼoeˇ loꞈ-ehˇ ehˇ ngeh, ngaˇ miˇ tsa haw tsoˆ taˬ-awˇ, dawˬ maˬ tmˇ ni jawˇ-euˬ ma.

¹⁶Kʼoeˇ ngeh, tsawˇ haˬ zaˬ-ahˇ duˇ leˇ-eu mˬ taˆ gʼaˬ kʼehˇ kʼoeˇ gʼaˬ, aˬ laꞈ cawˬ ja leꞈ-awˇ, ngaˬ-euˬ mehˬ luꞈ-ahˇ toeˬ ciˆ-euˬ meh. Kʼoeˇ naˇ, ngaˬ-euˬ kʼaˬ meh mˇ nga-awˇ dawˬ ngehˬ dahˬ beh-awˇ, aˬ yawꞈ-ahˇ heu loꞈ-ehˇ ehˇ nehˬ-euˬ ma. “Yaw huiˬ yaw mahˇ gʼaˬ-oˇ, yaw sahˇ laꞈ kʼoeˇ ya siˬ ya mawˇ-euˬ heu ngaˬ-ahˇ gʼaˬ baˬ dui dui-iˇ-awˇ, yaw dzuˬ dzuˬ-eu maˬ naˬ leˇ nya.

¹⁷Sahˬ paˬ mehˬ shi yawꞈ leˇ-euˬ zaˬ kʼaˆ-ahˇ duˇ miˇ-a. Nawˬ-ahˇ ngaˇ dawˬ aˬ joˆ-ehˇ ngehˬ cawˬ coeˇ nmˇ. Ngaˬ-euˬ laꞈ kʼoeˇ gʼaˬ jiˇ-awˇ, saꞈ gʼawˇ-euˬ gʼeh maˬ paˇ dzeˇ miˇ-a.”

¹⁸Aˬ yawꞈ ngaˬ-ahˇ tiˬ poˆ paˇ nyehꞈ tehꞈ ngeh, gʼaˬ ui cuiˆ paˇ ahˇ dzehˬ laˇ-euˬ miˇ-a.

¹⁹“Miˬyehˇ nawˬ-ahˇ gaˬ-eu meh. Kʼoeˇ miˇ neh, nawˇ tiˬ jeˬ-ahˇ-iˬ noeˬ shaˬ-awˇ taˬ guˆ” lehˇ aˬ yawꞈ ehˇ-eu meh. Aˬ yawꞈ kʼoeˇ loꞈ-ehˇ ehˇ gʼaˬ ngeh, ngaˇ gʼaˬ paˇ ahˇ dzehˬ laˇ-awˇ, heu loꞈ-ehˇ ehˇ-euˬ ma. “Yaw huiˬ yaw mahˇ gʼaˬ-oˇ, nawˇ ngaˬ-ahˇ dzawˇ nehˬ paˬ-ehˇ gʼeh-eu jeˬ dzawˇ nehˬ laꞈ-awˬ. Nawˬ neh ngaˬ-ahˇ gʼaˬ bi ahˇ dzehˬ laˇ-euˬ miˇ-a.”

²⁰Kʼoeˇ naˇ, aˬ yawꞈ heu loꞈ-ehˇ ehˇ-eu meh. “Aˬ jeˬ miˇ neh ngaˇ nawˇ jawˇ gaˇ oe-euˬ nawˇ siˬ nya ma loˇ. Ehˇ kʼawꞈ, nymˬ-mˇ ngaˇ gʼoꞈ leˇ-awˇ, Paˇshaˇ miˇ kʼahˬ-ahˇ haw piˇ luꞈ-eu mˬ taˆ gʼaˬ kʼehˇ kʼoeˇ gʼaˬ-ahˇ ya deuˆ ceh ceh leˇ-a siˬ. Ngaˇ deuˆ ceh ceh gʼaˬ ngeh, Heˬlaˬshaˆ miˇ kʼahˬ-ahˇ haw piˇ-eu mˬ taˆ gʼaˬ kʼehˇ kʼoeˇ gʼaˬ oe tehꞈ-a.

²¹Ehˇ kʼawꞈ, yaw tsaˬ yaw dawˇ sahˬ boꞈ laꞈ kʼoeˇ boꞈ ahˇ taˬ-euˬ gaˇ kawˆ nawˬ-ahˇ ngaˇ ehˇ nehˬ ma. Iˇsaˬleˬlaˆ miˇ kʼahˬ-ahˇ haw piˇ-eu mˬ taˆ gʼaˬ kʼehˇ pyeuꞈ-eu Miˇkeˬlaˇ maˬ ngeuˇ naˇ, gaˇ kawˆ heu hmˬ-ahˇ taꞈ leˇ-awˇ ngaˇ jawˇ paw pyawˬ-eu tiˬ gʼaˬ-iˬ maˬ jawˇ-a.