Read Akha Hawˇseˬ 12 Bible Online

Hawˇseˬ 12 - Akha bible

Hawˇseˬ 12

¹Iˇsaˬleˬlaˆ tsawˇ haˬ deuˬ neh, mˬ tiˬ ciꞈ mˇ-euˬ shaˇ-euˬ jeˬ, yaw muiˬ maˬ jaˆ yaw cawˆ tehꞈ meh. Yaw lehˬ hawˇ-eu yaw ca mˇ-eu, myaˬ laˇ kʼaˆ laˇ tehˇ tehˬ-eu meh. Aˬshuˇliˆ-ahˇ saˇ jaˇ dzaˬ-awˇ, Iˇjiˇtuˆ-ahˇ gaꞈ taꞈ-eu meh.”

²Yuˇdaˆ tsawˇ haˬ deuˬ-euˬ yaw ca, Sahˬpaˬ Miˬyehˇ ja-eu jaˆ meh. Iˇsaˬleˬlaˆ deuˬ-euˬ yaw lehˬ, Sahˬpaˬ Miˬyehˇ kʼehˬ-eu jaˆ meh. Aˬ yawꞈ maꞈ-ahˇ geuˇ-eu loꞈ-ehˇ, kʼehˬ-eu kʼaˆ-eu ya daˬ tehꞈ-a.

³Aˬ yawꞈ maꞈ-euˬ aˬ poeˬ Yaˬkoˆ, uˬ maˆ laꞈ kʼoeˇ uˇ luꞈ ngeh neh, Iˇsawˇ-euˬ kuiˇ nuiꞈ-ahˇ tsuˆ-awˇ, aˬ yawꞈ paˇ huiˬ loˆ laˇ ngeh jawˇ, Miˬyehˇ nehˬ-ehˇ paˇ dawꞈ-euˬ meh.

⁴Mˬ taˆ gʼaˬ kʼehˇ-ahˇ dawꞈ gʼaˬ-awˇ, ngoeˇ-awˇ guiˬ lahˬ shaˇ geuꞈ-euˬ meh. Beˬdeˬlaˇ lehˇ kuˇ-eu tsahˇ-ahˇ, Miˬyehˇ aˬ yawꞈ jawˇ gaˇ oe-awˇ, aˬ yawꞈ-ahˇ dawˬ ngehˬ cawˬ-euˬ meh.

⁵Baoˬ huiˬ dui dui-eu Miˬyehˇ kʼoeˇ, Sahˬpaˬ Miˬyehˇ lehˇ myahˇ-euˬ meh.

⁶Yaˬkoˆ-euˬ zaˬ deuˬ uˆ deuˬ-oˇ, kʼoeˇ baˬ da neh nymˬ-mˇ naw maꞈ, naw maꞈ-euˬ Miˬyehˇ-ahˇ jah-awˇ, aˬ yawꞈ jawˇ paw gʼoꞈ laˇ jiˇ-awˬ. Gʼoeˇ-eu gaˬ-eu jeˬ-ahˇ hawˇ-eu, yaw tsaˬ yaw dawˇ jeˬ-ahˇ naw maꞈ, ziꞈ dah ni tsuˆ tehꞈ-eu laꞈ kʼoeˇ, naw maꞈ-euˬ Miˬyehˇ luˆ le gaˇ, nui ma oˇ oꞈ-awˇ dawˬ tawˬ-awˬ.

⁷Sahˬpaˬ Miˬyehˇ ehˇ-eu dawˬ-aˬ, “Iˇsaˬleˬlaˆ tsawˇ haˬ deuˬ-aˬ, Kaˬnaˬ tsawˇ haˬ kʼoeˇ deuˬ loꞈ-ehˇ, maˬ sui maˬ dawˇ-eu tsawˇ haˬ meh. Maˬ tsaˬ-eu daˇ leuˇ neh saˆ-awˇ, mehˇ shuiˇ shuiˇ-eu nui ma ahˇ meh.

⁸‘Nga maꞈ smˇ muiˬ muiˬ dui dui ma. Maˬ sui maˬ dawˇ-eu jeˬ laꞈ kʼoeˇ, pyuˇ shuiˇ laˆ jaˆ taˬ-euˬ meh lehˇ, tsawˇ haˬ tiˬ gʼaˬ-iˬ nga maꞈ-ahˇ, maˬ ngehˬ nya-a’ lehˇ ehˇ-eu meh.

⁹Iˇjiˇtuˆ miˇ kʼahˬ laꞈ kʼoeˇ neh, naw maꞈ-ahˇ sheuˬ doˆ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ-aˬ, aˇ hu kʼaˇ shuiꞈ deh-ahˇ shaˬ ngeh, sehˬ gʼawˆ laꞈ kʼoeˇ jawˇ-euˬ loꞈ-ehˇ, naw maꞈ ya jawˇ poˆ ni jahˇ ma.

¹⁰“Bawˇlawˇpeh[14] -ahˇ ngaˇ dawˬngehˬ-awˇ, yaw sahˇ laꞈ kʼoeˇ ya mawˇ-eu jeˬ, gʼawˬ mya poˆ ngaˇ byaˬ nehˬ-euˬ ma. Bawˇlawˇpeh-ahˇ gʼoe-eu laꞈ kʼoeˇ, ngaˬ-euˬ tsawˇ haˬ-ahˇ mehˬ-euˬ ma.

¹¹Ehˇ kʼawꞈ, tahˬ pahˬ aˬ ma deuˬ-ahˇ, Giˇlaˆ meuˬ uˬ duˬ tahˬ-euˬ meh. Kʼaˇ tahˬ-euˬ deuˬ ya shiˇ tehꞈ-a. Giˇlaˇgaˬlaˇ meuˬ-euˬ laꞈ kʼoeˇ, mawˇ neˇ mawˇ gaw lawˇ nehˬ-euˬ meh. Kʼoeˇ gaˇ jaˆ-eu lawˇ duˬ kʼoeˇ deuˬ, deh liˬ gʼahˇ ceh gʼoˆ bymˇ taˬ-euˬ, kʼaˬ lo lo bymˇ-ahˇ duˇ tehꞈ-a.”

¹²Aˬ dui-euˬ aˬ poeˬ Yaˬkoˆ-aˬ, miˬ zaˬ tiˬ gʼaˬ sheuˬ-euˬ aˇ poeˬ, aˬ cawˬ-euˬ yawˇ bo nehˬ-euˬ meh.

¹³Iˇjiˇtuˆ-ahˇ zaˬ kʼaˆ geuꞈ-eu, Iˇsaˬleˬlaˆ tsawˇ haˬ deuˬ-ahˇ, ka kʼoꞈ-awˇ sheuˬ gʼeh-eu gʼaˇ duˬ, aˬ dui Miˬyehˇ neh kʼehˇ doˆ-euˬ, Bawˇlawˇpeh tiˬ gʼaˬ oe-euˬ meh.

¹⁴Sahˬpaˬ Miˬyehˇ nui ma naˇ ni, Iˇsaˬleˬlaˆ tsawˇ haˬ mˇ-awˇ, aˬ yawꞈ maꞈ neh mˇ-euˬ yaw lehˬ, shiˇ gaˇ keuˆ ni daˬ-eu tsaˬ meh. Sahˬpaˬ Miˬyehˇ myaˆ pyawˬ cawˆ ni, aˬ yawꞈ maꞈ mˇ-euˬ baˬ da neh, kʼehˬ-eu jeˬ-ahˇ ya daˬ tehꞈ-a.