Read Akha Hawˇseˬ 14 Bible Online

Hawˇseˬ 14 - Akha bible

Hawˇseˬ 14

¹Iˇsaˬleˬlaˆ tsawˇ haˬ deuˬ-oˇ, nawˬ-euˬ Sahˬpaˬ Miˬyehˇ pyeuꞈ-eu, Miˬyehˇ jawˇ paw gʼoꞈ kʼoꞈ laˇ-awˬ. Naw maꞈ-euˬ iˬ baˇ baˬ da neh, naw maꞈ pehˆ toˆ tahˬ sehꞈ-euˬ meh.

²Guiˬ lahˬ shaˇ dawˬ heu yuˇ laꞈ-awˇ, lawˇ-eu shehˇ-eu tiˬ jeˬ loꞈ-ehˇ, Sahˬpaˬ Miˬyehˇ-ahˇ damˬ nehˬ-awˬ. “Nga maꞈ-euˬ iˬ baˇ pyehˬ laꞈ-awˇ, nga maꞈ shaˇ dawˬ naˇ haˬ nehˬ laꞈ. Nga maꞈ saˇ jaˇ dzaˬ-euˬ loꞈ-ehˇ, nawˬ-ahˇ nga maꞈ ja ceuˬ-eu ma.

³Aˬshuˇliˆ miˇ kʼahˬ nga maꞈ-ahˇ, ka kʼoꞈ nehˬ nya-eu maˬ ngeuˇ-a. Guiˇ deuˆ-eu dziˬ mahˬ kʼoeˇ deuˬ kʼawꞈ, nga maꞈ-ahˇ maˬ haw piˇ nya-a. Tahˬ pahˬ aˬ ma mawˇ kawˇ deuˬ-ahˇ, nga maꞈ-euˬ Miˬyehˇ ngeuˇ ma lehˇ, tiˬ jawˇ-iˬ maˬ paˇ kuˇ poˆ ma. Uˬ duˬ tahˬ shaˇ kʼaˇ maˬ za-ehˇ, shaˬ laˇ taˬ-euˬ tsawˇ haˬ deuˬ-ahˇ, Sahˬpaˬ Miˬyehˇ nawˇ ya mawˇ ngeh, gʼawˬ shaˬ gaˬ nehˬ laꞈ-eu meh” lehˇ, Miˬyehˇ-ahˇ guiˬ lahˬ shaˇ leˇ-awˬ.

⁴Sahˬpaˬ Miˬyehˇ ehˇ-eu dawˬ-aˬ, “Ngaˬ-euˬ tsawˇ haˬ paˇ sheuˬ kʼoꞈ-awˇ, nui ma laꞈ kʼoeˇ keuˆ ni gaˬ-awˇ, nui ma pehˇ-eu jeˬ byehˇ dzeh ma.

⁵Miˇ tsaˬ gui-awˇ kʼoˆ dui dui gaˇ, uˬ yehˇ yehˇ shehˬ nehˬ-eu loꞈ-ehˇ, Iˇsaˬleˬlaˆ-ahˇ ngaˇ haw ma. Aˬ yawꞈ maꞈ aˇ yehˆ yehˆ laˇ-awˇ, Leˬbaˬnoˬ aˇ bawˇ deuˬ loꞈ-ehˇ, duˬ ciˇ ziꞈ dah ni jaˆ tehꞈ-a.

⁶Aˬ yawꞈ maꞈ baw nmˬ nmˬ laˇ-awˇ, saˬ loˬ aˇ bawˇ loꞈ-ehˇ muiˬ-awˇ, Leˬbaˬnoˬ gawˬ jawˬ-ahˇ dehꞈ-eu, shuˬ liˇ aˇ bawˇ kʼoeˇ deuˬ loꞈ-ehˇ, yaw saꞈ saw dui dui laˇ tehꞈ-a.

⁷Ngaˇ bo saˆ haw piˇ-eu uˬ moˆ. Aˬ yawꞈ maꞈ paˇ jawˇ poˆ laˇ-awˇ, dzaˬ la gʼo cehˇ paˇ ka poˆ-awˇ, aˬ gaꞈ siˬ dui dui-eu loꞈ-ehˇ, baw dui za dui dui le tehꞈ-a. Leˬbaˬnoˬ gawˬ jawˬ-ahˇ doˆ-eu, muiˬ-eu aˬ gaꞈ dzaˇ uiˇ loꞈ-ehˇ, aˬ yawꞈ maꞈ tsawˇ myahˇ doˆ tehꞈ-a.

⁸Iˇsaˬleˬlaˆ tsawˇ haˬ deuˬ-aˬ, tahˬ pahˬ aˬ ma mawˇ kawˇ deuˬ-ahˇ, tiˬ pawꞈ-iˬ maˬ paˇ taꞈ leˇ-ehˇ, aˬ yawꞈ maꞈ-euˬ guiˬ lahˬ shaˇ dawˬ, ngaˇ naˇ haˬ-awˇ ngehˬ gʼeh nehˬ ma. Aˇ paꞈ tiˬ jawˇ-iˬ maˬ ga-eu, naˇ shmˇ muiˬ-eu aˇ bawˇ loꞈ-ehˇ, ngaˬ-euˬ naˇ shmˇ-ahˇ bi awˆ ma. Aˬ yawꞈ maꞈ-ahˇ guiˬ lahˬ shehˬ-eu, guiˬ lahˬ gawˆ mehˇ ngaˇ pyeuꞈ-eu ma.”

⁹Zaˬ siˬ tsawˇ gahˇ byah-eu tsawˇ haˬ, gaˇ kawˆ heu deuˬ noeˬ siˬ luꞈ-uˇ. Noeˬ siˬ noeˬ mawˇ nya-eu tsawˇ haˬ, gaˇ kawˆ heu deuˬ gʼoˆ shaw luꞈ-uˇ. Aˬ jeˬ miˇ neh ehˇ naˇ, Sahˬpaˬ Miˬyehˇ-euˬ gaˇ ma-aˬ, yaw tsaˬ yaw dawˇ gaˇ ma pyeuꞈ-awˇ, kʼaˇ sui kʼaˇ dawˇ-eu tsawˇ haˬ deuˬ, gaˇ ma kʼoeˇ kahˇ-ahˇ cah-eu meh. Ehˇ kʼawꞈ, iˬ baˇ mˇ-eu tsawˇ haˬ, gaˇ ma kʼoeˇ kahˇ-ahˇ maˬ haw ni, pehˆ toˆ-awˇ coˬ dzeh-iˇ-eu meh.