Read Akha Hawˇseˬ 7 Bible Online

Hawˇseˬ 7 - Akha bible

Hawˇseˬ 7

¹Iˇsaˬleˬlaˆ tsawˇ haˬ deuˬ-ahˇ, naˇ gawˇ dawˬ tawˆ laˆ taˬ nehˬ-awˇ, paˇ bi dehꞈ doˆ laˇ ma ehˇ ngeh, ngaˬ-euˬ myaˆ-ahˇ mawˇ laˇ-eu-aˬ, aˬ yawꞈ maꞈ neh mˇ byah taˬ-euˬ, yaw haiˬ hawˇ-eu yaw cawˆ tehꞈ meh. Tiˬ gʼaˬ tiˇ gʼaˬ mehˇ shuiˇ shuiˇ-eu, aˬ cawˬ nymˇ-ahˇ smˇ kʼoeˬ kʼoeˬ-eu, gaˇ ma doe ni tahˇ joe joe-eu, heu deuˬ aˬ yawꞈ maꞈ mˇ-eu meh.

²Yaw haiˬ kʼaˇ mˇ dzeuˇ-euˬ dawˬ tawˆ, ngaˇ maˬ ngehˇ ni noeˬ taˬ meh lehˇ, aˬ yawꞈ maꞈ maˬ noeˬ mawˇ leˇ-a. Aˬ yawꞈ maꞈ neh mˇ-euˬ iˬ baˇ, aˬ yawꞈ maꞈ-euˬ tiˬ jawˬ byah-awˇ, maˬ mawˇ laˇ-ehˇ maˬ gʼeh nya-a.”

³Sahˬpaˬ Miˬyehˇ ehˇ-eu dawˬ-aˬ, “Aˬ yawꞈ maꞈ-euˬ nui ma laꞈ gʼoꞈ, sahˬpaˬ laˬ kʼaˬ cehˇ ni mˇ-awˇ, aˬ yawꞈ maꞈ-euˬ jaˬ myawꞈ mehˇ shuiˇ, sahˬ ma nui saˇ bi za-eu meh.

⁴Aˬ yawꞈ maꞈ-euˬ puiˬ-eu nui ma, kaˬ muˇ jahˇ-eu gʼaˬ maˬ dah-ehˇ, maˬ laˆ nyehˆ ni bi jaˆ tawˬ-euˬ, doꞈ-eu tsawˬ bu-ahˇ duˇ-eu meh.

⁵Sahˬ paˬ bawˬ-iˬ gʼeh-eu aˇ nah-ahˇ, sahˬ paˬ hawˇ-eu yaw huiˬ deuˬ-ahˇ, yawꞈ maꞈ jiˇ baˬ bi dawˇ yehꞈ-awˇ, tsawˇ uˬ laˆ uˬ jiˇ nehˬ-euˬ meh.

⁶Yawꞈ maꞈ nui ma yaw gʼoꞈ mˇ-eu, nui ma miˬ dzaˬ doꞈ laˇ taˬ-euˬ, uˬ ciꞈ miˇ lah laꞈ kʼoeˇ buiˇ-awˇ, uˬ shawˬ miˬ lmˇ nyehˆ laˇ-eu meh.

⁷“Yawꞈ maꞈ nui pehˇ lahˇ dui dui-awˇ, sahˬ paˬ sahˬ ma-ahˇ sehꞈ-euˬ meh. Sahˬ paˬ tiˬ gʼaˬ saˇ-iˬ tiˬ gʼaˬ, sehꞈ byoˆ sehꞈ laˆ jiˇ nehˬ-euˬ kʼawꞈ, caw ba laꞈ lehˇ ngaˬ-ahˇ shaˇ-eu, tsawˇ haˬ tiˬ gʼaˬ-iˬ maˬ jawˇ-a.”

⁸Sahˬpaˬ Miˬyehˇ ehˇ-eu dawˬ-aˬ, “Iˇsaˬleˬlaˆ tsawˇ haˬ deuˬ-aˬ, hawˬ tahˬ tiˬ pyawˬ ba-euˬ loꞈ-ehˇ, aˬ cawˬ miˇ kʼahˬ-ahˇ gʼoe luꞈ meh.

⁹Aˬ cawˬ-ahˇ gʼoe-eu baˬ da neh, yawˬ ha-euˬ gʼaˬ-ahˇ teuꞈ laˇ-eu, aˬ yawꞈ maꞈ-ahˇ maˬ siˬ leˇ-a. Aˬ yawꞈ maꞈ-euˬ aˇ nah aˇ yamˬ, gʼawˬ myahˇ maˬ jaˆ ehˇ pyeuꞈ laˇ-euˬ, aˬ yawꞈ maꞈ maˬ noeˬ mawˇ nya-a.

¹⁰Iˇsaˬleˬlaˆ miˇ kʼahˬ laꞈ kʼoeˇ, aˬ yawꞈ maꞈ neh yaw haiˬ mˇ-euˬ, aˬ yawꞈ maꞈ gaˬ dehˆ taˬ-euˬ meh. Kʼoeˇ naˆ naˆ-ehˇ pyeuꞈ laˇ taˬ kʼawꞈ, aˬ yawꞈ maꞈ-euˬ Miˬyehˇ pyeuꞈ-eu, Sahˬpaˬ Miˬyehˇ jawˇ-eu paw dzeˇ, aˬ yawꞈ maꞈ maˬ gʼoꞈ pyawˇ laˇ-a.

¹¹Iˇsaˬleˬlaˆ-euˬ bawˬ toˆ-aˬ, kʼaˬ kʼoeˬ dawˇ ga tiˬ mawˇ loꞈ-ehˇ, Iˇjiˇtuˆ-ahˇ tahˬ shaˇ-iˇ haw, Aˬshuˇliˆ-ahˇ cehˆ keuˆ leˇ haw, tsawˬ toeˬ tsawˬ daˆ-ehˇ shaˬ luꞈ meh.

¹²Ehˇ kʼawꞈ, ngaˇ baw gʼaꞈ kʼmˇ tsehˆ-awˇ, aˇ jiˇ kʼmˇ mi dzaˬ-eu loꞈ-ehˇ, aˬ yawꞈ maꞈ-ahˇ nyehꞈ mi jiˇ-awˇ, yaw haiˬ mˇ dzeuˇ yaꞈ-euˬ aˇ poeˬ, aˬ yawꞈ maꞈ-ahˇ ngaˇ kʼehˬ nehˬ ma.

¹³“Ngaˬ-ahˇ byehˇ dzeh yaꞈ-euˬ miˇ neh, aˬ yawꞈ maꞈ ya noeˬ shaˬ luꞈ-uˇ. Ngaˬ-ahˇ muiˇ-awˇ puiˬ-euˬ miˇ neh, luˬ-iˇ seˇ-iˇ gaˇ keuˆ luꞈ-uˇ. Aˬ yawꞈ maꞈ-ahˇ ka kʼoꞈ mawꞈ kʼawꞈ, aˬ yawꞈ maꞈ uˬ duˬ tahˬ-eu-aˬ, ngaˬ-ahˇ mehˇ shuiˇ shuiˇ-eu tehꞈ meh.

¹⁴Aˬ yawꞈ maꞈ guˇ-awˇ shaˇ-eu dawˬ, nui ma keuˆ-eu dawˬ maˬ ngeuˇ-ehˇ, lawˇ ciꞈ zaˬ deuˬ jahˇ-eu loꞈ-ehˇ, coˬ lah coˬ lah-ehˇ guˇ-eu meh. Aˬ gaꞈ dzaˇ uiˇ hawˇ-eu cehˇ-ahˇ, aˬ yawꞈ maꞈ za ni shaˇ laˇ ngeh, lawˇ ciꞈ zaˬ deuˬ jahˇ-eu loꞈ-ehˇ, yawˬ ha gʼawˇ mawˇ-ahˇ laˆ naˇ-eu, ngaˬ-ahˇ puiˬ-eu tsawˇ haˬ deuˬ meh.

¹⁵Aˬ yawꞈ maꞈ-ahˇ ngaˇ ciˬ huiˬ-awˇ, gʼaˬ kʼaˆ laˇ ni bo saˆ-euˬ kʼawꞈ, ngaˬ-ahˇ puiˬ-eu leh jeh-eu meh.

¹⁶Baˬlaˇ miˬ yehˇ jawˇ paw cehˆ-eu kaˆ kaˆ poˆ-euˬ laꞈ gʼahˬ loꞈ-ehˇ, saˇ jaˇ maˬ ziꞈ-eu tsawˇ haˬ meh. Aˬ yawꞈ maꞈ-euˬ aˬ yuiꞈ aˬ tsu, dawˬ kʼaˆ ngehˬ myaˬ-eu baˬ da neh, mi cehˇ kʼehˬ-ahˇ ya coˬ sehꞈ gaˇ, Iˇjiˇtuˆ tsawˇ haˬ uiˇ tehꞈ-a.”