Read Akha Yawˇlaˆ 1 Bible Online

Yawˇlaˆ 1 - Akha bible

Yawˇlaˆ 1

¹Heu-aˬ, Peˬduˇlaˆ-euˬ aˬ li Yawˇlaˆ jawˇ gaˇ keuˆ le-euˬ Sahˬpaˬ Miˬyehˇ-euˬ dawˬ meh.

²Tsawˇ mawˬ tsawˇ kʼaˆ deuˬ naˇ haˬ-awˬ. Yuˇdaˆ miˇ kʼahˬ laꞈ kʼoeˇ jawˇ-eu, yawˬ gʼaˬ yawˬ na luꞈ naˇ haˬ-awˬ. Naw maꞈ-euˬ ziˇ laꞈ kʼoeˇ maˬ ehˇ, aˬ poeˬ aˬ bawˇ-euˬ ziˇ maˬ ehˇ, heu loꞈ-ehˇ gʼeh-eu gaˇ kawˆ heu, puˬ haw mawˇ haw-euˬ jaˆ meh loˇ.

³Naw maꞈ-euˬ aˬ buˇ aˬ li-ahˇ, gaˇ kawˆ kʼoeˇ naw maꞈ ja nehˬ-awˬ. Tiˬ jo tiˇ jo ja ka gʼeh-awˇ, tiˬ tsuiꞈ tiˇ tsuiꞈ mehˬ ka luꞈ-uˇ.

⁴Myaˬ dui dui-eu nyehˇ bahˇ baˬ maꞈ, tiˬ maꞈ mehˬ nah tiˬ maꞈ oe-awˇ, tiˬ maꞈ neh maˬ dzaˬ jiˇ-euˬ jeˬ, tiˬ maꞈ paˇ teuꞈ byoˆ leꞈ-eu meh.

⁵Jiˇ dawˇ kʼaˆ-eu tsawˇ haˬ deuˬ-oˇ, uˬ noeˬ beuˇ laˇ-awˇ neh ngoeˇ-awˬ. Aˬ gaꞈ dzaˇ uiˇ kʼaˇ dawˇ-eu deuˬ, yaw kʼaˆ-ehˇ guˇ guˇ-ehˇ ngoeˇ-awˬ. Aˬ gaꞈ baw duˆ laˆ cawˆ jiˇ-awˇ, aˬ gaꞈ dzaˇ uiˇ maˬ paˇ jaˆ meh.

⁶Nyehˇ bahˇ guiˇ maꞈ maꞈ ma oe-awˇ, aˬ dui miˇ kʼahˬ-ahˇ deuˆ-euˬ meh. Maˬ gui jiˇ coeˇ gaˇ keuˆ myaˬ-awˇ, baoˬ huiˬ-awˇ gʼaˬ kʼaˆ dui dui meh. Aˇ laˬ jaˬ shiˇ-euˬ juiˇ loꞈ-ehˇ, aˬ yawꞈ maꞈ seuˬ taˆ dui dui meh.

⁷Aˬ dui maꞈ-euˬ aˬ gaꞈ yaˇ kmˇ, aˬ yawꞈ maꞈ neh laˆ cawˆ jiˇ-awˇ, siˬ guˬ aˇ bawˇ dawˬ tawˆ luꞈ kʼawꞈ, aˬ yawꞈ maꞈ teuꞈ dzaˬ jiˇ-euˬ meh. Baˆ kʼoˆ dawˬ tawˆ luꞈ dzaˬ jiˇ-awˇ, uˬ laꞈ ba coˬ ni jaˆ-eu meh.

⁸Dahˬ dzaˬ-iˇ-eu lehˬ hmˬ taˬ-euˬ, zaˬ kʼaˬ shiˇ shaw-euˬ baˬ da neh, tsawˇ ngoeˇ ngoeˇ-eu zaˬ miˬ loꞈ-ehˇ, miˇ kʼahˬ zaˬ dawˬ tawˆ luꞈ ngoeˇ-awˬ.

⁹Uˬ duˬ tahˬ nymˇ nymˇ ma laꞈ kʼoeˇ, damˬ-eu dzaˬ la gʼo cehˇ hawˇ-eu, aˬ gaꞈ dzaˇ uiˇ maˬ paˇ jaˆ meh. Sahˬpaˬ Miˬyehˇ-ahˇ damˬ nehˬ-eu, tiˬ jeˬ-iˬ maˬ jaˆ-eu miˇ neh, piˇ ma deuˬ tsawˇ ngoeˇ ngoeˇ luꞈ meh.

¹⁰Deh yaˇ deuˬ neˇ leuꞈ ni jaˆ-awˇ, dzaˬ la gʼo cehˇ cawˆ-iˇ jiˇ-awˇ, aˬ gaꞈ baw duˆ koˆ-iˇ jiˇ-awˇ, saˬ loˬ aˇ bawˇ nyoeˬ jiˇ-euˬ gaˇ, miˇ tsaˬ tsawˇ ngoeˇ ngoeˇ luꞈ-eu meh.

¹¹Deh yaˇ mˇ dzaˬ-eu deuˬ ngoeˇ-awˬ. Aˬ gaꞈ yaˇ mˇ-eu deuˬ ngoeˇ-awˬ. Aˬ jeˬ miˇ neh ehˇ naˇ, cehˇ hawˇ-eu lawˬ loeˇ cawˆ-iˇ-awˇ, sahˬ lahˬ dawˬ tawˆ cawˆ jiˇ-euˬ meh.

¹²Aˬ gaꞈ baw duˆ deuˬ koˆ jiˇ-awˇ, siˬ guˬ aˇ bawˇ nyoeˬ jiˇ-euˬ meh. Aˇ siˬ aˇ bawˇ deuˬ shiˇ jiˇ-awˇ, laˬ kʼaˬ cehˇ duˬ maˬ paˇ jaˆ meh.

¹³Lawˇ duˬ-ahˇ jawˇ-eu piˇ ma deuˬ guˬ daˇ pehˇ zeuˇ dm-awˇ ngoeˇ-awˬ. Uˬ duˬ tahˬ nymˇ nymˇ ma laꞈ kʼoeˇ, uˬ ciꞈ miˇ lah-ehˇ ngoeˇ leˇ-awˬ. Naw maꞈ-euˬ Miˬyehˇ-ahˇ damˬ-eu, aˬ gaꞈ dzaˇ uiˇ hawˇ-eu cehˇ pyuˇ, laˬ doˆ-iˇ kʼaˇ maˬ paˇ za meh.

¹⁴Maˬ dzaˬ-eu zahˇ jahˇ-awˇ lah-awˬ. Tsawˇ haˬ aˇ maꞈ kuˇ uiˬ jiˇ-awˬ. Aˬ yuiꞈ aˬ tsu, tsawˇ mawˬ tsawˇ kʼaˆ, miˇ kʼahˬ zaˬ yawˬ gʼaˬ yawˬ na luꞈ, Miˬyehˇ Sahˬpaˬ Miˬyehˇ jawˇ gaˇ, Uˬ duˬ tahˬ nymˇ-ahˇ uiˬ leˇ-awˇ, Sahˬpaˬ Miˬyehˇ-ahˇ ngoeˇ haw-awˬ.

¹⁵Baoˬ huiˬ-eu gʼaˬ-euˬ aˬ laꞈ neh, laˆ cawˆ-eu jeˬ bi keuˆ le-eu, Sahˬpaˬ Miˬyehˇ-euˬ aˇ nah kʼoeˇ, yaw kawˇ ma-ehˇ keuˆ le luꞈ meh.

¹⁶Nga maꞈ-ahˇ mawˇ laˇ mawˇ laˇ-ehˇ, dzaˬ la gʼo cehˇ cawˆ jiˇ-euˬ meh. Miˬyehˇ-euˬ Uˬ duˬ tahˬ nymˇ-ahˇ, laˬ kʼaˬ cehˇ-eu maˬ paˇ jaˆ meh.

¹⁷Miˇ tsa ka-euˬ siˬ yoeˬ shiˇ-awˇ, cehˇ pi ahˇ taˬ-eu maˬ jaˆ-ehˇ, cehˇ jiˇ yawꞈ ngehꞈ coˬ-iˇ-eu meh.

¹⁸Gaˆ dzaˬ kʼaˇ maˬ za-eu miˇ neh, mawˇ neˇ deuˬ mahˇ mahˇ-ehˇ jawˇ-awˇ, yawˇ deuˬ tsoˆ leˇ-awˇ jawˇ-eu meh.

¹⁹Jeˬ zaˬ gaˆ kʼahˬ, aˇ bawˇ sahˬ kʼaˆ, miˬ dzaˬ neh bi puiˆ-euˬ loꞈ-ehˇ, nyoeˬ jiˇ kʼoˆ jiˇ-euˬ baˬ da neh, Sahˬpaˬ Miˬyehˇ-oˇ nawˬ-ahˇ ngaˇ, gaˇ kawˆ heu guˇ gaˬ luꞈ-eu ma.

²⁰Iˇ cuꞈ lawˇ gawˆ gui-iˇ jiˇ-awˇ, gaˆ kʼahˬ puiˆ dzaˬ jiˇ-euˬ miˇ neh, bawˇtsahˬ jeˬzaˬ nawˬ-ahˇ guˇmeh.