Read Akha Yawˇlaˆ 2 Bible Online

Yawˇlaˆ 2 - Akha bible

Yawˇlaˆ 2

¹Miˬyehˇ-euˬ Ziˇoˬ gawˬ jawˬ-ahˇ, muiˬ-eu shawˇ-eu gawˬ jawˬ kʼoeˇ-ahˇ, daˇ heh baw-awˇ laˆ luiˬ nehˬ-awˬ. Yuˇdaˆ tsawˇ haˬ yaw dzuˬ dzuˬ-awˬ. Sahˬpaˬ Miˬyehˇ-euˬ aˇ nah kʼoeˇ, yaw kawˇ ma-ehˇ keuˆ le luꞈ meh.

²Aˇ nah kʼoeˇ nah zahˇ dui dui-awˇ, juˬ kʼoeˬ tmˬ-awˇ naˆ dui dui meh. Gawˬ jawˬ kʼaˬ naˆ naˆ-eu loꞈ-ehˇ, nyehˇ bahˇ baˬ maꞈ laˇ gʼeh laꞈ meh. Kʼoeˇ naˆ naˆ-ehˇ gʼeh-eu gaˇ kawˆ, aˇ hu keuˆ le-euˬ maˬ jaˆ-ehˇ, aˬ kaˇ maˬ paˇ keuˆ le haw-aˇ.

³Miˬ dzaˬ puiˆ dzaˬ jiˇ-euˬ loꞈ-ehˇ, aˇ bawˇ kʼaˇ ngeuˇ-eu dzaˬ jiˇ-awˇ, aˬ yawꞈ maꞈ iˇ luꞈ-eu mehˬ hu, Eˬdeˬ yaˇ kmˇ loꞈ-ehˇ muiˬ kʼawꞈ, aˬ yawꞈ maꞈ iˇ dzeuˇ-euˬ naˇ kʼah, kʼaˇ shuiꞈ deh yaˇ pyeuꞈ jiˇ-eu meh. Tiˬ jeˬ-iˬ maˬ dzeuˇ-iˇ nya-a.

⁴Nyehˇ bahˇ kʼoeˇ deuˬ mahˬ-ahˇ duˇ-awˇ, guiˇ deuˆ-eu mahˬ cehˆ gaˇ duˇ meh.

⁵Gawˬ jawˬ-ahˇ tsawˬ tsawˬ-ehˇ cah ngeh, mahˬ laˆ lawˬ-euˬ teˇ saˇ loꞈ-ehˇ, shoe loe shuiˇ luiˇ-ehˇ mahˇ laˇ-awˇ, jaˆ gaˆ miˬ dzaˬ puiˆ-eu loꞈ-ehˇ, toeˆ toeˆ tawˆ tawˆ-ehˇ mahˇ-eu meh. Guiˇ deuˆ-eu lehˬ hmˬ dah taˬ-euˬ, guiˇ maꞈ maꞈ ma tiˬ maꞈ loꞈ-ehˇ, aˬ yawꞈ maꞈ yawꞈ cehˆ taˬ-euˬ meh.

⁶Aˬ yawꞈ maꞈ dawˬ peh oe peh ngeh, yawˬ gʼaˬ na luꞈ guˆ dui dui-awˇ, baˬ ba-ahˇ shiˬ maˬ paˇ dahˬ meh.

⁷Guiˇ huˬ loꞈ-ehˇ coeˬ ahˇ leꞈ-awˇ, yehˇ loꞈ-ehˇ meuˬ lahˇ daˆ doˆ-awˇ, kʼoeˇ paw heu paw maˬ iˇ ba ni, mehˬ hu dawˇ coe ni iˇ-eu meh.

⁸Tiˬ mawˇ tiˇ mawˇ maˬ tahˬ tuˆ ni, yawˬ iˇ gaˇ ma yawˬ ha baw-awˇ, guiˇ daˬ daˬ-euˬ coeˬ paˆ doˆ-awˇ, tiˬ jeˬ-iˬ maˬ laˆ naˬ nya-a.

⁹Meuˬ-ahˇ aˬ yawꞈ maꞈ yoeˇ tehˬ-awˇ, meuˬ lahˇ kʼoeˇ taˆ cehˆ tsehˆ gʼeh-awˇ, nymˇ kʼaˇ jaˆ gaˇ daˆ keuˆ leˇ-awˇ, smˇ kʼoeˬ tahˇ joe oe-eu loꞈ-ehˇ, laˇ gʼoˆ zaˬ-ahˇ uˇ-iˇ-eu meh.

¹⁰Aˬ yawꞈ maꞈ mehˬ hu paw le ngeh, miˇ tsaˬ tahˬ kʼawˇ miˇ luˆ luˆ-awˇ, mˬ nyeh nyeh-ehˇ pyeuꞈ laˇ-eu meh. Nahˇ ma ba la zahˇ-iˇ jiˇ-awˇ, aˬ guiˇ yaw shehꞈ maˬ paˇ bya meh.

¹¹Sahˬpaˬ Miˬyehˇ-euˬ guiˇ maꞈ-ahˇ Sahˬpaˬ Miˬyehˇ dawˬ biꞈ nehˬ ngeh, mˬ jeˬ tsawˬ tehˆ tehˆ gaˇ duˇ meh. Yawꞈ-euˬ ehˇ dawˬ geuꞈ-eu guiˇ maꞈ, myaˬ dui dui-awˇ baoˬ huiˬ-eu meh. Sahˬpaˬ Miˬyehˇ-euˬ aˇ nah-aˬ, guˆ dui dui laˇ paˬ-ehˇ gʼeh-awˇ, tiˬ gʼaˬ-iˬ maˬ dzeuˇ-iˇ nya-a.

¹²Nymˬ-mˇ SahˬpaˬMiˬyehˇ ehˇ-eu, “Naw maꞈ nui ma laꞈ kʼoeˇ keuˆ ni, naw maꞈ-euˬ iˬ baˇ noeˬ poˆ-awˇ, maˬ dzaˬ-eu zahˇ jahˇ-eu laꞈ kʼoeˇ, nui noeˬ shaˬ-awˇ ngoeˇ-eu laꞈkʼoeˇ, ngaˇ jawˇ gaˇ paˇ gʼoꞈ kʼoꞈ laˇ-awˬ.

¹³Mehˬtsoeˬ gʼeu paˆ gaˇ ngaˇ maˬ haw. Naw maꞈ noeˬ shaˬ-eu mawˇ laˇ ni, nui ma tsawˬ paˆ-euˬ byaˬ laˇ-awˬ.” Sahˬpaˬ Miˬyehˇ pyeuꞈ-eu Miˬyehˇ jawˇ paw naw maꞈ gʼoꞈ kʼoꞈ laˇ-awˬ. Aˬ yawꞈ gʼawˬ shaˬ gaˬ-eu byah-awˇ, nui ma oˇ oꞈ coeˇ-eu uˬ taꞈ, saˇ jaˇ dzaˬ taˬ-euˬ maˬ puiˬ-ehˇ, aˬ myah luꞈ iˬ baˇ pyehˬ nehˬ-awˇ, maˬ kʼehˬ maˬ kʼaˆ ni byehˇ-eu meh.

¹⁴Naw maꞈ Miˬyehˇ Sahˬpaˬ Miˬyehˇ nui ma noeˬ paˇ leˇ-eu baw-awˇ, naw maꞈ-ahˇ guiˬ lahˬ biꞈ nehˬ-awˇ, dzaˬ la gʼo cehˇ bi za le naˇ, aˬ gaꞈ dzaˇ uiˇ hawˇ-eu cehˇ deuˬ, aˬ yawꞈ-ahˇ naw maꞈ damˬ nya meh.

¹⁵Ziˇoˬ gawˬ jawˬ uˬ du jawˇ-awˇ, daˇ heh teˇ saˇ baw gaˬ nehˬ-awˬ. Maˬ dzaˬ-eu zahˇ jahˇ-awˇ lah-awˇ, miˇ kʼahˬ zaˬ uiˬ laˇ ni kuˇ-awˬ.

¹⁶Tsawˇ haˬ dawˬ tawˆ luꞈ kuˇ uiˬ-awˇ, muiˬ-eu shawˇ-eu baꞈ dzah dzah-awˬ. Tsawˇ mawˬ, zaˬ guˬ dawˬ tawˆ hawˇ-eu, aˬ coeˇ dawˇ zaˬ deuˬ kʼawꞈ kuˇ-awˬ. Sheuˬdahˬdzaˬ-euˬ tiˬ dehˬ pyeuꞈ-eu, miˬ zaˬ yo zaˬ yaw shuiꞈ deuˬ kʼawꞈ, tiˬ gʼaˬ-iˬ taˬ bi jawˇ tehˬ yaꞈ.

¹⁷Uˬ duˬ tahˬ nymˇ lahˇ kʼehˬ hawˇ-eu, lawˇ duˬ-euˬ yaw kaˬ-ahˇ jawˇ-awˇ, Sahˬpaˬ Miˬyehˇ-euˬ gaˇ mˇ-eu, piˇ ma kʼoeˇ deuˬ ngoeˇ-eu laꞈ kʼoeˇ heu loꞈ-ehˇ guiˬ lahˬ shaˇ nehˬ-awˬ. “Sahˬpaˬ Miˬyehˇ nawˬ-ahˇ shaˇ ma. Nawˬ-euˬ tsawˇ haˬ-ahˇ taˬ byehˇ laꞈ. Aˬ cawˬ tsawˇ jeuˬ deuˬ nga maꞈ-ahˇ, ‘Aˬ lehˬ, naw maꞈ-euˬ Miˬyehˇ’ lehˇ, cehꞈ lehꞈ ka-awˇ ja bu laˇ gaˇ, taˬ bi daˬ nehˬ laꞈ” lehˇ shaˇ-awˬ.

¹⁸Kʼoeˇ naˇ, aˬ yawꞈ-euˬ miˇ kʼahˬ-ahˇ, Sahˬpaˬ Miˬyehˇ nui ma jaˆ-awˇ, aˬ yawꞈ-euˬ tsawˇ haˬ deuˬ-ahˇ kʼawꞈ, gʼawˬ shaˬ paˇ gaˬ poˆ nehˬ-euˬ meh.

¹⁹Aˬ yawꞈ maꞈ-ahˇ aˬ yawꞈ ehˇ-eu, “Cehˇ, aˬ gaꞈ dzaˇ uiˇ, saˬ loˬ tsiˇ, heu deuˬ naw maꞈ-ahˇ ngaˇ biꞈ-awˇ, nui kʼahˇ tiˬ shiˇ bi dzaˬ dehˆ ma. Aˬ cawˬ tsawˇ jeuˬ deuˬ naw maꞈ-ahˇ, yehˬ bawˬ-ehˇ maˬ paˇ bi gʼeh ma.

²⁰Kʼoeˇ taˆ paw neh zaꞈ ka le-euˬ, nyehˇ bahˇ baˬ maꞈ ngaˇ teh byoˆ-awˇ, kʼaˇ shuiꞈ deh paw teh byaˆ nehˬ ma. Mehˬ huˬ huˬ-eu aˇ maꞈ deuˬ-ahˇ, Shiˇ-eu laˆ shaˆ-ahˇ teh puꞈ-awˇ, mehˬ nahˬ nahˬ-eu aˇ maꞈ deuˬ-ahˇ, Gʼahˇ ceh laˆ shaˆ-ahˇ teh puꞈ ma. Aˬ yawꞈ maꞈ shiˇ gahˬ taˬ-euˬ kʼoeˇ yaw buꞈ yoˆ yoˆ-ehˇ jaˆ tehꞈ-a. Naw maꞈ-ahˇ jahˇ doeˇ-euˬ aˇ poeˬ, aˬ yawꞈ maꞈ-ahˇ ngaˇ laˆ cawˆ ma.

²¹“Deh yaˇ deuˬ-oˇ, naw maꞈ taˬ guˆ. Laˬ kʼaˬ cehˇ-awˇ nui saˇ za-awˬ. Naw maꞈ gʼaˇ duˬ zahˬ leˇ paˬ-ehˇ, Sahˬpaˬ Miˬyehˇ mˇ nehˬ-euˬ meh.

²²Jeˬ zaˬ deuˬ-oˇ naw maꞈ taˬ guˆ. Gaˆ kʼahˬ nyoeˇ jawꞈ ni jaˆ luꞈ-awˇ, aˇ bawˇ aˇ siˬ sahˇ dui dui-awˇ, siˬ guˬ aˇ siˬ hawˇ-eu aˬ gaꞈ, maˬ dzaˬ jiˇ coeˇ ni jaˆ luꞈ meh.

²³“Ziˇoˬ zaˬ-oˇ, laˬ kʼaˬ cehˇ-awˬ. Naw maꞈ jah-eu Miˬyehˇ pyeuꞈ-eu, Sahˬpaˬ Miˬyehˇ laꞈ kʼoeˇ cehˇ-awˬ. Aˬ yawꞈ tsaˬ-eu dawˇ-eu miˇ neh, naꞈ ngeh loˬ-eu uˬ yehˇ kʼoeˇ bahˬ. Tiˬ byah tiˬ loꞈ biꞈ laꞈ-euˬ meh. Naꞈ ngeh mya ngeh loˬ-eu uˬ yehˇ, dzeuˇ laˇ ngeh biꞈ laꞈ-euˬ loꞈ-ehˇ, yamˬ law tsaˬ ni biꞈ laꞈ-euˬ meh.

²⁴Cehˇ diˬ doˆ-euˬ pu cu cu-awˇ, aˬ gaꞈ dzaˇ uiˇ saˬ loˬ tsiˇ deuˬ, tsiˇ lehˬ doˆ-eu duˬ kʼawꞈ laꞈ kʼoeˇ, maˬ deˇ leˇ ni yoeˇ kʼaˇ luꞈ meh.

²⁵Nyehˇ bahˇ baˬ maꞈ doˆ le ngeh kʼoꞈ, kʼaˇ dzaˬ cawˆ-euˬ jeˬ dawˬ tawˆ luꞈ, naw maꞈ-ahˇ ngaˇ tsoeˬ kʼoꞈ nehˬ ma. Nyehˇ bahˇ guiˇ maꞈ naw maꞈ jawˇ gaˇ pyehˬ leꞈ-euˬ yaw sahˇ gʼaˬ ngaˇ ma.

²⁶Dzaˬ ngeh maˬ jiˇ dawˇ ngeh maˬ shuꞈ, guiˬ lahˬ yaw dzahˇ za-euˬ miˇ neh, zahˬ leˇ paˬ-ehˇ gʼeh-eu guiˬ lahˬ, biꞈ nehˬ laꞈ-euˬ Miˬyehˇ pyeuꞈ-eu, naw maꞈ-euˬ Sahˬpaˬ Miˬyehˇ-ahˇ, naw maꞈ ya ja ceuˬ gaˇ keuˆ meh. Aˬ cawˬ ja bu ja doeˇ-eu jeˬ, ngaˬ-euˬ tsawˇhaˬ heu deuˬ kʼoeˇtaˆ, tiˬjawˇ-iˬ maˬpaˇ keuˆle meh.

²⁷Kʼoeˇ ngeh jawˇ Iˇsaˬleˬlaˆ-oˇ, naw maꞈ-euˬ gʼahˇceh ngaˇjawˇ-awˇ, Sahˬpaˬ Miˬyehˇ pyeuꞈ-eu ngaˇ-aˬ, naw maꞈ-euˬ Miˬyehˇ pyeuꞈ-awˇ, miˬyehˇ nui gʼaˬ maˬ jawˇ-a lehˇ, naw maꞈ-ahˇ siˬ duˬ leˇ tehꞈ-a. Aˬ cawˬ ja bu ja doeˇ-eu jeˬ, ngaˬ-euˬ tsawˇ haˬ heu deuˬ kʼoeˇ taˆ, tiˬ jawˇ-iˬ maˬ paˇ keuˆ le meh.

²⁸“Aˬ kaˇ keuˆ laˇ-eu aˇ yamˬ-ahˇ, yawˬ gʼaˬ yawˬ na luꞈ-euˬ kʼoeˇ taˆ, ngaˬ-euˬ yaw sahˇ shehˆ daˆ nehˬ-awˇ, naw maꞈ-euˬ aˬ buˇ aˬ li deuˬ, ngaˬ-euˬ gʼaˇ duˬ ngehˬ dah tehꞈ-a. Tsawˇ mawˬ deuˬ yuꞈ maˆ maˆ mawˇ-awˇ, zaˬ guˬ deuˬ kʼawꞈ yaw sahˇ laꞈ kʼoeˇ, siˬ-eu mawˇ-eu jeˬ za tehꞈ-a.

²⁹Aˇ yamˬ kʼoeˇ yamˬ keuˆ laˇ ngeh jawˇ, kʼaˬ dzeˇ zaˬ zaˬ kʼaˆ-ahˇ maˬ ehˇ, zaˬ miˬ zaˬ zaˬ kʼaˆ-ahˇ maˬ ehˇ, ngaˬ-euˬ yaw sahˇ shehˆ daˆ nehˬ ma.

³⁰“Mˬ taˆ hawˇ-eu miˇ tsaˬ kʼoeˇ taˆ, kʼaˆ jeˬ-ehˇ gʼeh-eu jeˬ mehˬ-awˇ, shiˬ sehꞈ yoeˇ-awˇ miˬ dzaˬ doꞈ-eu, uˬ kʼoeˬ uꞈ uꞈ-ehˇ jaˆ tehꞈ-a.

³¹Guˆ dui dui laˇ paˬ-ehˇ gʼeh-eu, Sahˬpaˬ Miˬyehˇ-euˬ Aˇ nah kʼoeˇ, keuˆ le-eu lehˇ gʼeh-eu mehˬ hu, nahˇ ma zahˇ tsui ni pyeuꞈ-iˇ-awˇ, ba la shiˬ neˇ neˇ-iˇ tehꞈ-a.

³²Sahˬpaˬ Miˬyehˇ-euˬ tsawˇ myahˇ-ahˇ, kuˇ-eu tsawˇ haˬ yawˬ gʼaˬ na luꞈ, ka kʼoꞈ-eu jeˬ-ahˇ za tehꞈ-a. Sahˬpaˬ Miˬyehˇ ehˇ taˬ-euˬ-aˬ. ‘Yeˬluˇsaˬlehˬ meuˬ-ahˇ jawˇ-eu, tiˬ paˆ na deuˬ ya dzeuˇ-iˇ-awˇ, ngaˬ neh tseˇ doˆ taˬ-euˬ kʼoeˇdeuˬ, buˬ-iˇ law-iˇ dzeuˇ-iˇ tehꞈ-a.’ ”