Read Akha Yawˇlaˆ 3 Bible Online

Yawˇlaˆ 3 - Akha bible

Yawˇlaˆ 3

¹Sahˬpaˬ Miˬyehˇ ehˇ-eu dawˬ-aˬ, “Aˇ nah aˇ yamˬ kʼoeˇ keuˆ le ngeh, Yuˇdaˆ miˇ kʼahˬ laꞈ kʼoeˇ maˬ ehˇ, Yeˬluˇsaˬlehˬ meuˬ-ahˇ maˬ ehˇ, baw le za le-eu guiˬ lahˬ kʼoeˇ, aˇ hu loꞈ-ehˇ paˇ biꞈ nehˬ ma.

²Yaˇ kʼaˬ daˇ-eu Deh kʼawꞈ laꞈ kʼoeˇ, tsawˇ jeuˬ dawˬ tawˆ sheuˬ uiˬ jiˇ-awˇ ngaˬ-euˬ tsawˇ haˬ deuˬ-euˬ kʼoeˇ taˆ, yawꞈ maꞈ neh jahˇ doeˇ-euˬ aˇ poeˬ, yawꞈ maꞈ-ahˇ ngaˇ yaˇ kʼaˬ daˇ ma. Iˇsaˬleˬlaˆ tsawˇ haˬ deuˬ-ahˇ, aˬ cawˬ miˇ kʼahˬ-ahˇ teh byaˆ-awˇ, ngaˬ-euˬ miˇ kʼahˬ Iˇsaˬleˬlaˆ, aˬ yawꞈ maꞈ nyiˬ paˆ paˆ-euˬ meh.

³Ngaˬ-euˬ tsawˇ haˬ nyehꞈ mi taˬ-euˬ, shehˆ tsaˬ tsaˬ-awˇ biˇ geuꞈ-euˬ meh. Nyehꞈ taˬ-euˬ aˬ buˇ aˬ li deuˬ, zaˬ kʼaˆ zeuˇ laˇ gaˇ ahˬ dzaˬ-awˇ, za-euˬ pyuˇ neh jiˇ baˬ dawˇ-awˇ, meh maˬ laˇ-ahˇ byawˬ gʼa-euˬ meh.

⁴“Duˇlu meuˬ, Siˇdoˬ meuˬ hawˇ-eu, Piˇliˇtiˆ miˇ kʼahˬ laꞈ kʼoeˇ kʼaˇ jaˆ-eu meuˬ dawˬ tawˆ luꞈ-oˇ, naw maꞈ ngaˬ-ahˇ aˬ jeˬ jahˇ-eu lehˇ gʼeh te. Naw maꞈ ngaˬ-ahˇ tiˬ jeˬ paˬ jahˇ kʼoꞈ-eu lehˇ gʼeh te loˇ. Jahˇ kʼoꞈ ma lehˇ ngeuˇ naˇ, naw maꞈ neh kʼaˇ jahˇ-euˬ jeˬ naw maꞈ-euˬ uˬ duˬ kʼoeˇ taˆ yaw kawˇ-ehˇ paˇ keuˆ le ni ngaˇ jahˇ poˆ ma.

⁵Ngaˬ-euˬ pyuˇ, ngaˬ-euˬ shuiˇ hawˇ-eu, ngaˬ-euˬ myawˬ gahˬ deuˬ naw maꞈ baꞈ-awˇ, naw maꞈ-euˬ uˬ duˬ tahˬ nymˇ deuˬ laꞈ kʼoeˇ baꞈ ahˇ taˬ-euˬ meh.

⁶Yuˇdaˆ miˇ kʼahˬ zaˬ deuˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ, gaˇ mahˇ kaˬ gaˇ naw maꞈ sheuˬ byoˆ gʼeh-awˇ, Heˬlaˬshaˆ tsawˇ haˬ deuˬ-ahˇ ahˬ dzaˬ-euˬ meh.

⁷Nymˬ-mˇ poˆ jawˇ, naw maꞈ neh ahˬ dzaˬ taˬ-euˬ jawˇ duˬ-ahˇ neh aˬ yawꞈ maꞈ-ahˇ ngaˇ paˇ sheuˬ kʼoꞈ doˆ laꞈ ma. Naw maꞈ neh aˬ yawꞈ maꞈ-ahˇ jahˇ nehˬ-euˬ loꞈ-ehˇ, naw maꞈ-ahˇ ngaˇ paˇ jahˇ poˆ ma.

⁸Naw maꞈ-euˬ aˬ buˇ aˬ li deuˬ Yuˇdaˆ tsawˇ haˬ deuˬ-ahˇ ya ahˬ nehˬ gaˇ keuˆ ni ngaˇ jahˇ ma. Aˬ buˇ aˬ li kʼoeˇ deuˬ-ahˇ, gaˇ mahˇ kaˬ gaˇ jawˇ-eu Saˬbyaˬ tsawˇ jeuˬ-ahˇ aˬ yawꞈ maꞈ paˇ ahˬ dzaˬ poˆ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

⁹“Miˇ kʼahˬ tsawˇ jeuˬ dawˬ tawˆ luꞈ-ahˇ, heu loꞈ-ehˇ bi siˬ bi gaˬ-awˬ. ‘Guiˇ deuˆ-eu gʼaˇ duˬ lehˬ hmˬ-awˬ. Guiˇ deuˆ-eu tsawˇ haˬ kuˇ uiˬ-awˬ. Guiˇ zaˬ sheuˬ-awˇ mehˬ hu iˇ-awˬ.

¹⁰Nyoˬ tsehˬ-ahˇ mi cehˇ tehˆ pyeuꞈ-awˇ, yehˬ kʼoꞈ-ahˇ gahˬ tehˆ pyeuꞈ jiˇ-awˬ. Gʼaˬ baˬ dui dui-eu tsawˇ haˬ kʼawꞈ, guiˇ dzoeˬ aˬ da ma lehˇ lmˬ-awˬ.

¹¹Dawˬ peh jawˇ-eu tsawˇ jeuˬ dawˬ tawˆ, yaw kawˇ ma-ehˇ luˆ doˆ le-awˇ, deh kʼawꞈ-ahˇ ga uiˬ jiˇ le-awˬ.’ ” Nga maꞈ-euˬ Sahˬpaˬ Miˬyehˇ-oˇ, nawˬ-euˬ guiˇ maꞈ pyehˬ gʼeh leꞈ-awˇ, aˬ yawꞈ maꞈ-ahˇ guiˇ deuˆ le-awˬ.

¹²“Tsawˇ jeuˬ dawˬ tawˆ lehˬ hmˬ dah-awˇ, Yaˇ kʼaˬ daˇ-eu Deh kʼawꞈ laꞈ kʼoeˇ yawˬ jeuˬ na luꞈ oe keuˆ jiˇ-awˬ. Sahˬpaˬ Miˬyehˇ pyeuꞈ-eu ngaˇ-aˬ, dawˬ peh jawˇ-eu tsawˇ jeuˬ deuˬ-ahˇ, kʼoeˇ gaˇ nuiˇ-awˇ yaˇ kʼaˬ daˇ ma.

¹³Aˬ yawꞈ maꞈ haiˬ dui dui-eu meh. Cehˇ yehˬ ngeh pyehˆ tsehˆ-eu loꞈ-ehˇ, aˬ yawꞈ maꞈ-ahˇ pyehˆ tsehˆ nehˬ-awˬ. Nawˬ kʼmˬ byah kʼaˇ yoeˇ kaˇ ngeh keuˆ, aˬ gaꞈ dzaˇ uiˇ lehˬ-eu loꞈ-ehˇ, aˬ yawꞈ maꞈ-ahˇ lehˬ pyehˆ nehˬ-awˬ.”

¹⁴Yaˇ kʼaˬ daˇ-eu Deh kʼawꞈ laꞈ kʼoeˇ tsawˇ haˬ baˬ maꞈ, tsawˇ haˬ baꞈ muˇ, uiˬ leˇ bymˇ leˇ-awˇ jawˇ luꞈ meh. Yaˇ kʼaˬ daˇ-eu Deh kʼawꞈ laꞈ kʼoeˇ, Sahˬpaˬ Miˬyehˇ-euˬ Aˇ nah kʼoeˇ, gʼawˬ myahˇ maˬ gʼeh-ehˇ keuˆ le meh.

¹⁵Nahˇ ma ba la zahˇ tsui iˇ-awˇ, aˬ guiˇ yaw shehꞈ maˬ paˇ bya meh.

¹⁶Ziˇoˬ gawˬ jawˬ kʼoeˇ taˆ jawˇ-awˇ, Sahˬpaˬ Miˬyehˇ lmˬ doˆ laˇ ngeh, Yeˬluˇsaˬlehˬ meuˬ-ahˇ jawˇ-awˇ, mˬ jeˬ jeˬ-eu loꞈ-ehˇ lmˬ ngeh, mˬ hawˇ miˇ tsaˬ yaw dzuˬ dzuˬ meh. Ehˇ kʼawꞈ aˬ yawꞈ-euˬ tsawˇ jeuˬ-ahˇ, Sahˬpaˬ Miˬyehˇ haw piˇ tehꞈ-a.

¹⁷“Kʼoeˇ ngeh jawˇ, Iˇsaˬleˬlaˆ-oˇ, SahˬpaˬMiˬyehˇ lehˇ kuˇ-eu ngaˇ, nawˬ-euˬ Miˬyehˇ pyeuꞈ-eu ma lehˇ, nawˇ siˬ duˬ mawˇ duˬ laˇ tehꞈ-a. Muiˬ-eu shawˇ-eu ngaˬ-euˬ gawˬjawˬ, Ziˇoˬ-euˬ kʼoeˇ taˆ ngaˇ jawˇ ma. Yeˬluˇsaˬlehˬ meuˬ shawˇ laˇ-awˇ, aˬ cawˬ neh bi deuˆ gʼaˬ-eu jeˬ, tiˬ jawˇ-iˬ maˬ paˇ keuˆ le meh.

¹⁸Aˇ nah aˇ yamˬ kʼoeˇ keuˆ le ngeh, gawˬ jawˬ aˬ gaꞈ yaˇ mˇ byah-awˇ, gawˬ duˇ jeˬ zaˬ gaˆ byah jiˇ-awˇ, Yuˇdaˆ miˇ kʼahˬ lawˇ gawˆ lawˇ baˬ, iˇ cuꞈ tiˬ byah ni yoeˇ tehꞈ-a. Sahˬpaˬ Miˬyehˇ-euˬ Nymˇ-ahˇ neh, lawˇ gawˆ tiˬ gawˆ yoeˇ doˆ le-awˇ, Aˬ kaˬ shaˆ Deh kʼawꞈ kʼoeˇ kʼawꞈ-ahˇ iˇ cuꞈ tiˬ loꞈ biꞈ le tehꞈ-a.

¹⁹“Iˇjiˇtuˆ hawˇ-eu Eˬdoˬ-aˬ, Yuˇdaˆ miˇ kʼahˬ-ahˇ guiˇ deuˆ-awˇ, maˬ lehˬ maˬ ca-eu tsawˇ haˬ-ahˇ, shiˬ sehꞈ yoeˇ-euˬ jaˆ-eu miˇ neh, Iˇjiˇtuˆ miˇ kʼahˬ byoˆ le-awˇ, kʼaˇ shuiꞈ deh ga pyeuꞈ-iˇ tehꞈ-a. Eˬdoˬ miˇ kʼahˬ gʼeh byoˆ le-awˇ, bawˇtsahˬ bawˇdahˇ pyeuꞈ-iˇ tehꞈ-a.

²⁰Mˬ maˬ maˬ byaˆ zaˇ ziˇ jiˇ ni, Yuˇdaˆ miˇ kʼahˬ tsawˇ haˬ behˇ-awˇ, Yeˬluˇsaˬlehˬ ziˇ baw tehꞈ-a.

²¹Shiˬ laˆ yoeˇ-euˬ tsawˇ haˬ deuˬ-ahˇ, maˬ bi dzeuˇ-iˇ ni kʼehˬ nehˬ ma. Sahˬpaˬ Miˬyehˇ pyeuꞈ-eu ngaˇ-aˬ, Ziˇoˬ gawˬ jawˬ kʼoeˇ taˆ jawˇ ma.”