Read Akha Aˬmoˆ 2 Bible Online

Aˬmoˆ 2 - Akha bible

Aˬmoˆ 2

¹Sahˬpaˬ Miˬyehˇ ehˇ-eu, “Mawˇbaˆ miˇ kʼahˬ-ahˇ jawˇ-eu tsawˇ haˬ deuˬ tiˬ poˆ saˇ-iˬ tiˬ poˆ iˬ baˇ mˇ-euˬ miˇ neh, aˬ yawꞈ maꞈ-ahˇ ngaˇ aˬ diˇ aˬ maˇ kʼehˬ nehˬ kʼaˆ nehˬ ma. Eˬdoˬ sahˬ paˬ-euˬ shaˬ yoeˬ-ahˇ kʼaˬ lehˇ pyeuꞈ-iˇ ngeh keuˆ ni aˬ yawꞈ maꞈ miˬ dzaˬ dzah puiˆ-euˬ laꞈ kʼoeˇ, yehˬ bawˬ sehˇ lu-ehˇ gʼeh nehˬ-euˬ meh.

²Mawˇbaˆ miˇ kʼahˬ-ahˇ ngaˇ miˬ dzaˬ pyehˬ gʼeh leꞈ-awˇ, Kiˇliˇyoˆ meuˬ-ahˇ jaˆ-eu ziꞈ dah ni gʼeh-eu nymˇ nymˇ ma deuˬ bi puiˆ dzeh ma. Yehˇ deuˬ guˇ guˇ-ehˇ daˇ heh baw-awˇ guiˇ deuˆ lawꞈ taˬ-euˬ yaw kaˬ-ahˇ, Mawˇbaˆ miˇ kʼahˬ-ahˇ jawˇ-eu tsawˇ haˬ deuˬ ya shiˇ tehꞈ-a.

³Mawˇbaˆ miˇ kʼahˬ-ahˇ uˆ lahˇ-eu gʼaˬ hawˇ-eu aˬ yuiꞈ aˬ tsu deuˬ dawˬ tawˆ luꞈ-ahˇ ngaˇ sehꞈ jiˇ ma.”

⁴Sahˬpaˬ Miˬyehˇ ehˇ-eu, “Yuˇdaˆ miˇ kʼahˬ-ahˇ jawˇ-eu tsawˇ haˬ deuˬ tiˬ poˆ saˇ-iˬ tiˬ poˆ iˬ baˇ mˇ-euˬ miˇ neh, aˬ yawꞈ maꞈ-ahˇ ngaˇ aˬ diˇ aˬ maˇ kʼehˬ nehˬ kʼaˆ nehˬ ma. Ngaˬ neh mehˬ nehˬ tsoˆ nehˬ-euˬ jeˬ-ahˇ aˬ yawꞈ maꞈ yaw zeu maˬ baw-ehˇ, ngaˬ neh dawˬ biꞈ taˬ-euˬ gaˇ aˬ yawꞈ maꞈ maˬ caw teh geuꞈ-a. Aˬ yawꞈ maꞈ-euˬ aˬ poeˬ aˬ bawˇ deuˬ caw teh-euˬ miˬ yehˇ deuˬ pyeuꞈ-eu, maˬ ngeuˇ-eu miˬ yehˇ kʼoeˇ deuˬ neh aˬ yawꞈ maꞈ-ahˇ gaˇ ma bi sheuˬ bahˬ-euˬ meh.

⁵Kʼoeˇ miˇ neh, Yuˇdaˆ miˇ kʼahˬ kʼoeˇ taˆ ngaˇ miˬ dzaˬ pyehˬ gʼeh leꞈ-awˇ, Yeˬluˇsaˬlehˬ meuˬ-ahˇ jaˆ-eu ziꞈ dah ni gʼeh-eu nymˇ nymˇ ma deuˬ bi puiˆ dzeh ma.”

⁶Sahˬpaˬ Miˬyehˇ ehˇ-eu, “Iˇsaˬleˬlaˆ miˇ kʼahˬ-ahˇ jawˇ-eu tsawˇ haˬ deuˬ tiˬ poˆ saˇ-iˬ tiˬ poˆ iˬ baˇ mˇ-euˬ miˇ neh, aˬ yawꞈ maꞈ-ahˇ ngaˇ aˬ diˇ aˬ maˇ kʼehˬ nehˬ kʼaˆ nehˬ ma. Aˬ yawꞈ maꞈ-ahˇ dziˇ dzoˆ maˬ tsoeˬ nehˬ nya-eu yaw sui yaw dawˇ tsawˇ haˬ deuˬ hawˇ-eu, sehˬ nawˆ tiˬ juꞈ aˇ poeˬ maˬ tsoeˬ tsehˆ nya gaˇ keuˆ ni shaˬ-eu tsawˇ haˬ deuˬ-ahˇ, aˬ cawˬ zaˬ kʼaˆ bi geuꞈ-eu lehˇ aˬ yawꞈ maꞈ ahˬ dzaˬ-euˬ meh.

⁷Gʼaˬ baˬ-awˇ maˬ gʼeh nya-eu deuˬ-ahˇ aˬ yawꞈ maꞈ nawˬ tehˬ-awˇ, iˇ shaˬ zaˬ deuˬ-ahˇ dehˬ dzeh-euˬ meh. Zaˬ miˬ zaˬ zaˬ kʼaˆ tiˬ gʼaˬ-ahˇ tehꞈ-ehˇ nyiˬ da zaˬ luꞈ yuꞈ taꞈ-eu laꞈ kʼoeˇ, muiˬ-eu shawˇ-eu ngaˬ-euˬ tsawˇ myahˇ-ahˇ laˆ jawꞈ-euˬ meh.

⁸Uˬ duˬ tahˬ-eu jawˇ duˬ yawˬ tsahˇ na luꞈ-ahˇ, shaˬ-eu zahˬ-eu tsawˇ haˬ deuˬ pyuˇ shaˇ paˇ gaˇ biꞈ daˇ taˬ-euˬ dm gʼaˬ dm lmˇ deuˬ kʼawˬ-awˇ, aˬ yawꞈ maꞈ yuꞈ-euˬ meh. Aˬ yawꞈ maꞈ-euˬ Miˬyehˇ-euˬ uˬ duˬ tahˬ nymˇ laꞈ kʼoeˇ, aˬ yawꞈ maꞈ-ahˇ dziˇ dzoˆ daˆ-eu deuˬ jawˇ gaˇ yuˇ-euˬ aˬ gaꞈ dzaˇ uiˇ dawˇ-eu meh.

⁹“Ehˇ kʼawꞈ, ngaˬ-euˬ tsawˇ haˬ deuˬ-oˇ, shuˬ liˇ aˇ bawˇ loꞈ-ehˇ goˇ-awˇ tsuiꞈ kaˆ aˇ bawˇ loꞈ-ehˇ deuˇ-eu Aˬmawˇliˆ tsawˇ haˬ deuˬ-ahˇ, naw maꞈ gʼaˇ duˬ ngaˇ laˆ luˬ laˆ seˇ nehˬ jiˇ-euˬ ma.

¹⁰Naw maꞈ-ahˇ ngaˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ laꞈ-awˇ, bawˇ tsahˬ bawˇ dahˇ laꞈ kʼoeˇ oeˬ tseˇ kʼoꞈ sheuˬ sheuˬ-ehˇ cah-awˇ, Aˬmawˇliˆ tsawˇ jeuˬ-euˬ miˇ kʼahˬ naw maꞈ-ahˇ biꞈ-euˬ ma.

¹¹Naw maꞈ-euˬ aˬ li tiˬ paˆ na deuˬ-ahˇ ngaˇ tseˇ doˆ-awˇ, Miˬyehˇ gʼaˇ duˬ ngehˬ dah-eu tsawˇ haˬ bi geuꞈ-euˬ ma. Zaˬ guˬ tiˬ paˆ na deuˬ-ahˇ kʼawꞈ, Naˬzaˬliˇ tsawˇ haˬ bi geuꞈ-euˬ ma. Iˇsaˬleˬlaˆ tsawˇ haˬ deuˬ-oˇ, Sahˬpaˬ Miˬyehˇ pyeuꞈ-eu ngaˇ ehˇ-eu heu maˬ tsaˬ-a loˇ.

¹²Ehˇ kʼawꞈ, Naˬzaˬliˇ tsawˇ haˬ deuˬ jiˇ baˬ dawˇ ni naw maꞈ jahˇ-awˇ, Miˬyehˇ gʼaˇ duˬ ngehˬ dah-eu deuˬ ngaˬ neh bi ngehˬ-euˬ dawˬ maˬ ya ngehˬ ni naw maꞈ laˆ tsoeˬ-euˬ meh.

¹³Nymˬ-mˇ ngaˇ naw maꞈ-ahˇ miˇ tsa dehˬ pahˬ-awˇ, cehˇ tiˬ byah ni tawˬ luꞈ-eu laˆ lawˬ loꞈ-ehˇ naw maꞈ behˇ behˇ-ehˇ ya shaˬ tehꞈ-a.

¹⁴Cehˆ kawˇ nya dui dui-eu deuˬ kʼawꞈ, maˬ cehˆ dzeuˇ nya-aˇ. Gʼaˬ kʼaˆ-eu tsawˇ haˬ deuˬ kʼawꞈ gʼaˬ jiˇ-awˇ, yehˇ deuˬ kʼawꞈ yawˬ ha maˬ ya shiˇ ni maˬ teuˆ buˬ nya-aˇ.

¹⁵Kaˆ beuˆ-eu tsawˇ haˬ deuˬ maˬ yawꞈ tehˬ coeˇ-aˇ. Cehˆ kawˇ nya-eu deuˬ kʼawꞈ maˬ cehˆ dzeuˇ nya-aˇ. Mahˬ dziˬ-awˇ guiˇ deuˆ-eu deuˬ kʼawꞈ, yawˬ ha-euˬ uˬ kʼawˇ maˬ cehˆ buˬ nya-aˇ.

¹⁶Kʼoeˇ ngeh nah keuˆ laˇ ngeh, nui ma kʼaˬ dui dui-eu yehˇ deuˬ kʼawꞈ, yawˬ ha-euˬ guiˇ deuˆ-eu keu ka baꞈ dzeh-awˇ cehˆ tehꞈ-a.” Heu-aˬ, Sahˬpaˬ Miˬyehˇ neh ehˇ taˬ-euˬ dawˬ meh.