Read Akha Aˬmoˆ 7 Bible Online

Aˬmoˆ 7 - Akha bible

Aˬmoˆ 7

¹Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-aˬ, yaw sahˇ laꞈ kʼoeˇ ngaˬ-ahˇ heu loꞈ-ehˇ bi mawˇ laꞈ-euˬ meh. Sahˬpaˬ-euˬ mahˬ dzaˇ yehˬ gʼaˬ-awˇ yaˇ moꞈ paˇ nmˬ doˆ laˇ-eu nehˬ-ehˇ, Sahˬpaˬ Miˬyehˇ nyehˇ bahˇ baˬ maꞈ beh gaˇ ngaˇ ya mawˇ-euˬ ma.

²Nyehˇ bahˇ kʼoeˇ deuˬ miˇ kʼahˬ heu kʼahˬ laꞈ kʼoeˇ kʼaˇ jaˆ-eu buˬ nyoeˇ dawˬ tawˆ luꞈ teuꞈ byoˆ jiˇ gaˇ, yaw sahˇ laꞈ kʼoeˇ ngaˇ ya mawˇ-awˇ, ngaˇ heu loꞈ-ehˇ ehˇ-euˬ ma. “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, nawˬ-euˬ tsawˇ haˬ deuˬ-ahˇ iˬ baˇ pyehˬ nehˬ-awˬ. Aˬ yawꞈ maꞈ-ahˇ aˬ joˆ-ehˇ bi dehꞈ-iˇ nmˇ. Aˬ yawꞈ maꞈ-aˬ, teˬ dui nyiˇ dui dui-awˇ, gʼaˬ baˬ dui dui-eu meh.”

³Kʼoeˇ ngeh, Sahˬpaˬ Miˬyehˇ nui ma paˇ laˇ-awˇ, “Nawˬ neh ya mawˇ-euˬ loꞈ-ehˇ maˬ pyeuꞈ laˇ-aˇ” lehˇ ehˇ-eu meh.

⁴Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-aˬ, yaw sahˇ laꞈ kʼoeˇ ngaˬ-ahˇ heu loꞈ-ehˇ paˇ bi mawˇ laꞈ-euˬ meh. Aˬ yawꞈ-euˬ tsawˇ haˬ deuˬ-ahˇ miˬ dzaˬ neh kʼehˬ nehˬ kʼaˆ nehˬ-eu lehˇ aˬ yawꞈ lehˬ hmˬ luꞈ-eu meh. Miˇ tsaˬ dawˬ dah jaˆ-eu iˬ ma laˆ shaˆ-ahˇ miˬ dzaˬ puiˆ dzaˬ-awˇ, miˇ tsaˬ-ahˇ doꞈ nyawˬ-euˬ meh.

⁵Kʼoeˇ ngeh, ngaˇ heu loꞈ-ehˇ ehˇ-euˬ ma. “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, miˬ dzaˬ taˬ paˇ bi puiˆ hawˇ-awˬ. Nawˬ-euˬ tsawˇ haˬ deuˬ aˬ joˆ-ehˇ bi dehꞈ-iˇ nmˇ. Aˬ yawꞈ maꞈ-aˬ, teˬ dui nyiˇ dui dui-awˇ, gʼaˬ baˬ dui dui-eu meh.”

⁶Kʼoeˇ ngeh, Sahˬpaˬ Miˬyehˇ nui ma tiˬ poˆ paˇ paˇ laˇ-awˇ, “Heu kʼawꞈ, maˬ pyeuꞈ laˇ-aˇ” lehˇ paˇ ehˇ-eu meh.

⁷Sahˬpaˬ Miˬyehˇ ngaˬ-ahˇ yaw sahˇ laꞈ kʼoeˇ heu loꞈ-ehˇ paˇ bi mawˇ laꞈ-euˬ meh. Shmˇ siˬ caˆ dza[3] neh dza-awˇ gawˬ taˬ-eu lahˇ tiˬ lahˇ dawˬ peh Sahˬpaˬ Miˬyehˇ yawꞈ luꞈ-awˇ, aˬ yawꞈ-euˬ aˬ laꞈ-ahˇ shmˇ siˬ caˆ dza tuˆ tehˬ taˬ-euˬ ngaˇ ya mawˇ-euˬ ma.

⁸“Aˬmoˆ-oˇ, nawˇ aˬ jeˬ mawˇ teˬ” lehˇ aˬ yawꞈ ngaˬ-ahˇ naˇ haˬ-eu miˇ neh, “Shmˇ siˬ caˆ dza mawˇ-euˬ ma” lehˇ ngaˇ ehˇ kʼoꞈ nehˬ-euˬ ma. Kʼoeˇ naˇ, aˬ yawꞈ heu loꞈ-ehˇ ehˇ-eu meh. “Ngaˬ-euˬ tsawˇ haˬ deuˬ-aˬ, dawˇ coe ni maˬ jaˆ-eu meuˬ lahˇ tiˬ lahˇ-ahˇ duˇ-eu gaˇ kawˆ bi siˬ-eu gʼaˇ duˬ, caˆ dza heu hmˬ ngaˇ tuˆ tehˬ luꞈ-eu ma. Heu poˆ jawˇ, ngaˇ nui ma maˬ paˇ ni aˬ yawꞈ maꞈ-ahˇ aˬ diˇ kʼehˬ nehˬ ma.

⁹Iˇtsaˆ-euˬ zaˬ deuˬ uˆ deuˬ uˬ duˬ tahˬ-eu jawˇ duˬ ya cawˆ-iˇ tehꞈ-a. Iˇsaˬleˬlaˆ tsawˇ jeuˬ-euˬ muiˬ-eu shawˇ-eu jawˇ duˬ deuˬ ya luˬ ya seˇ-iˇ jiˇ tehꞈ-a. Sahˬpaˬ Yeˬyawˇbamˬ-euˬ nymˇ jiˇ sahˬ paˬ geuꞈ-awˇ uˆ lahˇ-eu aˇ yamˬ aˇ saˬ saˬ tehꞈ-a.”

¹⁰Beˬdeˬlaˇ meuˬ-ahˇ jawˇ-eu piˇ ma yaw huiˬ gʼaˬ pyeuꞈ-eu Aˬmaˬziˇ gʼaˬ, Iˇsaˬleˬlaˆ sahˬ paˬ Yeˬyawˇbamˬ jawˇ gaˇ heu loꞈ-ehˇ bi tsaꞈ gaˬ leˇ-euˬ meh. “Aˬmoˆ-aˬ, miˇ kʼahˬ zaˬ deuˬ jawˇ gaˇ nawˬ-euˬ gaˇ kawˆ maˬ muiˬ-eu jeˬ ja-awˇ, miˇ kʼahˬ bi pyaˆ laˇ-eu dawˬ ngehˬ luꞈ meh.

¹¹Yeˬyawˇbamˬ-ahˇ guiˇ deuˆ gaˇ bi deuˆ sehꞈ-awˇ, miˇ kʼahˬ zaˬ deuˬ aˬ cawˬ-euˬ miˇ kʼahˬ-ahˇ bi nyehꞈ byoˆ gʼeh tehꞈ-a lehˇ aˬ yawꞈ ehˇ luꞈ meh.”

¹²Kʼoeˇ naˇ, Aˬmoˆ-ahˇ Aˬmaˬziˇ ehˇ nehˬ-eu, “Miˬyehˇ gʼaˇ duˬ ngehˬ dah-eu gʼaˬ-oˇ, teu naˆ ni ehˇ naˇ gʼaˬ-aˇ. Yuˇdaˆ miˇ kʼahˬ-ahˇ gʼoꞈ-iˇ-awˇ, kʼoeˇ gaˇ dawˬ mehˬ mehˬ-iˇ-awˬ. Kʼoeˇ gaˇ jawˇ-eu tsawˇ haˬ deuˬ neh nawˬ-ahˇ dawˬ mehˬ mehˬ poeˬ bi biꞈ-awˬ.

¹³Heu gaˇ Beˬdeˬlaˇ meuˬ-ahˇ Miˬyehˇ gʼaˇ duˬ ngehˬ dah ngehˬ dah-ehˇ taˬ paˇ jawˇ. Heu-aˬ, sahˬ paˬ uˬ duˬ tahˬ-eu jawˇ duˬ hawˇ-eu miˇ kʼahˬ zaˬ-euˬ uˬ duˬ tahˬ nymˇ jaˆ-eu jawˇ duˬ pyeuꞈ-eu meh.”

¹⁴Aˬmoˆ ehˇ-eu, “Ngaˇ-aˬ, aˇ poeˬ ya dzaˬ gaˇ haw-awˇ Miˬyehˇ gʼaˇ duˬ ngehˬ dah luꞈ-eu tsawˇ haˬ maˬ ngeuˇ. Jeˬ zaˬ cu-awˇ siˬ guˬ yaˇ kmˇ mˇ dzaˬ-eu tsawˇ haˬ ma.

¹⁵Ngaˇ mˇ dzaˬ luꞈ-eu yawˇ bo-eu gaˇ-ahˇ byehˇ dzeh-awˇ, aˬ yawꞈ-euˬ tsawˇ haˬ pyeuꞈ-eu Iˇsaˬleˬlaˆ tsawˇ haˬ deuˬ jawˇ gaˇ Miˬyehˇ gʼaˇ duˬ ngehˬ dah nehˬ leˇ-awˬ lehˇ, Sahˬpaˬ Miˬyehˇ ngaˬ-ahˇ kʼehˇ-eu meh.

¹⁶Nymˬ-mˇ Sahˬpaˬ Miˬyehˇ ehˇ gaˇ naˇ haˬ sheˇ. Miˬyehˇ gʼaˇ duˬ ngehˬ dah ngehˬ dah-ehˇ Iˇsaˬleˬlaˆ tsawˇ haˬ deuˬ-ahˇ bi coeˬ leˇ-eu dawˬ taˬ paˇ ngehˬ lehˇ nawˇ ngaˬ-ahˇ ehˇ-eu meh.

¹⁷Aˬmaˬziˇ-oˇ, teu baˬ da neh Sahˬpaˬ Miˬyehˇ nawˬ-ahˇ heu loꞈ-ehˇ ehˇ-eu meh. ‘Nawˬ-euˬ nymˇ dahˬ-aˬ, meuˬ-euˬ gaˇ ma doe ni meh maˬ laˇ geuꞈ geuꞈ-ehˇ ya cah-awˇ, nawˬ-euˬ zaˬ deuˬ guiˇ deuˆ gaˇ bi deuˆ sehꞈ tehꞈ-a. Nawˬ-euˬ miˇ tsaˬ aˬ cawˬ biˇ geuꞈ-awˇ, nawˬ-euˬ gʼawˇ mawˇ maˬ siˬ maˬ suˇ-eu miˇ kʼahˬ-ahˇ ya shiˇ tehꞈ-a. Iˇsaˬleˬlaˆ miˇ kʼahˬ zaˬ deuˬ aˬ cawˬ miˇ kʼahˬ-ahˇ aˬ diˇ aˬ maˇ bi nyehꞈ byoˆ gʼeh tehꞈ-a’ lehˇ ehˇ-eu meh.”