Read Akha Aˬmoˆ 8 Bible Online

Aˬmoˆ 8 - Akha bible

Aˬmoˆ 8

¹Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ngaˬ-ahˇ yaw sahˇ laꞈ kʼoeˇ heu loꞈ-ehˇ paˇ bi mawˇ laꞈ-euˬ meh. Aˇ siˬ kʼa sa tiˬ sa ngaˇ mawˇ-euˬ ma.

²“Aˬmoˆ-oˇ, nawˇ aˬ jeˬ mawˇ teˬ” lehˇ, Sahˬpaˬ Miˬyehˇ ngaˬ-ahˇ naˇ haˬ-eu miˇ neh, “Aˇ siˬ kʼa sa tiˬ sa mawˇ-euˬ ma” lehˇ ngaˇ ehˇ kʼoꞈ nehˬ-eu ma. Sahˬpaˬ Miˬyehˇ ngaˬ-ahˇ ehˇ-eu, “Ngaˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ gʼaˇ duˬ aˇ saˬ saˬ-eu aˇ yamˬ keuˆ le luꞈ meh. Ngaˇ nui ma maˬ paˇ ni aˬ yawꞈ maꞈ-ahˇ kʼehˬ nehˬ kʼaˆ nehˬ ma.

³Aˇ nah kʼoeˇ nah-ahˇ, sahˬ paˬ-euˬ nymˇ nymˇ ma laꞈ kʼoeˇ caˇ-eu dawˬ kawˬ maˬ paˇ ya gaˬ-ehˇ, tsawˇ ngoeˇ ngoeˇ-eu dawˬ kawˬ tehꞈ-ehˇ ya gaˬ tehꞈ-a. Yawˬ gaˇ na luꞈ tsawˇ haˬ shiˇ taˬ-awˇ ga gaˇ ya mawˇ-awˇ, ciˬ cuˇ ni baꞈ dzeh nehˬ tehꞈ-a.”

⁴Maˬ jaˆ-eu tsawˇ haˬ deuˬ-ahˇ nawˬ dzaˬ kʼaˆ dzaˬ-awˇ iˇ shaˬ zaˬ deuˬ-ahˇ laˆ shaˬ laˆ zahˬ nehˬ-eu deuˬ-oˇ, naˇ haˬ yawˬ.

⁵Naw maꞈ yawˬ haˇ yawˬ ha heu loꞈ-ehˇ ehˇ luꞈ meh. “Nga maꞈ cehˇ ahˬ-eu tehˬ-eu miˇ neh, nah lah ya lah-eu muiˬ-eu shawˇ-eu aˇ nah heu deuˬ dzeuˇ-iˇ gaˇ keuˆ ni maˬ dawˬ keuˆ coeˇ nya. Nga maꞈ cehˇ ya ahˬ-eu jawˇ nah dzeuˇ ngeh nah aˬ myah keuˆ le-eu lehˇ gʼeh ta heu. Kʼoeˇ ngeh, nga maꞈ aˇ poeˬ shaˇ daˆ-awˇ, maˬ byah-eu kuˬ pehˬ zmˬ-eu uˬ taꞈ, daˇ leuˇ maˬ tsaˬ ni jahˇ-awˇ, zeuˇ laˇ-eu tsawˇ haˬ deuˬ-ahˇ mehˇ shuiˇ shuiˇ dzaˬma.

⁶Maˬ muiˬ-eu cehˇ deuˬ-ahˇ kʼawꞈ nga maꞈ aˇ poeˬ ahˬ kʼaˆ nya ma. Yawˬ ha-euˬ dziˇ dzoˆ maˬ tsoeˬ kʼoꞈ nya-ehˇ, sehˬ nawˆ tiˬ juꞈ aˇ poeˬ kʼawꞈ maˬ tsoeˬ tsehˆ nya-eu iˇ shaˬ zaˬ tiˬ gʼaˬ na tahˬ puˬ le tehꞈ-a. Kʼoeˇ ngeh jawˇ, zaˬ kʼaˆ bi geuꞈ-eu gʼaˇ duˬ aˬ yawꞈ-euˬ gʼawˇ mawˇ mawˇ lah-ehˇ zeuˇ tsehˆ ma.”

⁷Iˇsaˬleˬlaˆ tsawˇ haˬ deuˬ nui ma huiˬ duˬ pyeuꞈ-eu Sahˬpaˬ Miˬyehˇ heu loꞈ-ehˇ saˇ jaˇ dzaˬ taˬ-euˬ meh. “Aˬ yawꞈ maꞈ neh mˇ-euˬ yaw haiˬ jeˬ-ahˇ ngaˇ tiˬ jawˇ-iˬ maˬ ngehˇ.

⁸Naw maꞈ kʼoeˇ loꞈ-ehˇ yaw haiˬ jeˬ mˇ-euˬ baˬ da neh miˇ luˆ luˆ laˇ-awˇ, miˇ tsaˬ kʼoeˇ taˆ kʼaˇ jawˇ-eu tsawˇ haˬ yawˬ gʼaˬ na luꞈ guˆ dui dui tehꞈ-a. Miˇ kʼahˬ heu kʼahˬ kʼahˬ lah ni bi sheu nyeh-awˇ, Niˬlaˇ lawˇ baˬ -ahˇ iˇ cuꞈ dahˬ daˆ laˇ-awˇ paˇ dahˬ ka-iˇ-eu loꞈ-ehˇ jaˆ tehꞈ-a.

⁹Nah loˆ ceh ngeh nahˇ ma ga ahˇ-awˇ, nah gʼahˇ nah gaˆ-ahˇ zahˇ tsui ni ngaˇ bi pyeuꞈ laˇ-eu aˇ yamˬ peh le luꞈ meh lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.

¹⁰Naw maꞈ bawˬ-iˬ gʼeh luꞈ ngeh, tsawˇ shiˇ tsawˇ naˇ mˇ-eu jeˬ ngaˇ bi keuˆ le-awˇ, naw maꞈ laˬ kʼaˬ cehˇ-eu caˇ dawˬ caˇ luꞈ ngeh, kuiˇ deuˇ gui-eu aˇ yamˬ ngaˇ bi keuˆ le ma. Naw maꞈ uˬ jehˆ ya jehˆ dzeh-awˇ, guˬ daˇ pehˇ zeuˇ mehˬ tsoeˬ dm-eu laꞈ kʼoeˇ, aˬ li tiˬ gʼaˬ jawˇ-eu bi shiˇ cuˆ-awˇ tsawˇ ngoeˇ ngoeˇ luꞈ-eu aˬ ma aˬ da loꞈ-ehˇ shaˬ zahˬ naꞈ ni ngaˇ jahˇ ma. Aˇ nah kʼoeˇ nah-ahˇ, yawˬ jeˬ na luꞈ kʼoeˇ taˆ, dawˇ keuˆ le-awˇ aˇ saˬ ya saˬ tehꞈ-a.

¹¹“Miˇ kʼahˬ heu kʼahˬ kʼoeˇ taˆ ngaˇ mehꞈ-eu shuꞈ-eu jeˬ bi keuˆ le-eu aˇ yamˬ peh le luꞈ meh. Miˇ kʼahˬ zaˬ mehꞈ dui shuꞈ dui dui tehꞈ-a. Ehˇ kʼawꞈ, hawˬ hawˇ-eu iˇ cuꞈ mehꞈ-eu maˬ ngeuˇ-ehˇ, Sahˬpaˬ Miˬyehˇ-euˬ dawˬ-ahˇ mehꞈ tehꞈ-a lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.

¹²Miˇ kʼahˬ zaˬ deuˬ Sahˬpaˬ Miˬyehˇ-euˬ dawˬ ya gaˬ ni laꞈ taˆ paw maˬ ehˇ, laꞈ oˆ paw maˬ ehˇ, nahˇ ma doˆ kʼehˬ paw maˬ ehˇ, nahˇ ma ga kʼehˬ paw maˬ ehˇ, kʼoeˇ paw heu paw-ehˇ coeˬ coeˬ-ehˇ shaˬ kʼawꞈ, tiˬ gaˇ-iˬ ma ya gaˬ-aˇ.

¹³Aˇ nah kʼoeˇ nah-ahˇ, aˬ lmˬ muiˬ dui dui-eu kʼaˬ dzeˇ zaˬ zaˬ guˬ hawˇ-eu zaˬ miˬ zaˬ zaˬ guˬ deuˬ iˇ cuꞈ mehꞈ dui dui-awˇ, coˬ dzeh tehꞈ-a.

¹⁴‘Daˬ miˬ yehˇ-euˬ tsawˇ myahˇ uˬ moˆ’ lehˇ hawˇ-eu ‘Beˬlaˇsheˬba miˬ yehˇ-euˬ tsawˇ myahˇ uˬ moˆ’ lehˇ ehˇ ehˇ-ehˇ, Saˬmaˬliˆ meuˬ-ahˇ jaˆ-eu tahˬ pahˬ aˬ ma mawˇ kawˇ deuˬ-ahˇ laꞈ jeuˬ shaˇ-awˇ toˇ-eu tsawˇ haˬ deuˬ coˬ dzeh-awˇ, tiˬ jawˇ-iˬ maˬ paˇ tuˇ laˇ nya-aˇ.”