Read Akha Aaˇbaˬdiˇ 1 Bible Online

Aaˇbaˬdiˇ 1 - Akha bible

Aaˇbaˬdiˇ 1

¹Heu-aˬ, Miˬyehˇ gʼaˇ duˬ Awˇbaˬdiˇ neh ngehˬ dah-euˬ dawˬ deuˬ meh. Eˬdoˬ miˇ kʼahˬ-euˬ gaˇ kawˆ Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. Sahˬpaˬ Miˬyehˇ gʼaˬ kʼehˇ pyehˬ-awˇ, miˇ kʼahˬ doe ni bi tsaꞈ gaˬ-euˬ, dawˬ kʼoeˇ nga maꞈ ya gaˬ-euˬ ma. “Lehˬ hmˬ-awˬ. Eˬdoˬ miˇ kʼahˬ-ahˇ, aˬ dui guiˇ deuˆ-iˇ-eu lehˇ ma.

²Eˬdoˬ miˇ kʼahˬ-oˇ, miˇ kʼahˬ dawˬ tawˆ luꞈ-euˬ mehˬ shi, nawˬ-ahˇ ngaˇ bi nyiˇ teˬ-iˇ-awˇ, aˬ cawˬ mehˬ shi daˬ bi ga ma.

³Nawˇ nui ma huiˬ-eu mahˇ-eu jeˬ nawˬ-ahˇ mehˇshuiˇshuiˇ gʼaˬ-euˬ meh. Lo guˇ uˬ gʼmˬ-ahˇ jawˇ-eu nawˇ, gawˬ jawˬ uˬ du ziꞈ luꞈ-eu nawˇ, ‘Ngaˬ-ahˇ gʼeu ka nya nmˇ loˇ’ lehˇ nui ma laꞈ kʼoeˇ lmˬ luꞈ-eu meh.

⁴Nawˬ-euˬ nymˇ kʼaˬ dzeˇ bahˬ loꞈ-ehˇ aˬ guiˇ yaw kaˬ-ahˇ jaˆ-eu kʼawꞈ, Nawˬ-ahˇ ngaˇ gʼeu ka nehˬ ma lehˇ, Ngaˇ Sahˬpaˬ Miˬyehˇ ehˇ-eu ma.

⁵Smˇ kʼoeˬ deuˬ nawˇ jawˇ gaˇ oe-awˇ, tahˇ joe deuˬ uˬ ciꞈ paw oe ngeh, aˬ yawꞈ maꞈ maˬ geuꞈ mawꞈ-eu jeˬ, maˬ yuˇ jiˇ ni byehˇ yaꞈ tehꞈ-a. Aˬ gaꞈ aˇ siˬ pyaˆ-eu deuˬ kʼawꞈ, maˬ pyaˆ jiˇ ni bi dzeˇ tehꞈ-a. Ehˇ kʼawꞈ, nawˬ-ahˇ muiˇ-eu kʼoeˇ deuˬ, nawˬ-ahˇ laˆ cawˆ-eu lehˇ oe ngeh, tiˬ jeˬ-iˬ maˬ bi dzeˇ yaꞈ-aˇ.

⁶Iˇsawˇ-euˬ zaˬ deuˬ uˆ deuˬ-oˇ, nawˬ-euˬ pyuˇ shuiˇ myawˬ gahˬ dawˬ tawˆ, aˬ cawˬ ceh geuꞈ jiˇ gaˇ keuˆ meh.

⁷Nawˬ-ahˇ nui ma gm-euˬ deuˬ kʼawꞈ, nawˬ-euˬ miˇ kʼahˬ laꞈ nyiˇ nawˬ-ahˇ, teh dzeh nehˬ laꞈ gaˇ keuˆ tehꞈ-a. Nawˬ-ahˇ tsaˬ leˇ dzoeˇ leˇ-euˬ deuˬ, nawˬ-ahˇ guiˇ paˇ deuˆ gʼaˬ tehꞈ-a. Tiˬ gaˇ dzaˬ tiˬ gaˇ dawˇ-euˬ deuˬ, nawˬ-ahˇ lahˇ ju kʼmˇ paꞈ tehꞈ-a. Nawˬ neh dehꞈ dzaˬ-euˬ aˇ nah kʼoeˇ, aˬ gaˇ iˇ byoˆ jiˇ-euˬ nga lehˇ, aˬ yawꞈ maꞈ ehˇ gaˇ keuˆ tehꞈ-a.

⁸Eˬdoˬ miˇ kʼahˬ ngaˇ kʼehˬ ngeh nah, bym-eu deuˬ-ahˇ ngaˇ laˆ cawˆ-awˇ, zaˬ siˬ tsawˇ gahˇ laˆ byoˆ nehˬ ma.

⁹Teˬmaˬ meuˬ-euˬ guiˇ deuˆ zaˬ deuˬ, guˆ dui dui-eu laˇ baˇ-iˇ-awˇ, Eˬdoˬ meuˬ-euˬ yehˇ dawˬ tawˆ luꞈ, bi sehꞈ byoˆ jiˇ gaˇ keuˆ tehꞈ-a.

¹⁰Nawˬ-euˬ mehˇ nmˇ deuˬ pyeuꞈ luꞈ-eu, Yaˬkoˆ-euˬ zaˬ kʼoeˇ deuˬ-ahˇ nawˇ, tahˇ joe joe-awˇ sehꞈ-euˬ miˇ neh, luˬ-eu seˇ-eu nawˇ ya daˬ-awˇ, mˬ maˬ maˬ byaˆ daˬ ga tehꞈ-a.

¹¹Muiˇ-eu deuˬ Yeˬluˇsaˬlehˬ-euˬ, meuˬ lahˇ laˇ gʼoˆ deh pyaˆ ngeh nah, nawˇ yahˇ pawˇ-awˇ yawꞈ luꞈ-eu meh. Yeˬluˇsaˬlehˬ meuˬ-euˬ myawˬ gahˬ, baꞈ doˆ gʼeh-awˇ biˇ geuꞈ jiˇ-euˬ, boeˇ miˬ siˬ kʼaˬ kʼoeˇ deuˬ loꞈ-ehˇ, nawˇ kʼawꞈ doeˇ dui dui-eu gʼaˬ meh.

¹²Nawˬ-euˬ aˬ yuiꞈ aˬ nyiˇ pyeuꞈ-eu, Yuˇdaˆ miˇ kʼahˬ shaˬ zahˬ mˇ gaˇ, nawˇ nui kʼahˇ shiˇ-eu maˬ tsaˬ-a. Aˬ yawꞈ maꞈ luˬ-iˇ seˇ-iˇ ngeh, nawˇ laˬ kʼaˬ cehˇ-eu maˬ tsaˬ-a. Aˬ yawꞈ maꞈ noeˬ dui noeˬ duiˇ ngeh, nawˇ uiˇ haw nehˬ-eu maˬ tsaˬ-a.

¹³Aˬ yawꞈ maꞈ shaˬ zahˬ naꞈ luꞈ ngeh, naw maꞈ nui kʼahˇ tiˬ shiˇ haw-awˇ, pyuˇ shuiˇ myawˬ gahˬ ceh geuꞈ-eu lehˇ, ngaˬ-euˬ tsawˇ jeuˬ-euˬ meuˬ kʼoeˇ-ahˇ, nawˇ coeˬ uˇ leꞈ-eu maˬ tsaˬ-a.

¹⁴Cehˆ dzeuˇ-eu lehˇ leh jeh luꞈ-eu, aˬ yawꞈ maꞈ-ahˇ nyehꞈ-eu gʼaˇ duˬ, gaˇ tsmˇ doe ni naw maꞈ taˬ yawꞈ. Aˬ yawꞈ maꞈ noeˬ dui noeˬ duiˇ ngeh, 2 aˬ yawꞈ maꞈ-ahˇ naw maꞈ nyehꞈ-awˇ muiˇ-eu deuˬ-euˬ aˬ laꞈ laꞈ kʼoeˇ, a nehˬ-eu jeˬ naw maꞈ taˬ mˇ.

¹⁵“Miˇ tsaˬ tsawˇ jeuˬ dawˬ tawˆ luꞈ-ahˇ, Sahˬpaˬ Miˬyehˇ yaˇ kʼaˬ daˇ-eu aˇ nah dawˬ peh peh laˇ luꞈ meh. Eˬdoˬ miˇ kʼahˬ nawˇ mˇ-euˬ jeˬ, nawˬ-euˬ kʼoeˇ taˆ keuˆ le tehꞈ-a. Nawˬ neh aˬ cawˬ-ahˇ biꞈ-euˬ jeˬ, nawˬ-ahˇ aˬ cawˬ biꞈ kʼoꞈ tehꞈ-a.

¹⁶Ngaˬ-euˬ shawˇ-eu gawˬ duˇ kʼoeˇ taˆ, kʼehˬ-eu kʼaˆ-eu kʼmˬ maˬ yaw kʼaˬ, ngaˬ-euˬ tsawˇ haˬ deuˬ dawˇ-euˬ meh. Ehˇ kʼawꞈ, jawˬ jawˬ-ehˇ kʼaˇ jawˇ-eu, tsawˇ jeuˬ kʼoeˇ deuˬ dawˬ tawˆ luꞈ kʼawꞈ, kʼoeˇ naˆ maˬ tseˇ kʼaˬ dui dui-eu, kʼehˬ-eu kʼaˆ-eu kʼmˬ maˬ dawˇ-awˇ, dawˬ tawˆ luꞈ ya myoꞈ ahˇ jiˇ-awˇ, ya shiˇ byoˆ jiˇ gaˇ keuˆ tehꞈ-a.

¹⁷“Ehˇ kʼawꞈ, Ziˇoˬ gawˬ jawˬ kʼoeˇ taˆ, tiˬ paˆ na deuˬ ya cehˆ buˬ-awˇ, gawˬ jawˬ kʼoeˇ jawˬ muiˬ-eu shawˇ-eu, jawˇ duˬ tiˬ tsahˇ pyeuꞈ laˇ tehꞈ-a. Yaˬkoˆ-euˬ zaˬ deuˬ uˆ deuˬ-aˬ, aˬ yawꞈ maꞈ-ahˇ oꞈ-eu miˇ kʼahˬ, aˬ yawꞈ maꞈ paˇ za kʼoꞈ tehꞈ-a.

¹⁸Yaˬkoˆ, Yoˇsehˆ-euˬ tsawˇ haˬ deuˬ, miˬ dzaˬ loꞈ-ehˇ duˇ leˇ tehꞈ-a. Jaˆ guˬ jaˆ gaˆ puiˆ-eu loꞈ-ehˇ, Iˇsawˇ-euˬ zaˬ deuˬ uˆ deuˬ-ahˇ, aˬ yawꞈ maꞈ laˆ cawˆ nehˬ tehꞈ-a. Iˇsawˇ-euˬ zaˬ deuˬ uˆ deuˬ-aˬ, tiˬ gʼaˬ-iˬ maˬ dzeuˇ-iˇ nya ni, ya shiˇ jiˇ gaˇ keuˆ tehꞈ-a lehˇ, ngaˇ Sahˬpaˬ Miˬyehˇ ehˇ-eu ma.

¹⁹“Yuˇdaˆ miˇ kʼahˬ laꞈ oˆ dzaˬ-ahˇ, jawˇ luꞈ-eu tsawˇ haˬ kʼoeˇ deuˬ neh, Eˬdoˬ miˇ kʼahˬ-ahˇ deuˆ gʼaˬ-awˇ, nahˇ ma ga kʼehˬ paw dzeˇ coeˇ-ahˇ jawˇ luꞈ-eu tsawˇ haˬ kʼoeˇ deuˬ neh, Piˇliˇtiˆ miˇ kʼahˬ deuˆ geuꞈ meh. Eˇpaˬleˬ miˇ kʼahˬ-ahˇ maˬ ehˇ, Saˬmaˬliˆ miˇ kʼahˬ-ahˇ maˬ ehˇ, Iˇsaˬleˬlaˆ tsawˇ jeuˬ za-awˇ, Giˇlaˆ miˇ kʼahˬ-ahˇ-aˬ, Beˬyaˬmiˬ tsawˇ jeuˬ za tehꞈ-a.

²⁰Iˇsaˬleˬlaˆ laꞈ taˆ kʼahˬ-ahˇ, jawˇ luꞈ-eu bi nyehꞈ byoˆ gʼeh-euˬ, guiˇ maꞈ deuˬ paˇ gʼoꞈ keuˆ le-awˇ, laꞈ taˆ paw Zaˬleˇpaˇ meuˬ-ahˇ, jaˆ keuˆ-eu Piˇniˇshaˆ miˇ kʼahˬ, aˬ yawꞈ maꞈ neh deuˆ gʼaˬ tehꞈ-a. Yeˬluˇsaˬlehˬ meuˬ-ahˇ jawˇ-euˬ, aˬ cawˬ neh bi nyehꞈ byoˆ gʼeh-awˇ Saˬdiˇ meuˬ-ahˇ jawˇ-iˇ-euˬ deuˬ, Yuˇdaˆ miˇ kʼahˬ laꞈ oˆ dzaˬ-ahˇ, jaˆ-eu meuˬ deuˬ deuˆ za tehꞈ-a.

²¹Guiˇ deuˆ gʼaˬ-euˬ tsawˇ haˬ pyeuꞈ-eu, Yeˬluˇsaˬlehˬ tsawˇ haˬ deuˬ-aˬ, Eˬdoˬ miˇ kʼahˬ-ahˇ deuˆ gʼaˬ-awˇ, miˇ kʼahˬ kʼoeˇ-ahˇ uˆ lahˇ tehꞈ-a. Kʼoeˇ ngeh, Sahˬpaˬ Miˬyehˇ aˬ yawꞈ, aˬ yawꞈ-euˬ tsawˇ haˬ deuˬ kʼoeˇ taˆ, sahˬ paˬ geuꞈ-awˇ uˆ lahˇ tehꞈ-a.”