Read Akha Yawˇnaˆ 3 Bible Online

Yawˇnaˆ 3 - Akha bible

Yawˇnaˆ 3

¹Kʼoeˇ naˇ, Yawˇnaˆ jawˇ gaˇ Sahˬpaˬ Miˬyehˇ-euˬ dawˬ heu loꞈ-ehˇ paˇ keuˆ le-euˬ meh.

²“Huiˬ dui dui-eu Niˇnaˬbeˬ meuˬ kʼoeˇ meuˬ-ahˇ iˇ-awˇ, ngaˬ neh nawˬ-ahˇ bi ehˇ-euˬ dawˬ deuˬ tsawˇ haˬ kʼoeˇ deuˬ-ahˇ ehˇ nehˬ-iˇ-awˬ.”

³Kʼoeˇ ngeh, Sahˬpaˬ Miˬyehˇ-euˬ ehˇ dawˬ-ahˇ Yawˇnaˆ naˇ haˬ geuꞈ-awˇ, smˬ nah maˬ cah naˇ maˬ cah doe coeˇ-eu meuˬ meuˬ ma pyeuꞈ-eu Niˇnaˬbeˬ meuˬ-ahˇ iˇ-euˬ meh.

⁴Meuˬ kʼoeˇ meuˬ-ahˇ Yawˇnaˆ cah-iˇ-awˇ, tiˬ nah nah ga ni cah gʼaˬ ngeh, “Oeˬ tseˇ nah laꞈ kʼoeˇ Niˇnaˬbeˬ meuˬ ya luˬ ya seˇ-iˇ tehꞈ-a” lehˇ guˇ-euˬ meh.

⁵Niˇnaˬbeˬ meuˬ laꞈ kʼoeˇ jawˇ-eu tsawˇ haˬ deuˬ Sahˬpaˬ Miˬyehˇ-euˬ dawˬ-ahˇ jah-awˇ, yawˬ gʼaˬ na luꞈ maˬ dzaˬ maˬ dawˇ ni ya lah meh lehˇ aˬ yawꞈ maꞈ noeˬ tsehˆ-awˇ, aˬ yawꞈ maꞈ noeˬ poˆ gʼaˬ-euˬ gaˇ kawˆ bi siˬ-eu gʼaˇ duˬ, huiˬ zaˬ nyiˇ zaˬ dawˬ tawˆ luꞈ guˬ daˇ pehˇ zeuˇ mehˬ tsoeˬ dm-euˬ meh.

⁶Gaˇ kawˆ kʼoeˇ Niˇnaˬbeˬ sahˬ paˬ-ahˇ gaˬ keuˆ leˇ ngeh, aˬ yawꞈ-euˬ dzoeˬ dzaˬ nuiˇ mahˬ-ahˇ nuiˇ luꞈ-eu tuˇ laˇ-awˇ, sahˬ paˬ dm-eu pehˇ kʼahˬ pehˇ mahˇ lehˆ dzeh-awˇ, guˬ daˇ pehˇ zeuˇ mehˬ tsoeˬ dm-eu laꞈ kʼoeˇ, lehˇ tsaˇ jaˆ gaˇ nuiˇ-euˬ meh.

⁷Niˇnaˬbeˬ meuˬ-ahˇ jawˇ-eu tsawˇ haˬ deuˬ-ahˇ aˬ yawꞈ heu loꞈ-ehˇ dawˬ biꞈ-awˇ bi guˇ gaˬ doe-euˬ meh. “Heu-aˬ, sahˬ paˬ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ neh biꞈ-euˬ dawˬ pyeuꞈ-eu meh. Tsawˇ haˬ maˬ ehˇ, mawˇ neˇ maˬ ehˇ, yawˇ maˬ ehˇ, tiˬ jeˬ-iˬ maˬ dzaˬ maˬ dawˇ ni ya lah meh.

⁸Tsawˇ haˬ hawˇ-eu jeˬ zaˬ dawˬ tawˆ luꞈ guˬ daˇ pehˇ zeuˇ mehˬ tsoeˬ ya dm meh. Yawˬ gʼaˬ na luꞈ nui ma keuˆ-eu laꞈ kʼoeˇ Miˬyehˇ-ahˇ guiˬ lahˬ ya shaˇ-awˇ, yawˬ ha neh mˇ-euˬ yaw lehˬ yaw ca jeˬ hawˇ-eu yaw haiˬ jeˬ-ahˇ ya byehˇ dzeh jiˇ meh.

⁹Miˬyehˇ nui ma paˇ laˇ-awˇ, nui ma pehˇ-eu taˬ leˇ-eu laꞈ kʼoeˇ, aˬ dui shiˇ gaˇ maˬ ya keuˆ-eu baw tehꞈ-a.”

¹⁰Aˬ yawꞈ maꞈ kʼoeˇ loꞈ-ehˇ jahˇ luꞈ-awˇ, aˬ yawꞈ maꞈ neh mˇ-euˬ yaw haiˬ jeˬ-ahˇ byehˇ dzeh-euˬ gaˇ Miˬyehˇ ya mawˇ ngeh, nui ma paˇ laˇ-awˇ, aˬ yawꞈ maꞈ-ahˇ kʼehˬ nehˬ kʼaˆ nehˬ ma lehˇ ehˇ taˬ gʼaˬ-euˬ kʼawꞈ, maˬ kʼehˬ nehˬ ni byehˇ-euˬ meh.