Read Akha Bawˇtsahˬ 14 Bible Online

Bawˇtsahˬ 14 - Akha bible

Bawˇtsahˬ 14

¹Iˇsaˬleˬlaˆ tsawˇ haˬ deuˬ nui ma cawˆ-eu laꞈ kʼoeˇ, uˬ ciꞈ miˇ lah-ehˇ guˇ guˇ-ehˇ ngoeˇ-euˬ meh.

²Aꞈ yawꞈ maꞈ nui ma cawˆ-eu laꞈ kʼoeˇ, Moˇseˬ hawˇ-eu Aˬloˬ-ahˇ iˬ baˇ taˬ-awˇ ehˇ-eu, “Iˇjiˇtuˆ miˇ kʼahˬ laꞈ kʼoeˇ ya shiˇ law nmˇ-aˬ muiˬ dzehˬ tehꞈ-a. Heu gaˇ, bawˇ tsahˬ bawˇ dahˇ heu tsahˇ laꞈ kʼoeˇ ya shiˇ law nmˇ kʼawꞈ, zaˬ dzehˬ tehꞈ-a.

³Aˬ jeˬ miˇ neh miˇ kʼahˬ kʼoeˇ kʼahˬ-ahˇ Sahˬpaˬ Miˬyehˇ aˬ dui maꞈ-ahˇ sheuˬ gʼeh ta. Guiˇ deuˆ-eu laꞈ kʼoeˇ aˬ dui maꞈ-ahˇ aˬ cawˬ neh bi deuˆ sehꞈ-awˇ, aˬ dui maꞈ-euˬ miˬ sawˇ zaˬ deuˬ-ahˇ aˬ cawˬ nyehꞈ gʼeh tehꞈ-a.”

⁴Kʼoeˇ naˇ, “Aˬ yuiꞈ tiˬ gʼaˬ tseˇ doˆ-awˇ, Iˇjiˇtuˆ miˇ kʼahˬ-ahˇ paˇ gʼoꞈ-iˇ kaˇ-euˇ” lehˇ aˬ yawꞈ maꞈ tiˬ gʼaˬ tiˇ gʼaˬ ja sawˇ-euˬ meh.

⁵Kʼoeˇ naˇ, Iˇsaˬleˬlaˆ tsawˇ haˬ dawˬ tawˆ luꞈ mehˬ shi, Moˇseˬ hawˇ-eu Aˬloˬ aˬ nyaꞈ miˇ tsaˬ-ahˇ awˆ byaˆ-euˬ meh.

⁶Kʼoeˬ sho haw leˇ-euˬ tsawˇ haˬ deuˬ laꞈ kʼoeˇ, Nuˬ-euˬ aˬ li Yawˇshuˆ hawˇ-eu Yeˬpuˬnehˇ-euˬ aˬ li Gaˬlehˆ aˬ nyaꞈ nui ma cawˆ dui dui-eu laꞈ kʼoeˇ, mehˬ tsoeˬ cehˬ pyaˬ-awˇ,

⁷Iˇsaˬleˬlaˆ tsawˇ haˬ deuˬ-ahˇ ehˇ nehˬ-eu, “Nga maꞈ neh pyehˆ tseˇ haw leˇ-euˬ miˇ kʼahˬ-aˬ, muiˬ dui dui-eu miˇ kʼahˬ pyeuꞈ-eu meh.

⁸Sahˬpaˬ Miˬyehˇ aˬ dui-ahˇ nui ma tsaˬ naˇ, aˬ dui-ahˇ kʼoeˇ gaˇ aˬ yawꞈ sheuˬ gʼeh-awˇ, miˇ tsaˬ miˇ muiˬ muiˬ dui dui-awˇ baw le za le-eu miˇ kʼahˬ kʼoeˇ, aˬ dui-ahˇ biꞈ nehˬ laꞈ tehꞈ-a.

⁹Sahˬpaˬ Miˬyehˇ-ahˇ taˬ puiˬ. Kʼoeˇ gaˇ jawˇ-eu tsawˇ haˬ deuˬ-ahˇ taˬ guˆ. Aˬ yawꞈ maꞈ-ahˇ aˬ dui maꞈ yaw awˇ laꞈ-ehˇ gʼaˬ leˇ tehꞈ-a. Sahˬpaˬ Miˬyehˇ aˬ dui nehˬ-ehˇ jawˇ-awˇ, aˬ yawꞈ maꞈ-ahˇ bo saˆ luꞈ-eu miˬ yehˇ deuˬ-ahˇ gʼaˬ leˇ gʼaˬ-euˬ meh. Kʼoeˇ miˇ neh taˬ guˆ.”

¹⁰Ehˇ kʼawꞈ, tsawˇ haˬ aˇ maꞈ aˬ muˇ dawˬ tawˆ luꞈ aˬ yawꞈ nyaꞈ-ahˇ kʼaˬ lo neh bi sehꞈ-eu lehˇ lmˬ luꞈ-eu meh. Kʼoeˇ ngeh, Sahˬpaˬ Miˬyehˇ-euˬ yaw shehꞈ kʼahˬ sehˇ aˬ yawꞈ-euˬ Sehˬ gʼawˆ kʼoeˇ taˆ ja pyuˬ ni bya doˆ le-euˬ gaˇ aˬ yawꞈ maꞈ ya mawˇ-euˬ meh.

¹¹Moˇseˬ-ahˇ Sahˬpaˬ Miˬyehˇ ehˇ nehˬ-eu, “Tsawˇ haˬ heu deuˬ aˇ myah keuˆ ni ngaˬ-ahˇ byehˇ dzeh-eu lehˇ gʼeh ta. Aˬ yawꞈ maꞈ-ahˇ zahˬ leˇ paˬ-ehˇ gʼeh-eu jeˬ gʼawˬ mya poˆ mˇ mehˬ gʼaˬ-euˬ kʼawꞈ, ngaˬ-ahˇ maˬ jah-ehˇ aˬ yawꞈ maꞈ aˬ myah keuˆ ni jawˇ-eu gʼeh ta.

¹²Nyawˬ leˇ nya-eu yaw jaw naˇ-eu naˇ gawˇ pyehˬ gʼeh leꞈ-awˇ, aˬ yawꞈ maꞈ-ahˇ ngaˇ laˆ cawˆ ma. Ehˇ kʼawꞈ, nawˬ-ahˇ ngaˇ, aˬ yawꞈ maꞈ naˆ maˬ tseˇ myaˬ dzehˬ-awˇ gʼaˬ kʼaˆ dzehˬ-eu tsawˇ jeuˬ tiˬ jeuˬ-euˬ aˬ da bi pyeuꞈ laˇ ma.”

¹³Sahˬpaˬ Miˬyehˇ-ahˇ Moˇseˬ ehˇ nehˬ-eu, “Nawˬ-euˬ baoˬ-ahˇ gʼoe-awˇ, tsawˇ haˬ heu deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh nawˇ sheuˬ doˆ laꞈ-euˬ meh. Nawˬ-euˬ tsawˇ haˬ deuˬ-ahˇ nawˬ neh mˇ nehˬ-euˬ gaˇ kawˆ Iˇjiˇtuˆ tsawˇ haˬ deuˬ ya gaˬ ngeh,

¹⁴miˇ kʼahˬ heu kʼahˬ laꞈ kʼoeˇ jawˇ-eu tsawˇ haˬ kʼoeˇ deuˬ-ahˇ, gaˇ kawˆ kʼoeˇ aˬ yawꞈ maꞈ dzawˇ nehˬ tehꞈ-a. Sahˬpaˬ Miˬyehˇ nawˇ nga maꞈ nehˬ-ehˇ jawˇ-eu gaˇ kawˆ maˬ ehˇ, nawˬ-euˬ mˬ dmˇ nga maꞈ kʼoeˇ taˆ naˬ le ngeh nawˬ-ahˇ bya cehˆ ni ya mawˇ-euˬ gaˇ kawˆ maˬ ehˇ, nah gʼahˇ paw mˬ dmˇ kʼawˇ zeuˇ neh nga maꞈ-ahˇ nawˇ sheuˬ gʼeh-euˬ gaˇ kawˆ maˬ ehˇ, uˬ ciꞈ paw miˬ dzaˬ kʼawˇ zeuˇ neh sheuˬ gʼeh-euˬ gaˇ kawˆ maˬ ehˇ, tsawˇ haˬ kʼoeˇ deuˬ ya siˬ ya mawˇ gʼaˬ-euˬ meh.

¹⁵Nymˬ-mˇ, nawˬ-euˬ tsawˇ haˬ dawˬ tawˆ luꞈ-ahˇ nawˇ sehꞈ naˇ, tsawˇ myahˇ doˆ-eu nawˬ-euˬ gaˇ kawˆ-ahˇ ya gaˬ-eu tsawˇ jeuˬ kʼoeˇ deuˬ heu loꞈ-ehˇ ehˇ tehꞈ-a.

¹⁶Nawˬ-euˬ tsawˇ haˬ deuˬ-ahˇ biꞈ ma lehˇ nawˬ neh saˇ jaˇ dzaˬ taˬ-euˬ miˇ kʼahˬ-ahˇ, aˬ yawꞈ maꞈ-ahˇ nawˇ maˬ sheuˬ keuˆ gʼeh nya-eu baˬ da neh, bawˇ tsahˬ bawˇ dahˇ laꞈ kʼoeˇ nawˬ-euˬ tsawˇ haˬ deuˬ-ahˇ nawˇ sehꞈ-euˬ ngaˇ lehˇ ehˇ tehꞈ-a.

¹⁷Kʼoeˇ miˇ neh Sahˬpaˬ Miˬyehˇ-oˇ, nymˬ-mˇ ngaˇ nawˬ-ahˇ heu loꞈ-ehˇ guiˬ lahˬ shaˇ-eu ma. Nawˬ-euˬ baoˬ nga maꞈ-ahˇ bi mawˇ laꞈ-awˇ, nawˬ neh saˇ jaˇ dzaˬ-awˇ ehˇ taˬ-euˬ jaˆ-eu loꞈ-ehˇ mˇ nehˬ laꞈ-awˬ. Nawˇ heu loꞈ-ehˇ ehˇ taˬ-euˬ jaˆ-eu meh.

¹⁸‘Sahˬpaˬ Miˬyehˇ pyeuꞈ-eu ngaˇ-aˬ, yaw awˇ laꞈ-ehˇ nui ma maˬ pehˇ. Ngaˇ-aˬ, gʼoeˇ-eu gaˬ-eu jeˬ tiˬ byah ni ahˇ-awˇ, saˇ jaˇ ziꞈ dui dui-eu uˬ taꞈ, iˬ baˇ ahˇ-eu tsawˇ haˬ deuˬ hawˇ-eu ngaˬ-ahˇ puiˬ-eu tsawˇ haˬ deuˬ-ahˇ iˬ baˇ pyehˬ nehˬ-eu ma. Ehˇ kʼawꞈ, aˬ ma aˬ da aˬ piˬ aˬ bawˇ deuˬ-euˬ iˬ baˇ baˬ da neh, aˬ yawꞈ maꞈ-euˬ aˬ buˇ aˬ li hawˇ-eu oeˬ paˬ oeˬ maˬ deuˬ-ahˇ, smˬ ziˇ oeˬ ziˇ keuˆ ni maˬ bi dzeuˇ-iˇ ni ngaˇ kʼehˬ nehˬ ma’ lehˇ nawˇ ehˇ taˬ-euˬ jaˆ-eu meh.

¹⁹Sahˬpaˬ Miˬyehˇ-oˇ, tiˬ jawˇ-iˬ maˬ paˇ laˇ nya-eu nawˬ-euˬ gʼoeˇ-eu gaˬ-eu jeˬ huiˬ dui dui-eu baˬ da neh, Iˇjiˇtuˆ miˇ kʼahˬ laꞈ kʼoeˇ neh doˆ le ngeh tiˬ nah neh, tsawˇ haˬ heu deuˬ-euˬ iˬ baˇ nawˇ pyehˬ nehˬ luꞈ-eu loꞈ-ehˇ, nymˬ-mˇ kʼawꞈ aˬ yawꞈ maꞈ-euˬ iˬ baˇ pyehˬ nehˬ-awˬ lehˇ nawˬ-ahˇ ngaˇ guiˬ lahˬ shaˇ-eu ma.”

²⁰Sahˬpaˬ Miˬyehˇ ehˇ-eu, “Nawˇ ngaˬ-ahˇ shaˇ-eu loꞈ-ehˇ, aˬ yawꞈ maꞈ-ahˇ ngaˇ iˬ baˇ pyehˬ nehˬ ma.

²¹Ehˇ kʼawꞈ, ngaˇ dehꞈ luꞈ-eu jeˬ hawˇ-eu miˇ tsaˬ kʼoeˇ taˆ ngaˬ-euˬ yaw shehꞈ kʼahˬ sehˇ byah-eu jeˬ yaw duˬ baw-eu loꞈ-ehˇ,

²²tsawˇ haˬ heu deuˬ laꞈ kʼoeˇ tiˬ gʼaˬ-iˬ miˇ kʼahˬ kʼoeˇ kʼahˬ laꞈ kʼoeˇ uˇ keuˆ leˇ ngeh keuˆ ni maˬ ya dehꞈ keuˆ-eu jeˬ kʼawꞈ, yaw duˬ baw tehꞈ-a. Ngaˬ-euˬ yaw shehꞈ kʼahˬ sehˇ laꞈ kʼoeˇ ngaˇ jawˇ luꞈ-eu jeˬ-ahˇ maˬ ehˇ, Iˇjiˇtuˆ miˇ kʼahˬ laꞈ kʼoeˇ hawˇ-eu bawˇ tsahˬ bawˇ dahˇ laꞈ kʼoeˇ ngaˬ neh mˇ-euˬ zahˬ leˇ paˬ-ehˇ gʼeh-eu jeˬ-ahˇ maˬ ehˇ, aˬ yawꞈ maꞈ ya mawˇ gʼaˬ-euˬ kʼawꞈ, ngaˬ-euˬ oˇ oꞈ nya-eu nui ma-ahˇ aˬ yawꞈ maꞈ tiˬ poˆ saˇ-iˬ tiˬ poˆ lawˬ haw-awˇ, ngaˬ-euˬ ehˇ dawˬ-ahˇ maˬ naˇ haˬ geuꞈ-a.

²³Aˬ yawꞈ maꞈ-euˬ aˬ poeˬ aˬ bawˇ deuˬ-ahˇ ngaˬ neh saˇ jaˇ dzaˬ taˬ-euˬ miˇ kʼahˬ-ahˇ, aˬ yawꞈ maꞈ tiˬ jawˇ-iˬ maˬ paˇ ya uˇ keuˆ leˇ meh. Ngaˬ-ahˇ kʼaˇ byehˇ dzeh-euˬ tsawˇ haˬ aˬ geu gʼaˬ maˬ kaˬ, kʼoeˇ gaˇ maˬ ya uˇ leˇ-a.

²⁴Ehˇ kʼawꞈ, ngaˬ-euˬ zaˬ kʼaˆ Gaˬlehˆ nui ma taˬ-eu aˬ cawˬ-ahˇ beu gaˇ-awˇ, ngaˬ-ahˇ saˇ jaˇ ziꞈ-eu miˇ neh, aˬ yawꞈ pyehˆ tseˇ haw leˇ-euˬ miˇ kʼahˬ kʼoeˇ kʼahˬ laꞈ kʼoeˇ, aˬ yawꞈ-ahˇ ngaˇ sheuˬ keuˆ nehˬ-awˇ, aˬ yawꞈ-euˬ zaˬ deuˬ uˆ deuˬ miˇ kʼahˬ kʼoeˇ kʼahˬ ya geuꞈ tehꞈ-a.

²⁵Deh kʼawꞈ kʼoeˇ deuˬ laꞈ kʼoeˇ, Aˬmaˬlehˇ tsawˇ jeuˬ hawˇ-eu Kaˬnaˬ tsawˇ jeuˬ jawˇ luꞈ-eu miˇ neh, ni shawˬ nah Aˬgaˬbaˬ Iˬ ma laˆ shaˆ lahˇ gʼoꞈ paw neh bawˇ tsahˬ bawˇ dahˇ paw paˇ gʼoꞈ-iˇ-awˬ.”

²⁶Moˇseˬ hawˇ-eu Aˬloˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

²⁷“Tsawˇ haˬ yaw haiˬ heu deuˬ aˇ myah keuˆ ni ngaˬ-ahˇ iˬ baˇ taˬ-eu gʼeh ta. Aˬ yawꞈ maꞈ iˬ baˇ taˬ-eu laꞈ kʼoeˇ toˇ luꞈ-eu dawˬ deuˬ-ahˇ ngaˇ gaˬ dehˆ-euˬ ma.

²⁸Nymˬ-mˇ, aˬ yawꞈ maꞈ-ahˇ heu loꞈ-ehˇ ehˇ nehˬ-awˬ. ‘Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu ma. Ngaˇ dehꞈ luꞈ-eu jeˬ yaw duˬ baw-eu loꞈ-ehˇ, naw maꞈ neh kʼaˇ shaˇ-euˬ loꞈ-ehˇ ngaˇ mˇ nehˬ-eu jeˬkʼawꞈ yaw duˬ baw ma lehˇ ngaˇ kamˬ-eu ma.

²⁹Naw maꞈ shiˇ-awˇ, bawˇ tsahˬ bawˇ dahˇ doe ni ya ga tehꞈ-a. Naw maꞈ laꞈ kʼoeˇ aˇ kʼoꞈ nyiˬ tseˇ kʼaˇ dzehˬ-iˇ-euˬ deuˬ miˇ kʼahˬ kʼoeˇ kʼahˬ laꞈ kʼoeˇ maˬ ya uˇ keuˆ leˇ-a. Aˬ jeˬ miˇ neh ehˇ naˇ, naw maꞈ ngaˬ-ahˇ iˬ baˇ taˬ-eu dawˬ ngehˬ-euˬ meh.

³⁰Naw maꞈ-ahˇ kʼoeˇ gaˇ bi jawˇ ma lehˇ ngaˬ neh saˇ jaˇ dzaˬ taˬ-euˬ jaˆ-eu kʼawꞈ, Gaˬlehˆ hawˇ-eu Yawˇshuˆ maˬ ngeuˇ naˇ tiˬ gʼaˬ-iˬ maˬ paˇ ya jawˇ keuˆ leˇ meh.

³¹Naw maꞈ-euˬ zaˬ deuˬ aˬ cawˬ neh bi nyehꞈ jiˇ tehꞈ-a lehˇ naw maꞈ ehˇ-eu meh. Ehˇ kʼawꞈ, naw maꞈ neh byehˇ dzeh-euˬ miˇ kʼahˬ laꞈ kʼoeˇ aˬ yawꞈ maꞈ-ahˇ ngaˇ sheuˬ gʼeh-awˇ, aˬ yawꞈ maꞈ-euˬ nymˇ jiˇ kʼoeˇ gaˇ jaˆ laˇ tehꞈ-a.

³²Naw maꞈ-aˬ, bawˇ tsahˬ bawˇ dahˇ heu tsahˇ laꞈ kʼoeˇ ya shiˇ yaꞈ tehꞈ-a.

³³Naw maꞈ tiˬ gʼaˬ-iˬ maˬ dzeˇ-ehˇ shiˇ jiˇ ngeh keuˆ ni, oeˬ tseˇ kʼoꞈ keuˆ ni naw maꞈ-euˬ zaˬ deuˬ bawˇ tsahˬ bawˇ dahˇ laꞈ kʼoeˇ cah cah-ehˇ ya jawˇ tehꞈ-a. Naw maꞈ saˇ jaˇ maˬ jawˇ-eu baˬ da neh aˬ yawꞈ maꞈ kʼoeˇ loꞈ-ehˇ ya daˬ tehꞈ-a.

³⁴Naw maꞈ-euˬ iˬ baˇ baˬ da neh pyeuꞈ laˇ-euˬ jeˬ-ahˇ oeˬ tseˇ kʼoꞈ keuˆ ni naw maꞈ ya daˬ tehꞈ-a. Miˇ kʼahˬ kʼoeˇ kʼahˬ-ahˇ pyehˆ tseˇ haw leˇ-euˬ aˇ nah tiˬ nah dah zaˇ tiˬ kʼoꞈ naw maꞈ ya daˬ poˆ tehꞈ-a. Kʼoeˇ ngeh, naw maꞈ-ahˇ ngaˇ nui ma maˬ saˇ ngeh aˬ joˆ-ehˇ gʼeh-eu nya lehˇ naw maꞈ ya siˬ duˬ tehꞈ-a.

³⁵Sahˬpaˬ Miˬyehˇ pyeuꞈ-eu ngaˇ, heu loꞈ-ehˇ ehˇ-eu ma. Ngaˬ-ahˇ puiˬ-eu lehˇ tiˬ kawˆ loꞈ-ehˇ uiˬ leˇ taˬ-euˬ haiˬ-eu tsawˇ haˬ pyeuꞈ-eu naw maꞈ-ahˇ kʼoeˇ loꞈ-ehˇ jahˇ nehˬ ma lehˇ ngaˇ kamˬ tsehˆ-eu ma. Bawˇ tsahˬ bawˇ dahˇ heu tsahˇ laꞈ kʼoeˇ naw maꞈ yawˬ gʼaˬ na luꞈ ya shiˇ jiˇ tehꞈ-a’ lehˇ ehˇ nehˬ-awˬ.”

³⁶Moˇseˬ neh miˇ kʼahˬ kʼoeˇ kʼahˬ-ahˇ bi pyehˆ tseˇ haw leˇ-euˬ tsawˇ haˬ kʼoeˇ deuˬ gʼoꞈ le-awˇ, maˬ ngeuˇ-eu jeˬ dzawˇ nehˬ le-euˬ baˬ da neh, Iˇsaˬleˬlaˆ tsawˇ haˬ deuˬ Sahˬpaˬ Miˬyehˇ-ahˇ iˬ baˇ taˬ-eu dawˬ ngehˬ-euˬ meh. Kʼoeˇ miˇ neh, aˬ yawꞈ maꞈ kʼoeˇ taˆ Sahˬpaˬ Miˬyehˇ naˇ gawˇ bi keuˆ le-awˇ, aˬ yawꞈ maꞈ shiˇ-euˬ meh.

³⁷

³⁸Kʼoeˬ sho haw leˇ-euˬ tsawˇ haˬ tseˇ nyiꞈ gʼaˬ laꞈ kʼoeˇ, Nuˬ-euˬ aˬ li Yawˇshuˆ hawˇ-eu Yeˬpuˬnehˇ-euˬ aˬ li Gaˬlehˆ aˬ nyaꞈ tehꞈ-ehˇ maˬ shiˇ ni dzeuˇ-iˇ-euˬ meh.

³⁹Sahˬpaˬ Miˬyehˇ neh ehˇ-euˬ gaˇ kawˆ kʼoeˇ Iˇsaˬleˬlaˆ tsawˇ haˬ deuˬ-ahˇ Moˇseˬ dzawˇ nehˬ ngeh, aˬ yawꞈ maꞈ tsawˇ ngoeˇ ngoeˇ dui dui-euˬ meh.

⁴⁰Yawˬ nah yawˬ uˬ shawˬ yaw naꞈ-ehˇ, aˬ yawꞈ maꞈ ehˇ-eu, “Sahˬpaˬ Miˬyehˇ neh saˇ jaˇ dzaˬ taˬ-euˬ jawˇ duˬ-ahˇ, nymˬ-mˇ nga maꞈ le-eu lehˇ gʼeh-eu ma. Nga maꞈ-aˬ, aˬ diˇ aˬ maˇ iˬ baˇ mˇ gʼaˬ-euˬ tsawˇ haˬ pyeuꞈ-eu ma lehˇ ehˇ-awˇ, gawˬ jawˬ gawˬ duˇ jaˆ-eu miˇ kʼahˬ-ahˇ le-eu lehˇ doˆ le luꞈ-eu meh.”

⁴¹Ehˇ kʼawꞈ, Moˇseˬ ehˇ-eu, “Aˬ jeˬ miˇ neh Sahˬpaˬ Miˬyehˇ-euˬ ehˇ dawˬ-ahˇ nymˬ-mˇ poˆ kʼawꞈ naw maꞈ maˬ naˇ haˬ te. Naw maꞈ noeˬ-euˬ loꞈ-ehˇ maˬ mˇ pyeuꞈ nya-a.

⁴²Teu miˇ neh taˬ le. Naw maꞈ nehˬ-ehˇ Sahˬpaˬ Miˬyehˇ maˬ jawˇ-eu miˇ neh, naw maꞈ-ahˇ muiˇ-eu deuˬ-ahˇ naw maꞈ maˬ gʼaˬ leˇ-a.

⁴³Aˬmaˬlehˇ tsawˇ jeuˬ hawˇ-eu Kaˬnaˬ tsawˇ jeuˬ-ahˇ naw maꞈ guiˇ deuˆ ngeh, naw maꞈ ya shiˇ jiˇ tehꞈ-a. Sahˬpaˬ Miˬyehˇ naw maꞈ nehˬ-ehˇ maˬ jawˇ-aˇ. Aˬ jeˬ miˇ neh ehˇ naˇ, naw maꞈ aˬ yawꞈ-euˬ mehˬ nah maˬ caw teh-euˬ miˇ neh meh.”

⁴⁴Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ hawˇ-eu Moˇseˬ-euˬ gʼawˇ mawˇ maˬ luˆ-iˇ ni jawˇ luꞈ-eu kʼawꞈ, aˬ yawꞈ maꞈ maˬ guˆ ni, gawˬ jawˬ gawˬ duˇ jaˆ-eu miˇ kʼahˬ-ahˇ le-euˬ meh.

⁴⁵Kʼoeˇ naˇ, kʼoeˇ gaˇ jawˇ-eu Aˬmaˬlehˇ tsawˇ jeuˬ hawˇ-eu Kaˬnaˬ tsawˇ jeuˬ aˬ yawꞈ maꞈ-ahˇ guiˇ deuˆ le-awˇ, aˬ yawꞈ maꞈ-ahˇ deuˆ gʼaˬ-euˬ uˬ taꞈ, Hawˇmaˬ meuˬ-ahˇ keuˆ ni teh keuˆ-euˬ meh.