Read Akha Bawˇtsahˬ 15 Bible Online

Bawˇtsahˬ 15 - Akha bible

Bawˇtsahˬ 15

¹Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

²“Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Ngaˬ neh naw maꞈ-ahˇ biꞈ-euˬ miˇ kʼahˬ-ahˇ naw maꞈ jawˇ keuˆ leˇ-awˇ,

³miˬ dzaˬ dzah puiˆ-awˇ lawˇ-eu jeˬ maˬ kaˬ, saˇ jaˇ dzaˬ-eu lawˇ-eu jeˬ maˬ kaˬ, nui ma keuˆ-awˇ lawˇ-eu jeˬ maˬ kaˬ, aˬ myah myah lawˇ luꞈ-eu zahˇ sahˇ kʼoꞈ-ahˇ taꞈ leˇ-eu lawˇ-eu jeˬ maˬ kaˬ, tiˬ jeˬ paˬ lawˇ ngeh, mawˇ neˇ mawˇ gaw maˬ ehˇ, yawˇ aˬ buˬ maˬ ehˇ, yawˇ maˬ ngeuˇ naˇ ciꞈ myehꞈ maˬ ehˇ, Sahˬpaˬ Miˬyehˇ jawˇ gaˇ ya tsahˇ laꞈ meh. Kʼoeˇ loꞈ-ehˇ lawˇ-euˬ jeˬ-euˬ yaw saꞈ-ahˇ Sahˬpaˬ Miˬyehˇ nui ma tsaˬ-eu meh.

⁴Lawˇ-eu jeˬ yuˇ laꞈ-euˬ tsawˇ haˬ-aˬ, saˬ loˬ tsiˇ maˇ tsaꞈ tiˬ tsaꞈ keuˬ taˬ-euˬ muiˬ-eu cehˇ meu tiˬ pehˬ yuˇ-awˇ, dzaˬ la gʼo cehˇ lawˇ-eu jeˬ loꞈ-ehˇ Sahˬpaˬ Miˬyehˇ jawˇ gaˇ ya yuˇ laꞈ meh.

⁵Yawˇ nyehꞈ-awˇ, miˬ dzaˬ dzah puiˆ-awˇ lawˇ-eu jeˬ lawˇ ngeh, aˬ gaꞈ dzaˇ uiˇ maˇ tsaꞈ tiˬ tsaꞈ ya lehˬ hmˬ meh.

⁶Yawˇ aˬ buˬ lawˇ ngeh, saˬ loˬ tsiˇ maˇ tsaꞈ tiˬ tsaꞈ uˬ taꞈ tiˬ kʼoeˆ keuˬ taˬ-euˬ muiˬ-eu cehˇ meu nyiˬ pehˬ yuˇ-awˇ, dzaˬ la gʼo cehˇ lawˇ-eu jeˬ loꞈ-ehˇ ya lawˇ ahˇ meh.

⁷Kʼoeˇ nehˬ-ehˇ tiˬ kawˆ loꞈ-ehˇ, aˬ gaꞈ dzaˇ uiˇ maˇ tsaꞈ tiˬ tsaꞈ uˬ taꞈ tiˬ kʼoeˆ ya lawˇ ahˇ meh. Kʼoeˇ loꞈ-ehˇ lawˇ-euˬ yaw saꞈ-ahˇ Sahˬpaˬ Miˬyehˇ nui ma tsaˬ-eu meh.

⁸Miˬ dzaˬ dzah puiˆ-awˇ lawˇ-eu jeˬ maˬ ehˇ, saˇ jaˇ dzaˬ-eu lawˇ-eu jeˬ maˬ ehˇ, cawˬ cawˬ taꞈ-eu lawˇ-eu jeˬ maˬ ehˇ, mawˇ neˇ mawˇ gaw tiˬ mawˇ tsahˇ-awˇ Sahˬpaˬ Miˬyehˇ-ahˇ lawˇ ngeh,

⁹saˬ loˬ tsiˇ maˇ tsaꞈ nyiˬ tsaꞈ keuˬ taˬ-euˬ muiˬ-eu cehˇ meuˬ smˇ pehˬ yuˇ-awˇ, dzaˬ la gʼo cehˇ lawˇ-eu jeˬ loꞈ-ehˇ ya lawˇ ahˇ meh.

¹⁰Aˬ gaꞈ dzaˇ uiˇ maˇ tsaꞈ nyiˬ tsaꞈ kʼawꞈ, kʼoeˇ nehˬ-ehˇ tiˬ kawˆ loꞈ-ehˇ ya lawˇ meh. Kʼoeˇ loꞈ-ehˇ lawˇ-euˬ yaw saꞈ-ahˇ Sahˬpaˬ Miˬyehˇ nui ma tsaˬ-eu meh.

¹¹“Mawˇ neˇ mawˇ gaw maˬ ehˇ, yawˇ aˬ buˬ maˬ ehˇ, yawˇ maˬ ngeuˇ naˇ ciꞈ myehꞈ maˬ ehˇ, tiˬ mawˇ na lawˇ ngeh, kʼoeˇ loꞈ-ehˇ dzaˬ la gʼo cehˇ lawˇ-eu jeˬ ya lawˇ ahˇ meh.

¹²Jeˬ zaˬ tiˬ mawˇ taꞈ-ehˇ lawˇ dzehˬ naˇ, kʼoeˇ myaˆ maˬ tseˇ ya lawˇ ahˇ meh.

¹³Iˇsaˬleˬlaˆ tsawˇ haˬ aˬ geu gʼaˬ maˬ kaˬ, Sahˬpaˬ Miˬyehˇ nui ma tsaˬ ni yaw saꞈ bi le-eu gʼaˇ duˬ dzaˬ dzaˬ dawˇ dawˇ lawˇ ngeh, kʼoeˇ loꞈ-ehˇ ya lawˇ meh.

¹⁴Tiˬ kʼehˬ tiˬ yamˬ laꞈ kʼoeˇ maˬ ehˇ, tiˬ ziˇ jiˇ ni maˬ ehˇ, naw maꞈ nehˬ-ehˇ jawˇ luꞈ-eu boeˇ miˬ siˬ kʼaˬ tiˬ gʼaˬ na, Sahˬpaˬ Miˬyehˇ nui ma tsaˬ ni yaw saꞈ bi le-eu gʼaˇ duˬ, dzaˬ dzaˬ dawˇ dawˇ lawˇ-eu jeˬ lawˇ naˇ, aˬ geu ngeh yamˬ-ahˇ lawˇ-eu maˬ kaˬ, naw maꞈ kʼaˇ lawˇ-eu loꞈ-ehˇ ya lawˇ meh.

¹⁵Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, naw maꞈ maˬ ehˇ, naw maꞈ nehˬ-ehˇ jawˇ luꞈ-eu boeˇ miˬ siˬ kʼaˬ deuˬ maˬ ehˇ, zahˇ sahˇ kʼoꞈ aˬ yawꞈ tiˬ hmˬ-ahˇ tehꞈ-ehˇ ya caw teh meh. Sahˬpaˬ Miˬyehˇ-euˬ mehˬ shi, naw maꞈ hawˇ-eu aˬ yawꞈ maꞈ tiˬ kawˆ meh.

¹⁶Naw maꞈ hawˇ-eu naw maꞈ nehˬ-ehˇ jawˇ luꞈ-eu boeˇ miˬ siˬ kʼaˬ deuˬ zahˇ sahˇ kʼoꞈ tiˬ hmˬ tehꞈ-ehˇ ya bi jaˆ-awˇ, zahˇ sahˇ kʼoꞈ tiˬ hmˬ tehꞈ-ehˇ ya tawˬ meh.”

¹⁷Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

¹⁸“Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Ngaˬ neh naw maꞈ-ahˇ biꞈ-euˬ miˇ kʼahˬ-ahˇ naw maꞈ jawˇ keuˆ leˇ ngeh, zahˇ sahˇ kʼoꞈ heu hmˬ-ahˇ naw maꞈ ya caw teh meh.

¹⁹Kʼoeˇ gaˇ kʼaˇ doˆ-eu dzaˬ-eu dawˇ-eu jeˬ naw maꞈ dzaˬ ngeh, dzaˬ-eu dawˇ-eu jeˬ kʼoeˇ ui cuiˆ yuˇ doˆ-awˇ Sahˬpaˬ Miˬyehˇ-ahˇ ya lawˇ meh.

²⁰Naw maꞈ kaˬ muˇ jahˇ ngeh, yaw shuiꞈ keuˆ le-euˬ dzaˬ la gʼo cehˇ neh jahˇ beh beh-euˬ kaˬ muˇ Sahˬpaˬ Miˬyehˇ-ahˇ ya lawˇ meh. Naw maꞈ neh baw shawˇ-euˬ cehˇ lawˇ-eu loꞈ-ehˇ, kaˬ muˇ kʼoeˇ naw maꞈ ya lawˇ meh.

²¹Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, naw maꞈ neh jahˇ-euˬ kaˬ muˇ Sahˬpaˬ Miˬyehˇ-ahˇ aˬ myah luꞈ kʼoeˇ loꞈ-ehˇ ya lawˇ meh.

²²Ehˇ kʼawꞈ, tsawˇ haˬ tiˬ gʼaˬ na, Sahˬpaˬ Miˬyehˇ neh Moˇseˬ-ahˇ biꞈ taˬ-euˬ zahˇ sahˇ kʼoꞈ heu deuˬ-ahˇ maˬ noeˬ maˬ duˇ-ehˇ maˬ caw teh ni jawˇ-eu maˬ ehˇ,

²³mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, Moˇseˬ-ahˇ Sahˬpaˬ Miˬyehˇ neh dawˬ kʼaˇ biꞈ taˬ-euˬ yawˬ jeˬ na luꞈ-ahˇ tsawˇ haˬ aˇ maꞈ aˇ muˇ dawˬ tawˆ luꞈ maˬ mˇ byah ni jawˇ-eu maˬ ehˇ, pyeuꞈ laˇ-eu ehˇ-awˬ.

²⁴Tsawˇ haˬ aˇ maꞈ aˇ muˇ dawˬ tawˆ luꞈ maˬ siˬ nya-eu laꞈ kʼoeˇ maˬ noeˬ maˬ duˇ-ehˇ mˇ lehˬ-euˬ jeˬ ngeuˇ naˇ, Sahˬpaˬ Miˬyehˇ nui ma tsaˬ ni yaw saꞈ bi le-eu gʼaˇ duˬ, mawˇ neˇ mawˇ gaw tiˬ mawˇ tsahˇ-awˇ, miˬ dzaˬ dzah puiˆ-awˇ lawˇ-eu jeˬ ya lawˇ meh. Kʼoeˇ nehˬ-ehˇ tiˬ kawˆ loꞈ-ehˇ, dzaˬ la gʼo cehˇ lawˇ-eu jeˬ hawˇ-eu aˬ gaꞈ dzaˇ uiˇ lawˇ-eu jeˬ kʼawꞈ ya lawˇ meh. Kʼoeˇ uˬ taꞈ, ciꞈ myehꞈ ciꞈ buˬ tiˬ mawˇ tsahˇ-awˇ, iˬ baˇ shawˇ-eu lawˇ-eu jeˬ aˬ yawꞈ maꞈ ya lawˇ meh.

²⁵Piˇ ma gʼaˬ tsawˇ haˬ aˇ maꞈ aˇ muˇ-ahˇ shawˇ nehˬ-eu zahˇ ya jahˇ meh. Kʼoeˇ ngeh, aˬ yawꞈ maꞈ-ahˇ iˬ baˇ pyehˬ nehˬ tehꞈ-a. Aˬ jeˬ miˇ neh ehˇ naˇ, aˬ yawꞈ maꞈ maˬ noeˬ maˬ duˇ-ehˇ mˇ lehˬ-euˬ jeˬ pyeuꞈ-awˇ, dzaˬ dzaˬ dawˇ dawˇ lawˇ-eu jeˬ loꞈ-ehˇ, iˬ baˇ shawˇ-eu lawˇ-eu jeˬ Sahˬpaˬ Miˬyehˇ jawˇ gaˇ aˬ yawꞈ maꞈ yuˇ laꞈ-euˬ meh.

²⁶Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ hawˇ-eu, aˬ yawꞈ maꞈ nehˬ-ehˇ jawˇ-eu boeˇ miˬ siˬ kʼaˬ deuˬ-ahˇ iˬ baˇ pyehˬ nehˬ tehꞈ-a. Aˬ jeˬ miˇ neh ehˇ naˇ, yawˬ gʼaˬ yawˬ na luꞈ maˬ noeˬ maˬ duˇ-ehˇ mˇ lehˬ-euˬ jeˬ pyeuꞈ-eu meh.

²⁷Tsawˇ haˬ tiˬ gʼaˬ na maˬ noeˬ maˬ duˇ-ehˇ iˬ baˇ mˇ naˇ, tiˬ myaˇ byah laˇ-euˬ ciꞈ myehꞈ ciꞈ buˬ zaˬ tiˬ mawˇ tsahˇ-awˇ, iˬ baˇ shawˇ-eu lawˇ-eu jeˬ aˬ yawꞈ ya lawˇ meh.

²⁸Tsawˇ haˬ kʼoeˇ gʼaˬ iˬ baˇ shawˇ laˇ ni, piˇ ma gʼaˬ lawˇ duˬ-ahˇ iˬ baˇ shawˇ-eu zahˇ ya jahˇ meh. Kʼoeˇ ngeh, tsawˇ haˬ kʼoeˇ gʼaˬ-ahˇ iˬ baˇ pyehˬ nehˬ tehꞈ-a.

²⁹Zahˇ sahˇ kʼoꞈ heu hmˬ-aˬ, Iˇsaˬleˬlaˆ tsawˇ haˬ deuˬ maˬ ehˇ, aˬ yawꞈ maꞈ nehˬ-ehˇ jawˇ luꞈ-eu boeˇ miˬ siˬ kʼaˬ deuˬ maˬ ehˇ, maˬ noeˬ maˬ duˇ-ehˇ iˬ baˇ mˇ-euˬ tsawˇ haˬ aˬ geu gʼaˬ-ahˇ maˬ kaˬ, taꞈ leˇ-eu zahˇ sahˇ kʼoꞈ pyeuꞈ-eu meh.

³⁰Ehˇ kʼawꞈ, Iˇsaˬleˬlaˆ tsawˇ haˬ tiˬ gʼaˬ na maˬ ehˇ, boeˇ miˬ siˬ kʼaˬ tiˬ gʼaˬ na maˬ ehˇ, maˇ maˇ ni iˬ baˇ mˇ ma lehˇ noeˬ-awˇ mˇ naˇ, Sahˬpaˬ Miˬyehˇ-ahˇ yehˬ bawˬ sehˇ lu-ehˇ gʼeh-eu iˬ baˇ naꞈ-eu miˇ neh, sehꞈ gaˇ ya daˬ tehꞈ-a.

³¹Aˬ jeˬ miˇ neh ehˇ naˇ, Sahˬpaˬ Miˬyehˇ-euˬ ehˇ dawˬ-ahˇ aˬ yawꞈ maˬ naˇ haˬ-ehˇ, maˇ maˇ ni zahˇ dawˬ kʼoꞈ dawˬ-ahˇ mˇ bahˬ-euˬ meh. Aˬ yawꞈ-aˬ, yawˬ haˇ yawˬ ha ya shiˇ ni mˇ-euˬ meh.”

³²Iˇsaˬleˬlaˆ tsawˇ haˬ deuˬ bawˇ tsahˬ bawˇ dahˇ laꞈ kʼoeˇ jawˇ luꞈ ngeh, tsawˇ haˬ tiˬ gʼaˬ jawˇ nah-ahˇ miˬ dzaˬ kʼehꞈ luꞈ-eu aˬ cawˬ mawˇ-euˬ meh.

³³Kʼoeˇ naˇ, Moˇseˬ, Aˬloˬ hawˇ-eu Iˇsaˬleˬlaˆ tsawˇ haˬ aˇ maꞈ aˇ muˇ jawˇ gaˇ, tsawˇ haˬ kʼoeˇ gʼaˬ-ahˇ sheuˬ laꞈ-euˬ meh.

³⁴Aˬ yawꞈ-ahˇ aˬ joˆ-ehˇ ya jahˇ nehˬ-eu maˬ siˬ duˬ-eu miˇ neh, ka lahˇ taˬ-awˇ bi loꞈ tawˬ-euˬ meh.

³⁵Kʼoeˇ naˇ, Moˇseˬ-ahˇ Sahˬpaˬ Miˬyehˇ ehˇ-eu, “Tsawˇ haˬ kʼoeˇ gʼaˬ-ahˇ ya sehꞈ meh. Tsawˇ haˬ aˇ maꞈ aˇ muˇ dawˬ tawˆ luꞈ gʼeh-awˇ aˬ yawꞈ-ahˇ pu pu dzeˇ sheuˬ doˆ gʼeh-awˇ, kʼaˬ lo neh ya biˬ sehꞈ meh.”

³⁶Kʼoeˇ ngeh, Sahˬpaˬ Miˬyehˇ neh dawˬ biꞈ-euˬ loꞈ-ehˇ, aˬ yawꞈ-ahˇ pu pu dzeˇ sheuˬ doˆ gʼeh-awˇ, tsawˇ haˬ aˇ maꞈ aˇ muˇ dawˬ tawˆ luꞈ gʼeh-awˇ, kʼaˬ lo neh biˬ sehꞈ-euˬ meh.

³⁷Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

³⁸Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. “Naw maꞈ-euˬ pehˇ kʼahˬ laꞈ coeˇ-ahˇ dawˬ sheuˇ guꞈ tsoꞈ-awˇ, dawˬ sheuˇ aˬ yawꞈ hmˬ yawꞈ-ahˇ nyoeˇ leuˬ leuˬ-eu saˬ kahˇ paꞈ-awˬ. Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, naw maꞈ aˬ myah luꞈ kʼoeˇ loꞈ-ehˇ jahˇ-awˬ.

³⁹Dawˬ sheuˇ kʼoeˇ-aˬ, naw maꞈ gʼaˇ duˬ bi noeˬ mawˇ-eu jeˬ pyeuꞈ tehꞈ-a. Aˬ myah luꞈ dawˬ sheuˇ kʼoeˇ-ahˇ naw maꞈ kʼaˇ mawˇ ngeh, ngaˬ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ naw maꞈ noeˬ mawˇ-awˇ naˇ haˬ geuꞈ-eu laꞈ kʼoeˇ, naw maꞈ-euˬ nui kʼahˇ maˬ mˇ-ehˇ, ngaˬ-ahˇ maˬ byehˇ dzeh ni dehꞈ tehꞈ-a.

⁴⁰Ngaˬ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ naw maꞈ naˇ haˬ geuꞈ ni dawˬ sheuˇ kʼoeˇ naw maꞈ-ahˇ aˬ myah luꞈ bi noeˬ mawˇ-awˇ, naw maꞈ maˇ maˇ ni ngaˬ-ahˇ taꞈ tehꞈ-a.

⁴¹Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma. Ngaˇ naw maꞈ-euˬ Miˬyehˇ pyeuꞈ laˇ ni, Iˇjiˇtuˆ miˇ kʼahˬ laꞈ kʼoeˇ neh naw maꞈ-ahˇ sheuˬ doˆ laꞈ-euˬ ma. Ngaˇ-aˬ, Sahˬpaˬ Miˬyehˇ ma.”