Read Akha Bawˇtsahˬ 16 Bible Online

Bawˇtsahˬ 16 - Akha bible

Bawˇtsahˬ 16

¹Leˬbiˇ tsawˇ jeuˬ Kawˇhaˆ aˇ jeuˬ pyeuꞈ-eu Iˇzaˬhaˬ-euˬ aˬ li Kawˇlaˆ-aˬ, Moˇseˬ-ahˇ puiˬ mawꞈ-eu nui ma ahˇ-eu meh. Luˇbeˬ tsawˇ jeuˬ laꞈ kʼoeˇ, Eˇliˇbaˆ-euˬ aˬ li pyeuꞈ-eu Daˬtaˬ hawˇ-eu Aˬbiˇlamˬ aˬ nyaꞈ nmˇ hawˇ-eu, Paˬlehˆ-euˬ aˬ li Awˇnaˆ heu smˇ gʼaˬ uˬ taꞈ, tsawˇ myahˇ doˆ-eu Iˇsaˬleˬlaˆ tsawˇ haˬ aˬ yuiꞈ aˬ tsu nui deuˬ nyiˬ yaˇ ngaˬ tseˇ gʼaˬ kʼawꞈ aˬ yawꞈ nehˬ-ehˇ gm leˇ-euˬ meh.

³Moˇseˬ hawˇ-eu Aˬloˬ aˬ nyaꞈ-euˬ mehˬ shi aˬ yawꞈ maꞈ uiˬ leˇ-awˇ, aˬ yawꞈ nyaꞈ-ahˇ ehˇ nehˬ-eu, “Naw nyaꞈ yawˬ haˇ yawˬ ha aˇ dzehˬ noeˬ huiˬ dzeuˇ-eu nga. Iˇsaˬleˬlaˆ tsawˇ haˬ aˇ maꞈ aˇ muˇ laꞈ kʼoeˇ kʼaˇ jawˇ-eu tsawˇ haˬ yawˬ gʼaˬ na luꞈ Sahˬpaˬ Miˬyehˇ-euˬ tsawˇ haˬ pyeuꞈ-awˇ, dawˬ tawˆ luꞈ nehˬ-ehˇ Sahˬpaˬ Miˬyehˇ jawˇ-eu meh. Moˇseˬ nawˇ aˬ jeˬ miˇ neh Sahˬpaˬ Miˬyehˇ-euˬ tsawˇ haˬ aˇ maꞈ aˇ muˇ kʼoeˇ taˆ, yawˬ haˇ yawˬ ha teu naˆ naˆ-ehˇ taˬ huiˬ taˬ mahˇ te.”

⁴Dawˬ kʼoeˇ dawˬ-ahˇ Moˇseˬ ya gaˬ ngeh, Miˇ tsaˬ-ahˇ ga lah-awˇ guiˬ lahˬ shaˇ-euˬ meh.

⁵Kʼoeˇ naˇ, Kawˇlaˆ hawˇ-eu Kawˇlaˆ-euˬ mehˬ nah caw teh-eu tsawˇ haˬ deuˬ-ahˇ aˬ yawꞈ ehˇ nehˬ-eu, “Aˬ geu gʼaˬ Sahˬpaˬ Miˬyehˇ-euˬ tsawˇ haˬ pyeuꞈ-eu gaˇ kawˆ, Sahˬpaˬ Miˬyehˇ aˬ dui-ahˇ ni shawˬ uˬ shawˬ bi siˬ bi mawˇ laꞈ tehꞈ-a. Aˬ yawꞈ neh tseˇ doˆ-euˬ aˬ yawꞈ-euˬ tsawˇ haˬ pyeuꞈ-eu gʼaˬ-ahˇ, lawˇ duˬ-ahˇ aˬ yawꞈ jawˇ-eu dawˬ peh bi le laꞈ tehꞈ-a.

⁶Ni shawˬ nawˇ hawˇ-eu nawˬ-euˬ mehˬ nah caw teh-eu tsawˇ haˬ deuˬ miˬ jiˆ pehˆ ahˇ-eu guiˬ gʼawˆ yuˇ-awˇ, doꞈ luꞈ-eu miˬ dzaˬ miˬ jiˆ hawˇ-eu yaw saw jeˬ dawˆ ahˇ-awˇ, lawˇ duˬ jaˆ gaˇ yuˇ gʼeh-awˬ. Kʼoeˇ ngeh, aˬ geu gʼaˬ-ahˇ Sahˬpaˬ Miˬyehˇ tseˇ doˆ-euˬ gaˇ kawˆ aˬ dui ya siˬ tehꞈ-a. Yawˬ haˇ yawˬ ha aˇ dzehˬ noeˬ huiˬ dzeuˇ-eu deuˬ-aˬ, naw maꞈ Leˬbiˇ tsawˇ haˬ deuˬ meh.”

⁷

⁸Kawˇlaˆ-ahˇ Moˇseˬ paˇ ehˇ nehˬ-eu, “Naw maꞈ Leˬbiˇ tsawˇ haˬ deuˬ naˇ haˬ sheˇ.

⁹Sahˬpaˬ Miˬyehˇ dawˬ peh naw maꞈ le-awˇ, Sahˬpaˬ Miˬyehˇ-euˬ Sehˬ gʼawˆ laꞈ kʼoeˇ gaˇ mˇ-eu laꞈ kʼoeˇ, tsawˇ haˬ aˇ maꞈ aˇ muˇ mehˬ shi yawꞈ-awˇ aˬ yawꞈ maꞈ gʼaˇ duˬ bi mˇ-eu lehˇ, tsawˇ haˬ heu myaˆ ni gʼeh-eu laꞈ kʼoeˇ, naw maꞈ-ahˇ biˇ paˆ doˆ-awˇ tseˇ doˆ taˬ-eu heu, dehˬ nyi-ehˇ gʼeh-eu gaˇ meh lehˇ naw maꞈ noeˬ te loˇ.

¹⁰Nawˇ hawˇ-eu Leˬbiˇ tsawˇ haˬ dawˬ tawˆ luꞈ-ahˇ aˬ yawꞈ kʼoeˇ loꞈ-ehˇ ciˬ huiˬ taˬ-euˬ meh. Ehˇ kʼawꞈ, nymˬ-mˇ nawˇ piˇ ma-euˬ aˇ yaˬ kʼawꞈ paˇ geuꞈ mawꞈ-eu nga laˬ.

¹¹Naw maꞈ Aˬloˬ-ahˇ iˬ baˇ taˬ-eu dawˬ ngehˬ-eu heu-aˬ, aˬ diˇ aˬ maˇ nawˇ hawˇ-eu nawˬ-euˬ mehˬ nah caw teh-eu tsawˇ haˬ deuˬ Sahˬpaˬ Miˬyehˇ-ahˇ puiˬ-eu jeˬ pyeuꞈ-eu meh.”

¹²Kʼoeˇ naˇ, Daˬtaˬ hawˇ-eu Aˬbiˇlamˬ-ahˇ Moˇseˬ bi kuˇ laˬ-iˇ-euˬ meh. Ehˇ kʼawꞈ, aˬ yawꞈ nyaꞈ ehˇ-eu, “Nga nyaꞈ nawˇ jawˇ gaˇ maˬ laˇ.

¹³Nga maꞈ-ahˇ bawˇ tsahˬ bawˇ dahˇ laꞈ kʼoeˇ bi shiˇ-eu lehˇ, miˇ tsaˬ miˇ muiˬ muiˬ dui dui-awˇ baw le za le-eu Iˇjiˇtuˆ miˇ kʼahˬ laꞈ kʼoeˇ neh sheuˬ doˆ leꞈ-euˬ tehꞈ-ehˇ maˬ gʼaˬ-ehˇ, nga maꞈ kʼoeˇ taˆ nawˇ sahˬ paˬ paˇ geuꞈ mawꞈ te siˬ loˇ.

¹⁴Deh ma hawˇ-eu aˬ gaꞈ yaˇ kmˇ baw baw-ehˇ ya jawˇ-eu miˇ tsaˬ miˇ muiˬ muiˬ dui dui-awˇ baw le za le-eu miˇ kʼahˬ-ahˇ, nga maꞈ-ahˇ nawˇ maˬ sheuˬ uˇ nehˬ laꞈ-eu uˬ taꞈ, nga maꞈ-ahˇ nawˇ mehˇ shuiˇ paˇ shuiˇ-eu lehˇ gʼeh-eu nga. Teu miˇ neh nga maꞈ maˬ laˇ.”

¹⁵Moˇseˬ nui ma pehˇ laˇ-awˇ, Sahˬpaˬ Miˬyehˇ-ahˇ ehˇ nehˬ-eu, “Tsawˇ haˬ heu deuˬ neh yuˇ laꞈ-euˬ lawˇ-eu jeˬ-ahˇ taˬ ha geuꞈ. Aˬ yawꞈ maꞈ kʼoeˇ taˆ yaw lehˬ tiˬ jeˬ-iˬ ngaˇ maˬ mˇ haw-aˬ. Aˬ yawꞈ maꞈ-euˬ mahˬ tahˬ laˆ tiˬ mawˇ tsahˇ geuꞈ taˬ-euˬ kʼawꞈ maˬ jaˆ.”

¹⁶Kawˇlaˆ-ahˇ Moˇseˬ ehˇ nehˬ-eu, “Nawˇ hawˇ-eu nawˬ-eu mehˬ nah caw teh-eu tsawˇ haˬ nyiˬ yaˇ ngaˬ tseˇ gʼaˬ, ni shawˬ nah Sahˬpaˬ Miˬyehˇ jawˇ-eu Sehˬ gʼawˆ-ahˇ ya laˇ meh. Aˬloˬ gʼeh kʼoeˇ gaˇ jawˇ tehꞈ-a.

¹⁷Naw maꞈ yawˬ gʼaˬ na luꞈ, miˬ dzaˬ miˬ jiˆ pehˆ ahˇ-eu guiˬ gʼawˆ kʼoeˇ taˆ yaw saw jeˬ dawˆ daˆ-awˇ, lawˇ duˬ-ahˇ ya lawˇ meh.”

¹⁸Kʼoeˇ naˇ, yawˬ gʼaˬ na luꞈ yawˬ ha-euˬ miˬ dzaˬ miˬ jiˆ pehˆ ahˇ-eu guiˬ gʼawˆ yuˇ-awˇ, doꞈ luꞈ-eu miˬ dzaˬ miˬ jiˆ hawˇ-eu yaw saw jeˬ dawˆ ahˇ-awˇ, Moˇseˬ hawˇ-eu Aˬloˬ nehˬ-ehˇ Sehˬ gʼawˆ mehˬ shi yawꞈ-euˬ meh .

¹⁹Kawˇlaˆ gʼeh, Iˇsaˬleˬlaˆ tsawˇ haˬ dawˬ tawˆ luꞈ kuˇ uiˬ-awˇ, sehˬ gʼawˆ gʼoˆ kʼehˬ dawˬ peh, Moˇseˬ hawˇ-eu Aˬloˬ-euˬ mehˬ shi aˬ yawꞈ maꞈ yawꞈ luꞈ-eu meh. Ja pyuˬ ni, Sahˬpaˬ Miˬyehˇ-euˬ yaw shehꞈ kʼahˬ sehˇ tsawˇ haˬ aˇ maꞈ dawˬ tawˆ luꞈ kʼoeˇ taˆ bya doˆ le-euˬ meh.

²⁰Kʼoeˇ ngeh, Moˇseˬ hawˇ-eu Aˬloˬ-ahˇ Sahˬpaˬ Miˬyehˇ ehˇ-eu,

²¹“Tsawˇ haˬ heu deuˬ nehˬ-ehˇ maˬ yawꞈ ni naˇ kʼah paw jiˆ kʼoꞈ-awˬ. Aˬ yawꞈ maꞈ-ahˇ ngaˇ tiˬ poˆ tehꞈ-ehˇ laˆ cawˆ nehˬ ma.”

²²Ehˇ kʼawꞈ, Moˇseˬ hawˇ-eu Aˬloˬ aˬ nyaꞈ myaˆ pyawˬ miˇ tsa tuˆ ni awˆ byaˆ-awˇ, “Miˬyehˇ-oˇ, nawˇ-aˬ yaw dehꞈ kʼaˇ dehꞈ-eu jeˬ dawˬ tawˆ luꞈ-euˬ yaw sahˇ pyeuꞈ-eu meh. Tsawˇ haˬ tiˬ gʼaˬ iˬ baˇ mˇ-euˬ baˬ da neh tsawˇ haˬ aˇ maꞈ aˇ muˇ dawˬ tawˆ luꞈ-ahˇ nawˇ nui ma pehˇ te loˇ.”

²³Moˇseˬ-ahˇ Sahˬpaˬ Miˬyehˇ heu loꞈ-ehˇ paˇ ehˇ nehˬ-euˬ meh.

²⁴“Kawˇlaˆ, Daˬtaˬ hawˇ-eu Aˬbiˇlamˬ aˬ ha smˇ gʼaˬ-euˬ sehˬ gʼawˆ dawˬ peh maˬ jawˇ ni cehˆ-awˬ lehˇ Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ.”

²⁵Kʼoeˇ naˇ, Iˇsaˬleˬlaˆ tsawˇ haˬ aˬ yuiꞈ aˬ tsu deuˬ nehˬ-ehˇ, Daˬtaˬ hawˇ-eu Aˬbiˇlamˬ jawˇ gaˇ Moˇseˬ iˇ-euˬ meh.

²⁶Iˇsaˬleˬlaˆ tsawˇ haˬ kʼoeˇ deuˬ-ahˇ Moˇseˬ ehˇ nehˬ-eu, “Haiˬ-eu tsawˇ haˬ deuˬ-euˬ sehˬ gʼawˆ dawˬ peh maˬ iˇ ni yaw taw yawꞈ-awˇ, aˬ yawꞈ maꞈ-ahˇ kʼaˇ taꞈ-eu jeˬ-ahˇ maˬ toeˬ ciˆ ni jawˇ-awˬ. Aˬ yawꞈ maꞈ-euˬ iˬ baˇ baˬ da neh aˬ yawꞈ maꞈ-ahˇ laˆ luˬ laˆ seˇ nehˬ ngeh naw maꞈ-ahˇ kʼawꞈ zaw laˇ nmˬ-mˇ.”

²⁷Kʼoeˇ ngeh, Kawˇlaˆ, Daˬtaˬ hawˇ-eu Aˬbiˇlamˬ aˬ ha smˇ gʼaˬ-euˬ sehˬ gʼawˆ dawˬ peh aˬ yawꞈ maꞈ maˬ jawˇ ni, ui cuiˆ yaw taw paw jawˇ-iˇ-euˬ meh. Daˬtaˬ hawˇ-eu Aˬbiˇlamˬ aˬ nyaꞈ doˆ le-awˇ, aˬ yawꞈ nyaꞈ-euˬ sehˬ gʼawˆ gʼoˆ kʼehˬ-ahˇ, miˬ sawˇ zaˬ deuˬ nehˬ-ehˇ yawꞈ luꞈ-eu meh.

²⁸Iˇsaˬleˬlaˆ tsawˇ haˬ deuˬ-ahˇ Moˇseˬ ehˇ nehˬ-eu, “Gaˇ heu deuˬ-ahˇ ngaˇ mˇ mawꞈ-eu miˇ neh mˇ-eu maˬ ngeuˇ-ehˇ, Sahˬpaˬ Miˬyehˇ ngaˬ-ahˇ pyehˬ gʼeh leꞈ-awˇ bi mˇ nehˬ laꞈ-euˬ gaˇ kawˆ, naw maꞈ heu loꞈ-ehˇ ya siˬ tehꞈ-a.

²⁹Tsawˇ haˬ heu deuˬ-ahˇ Miˬyehˇ neh kʼehˬ nehˬ-awˇ bi shiˇ-eu jeˬ maˬ ngeuˇ-ehˇ, aˬ cawˬ kʼaˇ shiˇ-eu loꞈ-ehˇ tehꞈ-ehˇ shiˇ naˇ, Sahˬpaˬ Miˬyehˇ ngaˬ-ahˇ kʼehˇ gʼeh leꞈ-eu maˬ ngeuˇ-aˇ.

³⁰Ehˇ kʼawꞈ, tiˬ jawˇ-iˬ maˬ gaˬ haw-euˬ jeˬ Sahˬpaˬ Miˬyehˇ mˇ-eu laꞈ kʼoeˇ, aˬ yawꞈ maꞈ hawˇ-eu aˬ yawꞈ maꞈ kʼaˇ jaˆ-eu jeˬ dawˬ tawˆ luꞈ tiˬ kawˆ loꞈ-ehˇ shiˇ-eu miˇ kʼahˬ-ahˇ ga keuˆ-iˇ ni, miˇ tsaˬ tsawˬ paˆ laˇ-awˇ aˬ yawꞈ maꞈ-ahˇ myoꞈ ahˇ naˇ, aˬ yawꞈ maꞈ Sahˬpaˬ Miˬyehˇ-ahˇ byehˇ dzeh-euˬ meh lehˇ naw maꞈ ya siˬ tehꞈ-a.”

³¹Aˬ yawꞈ kʼoeˇ loꞈ-ehˇ ehˇ gʼaˬ-eu maˬ dah ni, Daˬtaˬ hawˇ-eu Aˬbiˇlamˬ jawˇ gaˇ miˇ tsaˬ tsawˬ paˆ laˇ-awˇ,

³²aˬ yawꞈ nyaꞈ hawˇ-eu aˬ yawꞈ nyaꞈ-euˬ miˬ sawˇ zaˬ deuˬ-ahˇ maˬ ehˇ, Kawˇlaˆ-euˬ mehˬ nah kʼaˇ caw teh-eu tsawˇ haˬ deuˬ hawˇ-eu tsawˇ haˬ kʼoeˇ deuˬ kʼaˇ jaˆ-eu jeˬ dawˬ tawˆ luꞈ-ahˇ maˬ ehˇ, myoꞈ ahˇ jiˇ-euˬ meh.

³³Aˬ yawꞈ maꞈ hawˇ-eu aˬ yawꞈ maꞈ kʼaˇ jaˆ-eu jeˬ dawˬ tawˆ luꞈ tiˬ kawˆ loꞈ-ehˇ, shiˇ-eu miˇ kʼahˬ-ahˇ yaw dehꞈ-ehˇ ga ahˇ jiˇ-euˬ meh. Kʼoeˇ naˇ, aˬ yawꞈ maꞈ kʼoeˇ taˆ miˇ tsaˬ paˇ piˬ tehˬ-awˇ, aˬ yawꞈ maꞈ byoˆ-iˇ-euˬ meh.

³⁴Aˬ yawꞈ maꞈ guˇ-awˇ ngoeˇ-eu teˇ saˇ-ahˇ ya gaˬ ngeh, kʼoeˇ gaˇ jawˇ-eu Iˇsaˬleˬlaˆ tsawˇ haˬ deuˬ, “Cehˆ-awˬ de. Aˬ dui maꞈ-ahˇ kʼawꞈ miˇ tsaˬ paˇ myoꞈ ahˇ laˇ nmˇ de” lehˇ guˇ guˇ-ehˇ cehˆ jiˇ-euˬ meh.

³⁵Kʼoeˇ naˇ, Sahˬpaˬ Miˬyehˇ miˬ dzaˬ pyehˬ gʼeh leꞈ-awˇ, yaw saw jeˬ lawˇ luꞈ-eu tsawˇ haˬ kʼoeˇ nyiˬ yaˇ ngaˬ tseˇ gʼaˬ-ahˇ puiˆ-eu meh.

³⁶Kʼoeˇ naˇ, Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

³⁷“Miˬ dzaˬ puiˆ sehꞈ taˬ-euˬ tsawˇ haˬ kʼoeˇ deuˬ nehˬ-ehˇ ga-eu miˬ jiˆ pehˆ ahˇ-eu guiˬ gʼawˆ kʼoeˇ deuˬ yuˇ-awˇ, miˬ jiˆ-ahˇ tiˬ gaˇ paw deh kʼaˇ dzeh-awˬ lehˇ piˇ ma Aˬloˬ-euˬ aˬ li Eˇlaˬzaˬ-ahˇ ehˇ nehˬ-awˬ. Aˬ jeˬ miˇ neh ehˇ naˇ, guiˬ gʼawˆ kʼoeˇ deuˬ yaw muiˬ yaw shawˇ meh.

³⁸Lawˇ duˬ-ahˇ yuˇ gʼeh ngeh, guiˬ gʼawˆ kʼoeˇ deuˬ muiˬ laˇ shawˇ laˇ tehꞈ-a. Kʼoeˇ ngeh, yawˬ ha-euˬ iˬ baˇ baˬ da neh ya shiˇ-euˬ tsawˇ haˬ kʼoeˇ deuˬ-euˬ guiˬ gʼawˆ kʼoeˇ deuˬ yuˇ-awˇ, aˇ yaˆ tehˆ yaˆ-awˇ, lawˇ duˬ-ahˇ dehˬ kaˬ-eu kʼmˬ pymˬ tiˬ hmˬ jahˇ-awˬ. Heu-aˬ, Iˇsaˬleˬlaˆ tsawˇ haˬ deuˬ bi yahˇ-eu gʼaˇ duˬ, bi siˬ bi mawˇ-eu jeˬ pyeuꞈ tehꞈ-a.”

³⁹Kʼoeˇ ngeh, piˇ ma Eˇlaˬzaˬ gʼaˬ guiˬ caˇ guiˬ gʼawˆ kʼoeˇ deuˬ yuˇ-awˇ, lawˇ duˬ kʼmˬ pymˬ jahˇ-eu gʼaˇ duˬ aˇ yaˆ tehˆ yaˆ-euˬ meh.

⁴⁰Heu-aˬ, Aˬloˬ-euˬ zaˬ deuˬ uˆ deuˬ maˬ ngeuˇ naˇ, Sahˬpaˬ Miˬyehˇ-ahˇ yaw saw jeˬ lawˇ-eu gʼaˇ duˬ, tsawˇ haˬ tiˬ gʼaˬ-iˬ lawˇ duˬ dawˬ peh maˬ ya laˇ-eu gaˇ kawˆ Iˇsaˬleˬlaˆ tsawˇ haˬ deuˬ yahˇ ni bi siˬ bi mawˇ-eu jeˬ pyeuꞈ-eu meh. Maˬ ngeuˇ naˇ, Kawˇlaˆ hawˇ-eu aˬ yawꞈ-euˬ tsawˇ haˬ deuˬ loꞈ-ehˇ ya cawˆ-iˇ gaˇ keuˆ tehꞈ-a. Kʼoeˇ naˇ, Sahˬpaˬ Miˬyehˇ neh Moˇseˬ-ahˇ gʼoe-awˇ Eˇlaˬzaˬ-ahˇ dawˬ kʼaˇ biꞈ nehˬ-euˬ loꞈ-ehˇ yawˬ jeˬ na luꞈ mˇ jiˇ-euˬ meh.

⁴¹Yawˬ nah yawˬ, Iˇsaˬleˬlaˆ tsawˇ haˬ aˇ maꞈ deuˬ Moˇseˬ hawˇ-eu Aˬloˬ-ahˇ iˬ baˇ taˬ-awˇ, “Sahˬpaˬ Miˬyehˇ-euˬ tsawˇ haˬ tiˬ paˆ na deuˬ-ahˇ naw nyaꞈ sehꞈ-euˬ meh” lehˇ ehˇ-eu meh.

⁴²Moˇseˬ hawˇ-eu Aˬloˬ-ahˇ nui ma pehˇ haw-eu lehˇ aˬ yawꞈ maꞈ uiˬ leˇ-awˇ, Sahˬpaˬ Miˬyehˇ-euˬ Sehˬ gʼawˆ jaˆ-eu paw aˬ yawꞈ maꞈ gʼawˇ pyawˇ haw ngeh, Sehˬ gʼawˆ-ahˇ mˬ dmˇ dehˬ kaˬ taˬ-awˇ, Sahˬpaˬ Miˬyehˇ-euˬ yaw shehꞈ kʼahˬ sehˇ doˆ le-euˬ gaˇ ya mawˇ-euˬ meh.

⁴³Moˇseˬ hawˇ-eu Aˬloˬ aˬ nyaꞈ Sehˬ gʼawˆ mehˬ shi le-awˇ yawꞈ leˇ-euˬ meh.

⁴⁴Kʼoeˇ ngeh, Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ-eu meh.

⁴⁵“Tsawˇ haˬ heu deuˬ-euˬ dawˬ peh maˬ jawˇ ni cehˆ-awˬ. Aˬ yawꞈ maꞈ-ahˇ maˬ bi luˆ-iˇ ni tiˬ poˆ tehꞈ-ehˇ ngaˇ laˆ luˬ laˆ seˇ nehˬ ma.” Kʼoeˇ ngeh, Moˇseˬ hawˇ-eu Aˬloˬ aˬ nyaꞈ myaˆ pyawˬ miˇ tsa tuˆ ni awˆ byaˆ-euˬ meh.

⁴⁶Aˬloˬ-ahˇ Moˇseˬ ehˇ nehˬ-eu, “Nawˬ-euˬ miˬ jiˆ pehˆ ahˇ-eu guiˬ gʼawˆ yuˇ-awˇ, lawˇ duˬ kʼoeˇ taˆ jaˆ-eu doꞈ luꞈ-eu miˬ jiˆ pehˆ ahˇ-awˇ, miˬ jiˆ kʼoeˇ taˆ yaw saw jeˬ dawˆ puiˆ-awˬ. Kʼoeˇ naˇ, tsawˇ haˬ kʼoeˇ deuˬ jawˇ gaˇ yaw kawˇ-ehˇ iˇ-awˇ, aˬ yawꞈ maꞈ bi shawˇ laˇ-eu zahˇ jahˇ-awˬ. Yaw kawˇ kawˇ-ehˇ jahˇ-awˬ. Sahˬpaˬ Miˬyehˇ nui ma pehˇ laˇ taˬ-euˬ miˇ neh luˬ-iˇ seˇ-iˇ-eu jeˬ keuˆ le taˬ-euˬ nga.”

⁴⁷Aˬloˬ gʼeh Moˇseˬ kʼaˇ ehˇ-eu loꞈ-ehˇ miˬ jiˆ pehˆ ahˇ-eu guiˬ gʼawˆ yuˇ-awˇ, tsawˇ haˬ aˇ maꞈ-euˬ yaw kaˬ-ahˇ cehˆ coeˬ coeˬ gʼeh-euˬ meh. Luˬ-iˇ seˇ-iˇ-eu jeˬ keuˆ le taˬ-eu gaˇ aˬ yawꞈ ya mawˇ ngeh, miˬ jiˆ kʼoeˇ taˆ yaw saw jeˬ dawˆ puiˆ-awˇ, tsawˇ haˬ kʼoeˇ deuˬ bi shawˇ laˇ-eu zahˇ jahˇ-euˬ meh.

⁴⁸Aˬ yawꞈ kʼoeˇ loꞈ-ehˇ jahˇ ngeh, luˬ-iˇ seˇ-iˇ-eu jeˬ maˬ paˇ keuˆ le ni naˬ leˇ-awˇ, shiˇ taˬ-euˬ deuˬ hawˇ-eu dehꞈ luꞈ-eu deuˬ yaw kaˬ-ahˇ aˬ yawꞈ yawꞈ luꞈ-eu meh.

⁴⁹Kawˇlaˆ puiˬ ngeh poˆ shiˇ-euˬ deuˬ maˬ gui ahˇ-ehˇ, kʼoeˇ gaˇ shiˇ taˬ-euˬ tsawˇ haˬ deuˬ tiˬ muiˇ oeˬ heˇ shiꞈ yaˇ gʼaˬ byah-eu meh.

⁵⁰Luˬ-iˇ seˇ-iˇ-eu kʼoeˇ dzeuˇ-iˇ ngeh, Sehˬ gʼawˆ gʼoˆ kʼehˬ-ahˇ Moˇseˬ jawˇ gaˇ Aˬloˬ gʼoꞈ leˇ-euˬ meh.