Read Akha Bawˇtsahˬ 18 Bible Online

Bawˇtsahˬ 18 - Akha bible

Bawˇtsahˬ 18

¹Aˬloˬ-ahˇ Sahˬpaˬ Miˬyehˇ ehˇ nehˬ-eu, “Ngaˇ jawˇ-eu Sehˬ gʼawˆ-ahˇ gaˇ mˇ-eu laꞈ kʼoeˇ iˬ baˇ doˆ laˇ naˇ, iˬ baˇ kʼoeˇ baˬ da neh kʼaˇ keuˆ le-eu jeˬ-ahˇ, nawˇ hawˇ-eu nawˬ-euˬ aˬ li deuˬ hawˇ-eu Leˬbiˇ tsawˇ haˬ deuˬ tehꞈ-ehˇ ya daˬ meh. Ehˇ kʼawꞈ, piˇ ma deuˬ mˇ-eu gaˇ laꞈ kʼoeˇ iˬ baˇ doˆ laˇ naˇ, nawˇ hawˇ-eu nawˬ li deuˬ tehꞈ-ehˇ ya daˬ meh.

²Nawˇ hawˇ-eu nawˬ li deuˬ Sehˬ gʼawˆ laꞈ kʼoeˇ gaˇ mˇ ngeh, nawˬ-euˬ gaˇ-ahˇ bi caw ba-eu gʼaˇ duˬ, nawˬ-euˬ aˬ yuiꞈ aˬ nyiˇ Leˬbiˇ tsawˇ haˬ deuˬ-ahˇ kuˇ-awˬ.

³Nawˬ-ahˇ mˇ nehˬ paˬ-ehˇ gʼeh-eu deuˬ maˬ ehˇ, Sehˬ gʼawˆ laꞈ kʼoeˇ mˇ paˬ-ehˇ jaˆ-eu deuˬ maˬ ehˇ, aˬ yawꞈ maꞈ ya mˇ meh. Ehˇ kʼawꞈ, muiˬ-eu shawˇ-eu jawˇ duˬ-ahˇ taꞈ-eu keu ka deuˬ hawˇ-eu lawˇ duˬ-ahˇ taꞈ-eu keu ka deuˬ-ahˇ aˬ yawꞈ maꞈ maˬ ya toeˬ ciˆ-a. Kʼoeˇ deuˬ-ahˇ aˬ yawꞈ maꞈ toeˬ ciˆ naˇ, nawˇ maˬ ehˇ, aˬ yawꞈ maꞈ maˬ ehˇ, sehꞈ gaˇ tiˬ kawˆ loꞈ-ehˇ ya daˬ tehꞈ-a.

⁴Aˬ yawꞈ maꞈ nawˬ nehˬ-ehˇ gaˇ mˇ-eu laꞈ kʼoeˇ, Sehˬ gʼawˆ laꞈ kʼoeˇ jaˆ-eu gaˇ deuˬ-ahˇ ya mˇ meh. Ehˇ kʼawꞈ, maˬ geuˇ-eu tsawˇ haˬ deuˬ-ahˇ nawˬ nehˬ-ehˇ gaˇ maˬ ya bi mˇ-a.

⁵Iˇsaˬleˬlaˆ tsawˇ haˬ deuˬ-ahˇ yawˬ poˆ yawˬ ngaˇ nui ma maˬ ya pehˇ-eu gʼaˇ duˬ, muiˬ-eu shawˇ-eu jawˇ duˬ-ahˇ taꞈ-eu gaˇ deuˬ hawˇ-eu lawˇ duˬ-ahˇ taꞈ-eu gaˇ deuˬ-ahˇ, nawˇ hawˇ-eu nawˬ li deuˬ tehꞈ-ehˇ ya mˇ meh.

⁶Ngaˇ-aˬ, Iˇsaˬleˬlaˆ tsawˇ haˬ deuˬ laꞈ kʼoeˇ, nawˬ-euˬ aˬ yuiꞈ aˬ nyiˇ Leˬbiˇ tsawˇ haˬ deuˬ-ahˇ nawˬ-euˬ gʼaˇ duˬ tseˇ doˆ-euˬ gʼaˬ pyeuꞈ-eu ma. Aˬ yawꞈ maꞈ-aˬ, Sehˬ gʼawˆ laꞈ kʼoeˇ gaˇ mˇ nya ni a nehˬ taˬ-euˬ tsawˇ haˬ deuˬ pyeuꞈ-eu meh.

⁷Ehˇ kʼawꞈ, lawˇ duˬ hawˇ-eu muiˬ-eu shawˇ-eu jawˇ duˬ-ahˇ taꞈ leˇ-eu gaˇ deuˬ-ahˇ, nawˇ hawˇ-eu nawˬ li deuˬ tehꞈ-ehˇ ya mˇ meh. Gaˇ heu deuˬ-aˬ, naw maꞈ-euˬ gaˇ pyeuꞈ-eu meh. Aˬ jeˬ miˇ neh ehˇ naˇ, piˇ ma geuꞈ-eu laꞈ sawˬ naw maꞈ-ahˇ ngaˇ biꞈ taˬ-euˬ ma. Maˬ geuˇ-eu tsawˇ haˬ aˬ geu gʼaˬ maˬ kaˬ, muiˬ-eu shawˇ-eu keu ka deuˬ dawˬ peh laˇ naˇ, sehꞈ gaˇ ya daˬ tehꞈ-a.”

⁸Aˬloˬ-ahˇ Sahˬpaˬ Miˬyehˇ ehˇ nehˬ-eu, “Ngaˬ-ahˇ kʼaˇ damˬ-euˬ muiˬ-eu damˬ-eu jeˬ laꞈ kʼoeˇ, miˬ dzaˬ dzah puiˆ-awˇ maˬ kʼaˇ lawˇ-euˬ jeˬ nawˬ-ahˇ ngaˇ biꞈ-euˬ meh lehˇ maˬ ngehˇ ni noeˬ taˬ-awˬ. Kʼoeˇ-aˬ, aˬ myah luꞈ nawˇ hawˇ-eu nawˬ-euˬ zaˬ nawˬ-euˬ uˆ deuˬ-ahˇ biꞈ taˬ-euˬ shaˬ bymˇ meh.

⁹Lawˇ duˬ kʼoeˇ taˆ maˬ dzah puiˆ-euˬ muiˬ dui shawˇ dui dui-eu lawˇ-eu jeˬ laꞈ kʼoeˇ, dzaˬ la gʼo cehˇ lawˇ-eu jeˬ, iˬ baˇ shawˇ-eu lawˇ-eu jeˬ hawˇ-eu dziˇ dzoˆ tsoeˬ-eu lawˇ-eu jeˬ heu deuˬ-aˬ, nawˬ-ahˇ oꞈ-eu shaˬ bymˇ pyeuꞈ-eu meh. Ngaˇ jawˇ gaˇ kʼaˇ yuˇ laꞈ-euˬ muiˬ-eu shawˇ-eu lawˇ-eu jeˬ dawˬ tawˆ luꞈ, nawˇ hawˇ-eu nawˬ li deuˬ-ahˇ oꞈ-eu shaˬ bymˇ pyeuꞈ-eu meh.

¹⁰Kʼaˬ dzeˇ zaˬ deuˬ tehꞈ-ehˇ dzaˇ kʼoeˇ deuˬ dzaˬ nya-awˇ, muiˬ-eu shawˇ-eu jawˇ duˬ laꞈ kʼoeˇ naw maꞈ ya dzaˬ meh. Dzaˇ kʼoeˇ-aˬ, muiˬ-eu shawˇ-eu dzaˇ meh lehˇ naw maꞈ siˬ nya-awˬ.

¹¹“Kʼoeˇ uˬ taꞈ, Iˇsaˬleˬlaˆ tsawˇ haˬ deuˬ neh ngaˇ jawˇ gaˇ kʼaˇ yuˇ laꞈ-euˬ yaw zawˇ muiˬ-eu damˬ-eu jeˬ dawˬ tawˆ luꞈ, naw maꞈ-ahˇ oꞈ-eu shaˬ bymˇ pyeuꞈ-eu meh. Mehˬ hu paw dehꞈ daˆ leꞈ-eu aˇ yamˬ dawˬ tawˆ luꞈ laꞈ kʼoeˇ, nawˬ-ahˇ maˬ ehˇ, nawˬ li deuˬ-ahˇ maˬ ehˇ, nawˬ buˇ deuˬ-ahˇ maˬ ehˇ, kʼoeˇ deuˬ ngaˇ biꞈ ma. Zahˇ sahˇ kʼoꞈ-ahˇ tsaˬ ni shawˇ-eu tsawˇ haˬ pyeuꞈ-eu naw maꞈ-euˬ nymˇ kʼahˬ zaˬ deuˬ dawˬ tawˆ luꞈ, dzaˇ kʼoeˇ dzaˬ nya meh.

¹²“Keuˆ beh beh le-euˬ saˬ loˬ tsiˇ, aˬ gaꞈ dzaˇ uiˇ hawˇ-eu dzaˬ la gʼo cehˇ deuˬ laꞈ kʼoeˇ, aˬ cawˬ naˆ maˬ tseˇ muiˬ dzehˬ-eu deuˬ yuˇ-awˇ, Iˇsaˬleˬlaˆ tsawˇ haˬ deuˬ ngaˬ-ahˇ damˬ laˇ ngeh, kʼoeˇ deuˬ dawˬ tawˆ luꞈ ngaˇ naw maꞈ-ahˇ biꞈ-eu ma.

¹³Kʼoeˇ deuˬ dawˬ tawˆ luꞈ naw maꞈ-ahˇ oꞈ-eu shaˬ bymˇ pyeuꞈ-eu meh. Zahˇ sahˇ kʼoꞈ-ahˇ tsaˬ ni shawˇ-eu tsawˇ haˬ pyeuꞈ-eu naw maꞈ-euˬ nymˇ kʼahˬ zaˬ dawˬ tawˆ luꞈ, dzaˇ kʼoeˇ deuˬ dzaˬ nya meh.

¹⁴“Iˇsaˬleˬlaˆ tsawˇ haˬ deuˬ neh kʼaˇ damˬ-euˬ jeˬ dawˬ tawˆ luꞈ, naw maꞈ-ahˇ oꞈ-eu shaˬ bymˇ pyeuꞈ-eu meh.

¹⁵“Iˇsaˬleˬlaˆ tsawˇ haˬ deuˬ ngaˬ-ahˇ kʼaˇ damˬ laˇ-euˬ dehꞈ beh beh le-euˬ zaˬ deuˬ hawˇ-eu jeˬ zaˬ deuˬ kʼawꞈ, naw maꞈ-ahˇ oꞈ-eu shaˬ bymˇ pyeuꞈ-eu meh. Ehˇ kʼawꞈ, dehꞈ beh beh le-euˬ zaˬ-ahˇ zeuˇ kʼoꞈ geuꞈ-euˬ pyuˇ hawˇ-eu, gʼaw beh beh-euˬ maˬ shawˇ-eu jeˬ zaˬ-ahˇ zeuˇ kʼoꞈ geuꞈ-euˬ pyuˇ-ahˇ, naw maꞈ ya ha geuꞈ meh.

¹⁶Zaˬ dehꞈ le-euˬ ba la tiˬ siˬ byah laˇ naˇ, aˇ poeˬ daˇ tsehˆ taˬ-euˬ jaˆ-eu loꞈ-ehˇ, kaˇ-ahˇ tsaˬ-eu pyuˇ maˇ byaˆ ngaˬ byaˆ biꞈ-awˇ ya zeuˇ kʼoꞈ geuꞈ meh.

¹⁷Ehˇ kʼawꞈ, gʼaw beh beh-euˬ mawˇ neˇ mawˇ zaˬ, yawˇ zaˬ hawˇ-eu ciꞈ myehꞈ ciꞈ zaˬ heu deuˬ-ahˇ maˬ ya zeuˇ kʼoꞈ geuꞈ-a. Kʼoeˇ deuˬ-aˬ, maˇ maˇ ni ngaˬ-euˬ pyeuꞈ-awˇ, ngaˬ-ahˇ ya lawˇ meh. Jeˬ zaˬ kʼoeˇ deuˬ-euˬ shiˬ neh lawˇ duˬ-ahˇ byaˆ shehˬ-awˇ, tsiˇ deuˬ yuˇ-awˇ, ngaˇ nui ma tsaˬ-eu yaw saꞈ bi doˆ laˇ-eu dzaˬ dzaˬ dawˇ dawˇ lawˇ-eu jeˬ ya lawˇ meh.

¹⁸Yaw zawˇ muiˬ-eu lawˇ-eu jeˬ-euˬ kʼahˬ hawˇ-eu aˬ kuiˇ naw maꞈ-ahˇ oꞈ-eu loꞈ-ehˇ, jeˬ zaˬ kʼoeˇ deuˬ-euˬ shaˬ jiˇ kʼawꞈ naw maꞈ-ahˇ oꞈ-eu meh.

¹⁹“Mehˬ hu paw dehꞈ daˆ leꞈ-eu aˇ yamˬ dawˬ tawˆ luꞈ laꞈ kʼoeˇ, Iˇsaˬleˬlaˆ tsawˇ haˬ deuˬ neh ngaˇ jawˇ gaˇ kʼaˇ yuˇ laꞈ-euˬ yaw zawˇ muiˬ-eu damˬ-eu jeˬ dawˬ tawˆ luꞈ, nawˬ-ahˇ maˬ ehˇ, nawˬ li deuˬ-ahˇ maˬ ehˇ, nawˬ buˇ deuˬ-ahˇ maˬ ehˇ, ngaˇ biꞈ-eu ma. Heu-aˬ, nawˇ hawˇ-eu nawˬ-euˬ zaˬ nawˬ-euˬ uˆ deuˬ-ahˇ ngaˬ neh dzaˬ taˬ-euˬ, tiˬ jawˇ-iˬ maˬ cawˆ-iˇ nya-eu dawˬ ma saˇ jaˇ pyeuꞈ-eu ma.”

²⁰Kʼoeˇ naˇ, Aˬloˬ-ahˇ Sahˬpaˬ Miˬyehˇ ehˇ nehˬ-eu, “Naw maꞈ gʼaˇ duˬ, myawˬ gahˬ jeˬ biˇ maˬ jaˆ-a. Iˇsaˬleˬlaˆ miˇ kʼahˬ laꞈ kʼoeˇ, naw maꞈ gʼaˇ duˬ miˇ tsaˬ kʼawꞈ maˬ jaˆ-a. Sahˬpaˬ Miˬyehˇ pyeuꞈ-eu ngaˇ-aˬ, Iˇsaˬleˬlaˆ tsawˇ haˬ deuˬ-euˬ laꞈ kʼoeˇ jaˆ-eu naw maꞈ-euˬ jeˬ biˇ pyeuꞈ-eu ma.”

²¹Sahˬpaˬ Miˬyehˇ ehˇ-eu, “Leˬbiˇ tsawˇ haˬ deuˬ-ahˇ, Iˇsaˬleˬlaˆ tsawˇ haˬ deuˬ neh kʼaˇ yuˇ laꞈ-euˬ tseˇ bymˇ tiˬ bymˇ ngaˇ biꞈ-eu ma. Heu-aˬ, ngaˇ jawˇ-eu Sehˬ gʼawˆ laꞈ kʼoeˇ gaˇ mˇ-euˬ gʼaˬ gaˇ poeˬ pyeuꞈ-eu ma.

²²Iˇsaˬleˬlaˆ tsawˇ haˬ deuˬ Sehˬ gʼawˆ dawˬ peh maˬ paˇ ya laˇ meh. Kʼoeˇ miˇ neh, aˬ yawꞈ maꞈ kʼoeˇ taˆ shiˇ-eu jeˬ maˬ paˇ keuˆ le nya meh.

²³Aˬ kaˇ naˇ, Leˬbiˇ tsawˇ haˬ deuˬ tehꞈ-ehˇ Sehˬ gʼawˆ-ahˇ haw-eu pyaˆ-eu laꞈ kʼoeˇ, sehˬ gʼawˆ laꞈ kʼoeˇ jaˆ-eu gaˇ deuˬ ya mˇ meh. Heu-aˬ, naw maꞈ-euˬ zaˬ deuˬ uˆ deuˬ-ahˇ keuˆ ni taꞈ-eu maˬ poˆ maˬ paˇ laˇ nya-eu zahˇ sahˇ kʼoꞈ pyeuꞈ-eu meh. Iˇsaˬleˬlaˆ miˇ kʼahˬ laꞈ kʼoeˇ, Leˬbiˇ tsawˇ haˬ deuˬ ya geuꞈ tsehˆ tsehˆ-eu jeˬ biˇ maˬ jaˆ-a.

²⁴Aˬ jeˬ miˇ neh ehˇ naˇ, Iˇsaˬleˬlaˆ tsawˇ haˬ deuˬ neh yaw zawˇ muiˬ-eu damˬ-eu jeˬ loꞈ-ehˇ damˬ nehˬ laˇ-euˬ tseˇ bymˇ tiˬ bymˇ, aˬ yawꞈ maꞈ-ahˇ ngaˇ biꞈ nehˬ-eu ma. Kʼoeˇ miˇ neh, Iˇsaˬleˬlaˆ miˇ kʼahˬ laꞈ kʼoeˇ, aˬ yawꞈ maꞈ ya geuꞈ tsehˆ tsehˆ-eu jeˬ biˇ maˬ jaˆ-a lehˇ aˬ yawꞈ maꞈ-ahˇ ngaˇ ehˇ nehˬ-eu ma.”

²⁵Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ nehˬ-euˬ meh.

²⁶“Leˬbiˇ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Sahˬpaˬ Miˬyehˇ neh naw maꞈ-ahˇ biꞈ laꞈ-eu Iˇsaˬleˬlaˆ tsawˇ haˬ deuˬ-euˬ tseˇ bymˇ tiˬ bymˇ naw maꞈ za ngeh, tseˇ bymˇ tiˬ bymˇ naw maꞈ paˇ yuˇ doˆ-awˇ, yaw zawˇ muiˬ-eu damˬ-eu jeˬ loꞈ-ehˇ Sahˬpaˬ Miˬyehˇ-ahˇ ya damˬ nehˬ meh.

²⁷Yaw zawˇ muiˬ-eu damˬ-eu jeˬ heu-aˬ, mˇ dzaˬ kʼawꞈ dawˇ-eu tsawˇ haˬ tiˬ gʼaˬ neh lawˇ-euˬ keuˆ beh beh le-euˬ dzaˬ la gʼo cehˇ hawˇ-eu aˬ gaꞈ dzaˇ uiˇ-ahˇ duˇ-eu meh.

²⁸Kʼoeˇ loꞈ-ehˇ jahˇ-awˇ, naw maꞈ kʼawꞈ, Iˇsaˬleˬlaˆ tsawˇ haˬ deuˬ neh damˬ nehˬ laˇ-awˇ kʼaˇ za-euˬ tseˇ bymˇ tiˬ bymˇ laꞈ kʼoeˇ, Sahˬpaˬ Miˬyehˇ-euˬ shaˬ bymˇ pyeuꞈ-eu yaw zawˇ muiˬ-eu damˬ-eu jeˬ aˬ yawꞈ-ahˇ ya damˬ meh. Yaw zawˇ muiˬ-eu damˬ-eu jeˬ heu, Sahˬpaˬ Miˬyehˇ gʼaˇ duˬ, Aˬloˬ-ahˇ naw maꞈ ya biꞈ nehˬ meh.

²⁹Naw maꞈ neh za-euˬ jeˬ laꞈ kʼoeˇ, kʼaˇ muiˬ dzehˬ-eu jeˬ damˬ-awˬ.

³⁰Mˇ dzaˬ kʼawꞈ dawˇ-eu tsawˇ haˬ tiˬ gʼaˬ tiˬ jeˬ paˬ lawˇ ngeh, dzehˬ laˇ-euˬ deuˬ aˬ yawꞈ paˇ geuꞈ kʼoꞈ-eu meh. Kʼoeˇ loꞈ-ehˇ duˇ ni, naw maꞈ kʼawꞈ, kʼaˇ muiˬ dzehˬ-eu deuˬ damˬ gʼaˬ ngeh, dzehˬ laˇ-euˬ deuˬ naw maꞈ geuꞈ-awˬ.

³¹Dzehˬ laˇ-euˬ kʼoeˇ deuˬ-ahˇ, naw maꞈ hawˇ-eu naw maꞈ-euˬ miˬ sawˇ zaˬ deuˬ jawˇ duˬ maˬ tseˇ ni dzaˬ nya meh. Aˬ jeˬ miˇ neh ehˇ naˇ, kʼoeˇ-aˬ, Sehˬ gʼawˆ laꞈ kʼoeˇ naw maꞈ gaˇ mˇ-eu miˇ neh za-euˬ gʼaˬ gaˇ poeˬ meh.

³²Muiˬ dzehˬ-eu deuˬ yuˇ doˆ-awˇ Sahˬpaˬ Miˬyehˇ-ahˇ naw maꞈ biꞈ gʼaˬ naˇ, dzeˇ-eu deuˬ-ahˇ naw maꞈ dzaˬ ngeh, naw maꞈ iˬ baˇ maˬ ahˇ-a. Ehˇ kʼawꞈ, muiˬ dzehˬ-eu deuˬ yuˇ doˆ-awˇ maˬ lawˇ mi naˆ-ehˇ dzaˬ-eu laꞈ kʼoeˇ, Iˇsaˬleˬlaˆ tsawˇ haˬ deuˬ neh damˬ-euˬ muiˬ-eu shawˇ-eu jeˬ-ahˇ maˬ ya laˆ jawꞈ-eu gʼaˇ duˬ yahˇ-awˬ. Kʼoeˇ loꞈ-ehˇ jahˇ naˇ, naw maꞈ sehꞈ gaˇ ya daˬ tehꞈ-a.”