Read Akha Bawˇtsahˬ 20 Bible Online

Bawˇtsahˬ 20 - Akha bible

Bawˇtsahˬ 20

¹Ba la yaw beh siˬ-ahˇ, Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ, Ziˇnaˆ lehˇ kuˇ-eu bawˇ tsahˬ bawˇ dahˇ laꞈ kʼoeˇ oe keuˆ-awˇ, Kaˬdeˬshaˇ lehˇ kuˇ-eu jawˇ duˬ-ahˇ jawˇ naˬ-euˬ meh. Kʼoeˇ gaˇ Miˇliˬyaˬ shiˇ-awˇ, baꞈ pahˬ nehˬ-euˬ meh.

²Aˬ yawꞈ maꞈ jawˇ naˬ-euˬ jawˇ duˬ kʼoeˇ tsahˇ iˇ cuꞈ maˬ jaˆ-eu miˇ neh, Moˇseˬ hawˇ-eu Aˬloˬ jawˇ gaˇ Iˇsaˬleˬlaˆ tsawˇ haˬ deuˬ uiˬ leˇ-euˬ meh.

³Aˬ yawꞈ maꞈ Moˇseˬ-ahˇ iˬ baˇ taˬ-eu laꞈ kʼoeˇ ehˇ-eu, “Nga maꞈ-euˬ cawˬ Iˇsaˬleˬlaˆ tsawˇ haˬ kʼoeˇ deuˬ nehˬ-ehˇ Sahˬpaˬ Miˬyehˇ-euˬ Sehˬ gʼawˆ mehˬ shi shiˇ yaꞈ law nmˇ-aˬ, zaˬ dzehˬ law hawˇ miˇ-a.

⁴Aˬ jeˬ miˇ neh nawˇ nga maꞈ-ahˇ bawˇ tsahˬ bawˇ dahˇ heu hmˬ laꞈ kʼoeˇ sheuˬ ahˇ nehˬ laꞈ teˬ. Nga maꞈ hawˇ-eu nga maꞈ-euˬ jeˬ zaˬ tiˬ gaˇ bi shiˇ-eu lehˇ sheuˬ ahˇ nehˬ laꞈ te loˇ.

⁵Aˬ jeˬ miˇ neh Iˇjiˇtuˆ miˇ kʼahˬ laꞈ kʼoeˇ neh nga maꞈ-ahˇ nawˇ sheuˬ doˆ laꞈ-awˇ, tiˬ jeˬ-iˬ maˬ ka dzaˬ nya-eu doeˇ dui dui-eu jawˇ duˬ heu tsahˇ-ahˇ sheuˬ laꞈ teˬ. Dzaˬ la gʼo cehˇ, siˬ guˬ, aˬ gaꞈ, aˇ ka uˆ aˇ bawˇ, heu deuˬ kʼawꞈ maˬ dehꞈ ngaˬ tawˇ. Kʼoeˇ uˬ taꞈ, dawˇ-eu iˇ cuꞈ kʼawꞈ maˬ jaˆ nga tawˇ.”

⁶Moˇseˬ hawˇ-eu Aˬloˬ aˬ nyaꞈ tsawˇ haˬ kʼoeˇ deuˬ jawˇ gaˇ neh doˆ-iˇ-awˇ, Sehˬ gʼawˆ gʼoˆ kʼehˬ-ahˇ yawꞈ leˇ-euˬ meh. Kʼoeˇ naˇ, aˬ yawꞈ nyaꞈ myaˆ pyawˬ miˇ tsaˬ-ahˇ tuˆ ni awˆ byaˆ-awˇ, Sahˬpaˬ Miˬyehˇ-euˬ yaw shehꞈ kʼahˬ sehˇ bya doˆ le-euˬ meh.

⁷Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ-eu meh.

⁸“Dawˬ ma saˇ jaˇ Bahˬ keuˆ mehˬ shi jaˆ-eu gawˬ yoeˬ yuˇ-awˇ, Iˇsaˬleˬlaˆ tsawˇ haˬ dawˬ tawˆ luꞈ-ahˇ Aˬloˬ naw nyaꞈ kuˇ uiˬ-awˬ. Aˬ yawꞈ maꞈ dawˬ tawˆ luꞈ mehˬ shi, kʼoeˇ gaˇ jaˆ-eu kʼaˬ lo kʼoeˇ siˬ-ahˇ dawˬ ngehˬ nehˬ-awˬ. Kʼaˬ lo kʼoeˇ siˬ laꞈ kʼoeˇ iˇ cuꞈ yoeˇ doˆ le tehꞈ-a. Kʼoeˇ loꞈ-ehˇ jahˇ-awˇ, Iˇsaˬleˬlaˆ tsawˇ haˬ deuˬ hawˇ-eu aˬ yawꞈ maꞈ-euˬ jeˬ zaˬ deuˬ dawˇ-eu gʼaˇ duˬ, kʼaˬ lo kʼoeˇ siˬ-ahˇ iˇ cuꞈ bi yoeˇ doˆ le-awˬ.”

⁹Sahˬpaˬ Miˬyehˇ neh dawˬ biꞈ-euˬ loꞈ-ehˇ, gawˬ yoeˬ kʼoeˇ yoeˬ Moˇseˬ yuˇ laˬ leˇ-euˬ meh.

¹⁰Moˇseˬ hawˇ-eu Aˬloˬ aˬ nyaꞈ Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ-ahˇ kʼaˬ lo kʼoeˇ siˬ mehˬ shi kuˇ uiˬ-awˇ, “Puiˬ-eu tsawˇ haˬ deuˬ-oˇ, naw maꞈ gʼaˇ duˬ kʼaˬ lo heu siˬ-ahˇ neh ngaˇ iˇ cuꞈ ya bi yoeˇ le ta loˇ” lehˇ Moˇseˬ ehˇ-eu meh.

¹¹Kʼoeˇ naˇ, Moˇseˬ gawˬ yoeˬ cawˬ ja-awˇ, kʼaˬ lo kʼoeˇ siˬ-ahˇ nyiˬ laꞈ juiꞈ gʼeh-euˬ meh. Kʼoeˇ ngeh, iˇ cuꞈ lawˇ gawˆ loꞈ-ehˇ iˇ cuꞈ yoeˇ doˆ le-awˇ, tsawˇ haˬ kʼoeˇ deuˬ hawˇ-eu jeˬ zaˬ deuˬ iˇ cuꞈ dawˇ-euˬ meh.

¹²Ehˇ kʼawꞈ, Moˇseˬ hawˇ-eu Aˬloˬ aˬ nyaꞈ-ahˇ Sahˬpaˬ Miˬyehˇ nui ma maˬ saˇ-ehˇ ehˇ-eu, “Naw nyaꞈ-aˬ, ngaˬ-ahˇ jah-eu maˬ byah maˬ loꞈ-euˬ laꞈ kʼoeˇ, Iˇsaˬleˬlaˆ tsawˇ haˬ heu myaˆ ni gʼeh-eu mehˬ shi, ngaˬ-euˬ muiˬ-eu shawˇ-eu baoˬ-ahˇ yaw zeu maˬ baw-eu miˇ neh, tsawˇ haˬ heu deuˬ-ahˇ biꞈ ma lehˇ ngaˬ neh saˇ jaˇ dzaˬ taˬ-euˬ miˇ kʼahˬ laꞈ kʼoeˇ, aˬ yawꞈ maꞈ-ahˇ naw nyaꞈ maˬ paˇ ya sheuˬ uˇ gʼeh meh.”

¹³Meˬliˇbaˬ[5] lehˇ kuˇ-eu jawˇ duˬ kʼoeˇ tsahˇ-ahˇ Iˇsaˬleˬlaˆ tsawˇ haˬ deuˬ Sahˬpaˬ Miˬyehˇ-ahˇ iˬ baˇ taˬ-eu dawˬ ngehˬ-awˇ, jawˇ duˬ kʼoeˇ tsahˇ-ahˇ, Sahˬpaˬ Miˬyehˇ muiˬ-eu shawˇ-eu gaˇ kawˆ aˬ yawꞈ maꞈ-ahˇ bi siˬ bi mawˇ-euˬ meh.

¹⁴Kaˬdeˬshaˇ meuˬ-ahˇ Eˬdoˬ sahˬ paˬ jawˇ gaˇ Moˇseˬ tsawˇ haˬ pyehˬ gʼeh-awˇ, heu loꞈ-ehˇ bi tsaꞈ-iˇ-euˬ meh. “Nawˬ-euˬ aˬ yuiꞈ aˬ nyiˇ pyeuꞈ-eu Iˇsaˬleˬlaˆ tsawˇ haˬ deuˬ heu loꞈ-ehˇ dawˬ tsaꞈ tsaꞈ ahˇ leꞈ-eu ma. Nga maꞈ ya tahˬ puˬ-eu shaˬ-euˬ zahˬ-eu jeˬ dawˬ tawˆ luꞈ-ahˇ nawˇ siˬ nya meh.

¹⁵Nga maꞈ-euˬ aˬ poeˬ aˬ bawˇ deuˬ Iˇjiˇtuˆ miˇ kʼahˬ-ahˇ aˬ joˆ-ehˇ iˇ-euˬ gaˇ kawˆ maˬ ehˇ, kʼoeˇ gaˇ nga maꞈ gʼawˬ mya kʼoꞈ jawˇ yaꞈ-euˬ gaˇ kawˆ maˬ ehˇ, nga maꞈ-euˬ aˬ poeˬ aˬ bawˇ deuˬ hawˇ-eu nga maꞈ-ahˇ Iˇjiˇtuˆ tsawˇ haˬ deuˬ aˬ joˆ-ehˇ kʼehˬ nehˬ kʼaˆ nehˬ laꞈ-euˬ gaˇ kawˆ maˬ ehˇ,

¹⁶caw ba le-awˬ lehˇ Sahˬpaˬ Miˬyehˇ-ahˇ nga maꞈ guˇ guˇ-ehˇ shaˇ-euˬ gaˇ kawˆ maˬ ehˇ, nga maꞈ-euˬ shaˇ dawˬ-ahˇ aˬ yawꞈ naˇ haˬ-awˇ, mˬ taˆ gʼaˬ kʼehˇ tiˬ gʼaˬ pyehˬ gʼeh leꞈ-euˬ laꞈ kʼoeˇ nga maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh bi sheuˬ doˆ nehˬ laꞈ-euˬ gaˇ kawˆ maˬ ehˇ, nawˇ siˬ nya jiˇ meh. Nawˬ-euˬ miˇ kʼahˬ laꞈ kʼoeˇ jaˆ-eu Kaˬdeˬshaˇ meuˬ-ahˇ nymˬ-mˇ nga maꞈ jawˇ luꞈ-eu ma.

¹⁷Nawˬ-euˬ miˇ kʼahˬ laꞈ kʼoeˇ nga maꞈ-ahˇ bi cah tsehˆ laꞈ-awˬ. Nga maꞈ hawˇ-eu nga maꞈ-euˬ jeˬ zaˬ deuˬ gaˇ ma caw caw-ehˇ tehꞈ-ehˇ cah-awˇ, naw maꞈ-euˬ deh yaˇ hawˇ-eu aˬ gaꞈ yaˇ kmˇ deuˬ-ahˇ maˬ uˇ-iˇ-eu uˬ taꞈ, naw maꞈ-euˬ lah duˬ-ahˇ iˇ cuꞈ maˬ kʼawꞈ dawˇ ni cah ma. Nawˬ-euˬ miˇ kʼahˬ maˬ iˇ dzeuˇ kʼoeˇ keuˆ ni, gaˇ jawˬ caw caw-ehˇ tehꞈ-ehˇ nga maꞈ cah ma.”

¹⁸Ehˇ kʼawꞈ, Eˬdoˬ tsawˇ haˬ deuˬ ehˇ-eu, “Nga maꞈ-euˬ miˇ kʼahˬ laꞈ kʼoeˇ, naw maꞈ-ahˇ maˬ bi cah tsehˆ. Naw maꞈ cah tsehˆ naˇ, nga maꞈ oe-awˇ guiˇ deuˆ le ma.”

¹⁹Iˇsaˬleˬlaˆ tsawˇ haˬ deuˬ paˇ ehˇ-eu, “Nga maꞈ gaˇ jawˬ caw caw-ehˇ tehꞈ-ehˇ cah-awˇ, nga maꞈ-euˬ jeˬ zaˬ deuˬ naw maꞈ-euˬ iˇ cuꞈ dawˇ naˇ aˇ poeˬ biꞈ ma.”

²⁰Ehˇ kʼawꞈ, Eˬdoˬ tsawˇ haˬ deuˬ Iˇsaˬleˬlaˆ tsawˇ haˬ deuˬ-ahˇ maˬ bi cah tsehˆ lehˇ ehˇ-awˇ, Iˇsaˬleˬlaˆ tsawˇ haˬ deuˬ-ahˇ guiˇ deuˆ-eu gʼaˇ duˬ, myaˬ dui dui-eu guiˇ guiˇ maꞈ oe-euˬ meh.

²¹Eˬdoˬ tsawˇ haˬ deuˬ Iˇsaˬleˬlaˆ tsawˇ haˬ deuˬ-ahˇ aˬ yawꞈ maꞈ-euˬ miˇ kʼahˬ laꞈ kʼoeˇ maˬ bi cah tsehˆ-eu miˇ neh, Iˇsaˬleˬlaˆ tsawˇ haˬ deuˬ gaˇ jaw jaw-awˇ, gaˇ ma yawˬ kahˇ yawˬ-ahˇ iˇ-euˬ meh.

²²Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ Kaˬdeˬshaˇ meuˬ-ahˇ neh doˆ le-awˇ, Hawˇlaˆ gawˬ jawˬ-ahˇ laˇ keuˆ-euˬ meh.

²³Eˬdoˬ miˇ kʼahˬ-euˬ miˇ kaˬ dawˬ peh Hawˇlaˆ gawˬ jawˬ-ahˇ, Moˇseˬ hawˇ-eu Aˬloˬ-ahˇ Sahˬpaˬ Miˬyehˇ ehˇ nehˬ-eu,

²⁴“Iˇsaˬleˬlaˆ tsawˇ jeuˬ-ahˇ ngaˬ neh saˇ jaˇ dzaˬ taˬ-euˬ miˇ kʼahˬ-ahˇ, Aˬloˬ maˬ paˇ ya le keuˆ meh. Aˬ yawꞈ ziˇ jiˇ yamˬ keuˆ le taˬ-euˬ meh. Aˬ jeˬ miˇ neh ehˇ naˇ, Meˬliˇbaˬ lehˇ kuˇ-eu jawˇ duˬ-ahˇ ngaˬ-euˬ dawˬ-ahˇ naw nyaꞈ puiˬ-euˬ meh.

²⁵Aˬloˬ hawˇ-eu aˬ yawꞈ-euˬ aˬ li Eˇlaˬzaˬ-ahˇ, Hawˇlaˆ gawˬ jawˬ-ahˇ sheuˬ daˆ leꞈ-awˬ.

²⁶Kʼoeˇ gaˇ, Aˬloˬ dm luꞈ-eu piˇ ma-euˬ dm gʼaˬ dm lmˇ lehˆ-awˇ, Eˇlaˬzaˬ-ahˇ bi dm-awˬ. Aˬloˬ-aˬ, kʼoeˇ gaˇ ziˇ ya jiˇ tehꞈ-a” lehˇ ehˇ-eu meh.

²⁷Sahˬpaˬ Miˬyehˇ neh dawˬ kʼaˇ biꞈ-euˬ loꞈ-ehˇ, Moˇseˬ mˇ-euˬ meh. Tsawˇ haˬ aˇ maꞈ aˇ muˇ dawˬ tawˆ luꞈ mehˬ shi, Hawˇlaˆ gawˬ jawˬ kʼoeˇ taˆ aˬ yawꞈ maꞈ daˆ leˇ-euˬ meh.

²⁸Aˬloˬ dm luꞈ-euˬ piˇ ma-euˬ dm gʼaˬ dm lmˇ deuˬ Moˇseˬ lehˆ-awˇ, Eˇlaˬzaˬ-ahˇ bi dm-euˬ meh. Gawˬ jawˬ kʼoeˇ jawˬ-euˬ uˬ du Aˬloˬ ziˇ jiˇ yaꞈ-awˇ, Moˇseˬ hawˇ-eu Eˇlaˬzaˬ aˬ ha nyaꞈ gʼoꞈ ka le-euˬ meh.

²⁹Tsawˇ haˬ aˇ maꞈ aˇ muˇ dawˬ tawˆ luꞈ Aˬloˬ shiˇ-euˬ gaˇ kawˆ siˬ nya-awˇ, smˬ tseˇ nah keuˆ ni aˬ yawꞈ gʼaˇ duˬ tsawˇ ngoeˇ ngoeˇ-euˬ meh.