Read Akha Bawˇtsahˬ 22 Bible Online

Bawˇtsahˬ 22 - Akha bible

Bawˇtsahˬ 22

¹Iˇsaˬleˬlaˆ tsawˇ haˬ deuˬ mehˬ hu paw paˇ doˆ-iˇ-awˇ, Yeˬliˇkoˇ meuˬ-ahˇ neh Yawˇdaˬ lawˇ baˬ-euˬ nahˇ ma doˆ kʼehˬ paw baˬ-ahˇ jaˆ-eu Mawˇbaˆ miˇ kʼahˬ deh ga deuˬ-ahˇ jawˇ naˬ-euˬ meh.

²Aˬmawˇliˆ tsawˇ haˬ deuˬ-ahˇ Iˇsaˬleˬlaˆ tsawˇ haˬ deuˬ neh jahˇ nehˬ-euˬ gaˇ kawˆ hawˇ-eu, Iˇsaˬleˬlaˆ tsawˇ haˬ deuˬ aˇ myaˆ ni myaˬ-eu gaˇ kawˆ-ahˇ, Ziˇpoˬ-euˬ aˬli pyeuꞈ-eu Mawˇbaˆ sahˬ paˬ Baˬlehˇ ya gaˬ ngeh,

³aˬ yawꞈ hawˇ-eu aˬ yawꞈ-euˬ tsawˇ haˬ dawˬ tawˆ luꞈ guˆ dui dui-euˬ meh.

⁴Miˇdiˬyaˬ tsawˇ haˬ aˬ yuiꞈ aˬ tsu deuˬ-ahˇ Mawˇbaˆ tsawˇ haˬ deuˬ ehˇ nehˬ-eu, “Miˇ tsaˬ-ahˇ dehꞈ luꞈ-eu yaˇ moꞈ deuˬ-ahˇ mawˇ neˇ mawˇ gaw neh bi dzaˬ byoˆ-euˬ loꞈ-ehˇ, aˬ dui dawˬ peh kʼaˇ jaˆ-eu jeˬ-ahˇ tsawˇ haˬ teu muˇ neh bi laˆ cawˆ byoˆ jiˇ-eu keuˆ laˇ-euˬ nga.” Kʼoeˇ ngeh, sahˬ paˬ Baˬlehˇ-aˬ,

⁵tsawˇ haˬ pyehˬ gʼeh-awˇ, Aˬmaw miˇ kʼahˬ Uˇpaˬlaˇ lawˇ baˬ dawˬ peh Peˬdawˬ meuˬ-ahˇ jawˇ-eu Beˬyoˇ-euˬ aˬ li Baˬlamˬ-ahˇ heu loꞈ-ehˇ dawˬ tsaꞈ bi tsaꞈ-iˇ-euˬ meh. “Iˇjiˇtuˆ miˇ kʼahˬ-ahˇ neh laˇ taˬ-euˬ tsawˇ jeuˬ tiˬ jeuˬ yawˬ gaˇ na luꞈ jawˇ byah jiˇ-awˇ, aˬ dui-euˬ miˇ kʼahˬ-ahˇ ceh geuꞈ laˇ paˬ-ehˇ gʼeh-eu gaˇ kawˆ nawˬ-ahˇ ngaˇ bi siˬ-eu ma.

⁶Aˬ yawꞈ maꞈ aˬ dui maꞈ myaˆ maˬ tseˇ myaˬ dzehˬ-eu miˇ neh, nawˇ tiˬ poˆ laˇ-awˇ, ngaˬ-euˬ gʼaˇ duˬ aˬ yawꞈ maꞈ-ahˇ yaˬ kʼehˇ yaˬ nehˬ laˇ sheˇ. Kʼoeˇ loꞈ-ehˇ jahˇ naˇ, aˬ yawꞈ maꞈ-ahˇ aˬ dui gʼaˬ leˇ-awˇ, miˇ kʼahˬ heu kʼahˬ laꞈ kʼoeˇ neh aˬ yawꞈ maꞈ-ahˇ teh doˆ nya tehꞈ-a. Nawˇ aˬ cawˬ-ahˇ dawˬ ngehˬ gʼeh nehˬ ngeh, aˬ cawˬ guiˬ lahˬ za-awˇ, nawˇ aˬ cawˬ-ahˇ yaˬ kʼehˇ yaˬ ngeh, nawˬ neh yaˬ kʼehˇ kʼaˇ yaˬ-eu loꞈ-ehˇ aˬ cawˬ kʼoeˇ taˆ keuˆ le-euˬ gaˇ kawˆ ngaˇ siˬ nya-eu ma.”

⁷Kʼoeˇ naˇ, Mawˇbaˆ tsawˇ jeuˬ hawˇ-eu Miˇdiˬyaˬ tsawˇ jeuˬ aˬ yuiꞈ aˬ tsu deuˬ-aˬ, yaˬ kʼehˇ yaˬ poeˬ biꞈ-eu gʼaˇ duˬ laꞈ sawˬ yuˇ-awˇ, Baˬlamˬ jawˇ gaˇ iˇ-awˇ, Baˬlehˇ neh bi tsaꞈ-euˬ dawˬ deuˬ tsaꞈ nehˬ-iˇ-euˬ meh.

⁸Kʼoeˇ ngeh, aˬ yawꞈ maꞈ-ahˇ Baˬlamˬ ehˇ-eu, “Heu gaˇ tiˬ miˇ yaꞈ-awˬ. Sahˬpaˬ Miˬyehˇ neh ngaˬ-ahˇ kʼaˇ bi ehˇ-eu jeˬ ni shawˬ nah ngaˇ naw maꞈ-ahˇ ehˇ nehˬ ma.” Kʼoeˇ naˇ, Mawˇbaˆ tsawˇ haˬ aˬ yuiꞈ aˬ tsu kʼoeˇ deuˬ Baˬlamˬ jawˇ gaˇ yaꞈ-euˬ meh.

⁹Baˬlamˬ jawˇ gaˇ Miˬyehˇ oe-awˇ, “Nawˬ nehˬ-ehˇ jawˇ luꞈ-eu tsawˇ haˬ heu deuˬ aˬ suˇ gʼaˬ-a” lehˇ naˇ haˬ-euˬ meh.

¹⁰Baˬlamˬ ehˇ-eu, “Mawˇbaˆ sahˬ paˬ Baˬlehˇ neh aˬ yawꞈ maꞈ-ahˇ pyehˬ gʼeh leꞈ-awˇ, heu loꞈ-ehˇ bi tsaꞈ le-euˬ meh.

¹¹‘Iˇjiˇtuˆ miˇ kʼahˬ-ahˇ neh laˇ-euˬ tsawˇ haˬ deuˬ miˇ kʼahˬ kʼahˬ lah ni jawˇ byah jiˇ taˬ-euˬ meh. Tsawˇ haˬ kʼoeˇ deuˬ-ahˇ aˬ yawꞈ guiˇ deuˆ gʼaˬ-awˇ teh doˆ nya ni, aˬ yawꞈ gʼaˇ duˬ tsawˇ haˬ kʼoeˇ deuˬ kʼoeˇ taˆ yaˬ kʼehˇ yaˬ nehˬ laˇ-awˬ’ lehˇ bi tsaꞈ le-euˬ meh.”

¹²Miˬyehˇ ehˇ-eu, “Tsawˇ haˬ heu deuˬ nehˬ-ehˇ le-awˬ. Iˇsaˬleˬlaˆ tsawˇ haˬ deuˬ-ahˇ yaˬ kʼehˇ taˬ yaˬ. Aˬ jeˬ miˇ neh ehˇ naˇ, Iˇsaˬleˬlaˆ tsawˇ haˬ deuˬ-aˬ, guiˬ lahˬ za taˬ-euˬ tsawˇ jeuˬ pyeuꞈ-eu meh.”

¹³Yawˬ shawˬ yawˬ, Baˬlehˇ neh dawˬ tsaꞈ bi tsaꞈ le-euˬ tsawˇ haˬ deuˬ jawˇ gaˇ Baˬlamˬ iˇ-awˇ, heu loꞈ-ehˇ ehˇ nehˬ-euˬ meh. “Naw maꞈ gʼoꞈ leˇ-awˬ. Aˬ jeˬ miˇ neh ehˇ naˇ, Sahˬpaˬ Miˬyehˇ ngaˬ-ahˇ naw maꞈ nehˬ-ehˇ maˬ bi le laꞈ-a.”

¹⁴Kʼoeˇ naˇ, tsawˇ haˬ kʼoeˇ deuˬ Baˬlehˇ jawˇ gaˇ gʼoꞈ leˇ-awˇ, aˬ yawꞈ maꞈ-euˬ mehˬ nah Baˬlamˬ maˬ caw teh laˇ-eu gaˇ kawˆ tsaꞈ nehˬ leˇ-euˬ meh.

¹⁵Kʼoeˇ naˇ, yaw beh poˆ pyehˬ gʼeh-euˬ deuˬ myaˆ maˬ tseˇ tsawˇ haˬ aˇ gʼaˬ myaˬ dzehˬ-awˇ, kʼoeˇ deuˬ naˆ maˬ tseˇ huiˬ dzehˬ-eu aˬ yuiꞈ aˬ tsu deuˬ Baˬlehˇ paˇ pyehˬ gʼeh-euˬ meh.

¹⁶Baˬlamˬ jawˇ gaˇ aˬ yawꞈ maꞈ iˇ-awˇ, Baˬlehˇ-euˬ dawˬ heu loꞈ-ehˇ tsaꞈ nehˬ-euˬ meh. “Aˬ jeˬ pyeuꞈ kʼawꞈ ngaˇ jawˇ gaˇ maˬ laˇ-ehˇ taˬ byehˇ nehˬ laꞈ.

¹⁷Aˇ poeˬ kʼaˆ dui dui-eu laꞈ sawˬ deuˬ hawˇ-eu nawˇ kʼaˇ shaˇ-eu jeˬ ngaˇ nawˬ-ahˇ biꞈ ma. Laˇ-awˬ. Ngaˬ-euˬ gʼaˇ duˬ tsawˇ haˬ heu deuˬ-ahˇ yaˬ kʼehˇ yaˬ nehˬ laꞈ-awˬ.”

¹⁸Baˬlamˬ ehˇ-eu, “Baˬlehˇ kʼaˇ jaˆ-eu pyuˇ hawˇ-eu shuiˇ deuˬ ngaˬ-ahˇ biꞈ jiˇ laꞈ kʼawꞈ, nyiˇ dui dui-eu gaˇ tiˬ hmˬ laꞈ kʼoeˇ tehꞈ-ehˇ kʼawꞈ, ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ dawˬ-ahˇ ngaˇ maˬ leuˇ nya-a.

¹⁹Ehˇ kʼawꞈ, yaw beh poˆ oe-euˬ deuˬ yaꞈ-euˬ loꞈ-ehˇ, naw maꞈ kʼawꞈ heu gaˇ tiˬ miˇ yaꞈ-awˬ. Sahˬpaˬ Miˬyehˇ ngaˬ-ahˇ tiˬ jeˬ paˬ ehˇ paˬ-ehˇ gʼeh-eu jaˆ nga siˬ loˇ lehˇ ngaˇ haw la.”

²⁰Kʼoeˇ ngeh miˇ, Baˬlamˬ jawˇ gaˇ Miˬyehˇ oe-awˇ, “Aˬ yawꞈ maꞈ nehˬ-ehˇ laˇ-awˬ lehˇ tsawˇ haˬ heu deuˬ nawˬ-ahˇ kuˇ le-euˬ ngeuˇ naˇ, lehˬ hmˬ-awˇ le-awˬ. Ehˇ kʼawꞈ, ngaˇ kʼaˇ bi ehˇ-euˬ loꞈ-ehˇ tehꞈ-ehˇ ehˇ lawˬ.”

²¹Yawˬ shawˬ yawˬ Baˬlamˬ mahˬ tahˬ laˆ dziˬ gʼa laˆ dawˆ-awˇ, Mawˇbaˆ tsawˇ jeuˬ aˬ yuiꞈ aˬ tsu deuˬ-euˬ mehˬ nah caw teh gʼeh leꞈ-euˬ meh.

²²Baˬlamˬ kʼoeˇ loꞈ-ehˇ le-euˬ miˇ neh Sahˬpaˬ Miˬyehˇ nui ma pehˇ-awˇ, Baˬlamˬ hawˇ-eu aˬ yawꞈ-euˬ zaˬ kʼaˆ nyiˬ gʼaˬ mahˬ tahˬ laˆ dziˬ-awˇ gaˇ pehˇ le luꞈ ngeh, Sahˬpaˬ Miˬyehˇ-euˬ mˬ taˆ gʼaˬ kʼehˇ gaˇ ma-ahˇ yawꞈ tsoeˬ-euˬ meh.

²³Mˬ taˆ gʼaˬ kʼehˇ mi cehˇ tuˆ tehˬ-awˇ gaˇ ma-ahˇ yawꞈ luꞈ gaˇ mahˬ tahˬ laˆ kʼoeˇ mawˇ ya mawˇ ngeh, gaˇ ma-ahˇ maˬ cah ni deh yaˇ paw ciˬ pyawˇ-awˇ iˇ uˇ gʼeh-euˬ meh. Baˬlamˬ gʼeh mahˬ tahˬ laˆ-ahˇ diˬ-awˇ gaˇ ma paw paˇ teh daˆ-euˬ meh.

²⁴Kʼoeˇ naˇ, aˬ gaꞈ yaˇ kmˇ nyiˬ kmˇ yaw kaˬ-ahˇ, nyiˬ paw luꞈ kʼaˬ lo gawˬ taˬ-euˬ yaw kaˬ-ahˇ gaˇ ma suꞈ ti ni gʼeh gaˇ mˬ taˆ gʼaˬ kʼehˇ kʼoeˇ gʼaˬ paˇ yawꞈ luꞈ-eu meh.

²⁵Mˬ taˆ gʼaˬ kʼehˇ kʼoeˇ gʼaˬ-ahˇ mahˬ tahˬ laˆ kʼoeˇ mawˇ paˇ ya mawˇ ngeh, kʼaˬ lo gawˬ taˬ-euˬ gaˇ ciˬ tahˬ gʼeh-awˇ, Baˬlamˬ-euˬ aˬ kuiˇ kʼaˬ lo-ahˇ ciˬ jeˬ-euˬ meh. Kʼoeˇ ngeh, mahˬ tahˬ laˆ kʼoeˇ mawˇ-ahˇ Baˬlamˬ tiˬ poˆ paˇ diˬ-euˬ meh.

²⁶Kʼoeˇ naˇ, mˬ taˆ gʼaˬ kʼehˇ kʼoeˇ gʼaˬ paˇ iˇ huˬ gʼeh-awˇ, suꞈ dui dui-awˇ gaˇ jaw jaw doˆ kʼaˇ maˬ za-eu tsahˇ-ahˇ paˇ yawꞈ luꞈ-eu meh.

²⁷Kʼoeˇ poˆ jawˇ, mˬ taˆ gʼaˬ kʼehˇ kʼoeˇ gʼaˬ-ahˇ mahˬ tahˬ laˆ kʼoeˇ mawˇ ya mawˇ ngeh, coˬ lah gʼeh-euˬ meh. Kʼoeˇ ngeh, Baˬlamˬ nui ma pehˇ laˇ-awˇ, mahˬ tahˬ laˆ kʼoeˇ mawˇ-ahˇ daˇ cuiˇ yuˇ-awˇ diˬ-euˬ meh.

²⁸Kʼoeˇ ngeh, Sahˬpaˬ Miˬyehˇ mahˬ tahˬ laˆ kʼoeˇ mawˇ-ahˇ dawˬ ngehˬ nya-eu baoˬ biꞈ nehˬ-awˇ, “Nawˇ ngaˬ-ahˇ smˬ poˆ keuˆ ni diˬ paˬ-ehˇ, nawˬ-ahˇ ngaˇ mˇ lehˬ taˬ-euˬ aˬ jeˬ jaˆ ta” lehˇ mahˬ tahˬ laˆ kʼoeˇ mawˇ Baˬlamˬ-ahˇ ehˇ nehˬ-euˬ meh.

²⁹Baˬlamˬ ehˇ-eu, “Nawˇ ngaˬ-ahˇ tsawˇ uˬ laˆ uˬ nehˬ laꞈ-euˬ miˇ neh diˬ-eu maˬ ngeuˇ nga loˇ. Mi cehˇ ahˇ law nmˇ-aˬ, nawˬ-ahˇ ngaˇ sehꞈ ma.”

³⁰Mahˬ tahˬ laˆ kʼoeˇ mawˇ ehˇ-eu, “Dzeuˇ laˇ ngeh neh iˬ nah keuˆ ni nawˇ ngaˬ-ahˇ dziˬ luꞈ-eu maˬ ngeuˇ loˇ. Ngaˇ nawˬ-ahˇ heu loꞈ-ehˇ aˇ myaˆ poˆ jahˇ nehˬ laꞈ haw taˬ.” Baˬlamˬ gʼeh, “Dzeuˇ laˇ ngeh nawˇ ngaˬ-ahˇ heu loꞈ-ehˇ tiˬ poˆ-iˬ maˬ jahˇ nehˬ laꞈ haw-aˬ” lehˇ ehˇ nehˬ-euˬ meh.

³¹Kʼoeˇ ngeh, mi cehˇ tuˆ tehˬ-awˇ yawꞈ luꞈ-eu mˬ taˆ gʼaˬ kʼehˇ kʼoeˇ gʼaˬ-ahˇ mawˇ nya ni, Baˬlamˬ-euˬ myaˆ nuiˆ-ahˇ Sahˬpaˬ Miˬyehˇ pah nehˬ-euˬ meh. Baˬlamˬ coˬ lah-awˇ, miˇ tsa awˆ byaˆ taˬ-euˬ meh.

³²Mˬ taˆ gʼaˬ kʼehˇ kʼoeˇ gʼaˬ ehˇ-eu, “Aˬ jeˬ miˇ neh nawˬ-euˬ mahˬ tahˬ laˆ-ahˇ smˬ poˆ keuˆ ni nawˇ heu loꞈ-ehˇ diˬ te. Gaˇ ma heu kahˇ-ahˇ nawˇ le-eu maˬ tsaˬ-eu miˇ neh, laˆ tsoeˬ le-eu lehˇ ngaˇ oe-euˬ ma.

³³Ehˇ kʼawꞈ, nawˬ-euˬ mahˬ tahˬ laˆ ngaˬ-ahˇ mawˇ-awˇ, smˬ poˆ keuˆ ni gaˇ jaw jaw-euˬ meh. Maˬ ngeuˇ law nmˇ-aˬ, nawˬ-ahˇ ngaˇ sehꞈ-awˇ, mahˬ tahˬ laˆ tehꞈ-ehˇ bi dzeuˇ-iˇ-eu lehˇ ma.”

³⁴Baˬlamˬ ehˇ-eu, “Ngaˇ iˬ baˇ mˇ gʼaˬ-euˬ ma. Ngaˬ-ahˇ laˆ tsoeˬ-eu lehˇ gaˇ ma-ahˇ nawˇ yawꞈ luꞈ-eu ngaˇ maˬ siˬ-aˬ. Ehˇ kʼawꞈ, ngaˇ le-eu maˬ tsaˬ-a lehˇ nawˇ noeˬ naˇ, nymˬ-mˇ ngaˇ iˇ kahˇ paw paˇ gʼoꞈ kʼoꞈ-iˇ ma.”

³⁵Mˬ taˆ gʼaˬ kʼehˇ kʼoeˇ gʼaˬ paˇ ehˇ-eu, “Tsawˇ haˬ heu deuˬ nehˬ-ehˇ le-awˬ. Ehˇ kʼawꞈ, ngaˬ neh kʼaˇ bi ngehˬ kʼaˇ bi tmˇ-euˬ jeˬ tehꞈ-ehˇ nawˇ ya ngehˬ ya tmˇ meh.”. Kʼoeˇ naˇ, tsawˇ haˬ kʼoeˇ deuˬ nehˬ-ehˇ Baˬlamˬ le gʼeh leꞈ-euˬ meh.

³⁶Baˬlamˬ laˇ luꞈ-eu gaˇ kawˆ Baˬlehˇ ya gaˬ ngeh Mawˇbaˆ miˇ kʼahˬ-ahˇ yoeˇ-eu Aˬnoˬ lawˇ baˬ lawˇ deh jaˆ-eu Aˇlaˆ meuˬ-ahˇ iˇ-awˇ ha laˬ-iˇ-euˬ meh.

³⁷Baˬlamˬ-ahˇ Baˬlehˇ ehˇ nehˬ-eu, “Yaw beh poˆ ngaˇ bi kuˇ laˬ le ngeh, aˬ jeˬ miˇ neh nawˇ maˬ laˇ teˬ. Ngaˇ nawˬ-ahˇ laꞈ sawˬ tiˬ loꞈ maˬ biꞈ nya-eu paˬ lehˇ nawˇ noeˬ teˬ loˇ.”

³⁸Baˬlamˬ ehˇ-eu, “Ngaˇ laˇ keuˆ gʼaˬ-euˬ maˬ ngeuˇ nga loˇ. Ehˇ kʼawꞈ, nymˬ-mˇ ngaˇ baoˬ tiˬ jeˬ-iˬ maˬ ahˇ. Miˬyehˇ neh bi ngehˬ bi tmˇ-euˬ jeˬ tehꞈ-ehˇ ngaˇ ya ngehˬ ya tmˇ meh.”

³⁹Kʼoeˇ naˇ, Huˇzoˆ meuˬ-ahˇ, Baˬlehˇ nehˬ-ehˇ Baˬlamˬ le-euˬ meh.

⁴⁰Baˬlehˇ-aˬ, mawˇ neˇ hawˇ-eu yawˇ deuˬ sehꞈ-awˇ, Baˬlamˬ hawˇ-eu aˬ yuiꞈ aˬ tsu kʼoeˇ deuˬ-ahˇ shaˬ jiˇ biꞈ nehˬ-euˬ meh.

⁴¹Yawˬ shawˬ yawˬ, Baˬlamˬ-ahˇ Baˬmo baˬlaˇ meuˬ-ahˇ Baˬlehˇ sheuˬ gʼeh-euˬ meh. Kʼoeˇ gaˇ le keuˆ naˇ, Iˇsaˬleˬlaˆ tsawˇ haˬ tiˬ paˆ na deuˬ-ahˇ haw mawˇ nya-eu meh.