Read Akha Bawˇtsahˬ 24 Bible Online

Bawˇtsahˬ 24 - Akha bible

Bawˇtsahˬ 24

¹Nymˬ-mˇ poˆ jawˇ-aˬ, Sahˬpaˬ Miˬyehˇ aˬ yawꞈ-ahˇ Iˇsaˬleˬlaˆ tsawˇ haˬ deuˬ kʼoeˇ taˆ dawˬ bi ngehˬ gʼeh mawꞈ-eu Baˬlamˬ siˬ duˬ-euˬ miˇ neh, yaw beh loꞈ-ehˇ ja maw maw maw-ehˇ maˬ jawˇ ni, bawˇ tsahˬ bawˇ dahˇ paw haw ka gʼeh-euˬ meh.

²Kʼoeˇ ngeh, Iˇsaˬleˬlaˆ tsawˇ jeuˬ aˬ yawꞈ jeuˬ yawꞈ, yawˬ ha-euˬ jawˇ duˬ-ahˇ yawˬ ha jawˇ naˬ luꞈ gaˇ Baˬlamˬ ya mawˇ-euˬ meh. Miˬyehˇ-euˬ yaw sahˇ aˬ yawꞈ-ahˇ uˆ lahˇ le-awˇ,

³Miˬyehˇ gʼaˇ duˬ ngeh dah-eu laꞈ kʼoeˇ aˬ yawꞈ heu loꞈ-ehˇ ehˇ-eu meh. “Beˬyoˇ-euˬ aˬli Baˬlamˬ-euˬ dawˬ, haw duˬ mawˇ duˬ nya-eu gʼaˬ-euˬ dawˬ,

⁴Miˬyehˇ-euˬ dawˬ-ahˇ gaˬ nya-eu gʼaˬ-euˬ dawˬ-aˬ, heu loꞈ-ehˇ ma. Baoˬ huiˬ-eu Miˬyehˇ neh mehˬ nehˬ laꞈ-euˬ jeˬ-ahˇ, yaw sahˇ laꞈ kʼoeˇ maˇ jawˆ ni ngaˇ mawˇ-euˬ ma.

⁵Iˇsaˬleˬlaˆ tsawˇ haˬ-euˬ sehˬ gʼawˆ deuˬ muiˬ dui dui-awˇ,

⁶yaw cehˆ yaw cehˆ-ehˇ jaˆ-eu daoˇ aˇ bawˬ-ahˇ maˬ ehˇ, lawˇ baˬ dawˬ peh jaˆ-eu yaˇ kmˇ-ahˇ maˬ ehˇ, Sahˬpaˬ Miˬyehˇ neh ka taˬ-euˬ aˇ jawˬ aˇ bawˇ-ahˇ maˬ ehˇ, Lawˇ baˬ dawˬ peh dehꞈ-eu siˬ daˬ miˬ shuˬ aˇ bawˇ-ahˇ maˬ ehˇ, duˇ-eu meh.

⁷Aˬ yawꞈ maꞈ uˬ yehˇ tiˬ loꞈ za-awˇ, iˇ cuꞈ za-eu deh yaˇ-ahˇ siˬ yoeˬ sehˬ tehꞈ-a. Aˬ yawꞈ maꞈ-euˬ sahˬ paˬ-aˬ, sahˬ paˬ Aˬgaˆ naˆ maˬ tseˇ baoˬ huiˬ-awˇ, aˬ yawꞈ-euˬ miˇ kʼahˬ huiˬ dui jeˇ dui dui tehꞈ-a.

⁸Iˇjiˇtuˆ miˇ kʼahˬ laꞈ kʼoeˇ Miˬyehˇ aˬ yawꞈ maꞈ-ahˇ sheuˬ doˆ laꞈ-euˬ meh. Aˬ yawꞈ maꞈ gʼaˇ duˬ nehꞈ nyoˬ laꞈ hiˇ loꞈ-ehˇ aˬ yawꞈ guiˇ deuˆ-euˬ meh. Aˬ yawꞈ maꞈ-ahˇ muiˇ-eu deuˬ-ahˇ aˬ yawꞈ maꞈ kawꞈ sehꞈ tehꞈ-a. Shaˬ yoeˬ ngawˬ kʼehꞈ ngawˬ kʼoeˆ nehˬ-awˇ, kaˆ myaˬ neh beuˆ byoe nehˬ tehꞈ-a.

⁹Iˇsaˬleˬlaˆ tsawˇ jeuˬ-aˬ, aˇ laˬ jaˬ shiˇ-ahˇ duˇ-eu meh. Aˬ yawꞈ yuꞈ kʼaˆ luꞈ ngeh tiˬ gʼaˬ-iˬ maˬ laˆ noeˬ peuˬ-a. Iˇsaˬleˬlaˆ-ahˇ dawˬ kʼaˇ ngehˬ gʼeh nehˬ-eu tsawˇ haˬ guiˬ lahˬ za-awˇ, Iˇsaˬleˬlaˆ-ahˇ yaˬ kʼehˇ kʼaˇ yaˬ-eu tsawˇ haˬ-aˬ, yaˬ kʼehˇ yaˬ gaˇ ya daˬ tehꞈ-a”

¹⁰Kʼoeˇ ngeh, Baˬlehˇ nui ma pehˇ laˇ-awˇ, laꞈ tsuˆ tsuˆ deuˇ taˬ-eu laꞈ kʼoeˇ Baˬlamˬ-ahˇ ehˇ nehˬ-eu, “Ngaˬ-ahˇ muiˇ-eu deuˬ-ahˇ yaˬ kʼehˇ bi yaˬ-eu lehˇ nawˬ-ahˇ ngaˇ kuˇ-euˬ ma. Ehˇ kʼawꞈ, smˬ poˆ keuˆ ni aˬ yawꞈ maꞈ-ahˇ nawˇ dawˬ ngehˬ gʼeh nehˬ-euˬ meh.

¹¹Nymˬ-mˇ nawˇ gʼoꞈ-iˇ-awˬ. Nawˬ-ahˇ laꞈ sawˬ biꞈ ma lehˇ ngaˇ saˇ jaˇ dzaˬ taˬ-euˬ ma. Ehˇ kʼawꞈ, laꞈ sawˬ kʼoeˇ nawˇ maˬ za nya ni Sahˬpaˬ Miˬyehˇ jahˇ-euˬ meh.”

¹²Baˬlamˬ ehˇ-eu, “Nawˬ neh dawˬ tsaꞈ bi tsaꞈ le-euˬ tsawˇ haˬ deuˬ-ahˇ ngaˇ heu loꞈ-ehˇ ehˇ nehˬ-euˬ ma tawˇ.

¹³Nawˇ kʼaˇ jaˆ-eu pyuˇ hawˇ-eu shuiˇ deuˬ ngaˬ-ahˇ biꞈ jiˇ laꞈ law hawˇ kʼawꞈ, Sahˬpaˬ Miˬyehˇ-euˬ ehˇ dawˬ leuˇ-awˇ, yawˬ ha-euˬ nui noeˬ ngaˇ maˬ mˇ nya-a. Sahˬpaˬ Miˬyehˇ neh bi ngehˬ bi tmˇ laꞈ-euˬ loꞈ-ehˇ tehꞈ-ehˇ ngaˇ ngehˬ ma tmˇ ma lehˇ ehˇ nehˬ-euˬ ma tawˇ.”

¹⁴Baˬlehˇ-ahˇ Baˬlamˬ ehˇ nehˬ-eu, “Ngaˬ-euˬ tsawˇ haˬ jawˇ gaˇ ngaˇ nymˬ-mˇ gʼoꞈ-iˇ ma. Ngaˇ maˬ gʼoꞈ-iˇ mi naˆ-ehˇ, aˬ kaˇ, Iˇsaˬleˬlaˆ tsawˇ haˬ deuˬ nawˬ-euˬ tsawˇ haˬ deuˬ kʼoeˇ taˆ aˬ joˆ-ehˇ jahˇ nehˬ laꞈ paˬ-ehˇ jaˆ-eu gaˇ kawˆ ehˇ nehˬ yaꞈ nyaˇ.”

¹⁵Kʼoeˇ naˇ, Miˬyehˇ gʼaˇ duˬ dawˬ ngeh dah-eu laꞈ kʼoeˇ, aˬ yawꞈ heu loꞈ-ehˇ ehˇ-eu meh. “Beˬyoˇ-euˬ aˬ li Baˬlamˬ-euˬ dawˬ, haw duˬ mawˇ duˬ nya-eu gʼaˬ-euˬ dawˬ,

¹⁶Miˬyehˇ-euˬ dawˬ-ahˇ gaˬ nya-awˇ, dawˬ tawˆ luꞈ kʼoeˇ taˆ huiˬ dzehˬ mahˇ dzehˬ-eu gʼaˬ jawˇ gaˇ neh oe-euˬ zaˬ siˬ nui gahˇ za-euˬ gʼaˬ-euˬ dawˬ heu loˇ ma. Baoˬ huiˬ-eu Miˬyehˇ neh mehˬ nehˬ laꞈ-euˬ jeˬ-ahˇ, yaw sahˇ laꞈ kʼoeˇ maˇ jawˆ ni ngaˇ mawˇ-euˬ ma.

¹⁷Aˬ kaˇ keuˆ le-eu aˇ yamˬ-ahˇ ngaˇ haw gʼeh-awˇ, Iˇsaˬleˬlaˆ tsawˇ jeuˬ-ahˇ ngaˇ mawˇ-euˬ ma. Yaw shehꞈ bya-eu aˬ guiˇ loꞈ-ehˇ, aˬ yawꞈ maꞈ-euˬ tsawˇ jeuˬ laꞈ kʼoeˇ, sahˬpaˬ tiˬ gʼaˬ doˆ laˇ tehꞈ-a. Aˬ guiˇ smˇ miˇ iˇ-eu loꞈ-ehˇ, Iˇsaˬleˬlaˆ tsawˇ jeuˬ laꞈ kʼoeˇ, ja pyuˬ ni ga keuˆ le tehꞈ-a. Mawˇbaˆ tsawˇ haˬ aˬ yuiꞈ aˬ tsu deuˬ-ahˇ aˬ yawꞈ diˬ-awˇ, Seˬtaˆ tsawˇ haˬ dawˬ tawˆ luꞈ-ahˇ aˬ yawꞈ dawꞈ lah nehˬ jiˇ tehꞈ-a.

¹⁸Eˬdoˬ miˇ kʼahˬ-ahˇ jawˇ-eu aˬ yawꞈ-ahˇ muiˇ-eu deuˬ-ahˇ aˬ yawꞈ deuˆ gʼaˬ-eu laꞈ kʼoeˇ, aˬ yawꞈ maꞈ-euˬ miˇ kʼahˬ deuˆ geuꞈ-awˇ, Iˇsaˬleˬlaˆ tsawˇ haˬ deuˬ maˬ tsehˆ leˇ ni guiˇ deuˆ gʼaˬ nawˆ nawˆ tehꞈ-a.

¹⁹Iˇsaˬleˬlaˆ tsawˇ jeuˬ neh aˬ yawꞈ maꞈ-ahˇ nawˬ lah gʼeh-awˇ, meuˬ tiˬ meuˬ-iˬ maˬ dzeˇ-ehˇ pyeuꞈ-iˇ ngeh keuˆ ni deuˆ tehꞈ-a.”

²⁰Kʼoeˇ naˇ, Aˬmaˬlehˇ tsawˇ haˬ deuˬ-ahˇ yaw sahˇ laꞈ kʼoeˇ Baˬlamˬ ya mawˇ-awˇ, Miˬyehˇ gʼaˇ duˬ ngehˬ dah-eu laꞈ kʼoeˇ heu loꞈ-ehˇ ehˇ-eu meh. “Aˬmaˬlehˇ miˇ kʼahˬ-aˬ, aˬ cawˬ naˆ maˬ tseˇ baoˬ huiˬ-eu miˇ kʼahˬ pyeuꞈ kʼawꞈ, Aˇ saˬ saˬ laˇ ngeh, mˬ maˬ maˬ byaˆ zaˇ ziˇ ya cawˆ-iˇ tehꞈ-a.”

²¹Kʼoeˇ naˇ, yaw sahˇ laꞈ kʼoeˇ Kaˬnaˆ tsawˇ haˬ deuˬ-ahˇ aˬ yawꞈ paˇ mawˇ-awˇ, Miˬyehˇ gʼaˇ duˬ ngehˬ dah-eu laꞈ kʼoeˇ heu loꞈ-ehˇ ehˇ-eu meh. “Naw maꞈ-euˬ miˇ kʼahˬ-aˬ, ziꞈ dah ni gʼeh-awˇ, Lo guˇ uˬ gʼmˬ-ahˇ jaˆ-eu aˇ jiˇ bahˬ loꞈ-ehˇ, tiˬ jeˬ-ahˇ-iˬ guˆ kʼaˇ maˬ za-a.

²²Ehˇ kʼawꞈ, Kaˬnaˆ tsawˇ haˬ deuˬ-oˇ, Aˬshuˇliˆ tsawˇ haˬ deuˬ naw maꞈ-ahˇ nyehꞈ le ngeh, naw maꞈ ya luˬ ya seˇ-iˇ tehꞈ-a.”

²³Miˬyehˇ gʼaˇ duˬ ngehˬ dah-eu laꞈ kʼoeˇ, Baˬlamˬ heu loꞈ-ehˇ paˇ ehˇ-eu meh. “Laꞈ taˆ paw kʼahˬ-ahˇ uiˬ leˇ taˬ-awˇ jawˇ-eu teu deuˬ aˬ suˇ gʼaˬ-a.

²⁴Guˇbaˬluˇ paw neh aˬ cawˬ guiˇ deuˆ ahˇ laꞈ tehꞈ-a. 1 Aˬshuˇliˆ miˇ kʼahˬ hawˇ-eu Eˬbaˬ miˇ kʼahˬ-ahˇ aˬ yawꞈ maꞈ deuˆ gʼaˬ tehꞈ-a. Ehˇ kʼawꞈ, aˬ yawꞈ maꞈ gʼeh mˬ maˬ maˬ byaˆ zaˇ ziˇ ya luˬ ya seˇ-iˇ tehꞈ-a.”

²⁵Kʼoeˇ naˇ, Baˬlamˬ lehˬ hmˬ-awˇ gʼoꞈ-iˇ-euˬ meh. Baˬlehˇ gʼaˬ gʼeh, yawˬ ha-euˬ gaˇ ma yawˬ ha iˇ gʼeh-euˬ meh.