Read Akha Bawˇtsahˬ 26 Bible Online

Bawˇtsahˬ 26 - Akha bible

Bawˇtsahˬ 26

¹Luˬ-iˇ seˇ-iˇ-eu jeˬ keuˆ le gʼaˬ naˇ kʼah, Moˇseˬ hawˇ-eu Aˬloˬ-euˬ aˬ li Eˇlaˬzaˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

²“Iˇsaˬleˬlaˆ tsawˇ haˬ aˇ maꞈ aˇ muˇ, aˇ jeuˬ aˇ ca aˬ yawꞈ ca yawꞈ laꞈ kʼoeˇ, nyiˬ tseˇ kʼoꞈ-ahˇ neh laꞈ taˆ paw-euˬ guiˇ kʼaˇ deuˆ nya-eu kʼaˬ dzeˇ zaˬ deuˬ-euˬ tsawˇ myahˇ yuˇ-awˬ.”

³Yeˬliˇkoˇ meuˬ-euˬ nui baˬ-ahˇ, Yawˇdaˬ lawˇ baˬ lawˇ deh jaˆ-eu Mawˇbaˆ miˇ kʼahˬ deh ga-ahˇ, Moˇseˬ hawˇ-eu piˇ ma Eˇlaˬzaˬ aˬ nyaꞈ aˬ yawꞈ maꞈ-ahˇ kuˇ uiˬ-awˇ, heu loꞈ-ehˇ ehˇ nehˬ-euˬ meh.

⁴Moˇseˬ-ahˇ Sahˬpaˬ Miˬyehˇ dawˬ biꞈ taˬ-euˬ loꞈ-ehˇ, nyiˬ tseˇ kʼoꞈ-ahˇ neh laꞈ taˆ paw-euˬ tsawˇ haˬ deuˬ-ahˇ tsawˇ myahˇ yuˇ-awˬ lehˇ ehˇ nehˬ-euˬ meh. Heu deuˬ-aˬ, Iˇjiˇtuˆ miˇ kʼahˬ laꞈ kʼoeˇ neh doˆ le-euˬ Iˇsaˬleˬlaˆ tsawˇ haˬ deuˬ pyeuꞈ-eu meh.

⁵Yaˬkoˆ-euˬ aˬ li aˬ yuiꞈ yuiꞈ saˬ Luˇbeˬ-euˬ zaˬ deuˬ uˆ deuˬ pyeuꞈ-eu Luˇbeˬ tsawˇ jeuˬ-aˬ, Haˬnoˆ aˇ jeuˬ, Paˬloˇ aˇ jeuˬ,

⁶Heˬzaˬloˬ aˇ jeuˬ hawˇ-eu, Kaˬmiˬ aˇ jeuˬ heu deuˬ meh.

⁷Aˇ jeuˬ heu deuˬ dawˬ tawˆ luꞈ, oeˬ muiˇ smˬ heˇ shiꞈ yaˇ smˬ tseˇ gʼaˬ byah-eu meh.

⁸Paˬloˇ-euˬ zaˬ deuˬ uˆ deuˬ-aˬ, Eˇliˇbaˆ hawˇ-eu,

⁹Eˇliˇbaˆ-euˬ aˬ li Neˬmoeˬlaˇ, Daˬtaˬ hawˇ-eu Aˬbiˇlamˬ meh. Daˬtaˬ hawˇ-eu Aˬbiˇlamˬ aˬ nyaꞈ nmˇ-aˬ, Iˇsaˬleˬlaˆ tsawˇ haˬ aˇ maꞈ aˇ muˇ neh tseˇ doˆ-euˬ aˬ yuiꞈ aˬ tsu pyeuꞈ-awˇ, Moˇseˬ hawˇ-eu Aˬloˬ-ahˇ yehˬ bawˬ sehˇ lu-ehˇ ehˇ-eu laꞈ kʼoeˇ Kawˇlaˆ-euˬ mehˬ nah caw teh-eu deuˬ nehˬ-ehˇ gm leˇ-awˇ, Sahˬpaˬ Miˬyehˇ-ahˇ puiˬ gaˇ keuˬ leˇ-euˬ Daˬtaˬ hawˇ-eu Aˬbiˇlamˬ lehˇ kuˇ-eu kʼoeˇ nyiˬ gʼaˬ meh.

¹⁰Tsawˇ haˬ nyiˬ yaˇ ngaˬ tseˇ gʼaˬ miˬ dzaˬ neh bi laˆ luˬ bi laˆ seˇ ngeh nah, miˇ tsaˬ tsawˬ nga laˇ-awˇ bi myoꞈ ahˇ-euˬ laꞈ kʼoeˇ, Kawˇlaˆ hawˇ-eu aˬ yawꞈ-euˬ mehˬ nah caw teh-eu tsawˇ haˬ deuˬ nehˬ-ehˇ aˬ yawꞈ nyaꞈ kʼawꞈ ya shiˇ-euˬ meh. Aˬ yawꞈ maꞈ-aˬ, Iˇsaˬleˬlaˆ tsawˇ haˬ deuˬ bi yahˇ-eu gʼaˇ duˬ saˇ kiˇ pyeuꞈ-eu meh.

¹¹Ehˇ kʼawꞈ, Kawˇlaˆ-euˬ aˬ li deuˬ maˬ ya shiˇ ni dzeuˇ-iˇ-euˬ meh.

¹²Suˇmoˬ tsawˇ jeuˬ-aˬ, Neˬmoeˬlaˇ aˇ jeuˬ, Yaˬmeˬ aˇ jeuˬ, Yaˬciˬ aˇ jeuˬ,

¹³Zeˬlahˬ aˇ jeuˬ hawˇ-eu, Shawˇlaˆ aˇ jeuˬ heu deuˬ meh.

¹⁴Aˇ jeuˬ heu deuˬ dawˬ tawˆ luꞈ, nyiˬ muiˇ nyiˬ heˇ nyiˬ yaˇ gʼaˬ byah-eu meh.

¹⁵Gaˆ tsawˇ jeuˬ-aˬ, Zeˬpoˬ aˇ jeuˬ, Haˬgiˇ aˇ jeuˬ, Shuˇniˬ aˇ jeuˬ,

¹⁶Awˇzaˬniˇ aˇ jeuˬ, Eˬliˇ aˇ jeuˬ,

¹⁷Aˬyawˇdiˆ aˇ jeuˬ hawˇ-eu Aˬyeˬliˇ aˇ jeuˬ heu deuˬ meh.

¹⁸Aˇ jeuˬ heu deuˬ dawˬ tawˆ luꞈ, oeˬ muiˇ ngaˬ yaˇ gʼaˬ byah-eu meh.

¹⁹Yuˇdaˆ tsawˇ jeuˬ-aˬ, Sheˬlahˬ aˇ jeuˬ, Paˬyehˆ aˇ jeuˬ, Zeˬlahˬ aˇ jeuˬ, Heˬzaˬloˬ aˇ jeuˬ hawˇ-eu Haˬmuˇlaˬ aˇ jeuˬ heu deuˬ meh. (Yuˇdaˆ-euˬ aˬ li Iˇlehˆ hawˇ-eu Awˇnaˬ aˬ nyaꞈ nmˇ Kaˬnaˬ miˇ kʼahˬ-ahˇ shiˇ yaꞈ-euˬ meh.)

²⁰

²¹

²²Aˇ jeuˬ heu deuˬ dawˬ tawˆ luꞈ, shiꞈ muiˇ koꞈ heˇ ngaˬ yaˇ gʼaˬ byah-eu meh.

²³Iˇsaˬkaˬ tsawˇ jeuˬ-aˬ, Toˇlaˬ aˇ jeuˬ, Puˇhaˬ aˇ jeuˬ,

²⁴Yaˬshuˇbaˬ aˇ jeuˬ hawˇ-eu Shiˇmyoˬ aˇ jeuˬ heu deuˬ meh.

²⁵Aˇ jeuˬ heu deuˬ dawˬ tawˆ luꞈ, koꞈ muiˇ oeˬ heˇ smˬ yaˇ gʼaˬ byah-eu meh.

²⁶Zeˬbuˬluˬ tsawˇ jeuˬ-aˬ, Seˬyehˆ aˇ jeuˬ, Eˇloˬ aˇ jeuˬ hawˇ-eu Yaˬleˬlaˇ aˇ jeuˬ heu deuˬ meh.

²⁷Aˇ jeuˬ heu deuˬ dawˬ tawˆ luꞈ, koꞈ muiˇ ngaˬ yaˇ gʼaˬ byah-eu meh.

²⁸Maˬnaˇseˬ hawˇ-eu Eˇpaˬleˬ aˬ nyaꞈ nmˇ-euˬ aˬ da pyeuꞈ-eu Yoˇsehˆ-euˬ zaˬ deuˬ uˆ deuˬ pyeuꞈ-eu Yoˇsehˆ tsawˇ jeuˬ deuˬ-aˬ, heu deuˬ meh.

²⁹Maˬnaˇseˬ tsawˇ jeuˬ-aˬ, heu loꞈ-ehˇ meh. Maˬnaˇseˬ-euˬ aˬ li Maˬkiˬlaˇ-aˬ, Giˇlaˆ-euˬ aˬ da pyeuꞈ-awˇ, aˇ jeuˬ heu deuˬ dawˬ tawˆ luꞈ, Giˇlaˆ o neh jeuˬ le o le-euˬ meh.

³⁰Yeˬzeuˬ aˇ jeuˬ, Heˬleˇ aˇ jeuˬ,

³¹Aˬsaˬliˇlaˆ aˇ jeuˬ, Sheˬkmˬ aˇ jeuˬ,

³²Sheˬmiˇdaˬ aˇ jeuˬ hawˇ-eu Heˬpaˬ aˇ jeuˬ heu deuˬ meh.

³³Heˬpaˬ-euˬ aˬ li Zeˬloˇpeˬhaˇ-aˬ, aˬ li maˬ jawˇ-ehˇ, aˬ buˇ tehꞈ-ehˇ jawˇ-eu meh. Aˬ buˇ kʼoeˇ deuˬ-euˬ tsawˇ myahˇ-aˬ, Maˬhaˬlahˬ, Noˇaˬ, Hawˇgaˬlaˇ, Miˇlaˬkah hawˇ-eu Teuˇzaˬ meh.

³⁴Aˇ jeuˬ heu deuˬ dawˬ tawˆ luꞈ, ngaˬ muiˇ nyiˬ heˇ shiꞈ yaˇ gʼaˬ byah-eu meh.

³⁵Eˇpaˬleˬ tsawˇ jeuˬ-aˬ, Shuˇdeˬlaˇ aˇ jeuˬ, Beˬkeuˬ aˇ jeuˬ hawˇ-eu, Taˬhaˬ aˇ jeuˬ heu deuˬ meh.

³⁶Eˇlaˬnaˆ aˇ jeuˬ-aˬ, Shuˇdeˬlaˇ aˇ jeuˬ-ahˇ neh dehꞈ paˆ le-euˬ meh.

³⁷Aˇ jeuˬ heu deuˬ dawˬ tawˆ luꞈ, smˬ muiˇ nyiˬ heˇ ngaˬ yaˇ gʼaˬ byah-eu meh. Heu deuˬ-aˬ, Yoˇsehˆ o neh jeuˬ le o le-euˬ zaˬ deuˬ uˆ deuˬ pyeuꞈ-eu meh.

³⁸Beˬyaˬmiˬ tsawˇ jeuˬ-aˬ, Beˬlaˬ aˇ jeuˬ, Aˬshaˇbeˬlaˆ aˇ jeuˬ, Aˬhiˇlamˬ aˇ jeuˬ,

³⁹Sheˬpuˇpamˬ aˇ jeuˬ hawˇ-eu Huˇpamˬ aˇ jeuˬ heu deuˬ meh.

⁴⁰Aˬlaˬdaˆ aˇ jeuˬ hawˇ-eu Neˬmaˬ aˇ jeuˬ-aˬ, Beˬlaˬ aˇ jeuˬ-ahˇ neh dehꞈ paˆ le-euˬ meh.

⁴¹Aˇ jeuˬ heu deuˬ dawˬ tawˆ luꞈ, oeˬ muiˇ ngaˬ heˇ koꞈ yaˇ gʼaˬ byah-eu meh.

⁴²Daˬ tsawˇ jeuˬ-aˬ, Huˇshmˬ aˇ jeuˬ meh.

⁴³Dawˬ tawˆ luꞈ koꞈ muiˇ oeˬ heˇ oeˬ yaˇ gʼaˬ byah-eu meh.

⁴⁴Aˬshaˬ tsawˇ jeuˬ-aˬ, Iˇmaˬnahˬ aˇ jeuˬ, Iˇshaˬbiˇ aˇ jeuˬ hawˇ-eu, Beˬliˇyaˆ aˇ jeuˬ meh.

⁴⁵Heˬbeuˬ hawˇ-eu Maˬlaˬkeˬlaˇ aˇ jeuˬ-aˬ, Beˬliˇyaˆ aˇ jeuˬ-ahˇ neh dehꞈ paˆ le-euˬ meh.

⁴⁶Aˬshaˬ-aˬ, Seˬlahˬ lehˇ myahˇ-euˬ aˬ buˇ tiˬ buˇ jawˇ-eu meh.

⁴⁷Aˇ jeuˬ heu deuˬ dawˬ tawˆ luꞈ, ngaˬ muiˇ smˬ heˇ oeˬ yaˇ gʼaˬ byah-eu meh.

⁴⁸Naˬtaˬliˇ tsawˇ jeuˬ-aˬ, Yaˬzeˬlaˇ aˇ jeuˬ, Guˇniˬ aˇ jeuˬ,

⁴⁹Yeˬzaˬ aˇ jeuˬ hawˇ-eu Shiˇlmˬ aˇ jeuˬ heu deuˬ meh.

⁵⁰Aˇ jeuˬ heu deuˬ dawˬ tawˆ luꞈ, oeˬ muiˇ ngaˬ heˇ oeˬ yaˇ gʼaˬ byah-eu meh.

⁵¹Iˇsaˬleˬlaˆ tsawˇ haˬ dawˬ tawˆ luꞈ, koꞈ seh tiˬ heˇ shiꞈ yaˇ smˬ tseˇ gʼaˬ byah-eu meh.

⁵²Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

⁵³“Tsawˇ haˬ aˇ gʼaˬ yaw myaˬ yaw cuiˆ-ahˇ haw-awˇ, tsawˇ jeuˬ heu deuˬ-ahˇ miˇ kʼahˬ biˇ nehˬ-awˬ.

⁵⁴Tsawˇ haˬ myaˬ dzehˬ-eu tsawˇ jeuˬ-ahˇ miˇ kʼahˬ yaw huiˬ biˇ nehˬ-awˇ, tsawˇ haˬ cuiˆ dzehˬ-eu tsawˇ jeuˬ-ahˇ miˇ kʼahˬ yaw nyiˇ biˇ nehˬ-awˬ. Tsawˇ jeuˬ yawˬ jeuˬ na luꞈ-ahˇ tsawˇ haˬ yaw myaˬ yaw cuiˆ-ahˇ haw-awˇ, miˇ kʼahˬ biˇ nehˬ-awˬ.

⁵⁵Ehˇ kʼawꞈ, miˇ kʼahˬ biˇ nehˬ ngeh, tsawˇ jeuˬ kʼoeˇ deuˬ-euˬ aˬ da yaw dzahˇ gʼaˬ-euˬ tsawˇ myahˇ baꞈ-awˇ, shehˆ tsaˬ ya bi tsaˬ geuꞈ meh.

⁵⁶Myaˬ dzehˬ-eu tsawˇ jeuˬ-ahˇ miˇ kʼahˬ yaw huiˬ oꞈ leˇ-awˇ, cuiˆ dzehˬ-eu tsawˇ jeuˬ-ahˇ miˇ kʼahˬ yaw nyiˇ oꞈ leˇ ni ya biˇ tsaˬ geuꞈ meh.”

⁵⁷Leˬbiˇ tsawˇ jeuˬ laꞈ kʼoeˇ, Geˬlaˬshoˬ aˇ jeuˬ, Kawˇhaˆ aˇ jeuˬ hawˇ-eu, Meˬlaˬliˇ aˇ jeuˬ heu deuˬ ahˇ-eu meh.

⁵⁸Aˇ jeuˬ heu deuˬ-euˬ zaˬ deuˬ uˆ deuˬ laꞈ kʼoeˇ, Liˇbaˬniˇ, Heˬbyoˬ, Maˬhaˬliˬ, Muˇshiˬ hawˇ-eu Kawˇhaˆ aˇ jeuˬ heu deuˬ ahˇ-eu meh. Kawˇhaˆ-aˬ, Aˬmaˬlamˬ-euˬ aˬ da meh.

⁵⁹Aˬmaˬlamˬ-euˬ miˬ zaˬ-euˬ tsawˇ myahˇ-aˬ, Iˇjiˇtuˆ miˇ kʼahˬ-ahˇ dehꞈ le-euˬ Leˬbiˇ-euˬ aˬ buˇ Yawˇjeˬbehˇ pyeuꞈ-eu meh. Aˬ yawꞈ-aˬ, Aˬmaˬlamˬ gʼaˇ duˬ Aˬloˬ hawˇ-eu Moˇseˬ lehˇ myahˇ-euˬ aˬ li nyiˬ li ciˬ-awˇ, Miˇliˬyaˬ lehˇ myahˇ-euˬ aˬ buˇ tiˬ buˇ ciˬ-euˬ meh.

⁶⁰Aˬloˬ-aˬ, Naˬdehˇ, Aˬbiˇhuˬ, Eˇlaˬzaˬ hawˇ-eu Iˇdaˬmaˬ lehˇ myahˇ-euˬ aˬ li oeˬ li jawˇ-eu meh.

⁶¹Naˬdehˇ hawˇ-eu Aˬbiˇhuˬ aˬ nyaꞈ-aˬ, maˬ muiˬ maˬ shawˇ-eu miˬ dzaˬ yuˇ-awˇ Sahˬpaˬ Miˬyehˇ-ahˇ lawˇ-euˬ miˇ neh ya shiˇ-euˬ meh.

⁶²Ba la tiˬ siˬ byah laˇ-euˬ zaˬ nahˬ-ahˇ neh laꞈ taˆ paw-euˬ Leˬbiˇ tsawˇ haˬ kʼaˬ dzeˇ zaˬ dawˬ tawˆ luꞈ, nyiˬ muiˇ smˬ heˇ gʼaˬ byah-eu meh. Iˇsaˬleˬlaˆ tsawˇ haˬ deuˬ-ahˇ maˬ taꞈ ni, aˬ yawꞈ maꞈ-ahˇ tsawˇ myahˇ yuˇ-euˬ meh. Aˬ jeˬ miˇ neh ehˇ naˇ, Iˇsaˬleˬlaˆ miˇ kʼahˬ laꞈ kʼoeˇ, aˬ yawꞈ maꞈ-ahˇ jeˬ biˇ maˬ oꞈ-a.

⁶³Yeˬliˇkoˇ meuˬ-euˬ nui baˬ-ahˇ, Yawˇdaˬ lawˇ baˬ lawˇ deh-ahˇ jaˆ-eu deh saˇ-ahˇ, Iˇsaˬleˬlaˆ tsawˇ haˬ deuˬ-euˬ tsawˇ myahˇ aˬ yawꞈ maꞈ yuˇ ngeh, aˇ jeuˬ heu deuˬ dawˬ tawˆ luꞈ-euˬ tsawˇ myahˇ, Moˇseˬ hawˇ-eu Eˇlaˬzaˬ aˬ nyaꞈ boꞈ-euˬ meh.

⁶⁴Siˇnaˆ bawˇ tsahˬ bawˇ dahˇ-ahˇ Moˇseˬ hawˇ-eu Aˬloˬ yaw beh poˆ tsawˇ myahˇ yuˇ ngeh, tsawˇ myahˇ kʼaˇ dawˆ-euˬ tsawˇ haˬ dawˬ tawˆ luꞈ tiˬ gʼaˬ-iˬ maˬ paˇ dehꞈ ni shiˇ dzeuˇ jiˇ-euˬ meh.

⁶⁵Aˬ yawꞈ maꞈ dawˬ tawˆ luꞈ bawˇ tsahˬ bawˇ dahˇ laꞈ kʼoeˇ ya shiˇ jiˇ meh lehˇ ehˇ taˬ-euˬ loꞈ-ehˇ, Yeˬpuˬnehˇ-euˬ aˬ li Gaˬlehˆ hawˇ-eu Nuˬ-euˬ aˬ li Yawˇshuˆ aˬ nyaꞈ maˬ ngeuˇ naˇ, tiˬ gʼaˬ-iˬ maˬ paˇ dehꞈ ni shiˇ dzeuˇ jiˇ-euˬ meh.