Read Akha Bawˇtsahˬ 27 Bible Online

Bawˇtsahˬ 27 - Akha bible

Bawˇtsahˬ 27

¹Yoˇsehˆ-euˬ aˬ li Maˬnaˇseˬ, Maˬnaˇseˬ-euˬ aˬ li Maˬkiˬlaˇ, Maˬkiˬlaˇ-euˬ aˬ li Giˇlaˆ, Giˇlaˆ-euˬ aˬ li Heˬpaˬ, Heˬpaˬ-euˬ aˬ li Zeˬloˇpeˬhaˇ meh. Maˬhaˬlahˬ, Noˇaˬ, Hawˇgaˬlaˇ, Miˇlaˬkah hawˇ-eu Teuˇzaˬ heu deuˬ-aˬ, Zeˬloˇpeˬhaˇ-euˬ aˬ buˇ deuˬ meh.

²Sahˬpaˬ Miˬyehˇ jawˇ-eu Sehˬ gʼawˆ gʼoˆ kʼehˬ-ahˇ, Moˇseˬ, piˇ ma Eˇlaˬzaˬ, Iˇsaˬleˬlaˆ tsawˇ haˬ-euˬ aˬ yuiꞈ aˬ tsu deuˬ hawˇ-eu, tsawˇ haˬ aˇ maꞈ aˇ muˇ dawˬ tawˆ luꞈ-euˬ mehˬ shi, Zeˬlawˇpaˬ-euˬ aˬ buˇ kʼoeˇ deuˬ yawꞈ leˇ-awˇ ehˇ-eu,

³“Ngaˬ ha mehˇ nmˇ-euˬ aˬ da-aˬ, aˬ li tiˬ li-iˬ maˬ jawˇ le ni, bawˇ tsahˬ bawˇ dahˇ-ahˇ shiˇ yaꞈ-euˬ meh. Sahˬpaˬ Miˬyehˇ-ahˇ puiˬ-euˬ gʼaˬ pyeuꞈ-eu Kawˇlaˆ-euˬ mehˬ nah aˬ yawꞈ maˬ caw teh-aˬ. Aˬ yawꞈ-euˬ iˬ baˇ baˬ da neh aˬ yawˆ yawꞈ shiˇ-euˬ tehꞈ meh.

⁴Ngaˬ ha mehˇ nmˇ-euˬ aˬ da aˬ li maˬ jawˇ-eu miˇ neh, aˬ yawꞈ-euˬ aˇ jeuˬ aˇ ca laꞈ kʼoeˇ aˬ yawꞈ-euˬ tsawˇ myahˇ ya bi byoˆ-iˇ meh loˇ. Ngaˬ ha mehˇ nmˇ-euˬ aˬ da-euˬ aˬ yuiꞈ aˬ nyiˇ deuˬ-euˬ myawˬ gahˬ deuˬ nga maꞈ-ahˇ biˇ nehˬ laꞈ-awˬ.”

⁵Gaˇ kawˆ kʼoeˇ hmˬ, Sahˬpaˬ Miˬyehˇ-ahˇ Moˇseˬ a nehˬ-euˬ meh.

⁶Kʼoeˇ ngeh, Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

⁷“Zeˬloˇpeˬhaˇ-euˬ aˬ buˇ deuˬ shaˇ-eu kʼoeˇ tsaˬ meh. Aˬ yawꞈ maꞈ-euˬ aˬ da-euˬ aˬ yuiꞈ aˬ nyiˇ deuˬ-euˬ myawˬ gahˬ aˬ yawꞈ maꞈ-ahˇ biˇ nehˬ-awˬ. Aˬ yawꞈ maꞈ-euˬ aˬ da-euˬ jeˬ biˇ aˬ yawꞈ maꞈ-ahˇ biˇ oꞈ nehˬ-awˬ.

⁸Tsawˇ haˬ tiˬ gʼaˬ na aˬ li maˬ jawˇ le ni shiˇ naˇ, aˬ yawꞈ-euˬ jeˬ biˇ aˬ yawꞈ-euˬ aˬ buˇ-ahˇ oꞈ-eu meh lehˇ Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ.

⁹Aˬ buˇ kʼawꞈ maˬ jawˇ naˇ, aˬ yawꞈ-euˬ jeˬ biˇ kʼoeˇ aˬ yawꞈ-euˬ mehˇ nmˇ deuˬ-ahˇ oꞈ-eu meh.

¹⁰Mehˇ nmˇ maˬ baw naˇ, aˬ yawꞈ aˬ da-euˬ mehˇ nmˇ deuˬ-ahˇ oꞈ-eu meh.

¹¹Aˬ yawꞈ aˬ da-euˬ mehˇ nmˇ kʼawꞈ maˬ paˇ jawˇ naˇ, aˬ yawꞈ-ahˇ aˬ yuiꞈ aˬ nyiˇ kʼaˇ peh dzehˬ-eu gʼaˬ-ahˇ jeˬ biˇ kʼoeˇ ya biꞈ tsehˆ nehˬ meh. Ngaˇ nawˬ-ahˇ dawˬ biꞈ-euˬ loꞈ-ehˇ, zahˇ sahˇ kʼoꞈ heu hmˬ-ahˇ Iˇsaˬleˬlaˆ tsawˇ haˬ deuˬ ya caw teh meh.”

¹²Moˇseˬ-ahˇ Sahˬpaˬ Miˬyehˇ ehˇ nehˬ-eu, “Aˬbaˬleˬ gawˬ jawˬ-ahˇ daˆ leˇ-awˇ, Iˇsaˬleˬlaˆ tsawˇ haˬ deuˬ-ahˇ ngaˇ biꞈ-eu lehˇ gʼeh luꞈ-eu miˇ kʼahˬ-ahˇ haw gʼeh-awˬ.

¹³Miˇ kʼahˬ kʼoeˇ kʼahˬ-ahˇ nawˇ haw mawˇ gʼaˬ ngeh, nawˬ-euˬ aˇ doˆ Aˬloˬ shiˇ-euˬ loꞈ-ehˇ nawˇ ya shiˇ tehꞈ-a.

¹⁴Aˬ jeˬ miˇ neh ehˇ naˇ, Ziˇnaˆ lehˇ kuˇ-eu bawˇ tsahˬ bawˇ dahˇ laꞈ kʼoeˇ, naw nyaꞈ nyiˬ mehˇ nmˇ luꞈ ngaˬ-euˬ dawˬ-ahˇ puiˬ-euˬ meh. Meˬliˇbaˬ lehˇ kuˇ-eu jawˇ duˬ-ahˇ, Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ ngaˬ-ahˇ iˬ baˇ taˬ-eu dawˬ ngehˬ ngeh, aˬ yawꞈ maꞈ-euˬ mehˬ shi ngaˬ-euˬ baoˬ-ahˇ yaw zeu maˬ baw-eu jeˬ naw nyaꞈ nmˇ mˇ-euˬ meh.” (Meˬliˇbaˬ-aˬ, Ziˇnaˆ bawˇ tsahˬ bawˇ dahˇ laꞈ kʼoeˇ, Kaˬdeˬshaˇ lehˇ kuˇ-eu jawˇ duˬ-ahˇ jaˆ-eu iˇ cuꞈ iˇ beuˆ pyeuꞈ-eu meh.)

¹⁵Kʼoeˇ ngeh, Moˇseˬ heu loꞈ-ehˇ guiˬ lahˬ shaˇ-euˬ meh.

¹⁶“Yaw dehꞈ kʼaˇ dehꞈ-eu jeˬ dawˬ tawˆ luꞈ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, Iˇsaˬleˬlaˆ tsawˇ haˬ-ahˇ sheuˬ gʼeh nehˬ nya-eu tsawˇ haˬ tiˬ gʼaˬ tseˇ doˆ-awˬ lehˇ nawˬ-ahˇ ngaˇ shaˇ-eu ma.

¹⁷Nawˬ-euˬ tsawˇ haˬ aˇ maꞈ aˇ muˇ deuˬ, yawˇ bo-eu yaw sahˇ maˬ baw-eu yawˇ yawˇ maꞈ loꞈ-ehˇ maˬ ya pyeuꞈ-iˇ-eu gʼaˇ duˬ, guiˇ deuˆ ngeh aˬ yawꞈ maꞈ-ahˇ dawˬ biꞈ nya-eu tsawˇ haˬ-ahˇ tseˇ-awˬ.”

¹⁸Moˇseˬ-ahˇ Sahˬpaˬ Miˬyehˇ ehˇ nehˬ-eu, “Nuˬ-euˬ aˬ li Yawˇshuˆ laꞈ kʼoeˇ yaw sahˇ jawˇ meh. Aˬ yawꞈ-ahˇ kuˇ-awˇ, aˬ yawꞈ-euˬ uˬ duˬ-ahˇ nawˬ-eu aˬ laꞈ baꞈ daˆ-awˬ.

¹⁹Piˇ ma Eˇlaˬzaˬ hawˇ-eu Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ mehˬ shi aˬ yawꞈ-ahˇ bi yawꞈ-awˇ, nawˬ-euˬ dah zaˇ gaˇ mˇ-eu gʼaˇ duˬ aˬ yawꞈ-ahˇ tseˇ doˆ-euˬ gaˇ kawˆ, aˬ yawꞈ maꞈ dawˬ tawˆ luꞈ-ahˇ guˇ gaˬ nehˬ-awˬ.

²⁰Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ aˬ yawꞈ-ahˇ yaw zeu baw ni, nawˬ-euˬ uˆ lahˇ-eu baoˬ aˬ yawꞈ-ahˇ ui cuiˆ biꞈ nehˬ-awˬ.

²¹Uˇleˬ hawˇ-eu Duˇmeˬ[8] zmˬ-eu laꞈ kʼoeˇ ngaˬ-eu nui kʼahˇ-ahˇ siˬ nya-eu piˇ ma Eˇlaˬzaˬ-ahˇ aˬ yawꞈ ya gʼoe meh. Yawˬ jeˬ na luꞈ laꞈ kʼoeˇ, Eˇlaˬzaˬ neh mehˬ nehˬ tsoˆ nehˬ-euˬ loꞈ-ehˇ, Yawˇshuˆ hawˇ-eu Iˇsaˬleˬlaˆ tsawˇ haˬ aˇ maꞈ dawˬ tawˆ luꞈ ya mˇ meh.”

²²Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ Moˇseˬ mˇ-euˬ meh. Piˇ ma Eˇlaˬzaˬ hawˇ-eu Iˇsaˬleˬlaˆ tsawˇ haˬ aˇ maꞈ aˇ muˇ dawˬ tawˆ luꞈ mehˬ shi, Yawˇshuˆ-ahˇ bi yawꞈ-euˬ meh.

²³Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, Yawˇshuˆ-euˬ uˬ duˬ-ahˇ Moˇseˬ aˬ laꞈ baꞈ daˆ-awˇ, aˬ yawꞈ-euˬ dah zaˇ gaˇ bi mˇ-eu gʼaˇ duˬ tseˇ doˆ gʼaˬ-euˬ gaˇ kawˆ guˇ gaˬ-euˬ meh.