Read Akha Bawˇtsahˬ 3 Bible Online

Bawˇtsahˬ 3 - Akha bible

Bawˇtsahˬ 3

¹Heu-aˬ, Siˇnaˆ gawˬ jawˬ kʼoeˇ taˆ Moˇseˬ-ahˇ Sahˬpaˬ Miˬyehˇ dawˬ ngehˬ cawˬ ngeh yamˬ-ahˇ jawˇ luꞈ-eu Moˇseˬ hawˇ-eu Aˬloˬ-euˬ nymˇ kʼahˬ zaˬ deuˬ pyeuꞈ-eu meh.

²Aˬloˬ-euˬ aˬ li oeˬ li jawˇ-eu meh. Kʼoeˇ deuˬ-aˬ, Naˬdehˇ, Aˬbiˇhuˬ, Eˇlaˬzaˬ hawˇ-eu, Iˇdaˬmaˬ meh.

³Aˬ yawꞈ maꞈ-aˬ, piˇ ma geuꞈ-eu gʼaˇ duˬ, tsiˇ lehꞈ nehˬ-awˇ aˇ yaˬ biꞈ taˬ-euˬ tsawˇ haˬ deuˬ pyeuꞈ-eu meh.

⁴Ehˇ kʼawꞈ, Naˬdehˇ hawˇ-eu Aˬbiˇhuˬ-aˬ, Siˇnaˆ bawˇ tsahˬ bawˇ dahˇ laꞈ kʼoeˇ, Sahˬpaˬ Miˬyehˇ-ahˇ maˬ muiˬ maˬ shawˇ-eu miˬ dzaˬ lawˇ nehˬ ngeh, sehꞈ gaˇ ya daˬ-euˬ meh. Aˬ yawꞈ nyaꞈ zaˬ maˬ jawˇ-a. Kʼoeˇ miˇ neh, Aˬloˬ yaw dehꞈ dehꞈ luꞈ ngeh, Eˇlaˬzaˬ hawˇ-eu Iˇdaˬmaˬ aˬ nyaꞈ nmˇ piˇ ma geuꞈ-euˬ meh.

⁵Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

⁶“Leˬbiˇ tsawˇ jeuˬ-ahˇ mehˬ hu paw kuˇ doˆ-awˇ, Aˬloˬ-ahˇ caw ba-eu tsawˇ haˬ deuˬ bi geuꞈ-awˬ.

⁷Ngaˇ jawˇ-eu Sehˬ gʼawˆ laꞈ kʼoeˇ jaˆ-eu gaˇ deuˬ aˬ yawꞈ maꞈ mˇ-awˇ, piˇ ma deuˬ gʼaˇ duˬ maˬ ehˇ, tsawˇ haˬ aˇ maꞈ aˇ muˇ dawˬ tawˆ luꞈ gʼaˇ duˬ maˬ ehˇ, aˬ yawꞈ maꞈ gaˇ ya mˇ meh.

⁸Sehˬ gʼawˆ laꞈ kʼoeˇ jaˆ-eu keu ka dawˬ tawˆ luꞈ-ahˇ aˬ yawꞈ maꞈ ya haw ya pyaˆ-awˇ, Iˇsaˬleˬlaˆ tsawˇ haˬ deuˬ gʼaˇ duˬ mˇ paˬ-ehˇ gʼeh-eu jeˬ ya mˇ meh.

⁹Leˬbiˇ tsawˇ haˬ deuˬ-euˬ gaˇ-aˬ, Aˬloˬ hawˇ-eu aˬ yawꞈ-euˬ aˬ li deuˬ-ahˇ caw ba-eu gaˇ kʼoeˇ tiˬ jeˬ tehꞈ meh.

¹⁰Aˬloˬ hawˇ-eu aˬ yawꞈ-euˬ aˬ li deuˬ-ahˇ piˇ ma-euˬ gaˇ deuˬ nawˇ bi mˇ-awˬ. Gaˇ kʼoeˇ deuˬ mˇ-eu lehˇ kʼaˇ leh jeh-eu tsawˇ haˬ nui gʼaˬ aˬ geu gʼaˬ maˬ kaˬ, sehꞈ gaˇ ya daˬ tehꞈ-a.”

¹¹Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

¹²“Iˇsaˬleˬlaˆ tsawˇ haˬ zaˬ miˬ zaˬ aˬ yawꞈ gʼaˬ yawꞈ-euˬ dehꞈ beh beh le-euˬ aˬ li aˬ yuiꞈ yuiꞈ saˬ gʼaˬ-euˬ dah zaˇ, Iˇsaˬleˬlaˆ tsawˇ haˬ laꞈ kʼoeˇ Leˬbiˇ tsawˇ jeuˬ-ahˇ ngaˇ tseˇ doˆ taˬ-euˬ ma. Leˬbiˇ tsawˇ haˬ deuˬ-aˬ, ngaˬ-euˬ pyeuꞈ-eu ma.

¹³Aˬ jeˬ miˇ neh ehˇ naˇ, dehꞈ beh beh le-euˬ dawˬ tawˆ luꞈ ngaˬ-euˬ pyeuꞈ-eu ma. Iˇjiˇtuˆ tsawˇ haˬ deuˬ laꞈ kʼoeˇ, dehꞈ beh beh le-euˬ deuˬ-ahˇ ngaˇ sehꞈ dzeh ngeh, Iˇsaˬleˬlaˆ nymˇ jiˇ aˬ yawꞈ jiˇ yawꞈ laꞈ kʼoeˇ, dehꞈ beh beh le-euˬ aˬ li deuˬ hawˇ-eu dehꞈ beh beh le-euˬ jeˬ zaˬ yawˬ mawˇ na luꞈ-ahˇ, ngaˬ-euˬ gʼaˇ duˬ ngaˇ tseˇ paˆ doˆ taˬ-euˬ ma. Nymˬ-mˇ, Iˇsaˬleˬlaˆ-euˬ dehꞈ beh beh le-euˬ aˬ li deuˬ-ahˇ ngaˇ geuꞈ-eu dah zaˇ, Leˬbiˇ tsawˇ haˬ deuˬ ngaˇ geuꞈ ma. Aˬ yawꞈ maꞈ-aˬ, ngaˬ-euˬ pyeuꞈ-eu ma. Ngaˇ-aˬ, Sahˬpaˬ Miˬyehˇ ma.”

¹⁴Siˇnaˆ bawˇ tsahˬ bawˇ dahˇ laꞈ kʼoeˇ, Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ-euˬ meh.

¹⁵Leˬbiˇ tsawˇ haˬ aˇ jeuˬ aˬ yawꞈ jeuˬ yawꞈ hawˇ-eu nymˇ jiˇ aˬ yawꞈ jiˇ yawꞈ laꞈ kʼoeˇ, ba la tiˬ siˬ byah-eu zaˬ nahˬ-ahˇ neh laꞈ taˆ paw-euˬ kʼaˬ dzeˇ zaˬ aˬ yawꞈ gʼaˬ yawꞈ-euˬ tsawˇ myahˇ yuˇ-awˬ lehˇ ehˇ nehˬ-euˬ meh.

¹⁶Kʼoeˇ ngeh, Sahˬpaˬ Miˬyehˇ neh dawˬ biꞈ-euˬ loꞈ-ehˇ Moˇseˬ mˇ-euˬ meh.

¹⁷Leˬbiˇ-euˬ aˬ li deuˬ-euˬ tsawˇ myahˇ-aˬ, Geˬlaˬshoˬ, Kawˇhaˆ hawˇ-eu Meˬlaˬliˇ meh.

¹⁸Geˬlaˬshoˬ-euˬ aˬ li deuˬ-euˬ tsawˇ myahˇ-aˬ, Liˇbaˬniˇ hawˇ-eu Shiˇmiˇ meh.

¹⁹Kawˇhaˆ-euˬ aˬ li deuˬ-euˬ tsawˇ myahˇ-aˬ, Aˬmaˬlamˬ, Iˇzaˬhaˬ, Heˬbyoˬ hawˇ-eu Awˇzeˬlaˇ meh.

²⁰Meˬlaˬliˇ-euˬ aˬ li deuˬ-euˬ tsawˇ myahˇ-aˬ, Maˬhaˬliˬ hawˇ-eu Muˇshiˬ meh. Aˬ yawꞈ maꞈ-aˬ, aˬ yawꞈ maꞈ-euˬ tsawˇ myahˇ kʼaˇ pi luꞈ-eu nymˇ jiˇ deuˬ-euˬ aˬ da yaw dzahˇ meh.

²¹Liˇbaˬniˇ hawˇ-eu Shiˇmiˇ-euˬ nymˇ jiˇ deuˬ-aˬ, Geˬlaˬshoˬ aˇ jeuˬ pyeuꞈ-eu meh.

²²Ba la tiˬ siˬ byah laˇ-euˬ zaˬ nahˬ-ahˇ neh laꞈ taˆ paw-euˬ, tsawˇ myahˇ kʼaˇ dawˆ-euˬ kʼaˬ dzeˇ zaˬ dawˬ tawˆ luꞈ, shiꞈ heˇ ngaˬ yaˇ gʼaˬ byah-eu meh.

²³Geˬlaˬshoˬ aˇ jeuˬ deuˬ-aˬ, Sehˬ gʼawˆ-euˬ naˇ kʼah, nahˇ ma ga kʼehˬ paw pyawˬ-ahˇ jawˇ duˬ ya yuˇ meh.

²⁴Geˬlaˬshoˬ aˇ jeuˬ-euˬ nymˇ jiˇ deuˬ kʼoeˇ taˆ aˬ yuiꞈ geuꞈ-eu gʼaˬ-aˬ, Leˬlaˇ-euˬ aˬ li Eˇlaˬsaˆ meh.

²⁵Aˬ yawꞈ-euˬ gaˇ-aˬ, Sehˬ gʼawˆ hawˇ-eu, Sehˬ gʼawˆ-ahˇ laꞈ kʼoeˇ tiˆ dehˬ kaˬ-eu saˬ paˇ, laꞈ nyiˇ tiˆ dehˬ kaˬ-eu saˬ paˇ, gʼoˆ kʼehˬ-ahˇ taw-eu saˬ paˇ,

²⁶Sehˬ gʼawˆ jawˬ jawˬ-ehˇ yaˇ kmˇ mˇ gaˇ taw-eu saˬ paˇ hawˇ-eu lawˇ duˬ, Sehˬ gʼawˆ yaˇ kmˇ gʼoˆ kʼehˬ-ahˇ taw-eu saˬ paˇ, heu deuˬ-ahˇ ya haw ya pyaˆ-eu gaˇ meh. Heu deuˬ-ahˇ taꞈ leˇ-eu gaˇ dawˬ tawˆ luꞈ aˬ yawꞈ maꞈ ya mˇ meh.

²⁷Aˬmaˬlamˬ, Iˇzaˬhaˬ, Heˬbyoˬ, Awˇzeˬlaˇ, heu deuˬ-euˬ nymˇ jiˇ dawˬ tawˆ luꞈ, Kawˇhaˆ aˇ jeuˬ meh.

²⁸Ba la tiˬ siˬ byah-eu zaˬ nahˬ-ahˇ neh laꞈ taˆ paw-euˬ tsawˇ myahˇ kʼaˇ dawˆ-euˬ kʼaˬ dzeˇ zaˬ dawˬ tawˆ luꞈ, yehꞈ heˇ koꞈ yaˇ gʼaˬ byah-eu meh.

²⁹Kawˇhaˆ aˇ jeuˬ deuˬ Sehˬ gʼawˆ laꞈ oˆ paw pyawˬ-ahˇ jawˇ duˬ ya yuˇ meh.

³⁰Kawˇhaˆ aˇ jeuˬ-euˬ nymˇ jiˇ deuˬ kʼoeˇ taˆ aˬ yuiꞈ aˬ tsu geuꞈ-eu gʼaˬ-aˬ, Awˇzeˬlaˇ-euˬ aˬ li Eˇliˇzaˬpaˬ pyeuꞈ-eu meh.

³¹Aˬ yawꞈ maꞈ-euˬ gaˇ-aˬ, Dawˬ ma saˇ jaˇ Bahˬ keuˆ, hawˬ jeh, tsiˇ kʼmˬ doꞈ taˬ duˬ, lawˇ duˬ deuˬ, muiˬ-euˬ shawˇ-eu jawˇ duˬ laꞈ kʼoeˇ piˇ ma deuˬ zmˬ-eu keu ka deuˬ, muiˬ dui shawˇ dui dui-eu jawˇ duˬ-ahˇ uˇ leˇ-eu gʼoˆ kʼehˬ-ahˇ taw taˬ-euˬ saˬ paˇ, heu deuˬ-ahˇ ya haw ya pyaˆ-eu gaˇ meh. Heu deuˬ-ahˇ taꞈ leˇ-eu gaˇ dawˬ tawˆ luꞈ-ahˇ aˬ yawꞈ maꞈ ya mˇ meh.

³²Leˬbiˇ tsawˇ jeuˬ kʼoeˇ taˆ aˬ yuiꞈ aˬ tsu geuꞈ-eu gʼaˬ-aˬ, piˇ ma Aˬloˬ-euˬ aˬ li Eˇlaˬzaˬ meh. Muiˬ-eu shawˇ-eu jawˇ duˬ laꞈ kʼoeˇ gaˇ mˇ-eu tsawˇ haˬ deuˬ-ahˇ aˬ yawꞈ ya haw ya pyaˆ-eu meh.

³³Maˬhaˬliˬ hawˇ-eu Muˇshiˬ-euˬ nymˇ jiˇ deuˬ-aˬ, Meˬlaˬliˇ aˇ jeuˬ meh.

³⁴Ba la tiˬ siˬ byah-eu zaˬ nahˬ-ahˇ neh laꞈ taˆ paw-euˬ tsawˇ myahˇ kʼaˇ dawˆ-euˬ kʼaˬ dzeˇ zaˬ dawˬ tawˆ luꞈ, koꞈ heˇ nyiˬ yaˇ gʼaˬ byah-eu meh.

³⁵Meˬlaˬliˇ aˇ jeuˬ-euˬ nymˇ jiˇ deuˬ kʼoeˇ taˆ aˬ yuiꞈ aˬ tsu geuꞈ-eu gʼaˬ-aˬ, Aˬbiˇheˬlaˇ-euˬ aˬ li Zuˇliˇlaˆ meh. Sehˬ gʼawˆ-euˬ laꞈ taˆ paw pyawˬ-ahˇ aˬ yawꞈ maꞈ jawˇ duˬ ya yuˇ meh.

³⁶Aˬ yawꞈ maꞈ-euˬ gaˇ-aˬ, Sehˬ gʼawˆ teˇ byaꞈ, laꞈ law, kʼawˇ zeuˇ, zeuˇ dahˇ hawˇ-eu kʼoeˇ gaˇ taꞈ-eu keu ka deuˬ-ahˇ ya haw ya pyaˆ-eu gaˇ meh. Heu deuˬ-ahˇ taꞈ leˇ-eu gaˇ dawˬ tawˆ luꞈ-ahˇ aˬ yawꞈ maꞈ ya mˇ meh.

³⁷Laꞈ nyiˇ paw yaˇ kmˇ mˇ gaˇ zmˬ-eu keu ka pyeuꞈ-eu kʼawˇ zeuˇ, zeuˇ dahˇ, taꞈ cmˬ hawˇ-eu aˇ caˆ deuˬ-ahˇ kʼawꞈ, aˬ yawꞈ maˬ ya haw ya pyaˆ meh.

³⁸Moˇseˬ, Aˬloˬ hawˇ-eu Aˬloˬ-euˬ aˬ li deuˬ-aˬ, Sehˬ gʼawˆ mehˬ shi nahˇ ma doˆ kʼehˬ paw pyawˬ-ahˇ jawˇ duˬ ya yuˇ meh. Iˇsaˬleˬlaˆ tsawˇ haˬ deuˬ gʼaˇ duˬ, muiˬ-eu shawˇ-eu jawˇ duˬ laꞈ kʼoeˇ mˇ-eu gaˇ deuˬ-aˬ, aˬ yawꞈ maꞈ-euˬ gaˇ pyeuꞈ-eu meh. Kʼoeˇ loꞈ-ehˇ mˇ-eu lehˇ leh jeh-eu tsawˇ haˬ nui deuˬ aˬ geu gʼaˬ maˬ kaˬ, sehꞈ gaˇ ya daˬ tehꞈ-a.

³⁹Sahˬpaˬ Miˬyehˇ neh dawˬ biꞈ nehˬ-euˬ loꞈ-ehˇ, ba la tiˬ siˬ byah-eu zaˬ nahˬ-ahˇ neh laꞈ taˆ paw-euˬ Leˬbiˇ tsawˇ haˬ kʼaˬ dzeˇ zaˬ dawˬ tawˆ luꞈ-ahˇ, aˇ jeuˬ aˬ yawꞈ jeuˬ yawꞈ-ahˇ kʼaˇ taꞈ-eu loꞈ-ehˇ Moˇseˬ tsawˇ myahˇ yuˇ ngeh, tsawˇ myahˇ dawˆ-euˬ tsawˇ haˬ dawˬ tawˆ luꞈ nyiˬ muiˇ nyiˬ heˇ gʼaˬ byah-eu meh.

⁴⁰Moˇseˬ-ahˇ Sahˬpaˬ Miˬyehˇ ehˇ nehˬ-eu, “Ba la tiˬ siˬ byah-eu zaˬ nahˬ-ahˇ neh laꞈ taˆ paw-euˬ deuˬ dehꞈ beh beh le-euˬ Iˇsaˬleˬlaˆ tsawˇ haˬ kʼaˬ dzeˇ zaˬ deuˬ-ahˇ gui haw-awˇ, aˬ yawꞈ maꞈ-euˬ tsawˇ myahˇ yuˇ-awˬ.

⁴¹Ngaˬ-euˬ gʼaˇ duˬ, dehꞈ beh beh le-euˬ Iˇsaˬleˬlaˆ tsawˇ haˬ deuˬ-euˬ dah zaˇ Leˬbiˇ tsawˇ haˬ deuˬ bi dah-awˇ,Leˬbiˇ tsawˇ haˬ deuˬ-euˬ jeˬ zaˬ deuˬ-ahˇ, dehꞈ beh beh le-euˬ Iˇsaˬleˬlaˆ tsawˇ haˬ deuˬ-euˬ jeˬ zaˬ dah zaˇ bi dah-awˬ. Ngaˇ-aˬ, Sahˬpaˬ Miˬyehˇ ma.”

⁴²Kʼoeˇ naˇ, Sahˬpaˬ Miˬyehˇ neh dawˬ biꞈ nehˬ-euˬ loꞈ-ehˇ, Iˇsaˬleˬlaˆ tsawˇ haˬ deuˬ laꞈ kʼoeˇ, dehꞈ beh beh le-euˬ deuˬ-ahˇ Moˇseˬ gui haw-euˬ meh.

⁴³Ba la tiˬ siˬ byah-eu zaˬ nahˬ-ahˇ neh laꞈ taˆ paw-euˬ dehꞈ beh beh le-euˬ kʼaˬ dzeˇ zaˬ deuˬ-euˬ tsawˇ myahˇ yuˇ haw ngeh, dawˬ tawˆ luꞈ nyiˬ muiˇ nyiˬ heˇ nyiˬ yaˇ shiꞈ tseˇ smˇ gʼaˬ byah-eu meh.

⁴⁴Kʼoeˇ naˇ, Moˇseˬ-ahˇ Sahˬpaˬ Miˬyehˇ heu loꞈ-ehˇ paˇ ehˇ nehˬ-euˬ meh.

⁴⁵“Dehꞈ beh beh le-euˬ Iˇsaˬleˬlaˆ tsawˇ haˬ deuˬ-euˬ dah zaˇ,Leˬbiˇ tsawˇ haˬ deuˬ-ahˇ ngaˬ-ahˇ a nehˬ-awˇ, dehꞈ beh beh le-euˬ Iˇsaˬleˬlaˆ tsawˇ haˬ deuˬ-euˬ jeˬ zaˬ deuˬ dah zaˇ, Leˬbiˇ tsawˇ haˬ deuˬ-euˬ jeˬ zaˬ deuˬ ngaˬ-ahˇ a nehˬ-awˬ.

⁴⁶Dehꞈ beh beh le-euˬ Iˇsaˬleˬlaˆ tsawˇ haˬ deuˬ-aˬ, Leˬbiˇ tsawˇ haˬ deuˬ myaˆ maˬ tseˇ nyiˬ yaˇ shiꞈ tseˇ smˇ gʼaˬ myaˬ dzehˬ-eu miˇ neh, dzehˬ laˇ-euˬ aˬ li kʼoeˇ deuˬ-ahˇ naw maꞈ ya zeuˇ kʼoꞈ geuꞈ meh.

⁴⁷Aˬ yawꞈ gʼaˬ yawꞈ gʼaˇ duˬ, kaˇ-ahˇ tsaˬ-eu pyuˇ maˇ byaˆ ngaˬ yaˇ byaˆ ya biꞈ meh.

⁴⁸Dzehˬ laˇ-euˬ Iˇsaˬleˬlaˆ tsawˇ haˬ kʼoeˇ deuˬ-ahˇ zeuˇ kʼoꞈ-eu gʼaˇ duˬ, Aˬloˬ hawˇ-eu aˬ yawꞈ-euˬ aˬ li deuˬ-ahˇ pyuˇ kʼoeˇ deuˬ biꞈ-awˬ.”

⁴⁹Kʼoeˇ naˇ, Leˬbiˇ tsawˇ haˬ deuˬ neh bi zeuˇ kʼoꞈ-euˬ dzehˬ laˇ-euˬ tsawˇ haˬ kʼoeˇ deuˬ-ahˇ zeuˇ kʼoꞈ poeˬ pyuˇ kʼoeˇ, Moˇseˬ taꞈ uiˬ-euˬ meh.

⁵⁰Dehꞈ beh beh le-euˬ Iˇsaˬleˬlaˆ tsawˇ haˬ deuˬ jawˇ gaˇ, kaˇ-ahˇ tsaˬ-eu pyuˇ maˇ byaˆ tiˬ heˇ smˬ yaˇ koꞈ tseˇ ngaˬ byaˆ taꞈ za-euˬ meh.

⁵¹Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, tsawˇ haˬ zeuˇ kʼoꞈ poeˬ pyuˇ kʼoeˇ deuˬ, Moˇseˬ neh Aˬloˬ hawˇ-eu aˬ yawꞈ-euˬ aˬ li deuˬ-ahˇ biꞈ-euˬ meh.