Read Akha Bawˇtsahˬ 32 Bible Online

Bawˇtsahˬ 32 - Akha bible

Bawˇtsahˬ 32

¹Luˇbeˬ tsawˇ jeuˬ hawˇ-eu Gaˆ tsawˇ jeuˬ jeˬ zaˬ myaˬ dui dui-awˇ, Yaˬzeuˬ meuˬ hawˇ-eu Giˇlaˆ meuˬ-aˬ, jeˬ zaˬ jawˇ duˬ muiˬ dui dui gaˇ aˬ yawꞈ maꞈ ya mawˇ-euˬ meh.

²Kʼoeˇ ngeh, Moˇseˬ, Eˇlaˬzaˬ hawˇ-eu, Iˇsaˬleˬlaˆ tsawˇ haˬ aˇ maꞈ kʼoeˇ taˆ aˬ yuiꞈ aˬ tsu geuꞈ-eu deuˬ jawˇ gaˇ aˬ yawꞈ maꞈ le-awˇ, heu loꞈ-ehˇ ehˇ nehˬ-euˬ meh.

³“Aˬtaˬyoˆ meuˬ, Diˇboˬ meuˬ, Yaˬzeuˬ meuˬ, Nymˇlahˬ meuˬ, Heˬshaˬboˬ meuˬ, Eˇlaˬleˬ meuˬ, Siˇbaˬmaˬ meuˬ, Neˬboˬ meuˬ hawˇ-eu, Boeˬnaˬ meuˬ heu deuˬ ahˇ leˇ-ehˇ,

⁴Sahˬpaˬ Miˬyehˇ neh Iˇsaˬleˬlaˆ tsawˇ haˬ-ahˇ bi deuˆ za-euˬ miˇ kʼahˬ kʼoeˇ-aˬ, jeˬ zaˬ jawˇ duˬ yaw muiˬ meh. Nga maꞈ-aˬ, jeˬ zaˬ jawˇ myaˬ-eu tsawˇ haˬ pyeuꞈ-eu ma.

⁵Nga maꞈ-ahˇ Yawˇdaˬ lawˇ baˬ maˬ bi tsehˆ doˆ laꞈ ni, miˇ kʼahˬ heu kʼahˬ-ahˇ bi jawˇ laꞈ-awˬ.”

⁶Moˇseˬ ehˇ-eu, “Naw maꞈ-euˬ cawˬ Iˇsaˬleˬlaˆ tsawˇ haˬ deuˬ guiˇ deuˆ leˇ ngeh naw maꞈ heu gaˇ jawˇ yaꞈ mawꞈ-eu nya loˇ.

⁷Iˇsaˬleˬlaˆ tsawˇ haˬ deuˬ Yawˇdaˬ lawˇ baˬ tsehˆ-awˇ Sahˬpaˬ Miˬyehˇ neh biꞈ-euˬ miˇ kʼahˬ-ahˇ maˬ le peuˬ ni bi pyeuꞈ-iˇ-eu lehˇ naw maꞈ jahˇ te loˇ.

⁸Naw maꞈ-euˬ aˬ da deuˬ-ahˇ Kaˬdeˬshaˇbaˬneˬ-ahˇ neh miˇ kʼahˬ kʼoeˇ kʼahˬ-ahˇ ngaˇ bi kʼoeˬ sho haw leˇ ngeh, aˬ yawꞈ maꞈ kʼoeˇ loꞈ-ehˇ jahˇ-euˬ meh.

⁹Eˇshaˬkawˇlaˆ deh kʼawꞈ-ahˇ keuˆ ni aˬ yawꞈ maꞈ le keuˆ-awˇ, miˇ kʼahˬ kʼoeˇ kʼahˬ-ahˇ haw mawˇ yaꞈ-euˬ meh. Ehˇ kʼawꞈ, aˬ yawꞈ maꞈ gʼoꞈ keuˆ le ngeh, Sahˬpaˬ Miˬyehˇ neh biꞈ-euˬ miˇ kʼahˬ-ahˇ Iˇsaˬleˬlaˆ tsawˇ haˬ deuˬ maˬ le uˇ peuˬ ni aˬ yawꞈ maꞈ jahˇ-euˬ meh.

¹⁰Kʼoeˇ ngeh nah Sahˬpaˬ Miˬyehˇ nui ma pehˇ laˇ-awˇ, heu loꞈ-ehˇ saˇ jaˇ dzaˬ-euˬ meh.

¹¹Aˬ yawꞈ maꞈ ngaˬ-ahˇ saˇ jaˇ maˬ ziꞈ-eu miˇ neh, Iˇjiˇtuˆ miˇ kʼahˬ laꞈ kʼoeˇ neh kʼaˇ doˆ le-euˬ tsawˇ haˬ deuˬ laꞈ kʼoeˇ, nyiˬ tseˇ kʼoꞈ-ahˇ neh laꞈ taˆ paw-euˬ tsawˇ haˬ deuˬ tiˬ gʼaˬ-iˬ, Aˬbyaˬhaˬ, Iˇtsaˆ hawˇ-eu Yaˬkoˆ-ahˇ ngaˬ neh saˇ jaˇ dzaˬ taˬ-euˬ miˇ kʼahˬ laꞈ kʼoeˇ maˬ ya le uˇ-a lehˇ ngaˇ kamˬ-eu ma lehˇ ehˇ tsehˆ-euˬ meh.

¹²Sahˬpaˬ Miˬyehˇ-ahˇ saˇ jaˇ maˬ puiˬ-euˬ Gaˬnaˆ aˇ jeuˬ Yeˬpuˬnehˇ-euˬ aˬ li Gaˬlehˆ hawˇ-eu Nuˬ-euˬ aˬ li Yawˇshuˆ maˬ ngeuˇ naˇ, tiˬ gʼaˬ-iˬ maˬ ya le keuˆ-a lehˇ ehˇ taˬ-euˬ meh.

¹³Sahˬpaˬ Miˬyehˇ nui ma pehˇ-awˇ, aˬ yawꞈ nui ma maˬ saˇ ni mˇ-euˬ tsawˇ haˬ kʼoeˇ shehˆ maˬ shiˇ jiˇ kʼoeˇ keuˆ ni, oeˬ tseˇ kʼoꞈ keuˆ ni bawˇ tsahˬ bawˇ dahˇ doe ni cah cah-ehˇ bi jawˇ-euˬ meh.

¹⁴Nymˬ-mˇ, iˬ baˇ paˇ mˇ mawꞈ-eu naw maꞈ shehˆ kʼawꞈ ni, naw maꞈ-euˬ aˬ da deuˬ-euˬ pehˬ zaˇ-ahˇ paˇ nawˬ-awˇ, Iˇsaˬleˬlaˆ tsawˇ haˬ deuˬ kʼoeˇ taˆ Sahˬpaˬ Miˬyehˇ nui ma pehˇ-eu jeˬ tiˬ poˆ paˇ bi keuˆ le-eu gʼeh-eu ngaˇ.

¹⁵Luˇbeˬ tsawˇ jeuˬ hawˇ-eu Gaˆ tsawˇ jeuˬ pyeuꞈ-eu naw maꞈ deuˬ Sahˬpaˬ Miˬyehˇ mehˬ nah maˬ caw teh ni dehꞈ ma lehˇ ngeuˇ naˇ, Iˇsaˬleˬlaˆ tsawˇ haˬ dawˬ tawˆ luꞈ-ahˇ bawˇ tsahˬ bawˇ dahˇ laꞈ kʼoeˇ aˬ yawꞈ byehˇ dzeh yaꞈ-awˇ, naw maꞈ baˬ da neh Iˇsaˬleˬlaˆ tsawˇ haˬ deuˬ ya luˬ ya seˇ-iˇ tehꞈ-a.”

¹⁶Tsawˇ haˬ kʼoeˇ deuˬ Moˇseˬ-euˬ dawˬ peh paˇ jiˆ peh leˇ-awˇ ehˇ-eu, “Nga maꞈ-euˬ yawˇ deuˬ bi jawˇ-eu gʼaˇ duˬ, kʼaˬ lo jeˬ zaˬ jeˬ kuˆ deuˬ hawˇ-eu, nga maꞈ-euˬ miˬ sawˇ zaˬ deuˬ jawˇ-eu gʼaˇ duˬ, nga maꞈ-ahˇ heu gaˇ meuˬ tiˬ deuˬ jeˬ huˬ bi tsoˆ laꞈ-awˬ.

¹⁷Kʼoeˇ naˇ, nga maꞈ lehˬ hmˬ-awˇ, nga maꞈ-euˬ cawˬ Iˇsaˬleˬlaˆ tsawˇ haˬ deuˬ nehˬ-ehˇ guiˇ deuˆ leˇ-awˇ, aˬ yawꞈ maꞈ miˇ kʼahˬ za-awˇ jawˇ duˬ dah leˇ ngeh keuˆ ni, mehˬ hu paw nga maꞈ guiˇ daˬ daˬ-awˇ le ma. Nga maꞈ doˆ dzeuˇ ngeh, nga maꞈ-euˬ miˬ sawˇ zaˬ deuˬ miˇ kʼahˬ heu kʼahˬ-ahˇ jawˇ-eu tsawˇ haˬ deuˬ-ahˇ maˬ ya guˆ ni, ziꞈ dah ni gʼeh-eu meuˬ deuˬ laꞈ kʼoeˇ ya bi jawˇ yaꞈ tehꞈ-a.

¹⁸Iˇsaˬleˬlaˆ tsawˇ haˬ dawˬ tawˆ luꞈ yawˬ ha za paˬ-ahˇ gʼeh-eu miˇ kʼahˬ maˬ za kʼoeˇ keuˆ ni, nga maꞈ maˬ gʼoꞈ le.

¹⁹Yawˇdaˬ lawˇ baˬ-euˬ kʼoeˇ baˬ-ahˇ kʼaˇ jaˆ-eu jeˬ nga maꞈ tiˬ jeˬ-iˬ maˬ geuꞈ. Aˬ jeˬ miˇ neh ehˇ naˇ, Yawˇdaˬ lawˇ baˬ-euˬ nahˇ ma doˆ kʼehˬ paw baˬ pyeuꞈ-eu heu baˬ-ahˇ nga maꞈ jeˬ biˇ za gʼaˬ-euˬ ma.”

²⁰Moˇseˬ ehˇ-eu, “Naw maꞈ kʼaˇ ehˇ-eu loꞈ-ehˇ aˬ diˇ mˇ ma lehˇ ngeuˇ naˇ, heu gaˇ, Sahˬpaˬ Miˬyehˇ-euˬ mehˬ shi, guiˇ deuˆ leˇ-eu gʼaˇ duˬ naw maꞈ lehˬ hmˬ-awˬ.

²¹Guiˇ deuˆ-eu naw maꞈ tsawˇ haˬ dawˬ tawˆ luꞈ, Yawˇdaˬ lawˇ baˬ tsehˆ doˆ-awˇ, Sahˬpaˬ Miˬyehˇ uˆ lahˇ-eu uˬ moˆ muiˇ-eu deuˬ-ahˇ guiˇ deuˆ-awˇ, kʼoeˇ deuˬ-ahˇ Sahˬpaˬ Miˬyehˇ deuˆ gʼaˬ ngeh keuˆ ni naw maꞈ ya deuˆ meh.

²²Miˇ kʼahˬ kʼoeˇ kʼahˬ deuˆ za ngeh, naw maꞈ gʼoꞈ le nya meh. Aˬ jeˬ miˇ neh ehˇ naˇ, Sahˬpaˬ Miˬyehˇ-ahˇ maˬ ehˇ, naw maꞈ-euˬ cawˬ Iˇsaˬleˬlaˆ tsawˇ haˬ deuˬ-ahˇ maˬ ehˇ, mˇ nehˬ paˬ-ehˇ gʼeh-eu jeˬ, naw maꞈ mˇ byah gʼaˬ-euˬ meh. Kʼoeˇ naˇ, Yawˇdaˬ lawˇ baˬ nahˇ ma doˆ kʼehˬ paw baˬ-ahˇ jaˆ-eu miˇ kʼahˬ heu kʼahˬ, Sahˬpaˬ Miˬyehˇ naw maꞈ-ahˇ biꞈ tsehˆ nehˬ laꞈ tehꞈ-a.

²³Ehˇ kʼawꞈ, naw maꞈ neh ehˇ taˬ-euˬ loꞈ-ehˇ naw maꞈ saˇ jaˇ maˬ ziꞈ naˇ, Sahˬpaˬ Miˬyehˇ-ahˇ naw maꞈ mˇ lehˬ-eu meh lehˇ naw maꞈ-ahˇ ngaˇ nymˬ-mˇ mi naˆ-ehˇ ehˇ taˬ-eu ma. Naw maꞈ tiˬ jeˬ-iˬ maˬ ya mˇ lehˬ ni yahˇ-awˬ. Maˬ ngeuˇ naˇ, naw maꞈ-euˬ iˬ baˇ baˬ da neh kʼehˬ nehˬ kʼaˆ nehˬ-eu jeˬ-ahˇ naw maꞈ ya daˬ tehꞈ-a.

²⁴Naw maꞈ-euˬ meuˬ deuˬ hawˇ-eu yawˇ yawˇ kuˆ deuˬ tsoˆ-awˬ. Ehˇ kʼawꞈ, naw maꞈ neh saˇ jaˇ dzaˬ taˬ-euˬ loꞈ-ehˇ mˇ byah-eu gʼaˇ duˬ taˬ ngehˇ.”

²⁵Gaˆ tsawˇ haˬ hawˇ-eu Luˇbeˬ tsawˇ haˬ deuˬ ehˇ-eu, “Nawˬ neh dawˬ kʼaˇ biꞈ nehˬ laꞈ-euˬ loꞈ-ehˇ nga maꞈ mˇ ma.

²⁶Nga maꞈ-euˬ miˬ sawˇ zaˬ deuˬ, nga maꞈ-euˬ mawˇ neˇ hawˇ-eu yawˇ deuˬ, heu gaˇ, Giˇlaˆ meuˬ-ahˇ bi jawˇ yaꞈ ma.

²⁷Nga maꞈ dawˬ tawˆ luꞈ lehˬ hmˬ-awˇ, Sahˬpaˬ Miˬyehˇ uˆ lahˇ-eu uˬ moˆ guiˇ deuˆ leˇ ma.”

²⁸Kʼoeˇ naˇ, Eˇlaˬzaˬ, Yawˇshuˆ hawˇ-eu, Iˇsaˬleˬlaˆ tsawˇ haˬ aˬ yuiꞈ aˬ tsu deuˬ-ahˇ Moˇseˬ heu loꞈ-ehˇ dawˬ biꞈ-euˬ meh.

²⁹“Gaˆ tsawˇ jeuˬ hawˇ-eu Luˇbeˬ tsawˇ jeuˬ Yawˇdaˬ lawˇ baˬ tsehˆ doˆ-awˇ Sahˬpaˬ Miˬyehˇ uˆ lahˇ-euˬ uꞈ moˆ guiˇ deuˆ-eu laꞈ kʼoeˇ, aˬ yawꞈ maꞈ caw ba-eu baˬ da neh miˇ kʼahˬ kʼoeˇ kʼahˬ-ahˇ naw maꞈ deuˆ za gʼaˬ naˇ, aˬ yawꞈ maꞈ-ahˇ Giˇlaˆ miˇ kʼahˬ biꞈ nehˬ-awˬ.

³⁰Ehˇ kʼawꞈ, aˬ yawꞈ maꞈ Yawˇdaˬ lawˇ baˬ maˬ tsehˆ-ehˇ, naw maꞈ nehˬ-ehˇ guiˇ maˬ deuˆ laˇ naˇ, aˬ yawꞈ maꞈ-euˬ jeˬ biˇ kʼawꞈ naw maꞈ nehˬ-ehˇ tiˬ kawˆ loꞈ-ehˇ Kaˬnaˬ miˇ kʼahˬ-ahˇ jaˆ tehꞈ-a.”

³¹Gaˆ tsawˇ haˬ hawˇ-eu Luˇbeˬ tsawˇ haˬ deuˬ ehˇ-eu, “Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ nga maꞈ mˇ ma.

³²Yawˇdaˬ lawˇ baˬ nahˇ ma doˆ kʼehˬ heu gaˇ nga maꞈ jeˬ biˇ za ni, Sahˬpaˬ Miˬyehˇ uˆ lahˇ-eu uˬ moˆ Kaˬnaˬ miˇ kʼahˬ-ahˇ nga maꞈ le uˇ-awˇ guiˇ deuˆ leˇ ma.”

³³Kʼoeˇ naˇ, Aˬmawˇliˆ sahˬ paˬ Siˇhoˬ-euˬ miˇ kʼahˬ dawˬ tawˆ luꞈ hawˇ-eu Baˬshaˬ sahˬ paˬ Awˇgaˆ-euˬ miˇ kʼahˬ dawˬ tawˆ luꞈ maˬ ehˇ, miˇ kʼahˬ kʼoeˇ deuˬ-euˬ tahˬ gʼoꞈ tahˬ jawˇ jaˆ-eu meuˬ deuˬ hawˇ-eu kʼoeˇ-euˬ gahˬ kaˬ deuˬ maˬ ehˇ, Gaˆ tsawˇ jeuˬ, Luˇbeˬ tsawˇ jeuˬ hawˇ-eu Maˬnaˇseˬ tsawˇ jeuˬ tiˬ paˆ-ahˇ Moˇseˬ biꞈ nehˬ-euˬ meh.

³⁴Gaˆ tsawˇ jeuˬ neh tsoˆ muiˬ geuꞈ-euˬ meuˬ deuˬ-aˬ, Diˇboˬ meuˬ, Aˬtaˬyoˆ meuˬ, Aˬyawˬ meuˬ,

³⁵Aˬtaˬyawˇshoˬpaˬ meuˬ, Yeˬzeuˬ meuˬ, Yoˇbeˬhaˇ meuˬ,

³⁶Behˬnymˇlahˬ meuˬ hawˇ-eu, Behˬhaˬlaˬ meuˬ heu deuˬ meh.

³⁷Luˇbeˬ tsawˇ jeuˬ neh tsoˆ muiˬ geuꞈ-eu meuˬ deuˬ-aˬ, Heˬshaˬboˬ meuˬ, Eˇleˬlaˬ meuˬ, Kiˇlaˬdeˬ meuˬ,

³⁸Neˬboˬ meuˬ, Baˬlaˇmyoˬ meuˬ (meuˬ heu meuˬ-euˬ tsawˇ myahˇ heu myahˇ myahˇ paˇ taˬ-euˬ meh) hawˇ-eu, Siˇbaˬmaˬ meuˬ, heu deuˬ meh. Aˬ yawꞈ maꞈ neh tsoˆ muiˬ-euˬ meuˬ deuˬ-ahˇ, aˬ yawꞈ maꞈ tsawˇ myahˇ myahˇ paˇ nehˬ-euˬ meh.

³⁹Maˬnaˇseˬ-euˬ aˬ li Maˬkiˬlaˇ-euˬ aˇ jeuˬ deuˬ Giˇlaˆ meuˬ-ahˇ guiˇ deuˆ za-awˇ, kʼoeˇ gaˇ jawˇ-eu Aˬmawˇliˆ tsawˇ haˬ deuˬ-ahˇ teh doˆ nehˬ-euˬ meh.

⁴⁰Kʼoeˇ miˇ neh, Maˬkiˬlaˇ aˇ jeuˬ-ahˇ Giˇlaˆ miˇ kʼahˬ Moˇseˬ biꞈ-awˇ, kʼoeˇ gaˇ bi jawˇ-euˬ meh.

⁴¹Maˬnaˇseˬ tsawˇ jeuˬ Yaˬiˇlaˆ aˇ jeuˬ deuˬ kʼawꞈ, pu tiˬ paˆ na deuˬ deuˆ za-awˇ, “Yaˬiˇlaˆ-euˬ pu deuˬ” lehˇ myahˇ-euˬ meh.

⁴²Noˇbaˬ-aˬ, Jeˇnaˆ meuˬ hawˇ-eu kʼoeˇ gaˇ taꞈ-eu pu deuˬ-ahˇ deuˆ za-awˇ, aˬ yawꞈ-euˬ tsawˇ myahˇ yuˇ-awˇ, Noˇbaˬ meuˬ lehˇ myahˇ nehˬ-euˬ meh.