Read Akha Bawˇtsahˬ 35 Bible Online

Bawˇtsahˬ 35 - Akha bible

Bawˇtsahˬ 35

¹Yeˬliˇkoˇ meuˬ-euˬ kʼoeˇ paw paˆ Yawˇdaˬ lawˇ baˬ nui baˬ-ahˇ jaˆ-eu Mawˇbaˆ miˇ kʼahˬ deh ga-ahˇ, Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

²“Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Iˇsaˬleˬlaˆ tsawˇ haˬ deuˬ neh za-euˬ miˇ kʼahˬ laꞈ kʼoeˇ, meuˬ tiˬ paˆ na deuˬ hawˇ-eu meuˬ-euˬ tahˬ gʼoꞈ tahˬ jawˇ jaˆ-eu jeˬ zaˬ gaˆ kʼahˬ deuˬ Leˬbiˇ tsawˇ ha deuˬ-ahˇ ya biꞈ meh.

³Meuˬ kʼoeˇ deuˬ-aˬ, Leˬbiˇ tsawˇ haˬ deuˬ-euˬ meuˬ pyeuꞈ-awˇ, kʼoeˇ gaˇ ya bi jawˇ meh. Jeˬ zaˬ gaˆ kʼahˬ kʼoeˇ deuˬ kʼawꞈ, aˬ yawꞈ maꞈ-euˬ mawˇ neˇ hawˇ-eu jeˬ zaˬ deuˬ gʼaˇ duˬ meh.

⁴Meuˬ meuˬ lahˇ gawˬ taˬ-euˬ gaˇ neh nyiˬ yaˇ ngaˬ tseˇ lmˇ kaˬ gaˇ keuˆ ni, meuˬ-euˬ tiˬ jawˬ jeˬ zaˬ gaˆ kʼahˬ ya taˬ nehˬ meh.

⁵Meuˬ-euˬ laꞈ nyiˇ paw nahˇ ma doˆ kʼehˬ paw pyawˬ-ahˇ ngaˬ yaˇ lmˇ, nahˇ ma ga kʼehˬ paw pyawˬ-ahˇ ngaˬ yaˇ lmˇ, laꞈ taˆ paw pyawˬ-ahˇ ngaˬ yaˇ lmˇ hawˇ-eu, laꞈ oˆ paw pyawˬ-ahˇ ngaˬ yaˇ lmˇ bi jaˆ-awˇ, kʼoeˇ-euˬ gʼahˇ ceh meuˬ ya bi jaˆ meh. Heu-aˬ, meuˬ-euˬ jeˬ zaˬ gaˆ kʼahˬ pyeuꞈ-eu meh.

⁶Tsawˇ haˬ tiˬ gʼaˬ na maꞈ yehꞈ maˇ yehꞈ-ehˇ aˬ cawˬ-ahˇ laˆ sehꞈ ngeh cehˆ buˬ nya-eu gʼaˇ duˬ, buˬ-iˇ law-iˇ-eu meuˬ koꞈ meuˬ Leˬbiˇ tsawˇ haˬ-ahˇ naw maꞈ ya biꞈ meh. Kʼoeˇ uˬ taꞈ, meuˬ oeˬ tseˇ nyiꞈ meuˬ aˬ yawꞈ maꞈ-ahˇ ya biꞈ meh.

⁷Meuˬ dawˬ tawˆ luꞈ oeˬ tseˇ yehꞈ meuˬ hawˇ-eu meuˬ kʼoeˇ deuˬ-euˬ jeˬ zaˬ gaˆ kʼahˬ deuˬ ahˇ leˇ-ehˇ, Leˬbiˇ tsawˇ haˬ deuˬ-ahˇ naw maꞈ ya biꞈ meh.

⁸Leˬbiˇ tsawˇ haˬ deuˬ-ahˇ meuˬ biꞈ ngeh, miˇ kʼahˬ za huiˬ dzehˬ-euˬ tsawˇ jeuˬ deuˬ ya biꞈ myaˬ dzehˬ-awˇ, miˇ kʼahˬ za cuiˆ dzehˬ-euˬ deuˬ ya biꞈ cuiˆ dzehˬ meh.”

⁹Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

¹⁰“Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Yawˇdaˬ lawˇ baˬ tsehˆ-awˇ, Kaˬnaˬ miˇ kʼahˬ-ahˇ naw maꞈ uˇ leˇ ngeh,

¹¹tsawˇ haˬ tiˬ gʼaˬ na maˬ yehꞈ maˇ yehꞈ-ehˇ aˬ cawˬ-ahˇ laˆ sehꞈ ngeh cehˆ buˬ nya-eu gʼaˇ duˬ, buˬ-iˇ law-iˇ-eu meuˬ deuˬ naw maꞈ ya tseˇ doˆ taˬ meh.

¹²Kʼoeˇ gaˇ aˬ yawꞈ cehˆ uˇ-iˇ-awˇ, shiˇ-euˬ gʼaˬ-euˬ aˬ yuiꞈ aˬ nyiˇ deuˬ neh laꞈ poˆ bi poˆ-eu jeˬ-ahˇ aˬ yawꞈ ya buˬ-iˇ tehꞈ-a. Tsawˇ haˬ tiˬ gʼaˬ aˬ cawˬ-ahˇ sehꞈ-euˬ meh lehˇ ehˇ-eu kʼawꞈ, tsawˇ haˬ aˇ maꞈ aˇ muˇ mehˬ shi yaˇ kʼaˬ maˬ daˇ tsehˆ gʼaˬ kʼoeˇ keuˆ ni, aˬ yawꞈ-ahˇ maˬ ya sehꞈ-a.

¹³Meuˬ koꞈ meuˬ tseˇ doˆ taˬ-awˬ.

¹⁴Yawˇdaˬ lawˇ baˬ nahˇ ma doˆ kʼehˬ paw smˇ meuˬ hawˇ-eu Kaˬnaˬ miˇ kʼahˬ laꞈ kʼoeˇ smˇ meuˬ tseˇ doˆ taˬ-awˬ.

¹⁵Meuˬ kʼoeˇ deuˬ-aˬ, Iˇsaˬleˬlaˆ tsawˇ haˬ deuˬ hawˇ-eu aˬ yawꞈ maꞈ nehˬ-ehˇ tiˬ kʼehˬ tiˬ yamˬ laꞈ kʼoeˇ maˬ ehˇ, aˬ myah luꞈ maˬ ehˇ, jawˇ luꞈ-eu boeˇ miˬ siˬ kʼaˬ deuˬ gʼaˇ duˬ buˬ-iˇ law-iˇ-eu meuˬ deuˬ pyeuꞈ-eu meh. Tsawˇ haˬ tiˬ gʼaˬ na maˬ yehꞈ maˇ yehꞈ-ehˇ aˬ cawˬ-ahˇ laˆ sehꞈ ngeh, meuˬ kʼoeˇ tiˬ meuˬ na-ahˇ ceh uˇ-iˇ naˇ, ya buˬ-iˇ tehꞈ-a.

¹⁶“Tsawˇ haˬ tiˬ gʼaˬ na, shmˇ neh aˬ cawˬ-ahˇ diˬ-awˇ bi shiˇ naˇ, tsawˇ haˬ-ahˇ sehꞈ-euˬ jeˬ pyeuꞈ-eu miˇ neh, aˬ yawꞈ-ahˇ paˇ ya sehꞈ poˆ meh.

¹⁷Tsawˇ haˬ tiˬ gʼaˬ na, tsawˇ haˬ-ahˇ tuˆ sehꞈ nya-eu kʼaˬ lo tuˆ tehˬ-awˇ, aˬ cawˬ-ahˇ tuˆ-awˇ bi shiˇ naˇ, tsawˇ haˬ-ahˇ sehꞈ-euˬ jeˬ pyeuꞈ-eu miˇ neh, aˬ yawꞈ-ahˇ paˇ ya sehꞈ poˆ meh.

¹⁸Tsawˇ haˬ tiˬ gʼaˬ na, tsawˇ haˬ-ahˇ deh sehꞈ nya-eu daˇ kawˬ baꞈ-awˇ aˬ cawˬ-ahˇ deh-awˇ bi shiˇ naˇ, tsawˇ haˬ-ahˇ sehꞈ-euˬ jeˬ pyeuꞈ-eu miˇ neh, aˬ yawꞈ-ahˇ paˇ ya sehꞈ poˆ meh.

¹⁹Shiˇ-eu gʼaˬ-ahˇ aˬ yuiꞈ aˬ nyiˇ peh dzehˬ-eu gʼaˬ, tsawˇ haˬ kʼoeˇ gʼaˬ-ahˇ ya sehꞈ meh. Tsawˇ haˬ kʼoeˇ gʼaˬ-ahˇ kʼaˇ mawˇ le gaˇ aˬ yawꞈ sehꞈ nya meh.

²⁰“Tsawˇ haˬ tiˬ gʼaˬ na aˬ cawˬ nehˬ-ehˇ nui ma laˆ jaˆ taˬ-euˬ laꞈ kʼoeˇ, tiˬ gaˇ paw neh dehˬ ka-awˇ bi shiˇ-euˬ maˬ ehˇ, tiˬ jeˬ paˬ neh biˬ sehꞈ-euˬ maˬ ehˇ,

²¹aˬ laꞈ neh teˇ sehꞈ-euˬ maˬ ehˇ, tsawˇ haˬ-ahˇ sehꞈ-euˬ jeˬ pyeuꞈ-eu miˇ neh, aˬ yawꞈ-ahˇ paˇ ya sehꞈ poˆ meh. Shiˇ-eu gʼaˬ-ahˇ aˬ yuiꞈ aˬ nyiˇ peh dzehˬ-eu gʼaˬ tsawˇ haˬ kʼoeˇ gʼaˬ-ahˇ ya sehꞈ meh. Tsawˇ haˬ kʼoeˇ gʼaˬ-ahˇ kʼaˇ mawˇ le gaˇ aˬ yawꞈ sehꞈ nya meh.

²²“Tsawˇ haˬ tiˬ gʼaˬ na, yawˬ ha nehˬ-ehˇ nui ma laˆ naˇ taˬ-euˬ maˬ jaˆ-eu tsawˇ haˬ-ahˇ, tiˬ gaˇ paw dehˬ ka-awˇ maˬ ehˇ, tiˬ jeˬ paˬ neh biˬ tahˬ-awˇ maˬ ehˇ, maˬ yehꞈ maˇ yehꞈ-ahˇ laˆ sehꞈ-euˬ ehˇ-awˬ.

²³Maˬ ngeuˇ naˇ, tsawˇ haˬ tiˬ gʼaˬ na maˬ noeˬ maˬ duˇ-ehˇ kʼaˬ lo gʼoˆ biˬ gʼeh-awˇ, biˬ sehꞈ-eu lehˇ maˬ noeˬ-euˬ gaˇ, yawˬ ha nehˬ-ehˇ nui ma laˆ naˇ taˬ-euˬ maˬ jaˆ-eu tsawˇ haˬ tiˬ gʼaˬ na-ahˇ ga tahˬ-awˇ bi shiˇ-euˬ ehˇ-awˬ.

²⁴Kʼoeˇ loꞈ-ehˇ pyeuꞈ laˇ ngeh, aˬ cawˬ-ahˇ laꞈ poˆ paˇ poˆ mawꞈ-eu shiˇ dzeuˇ-euˬ gʼaˬ-ahˇ aˬ yuiꞈ aˬ nyiˇ peh dzehˬ-eu gʼaˬ jawˇ paw, miˇ kʼahˬ zaˬ deuˬ maˬ pyawˬ ni, maˬ yehꞈ maˇ yehꞈ-ehˇ aˬ cawˬ-ahˇ laˆ tahˬ-awˇ bi shiˇ-euˬ gʼaˬ jawˇ paw pyawˬ-awˇ yaˇ kʼaˬ ya daˇ meh.

²⁵Miˇ kʼahˬ zaˬ deuˬ-aˬ, aˬ cawˬ-ahˇ laˆ tahˬ-awˇ bi shiˇ-euˬ tsawˇ haˬ kʼoeˇ gʼaˬ-ahˇ, shiˇ dzeuˇ-euˬ gʼaˬ-euˬ aˬ yuiꞈ aˬ nyiˇ deuˬ-euˬ laꞈ-ahˇ neh ka kʼoꞈ-awˇ, buˬ-iˇ law-iˇ-eu meuˬ-ahˇ sheuˬ gʼeh nehˬ-awˇ ya bi buˬ-iˇ meh. Kʼoeˇ ngeh yamˬ-ahˇ Piˇ ma yaw huiˬ gʼaˬ geuꞈ luꞈ-eu gʼaˬ maˬ shiˇ kʼoeˇ keuˆ ni, tsawˇ haˬ kʼoeˇ gʼaˬ kʼoeˇ gaˇ ya jawˇ meh.

²⁶Ehˇ kʼawꞈ, aˬ cawˬ-ahˇ laˆ tahˬ-awˇ bi shiˇ-euˬ baˬ da neh iˬ baˇ ahˇ-eu tsawˇ haˬ kʼoeˇ gʼaˬ, buˬ-iˇ law-iˇ-eu meuˬ kʼoeˇ meuˬ-euˬ laꞈ nyiˇ doˆ-iˇ-awˇ,

²⁷aˬ yawꞈ neh laˆ sehꞈ-euˬ gʼaˬ-euˬ aˬ yuiꞈ aˬ nyiˇ neh aˬ yawꞈ-ahˇ mawˇ-awˇ bi sehꞈ naˇ, kʼoeˇ loꞈ-ehˇ sehꞈ-euˬ kʼoeˇ-aˬ, tsawˇ haˬ-ahˇ sehꞈ-euˬ jeˬ lehˇ maˬ sawˇ nya-a.

²⁸Piˇ ma yaw huiˬ kʼoeˇ gʼaˬ maˬ shiˇ kʼoeˇ keuˆ ni, aˬ cawˬ-ahˇ laˆ tahˬ-awˇ bi shiˇ-euˬ baˬ da neh iˬ baˇ ahˇ-eu tsawˇ haˬ kʼoeˇ gʼaˬ, buˬ-iˇ law-iˇ-eu meuˬ laꞈ kʼoeˇ tehꞈ-ehˇ ya jawˇ meh. Ehˇ kʼawꞈ, Piˇ ma yaw huiˬ gʼaˬ shiˇ dzeuˇ gʼaˬ ngeh, yawˬ ha-euˬ nymˇ jiˇ-ahˇ gʼoꞈ jawˇ-iˇ nya meh.

²⁹Naw maꞈ hawˇ-eu naw maꞈ-euˬ zaˬ deuˬ uˆ deuˬ aˬ geu gaˇ jawˇ keuˆ-eu maˬ kaˬ, zahˇ sahˇ kʼoꞈ heu hmˬ-ahˇ maˬ ya byehˇ-a.

³⁰“Kʼaˇ teˬ-eu myaˆ mawˇ duˬ-euˬ saˇ kiˇ nyiˬ gʼaˬ maˬ jawˇ gaˇ, aˬ cawˬ-ahˇ sehꞈ-euˬ tsawˇ haˬ-ahˇ maˬ ya sehꞈ-a. Saˇ kiˇ tiˬ gʼaˬ-ahˇ tehꞈ-ehˇ gʼoe-awˇ maˬ ya sehꞈ poˆ-a.

³¹Aˬ cawˬ-ahˇ sehꞈ-euˬ tsawˇ haˬ-ahˇ paˇ ya sehꞈ poˆ meh.

³²Pyuˇ biꞈ-awˇ maˬ ka kʼoꞈ nya-a. Buˬ-iˇ law-iˇ-eu meuˬ-ahˇ cehˆ jawˇ leˇ-euˬ tsawˇ haˬ tiˬ gʼaˬ-aˬ, Piˇ ma yaw huiˬ gʼaˬ maˬ shiˇ mi naˆ-ehˇ, pyuˇ biꞈ-awˇ yawˬ ha-euˬ nymˇ jiˇ-ahˇ maˬ gʼoꞈ jawˇ-iˇ nya-a.

³³Kʼoeˇ loꞈ-ehˇ jahˇ naˇ, naw maꞈ jawˇ luꞈ-eu miˇ kʼahˬ-ahˇ naw maꞈ laˆ jawꞈ-eu meh. Tsawˇ haˬ-ahˇ sehꞈ-euˬ jeˬ-aˬ, miˇ kʼahˬ-ahˇ laˆ jawꞈ-eu jeˬ pyeuꞈ-awˇ, aˬ cawˬ-ahˇ sehꞈ-euˬ gʼaˬ maˬ shiˇ kʼoeˇ keuˆ ni, tsawˇ haˬ sehꞈ-euˬ miˇ kʼahˬ kʼoeˇ kʼahˬ-ahˇ tiˬ jeˬ gʼeh-awˇ neh-iˬ maˬ laˆ muiˬ maˬ laˆ shawˇ nya-a.

³⁴Naw maꞈ jawˇ luꞈ-eu miˇ kʼahˬ-ahˇ naw maꞈ maˬ ya laˆ jawꞈ-a. Aˬ jeˬ miˇ neh ehˇ naˇ, ngaˇ-aˬ, Sahˬpaˬ Miˬyehˇ pyeuꞈ-awˇ, naw maꞈ nehˬ-ehˇ ngaˇ jawˇ-eu ma lehˇ ehˇ nehˬ-awˬ.”