Read Akha Bawˇtsahˬ 5 Bible Online

Bawˇtsahˬ 5 - Akha bible

Bawˇtsahˬ 5

¹Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

²“Shaˬ jiˇ baˆ kʼoˆ-ahˇ nyawˬ leˇ nya-eu maˇ naˇ naˇ-eu tsawˇ haˬ maˬ ehˇ, gʼawˇ mawˇ-ahˇ maˇ uiˇ doˆ-eu tsawˇ haˬ maˬ ehˇ, shiˇ taˬ-euˬ jeˬ-ahˇ toeˬ ciˆ-euˬ miˇ neh maˬ shawˇ-eu tsawˇ haˬ deuˬ maˬ ehˇ, pu laꞈ nyiˇ paw teh dzeh nehˬ-awˬ lehˇ Iˇsaˬleˬlaˆ tsawˇ haˬ deuˬ-ahˇ dawˬ biꞈ nehˬ-awˬ.

³Ngaˬ-euˬ tsawˇ haˬ deuˬ nehˬ-ehˇ tiˬ kawˆ loꞈ-ehˇ ngaˇ jawˇ luꞈ-eu pu-ahˇ maˬ ya bi laˆ jawꞈ-eu gʼaˇ duˬ, maˬ shawˇ-eu tsawˇ haˬ dawˬ tawˆ luꞈ-ahˇ laꞈ nyiˇ teh doˆ-awˬ.”

⁴Moˇseˬ-ahˇ Sahˬpaˬ Miˬyehˇ neh mehˬ nehˬ tsoˆ nehˬ-euˬ jeˬ-ahˇ Iˇsaˬleˬlaˆ tsawˇ haˬ deuˬ naˇ haˬ geuꞈ-awˇ, tsawˇ haˬ kʼoeˇ deuˬ-ahˇ pu laꞈ nyiˇ teh dzeh-euˬ meh.

⁵Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

⁶“Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-awˬ. Tsawˇ haˬ tiˬ gʼaˬ na Sahˬpaˬ Miˬyehˇ-ahˇ saˇ jaˇ puiˬ-awˇ, aˬ cawˬ-ahˇ yaw lehˬ jeˬ mˇ naˇ, tsawˇ haˬ kʼoeˇ gʼaˬ iˬ baˇ ahˇ-eu meh.

⁷Tsawˇ haˬ kʼoeˇ gʼaˬ yawˬ ha-euˬ iˬ baˇ ya ehˇ doˆ-awˇ, aˬ yawꞈ neh mˇ lehˬ nehˬ-euˬ gʼaˬ-ahˇ kʼaˇ mˇ lehˬ-euˬ jeˬ-euˬ aˇ poeˬ tiˬ byah tiˬ loꞈ ya biꞈ tsoeˬ-eu uˬ taꞈ, ngaˬ bymˇ tiˬ bymˇ ya biꞈ dzehˬ meh.

⁸Ehˇ kʼawꞈ, mˇ lehˬ nehˬ-euˬ jeˬ-ahˇ ya daˬ-euˬ tsawˇ haˬ kʼoeˇ gʼaˬ shiˇ-awˇ, aˬ yawꞈ-ahˇ tsoeˬ kʼoꞈ nehˬ-eu jeˬ-ahˇ ha geuꞈ-eu gʼaˇ duˬ aˬ yuiꞈ aˬ nyiˇ kʼawꞈ maˬ jawˇ naˇ, tsoeˬ kʼoꞈ nehˬ-euˬ jeˬ kʼoeˇ piˇ ma deuˬ gʼaˇ duˬ Sahˬpaˬ Miˬyehˇ-ahˇ ya a nehˬ meh. Iˬ baˇ ahˇ-eu tsawˇ haˬ kʼoeˇ gʼaˬ-ahˇ iˬ baˇ shawˇ nehˬ-eu zahˇ jahˇ gaˇ geuꞈ-eu yawˇ aˬ buˬ tiˬ mawˇ uˬ taꞈ, oꞈ-eu geuˇ-eu jeˬ ya biꞈ tsoeˬ-eu meh.

⁹Iˇsaˬleˬlaˆ tsawˇ haˬ deuˬ neh Sahˬpaˬ Miˬyehˇ-ahˇ kʼaˇ lawˇ nehˬ laˇ-euˬ yawˬ jeˬ na luꞈ, aˬ yawꞈ maꞈ neh kʼaˇ biꞈ laˇ-euˬ piˇ ma kʼoeˇ gʼaˬ-euˬ shaˬ bymˇ pyeuꞈ-eu meh.

¹⁰Piˇ ma aˬ geu gʼaˬ maˬ kaˬ, yawˬ ha-ahˇ kʼaˇ biꞈ ha laˇ-euˬ damˬ-eu jeˬ-ahˇ ya geuꞈ meh.”

¹¹Moˇseˬ-ahˇ Sahˬpaˬ Miˬyehˇ heu loꞈ-ehˇ dawˬ biꞈ-euˬ meh.

¹²Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ mehˬ nehˬ tsoˆ nehˬ-awˬ. Kʼaˬ dzeˇ zaˬ tiˬ gʼaˬ aˬ yawꞈ-euˬ miˬ zaˬ aˬ yawꞈ-ahˇ saˇ jaˇ maˬ jawˇ-ehˇ, kʼaˬ dzeˇ zaˬ nui gʼaˬ nehˬ-ehˇ joe-awˇ yawˬ haˇ yawˬ ha yaw jawꞈ jeˬ mˇ-euˬ meh lehˇ noeˬ-eu laꞈ kʼoeˇ, maˬ jah coeˇ-ehˇ pyeuꞈ laˇ-eu baw-eu meh. Ehˇ kʼawꞈ, zaˬ miˬ zaˬ gʼaˬ gaˇ kawˆ kʼoeˇ zaꞈ taˬ-euˬ miˇ neh maˬ ehˇ, saˇ kiˇ saˇ seˬ maˬ jawˇ-eu miˇ neh maˬ ehˇ, aˬ yawꞈ kʼoeˇ loꞈ-ehˇ joe luꞈ gaˇ nyehꞈ mi-euˬ maˬ ngeuˇ-eu miˇ neh maˬ ehˇ, kʼaˬ dzeˇ zaˬ gʼaˬ yaw duˬ yaw ciˇ ciˇ-ehˇ maˬ ehˇ duˬ nya-a. Maˬ ngeuˇ naˇ, zaˬ miˬ zaˬ gʼaˬ kʼaˇ boe-ehˇ saˇ jaˇ ziꞈ-awˇ dehꞈ-euˬ kʼawꞈ, kʼaˬ dzeˇ zaˬ gʼaˬ noeˬ bahˬ-eu jeˬ pyeuꞈ nya-eu meh.

¹⁵Heu loꞈ-ehˇ gʼeh-eu gaˇ kawˆ doˆ laˇ naˇ, kʼaˬ dzeˇ zaˬ gʼaˬ yawˬ ha-euˬ miˬ zaˬ-ahˇ piˇ ma jawˇ gaˇ ya sheuˬ gʼeh meh. Lawˇ-eu gʼaˇ duˬ loˬ-eu lawˬ loeˇ cehˇ meu tiˬ pehˬ kʼawꞈ aˬ yawꞈ ya yuˇ gʼeh meh. Ehˇ kʼawꞈ, kʼoeˇ-euˬ kʼoeˇ taˆ, saˬ loˬ tsiˇ maˬ ehˇ, yaw saw jeˬ maˬ ehˇ, maˬ ya dawˆ daˆ-a. Aˬ jeˬ miˇ neh ehˇ naˇ, kʼoeˇ-aˬ, yawˬ ha-euˬ miˬ zaˬ-ahˇ noeˬ bahˬ luꞈ-eu kʼaˬ dzeˇ zaˬ tiˬ gʼaˬ neh, yaw tsaˬ yaw dawˇ jeˬ bi doˆ laˇ-eu gʼaˇ duˬ lawˇ-euˬ jeˬ pyeuꞈ-eu meh.

¹⁶Piˇ ma gʼaˬ zaˬ miˬ zaˬ kʼoeˇ gʼaˬ-ahˇ mehˬ hu paw kuˇ doˆ-awˇ, lawˇ duˬ mehˬ shi ya bi yawꞈ meh.

¹⁷Miˇ tsaˬ naˬ bo laꞈ kʼoeˇ muiˬ-eu shawˇ-eu iˇ cuꞈ ui cuiˆ shehˆ ahˇ-awˇ, iˇ cuꞈ kʼoeˇ yaw kʼaˬ bi kʼaˬ-eu gʼaˇ duˬ Sahˬpaˬ Miˬyehˇ jawˇ-eu Sehˬ gʼawˆ laꞈ kʼoeˇ-euˬ miˇ tsaˬ ui cuiˆ yuˇ-awˇ ya dawˆ meh.

¹⁸Kʼoeˇ naˇ, zaˬ miˬ zaˬ kʼoeˇ gʼaˬ-euˬ uˬ duˬ tsehˇ kahˇ caˆ luˆ puiˇ-awˇ, lawˇ-eu cehˇ meu kʼoeˇ zaˬ miˬ zaˬ kʼoeˇ gʼaˬ-euˬ laꞈ kʼawˆ-ahˇ ya dawˆ ahˇ nehˬ meh. Piˇ ma gʼaˬ-aˬ, yaˬ kʼehˇ yaˬ-eu jeˬ hehˇ leꞈ-eu iˇ cuꞈ yaw kʼaˬ kʼoeˇ shehˆ ahˇ taˬ-euˬ naˬ bo ya yuˇ meh.

¹⁹Kʼoeˇ naˇ, piˇ ma gʼaˬ zaˬ miˬ zaˬ kʼoeˇ gʼaˬ-ahˇ heu loꞈ-ehˇ ehˇ nehˬ-awˇ ya bi kamˬ meh. “Kʼaˬ dzeˇ zaˬ nui gʼaˬ-ahˇ nawˇ maˬ bahˬ lawˬ naˇ, iˇ cuꞈ heu neh hehˇ leꞈ-euˬ yaˬ kʼehˇ yaˬ-eu jeˬ nawˬ-euˬ kʼoeˇ taˆ maˬ keuˆ le-aˇ.

²⁰Ehˇ kʼawꞈ, bahˬ taˬ-eu jaˆ naˇ,

²¹nawˬ-euˬ tsawˇ haˬ deuˬ laꞈ kʼoeˇ nawˬ-euˬ tsawˇ myahˇ kʼoeˇ taˆ Sahˬpaˬ Miˬyehˇ-euˬ yaˬ kʼehˇ yaˬ-eu jeˬ keuˆ le luꞈ-uˇ. Nawˬ-euˬ pyaˬ kaˬ liˬ-iˇ koˆ-iˇ-awˇ, nawˬ-euˬ uˬ maˆ puˬ laˇ-eu jeˬ nawˬ-euˬ kʼoeˇ taˆ Sahˬpaˬ Miˬyehˇ bi keuˆ le luꞈ-uˇ.

²²Iˇ cuꞈ heu nawˬ-euˬ uˬ maˆ laꞈ kʼoeˇ uˇ keuˆ-iˇ-awˇ, nawˬ-eu uˬ maˆ puˬ laˇ-awˇ, nawˬ-euˬ pyaˬ kaˬ liˬ-iˇ koˆ-iˇ-eu jeˬ bi keuˆ le luꞈ-uˇ.” Zaˬ miˬ zaˬ kʼoeˇ gʼaˬ gʼeh, “Ngaˇ nui ma tsaˬ ma. Sahˬpaˬ Miˬyehˇ kʼoeˇ loꞈ-ehˇ mˇ nehˬ laꞈ luꞈ-uˇ” lehˇ ya ehˇ meh.

²³Kamˬ taˬ-eu dawˬ kʼoeˇ deuˬ sahˬ boꞈ laꞈ kʼoeˇ piˇ ma gʼaˬ boꞈ ahˇ-awˇ, iˇ cuꞈ yaw kʼaˬ ahˇ-eu naˬ bo laꞈ kʼoeˇ ya lehˬ tsiˬ ahˇ meh.

²⁴Zaˬ miˬ zaˬ kʼoeˇ gʼaˬ-euˬ uˬ maˆ-ahˇ naˇ-eu gawˇ-eu jeˬ bi keuˆ le-eu iˇ cuꞈ yaw kʼaˬ kʼoeˇ maˬ bi dawˇ mi naˆ-ehˇ,

²⁵zaˬ miˬ zaˬ kʼoeˇ gʼaˬ-euˬ aˬ laꞈ laꞈ kʼoeˇ ahˇ-eu cehˇ meu kʼoeˇ piˇ ma gʼaˬ yuˇ-awˇ, aˬ laꞈ cawˬ ja-eu laꞈ kʼoeˇ Sahˬpaˬ Miˬyehˇ-ahˇ a nehˬ-awˇ, lawˇ duˬ kʼoeˇ taˆ ya yuˇ gʼeh meh.

²⁶Kʼoeˇ naˇ, lawˇ-eu jeˬ kʼoeˇ dawˬ tawˆ luꞈ-euˬ dah zaˇ, cehˇ meu kʼoeˇ laꞈ tsuˆ tiˬ tsuˆ tsuˆ doˆ-awˇ, lawˇ duˬ kʼoeˇ taˆ ya dzah puiˆ meh. Aˇ saˬ saˬ laˇ ngeh, zaˬ miˬ zaˬ kʼoeˇ gʼaˬ-ahˇ iˇ cuꞈ kʼoeˇ ya bi dawˇ meh.

²⁷Zaˬ miˬ zaˬ kʼoeˇ gʼaˬ kʼaˬ dzeˇ zaˬ nui gʼaˬ nehˬ-ehˇ bahˬ taˬ-euˬ jaˆ naˇ, iˇ cuꞈ kʼoeˇ naˇ-eu gawˇ-eu jeˬ bi keuˆ le tehꞈ-a. Aˬ yawꞈ-euˬ uˬ maˆ puˬ laˇ-awˇ, aˬ yawꞈ-euˬ pyaˬ kaˬ liˬ-iˇ koˆ-iˇ tehꞈ-a. Aˬ yawꞈ-euˬ tsawˇ haˬ laꞈ kʼoeˇ, aˬ yawꞈ kʼoeˇ taˆ yaˬ kʼehˇ yaˬ-eu jeˬ keuˆ le tehꞈ-a.

²⁸Ehˇ kʼawꞈ, aˬ yawꞈ iˬ baˇ maˬ ahˇ naˇ, aˬ yawꞈ kʼoeˇ taˆ tiˬ jeˬ-iˬ maˬ keuˆ le ni, zaˬ ciˬ zaˬ cu baw tehꞈ-a.

²⁹Heu-aˬ, kʼaˬ dzeˇ zaˬ tiˬ gʼaˬ yawˬ ha-euˬ miˬ zaˬ aˬ cawˬ nehˬ-ehˇ bahˬ-euˬ meh lehˇ noeˬ-awˇ, maˬ jah coeˇ-eu laꞈ kʼoeˇ myaˆ naˆ-eu gaˇ kawˆ-ahˇ taꞈ leˇ-eu zahˇ dawˬ kʼoꞈ dawˬ meh. Zaˬ miˬ zaˬ gʼaˬ-ahˇ lawˇ duˬ mehˬ shi bi yawꞈ-awˇ, piˇ ma gʼaˬ kʼoeˇ loꞈ-ehˇ zahˇ ya jahˇ meh.

³¹Kʼaˬ dzeˇ zaˬ gʼaˬ kʼoeˇ taˆ iˬ baˇ maˬ jaˆ-a. Ehˇ kʼawꞈ, miˬ zaˬ gʼaˬ iˬ baˇ ahˇ naˇ, kʼaˇ keuˆ le-eu jeˬ-ahˇ zaˬ miˬ zaˬ gʼaˬ ya daˬ meh.