Read Akha Bawˇtsahˬ 9 Bible Online

Bawˇtsahˬ 9 - Akha bible

Bawˇtsahˬ 9

¹Iˇsaˬleˬlaˆ tsawˇ haˬ deuˬ Iˇjiˇtuˆ miˇ kʼahˬ laꞈ kʼoeˇ neh doˆ le-awˇ, nyiˬ kʼoꞈ tiˬ kʼoꞈ ba la yaw beh siˬ-ahˇ, Siˇnaˆ bawˇ tsahˬ bawˇ dahˇ laꞈ kʼoeˇ Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

²“Nah tsaˬ tsoˆ taˬ-euˬ aˇ yamˬ-ahˇ, Iˇsaˬleˬlaˆ tsawˇ haˬ deuˬ bawˬ-iˬ bi gʼeh-awˬ.

³Ba la heu siˬ tseˇ oeˬ nah uˬ ciꞈ uˬ taw paw aˇ dahˬ beh-awˇ, zahˇ sahˇ kʼoꞈ kʼaˇ jaˆ-eu loꞈ-ehˇ Iˇsaˬleˬlaˆ tsawˇ haˬ deuˬ Baˬsaˬkaˬ Bawˬ-iˬ ya gʼeh meh.”

⁴Kʼoeˇ ngeh, Baˬsaˬkaˬ Bawˬ-iˬ ya gʼeh meh lehˇ Iˇsaˬleˬlaˆ tsawˇ haˬ deuˬ-ahˇ Moˇseˬ ehˇ nehˬ-euˬ meh.

⁵Kʼoeˇ naˇ, ba la yaw beh siˬ tseˇ oeˬ nah uˬ ciꞈ uˬ taw paw, Siˇnaˆ bawˇ tsahˬ bawˇ dahˇ laꞈ kʼoeˇ aˬ yawꞈ maꞈ bawˬ-iˬ gʼeh-euˬ meh. Moˇseˬ-ahˇ Sahˬpaˬ Miˬyehˇ neh dawˬ kʼaˇ biꞈ nehˬ-euˬ loꞈ-ehˇ aˬ yawꞈ maꞈ jahˇ-euˬ meh.

⁶Ehˇ kʼawꞈ, shiˇ taˬ-euˬ jeˬ-ahˇ toeˬ ciˆ-euˬ miˇ neh, zahˇ sahˇ kʼoꞈ-ahˇ taꞈ leˇ-eu laꞈ kʼoeˇ maˬ shawˇ-eu tsawˇ haˬ tiˬ paˆ na deuˬ jawˇ-eu meh. Kʼoeˇ ngeh nah laꞈ kʼoeˇ, tsawˇ haˬ kʼoeˇ deuˬ Baˬsaˬkaˬ Bawˬ-iˬ maˬ gʼeh nya-a. Kʼoeˇ ngeh nah, Moˇseˬ hawˇ-eu Aˬloˬ jawˇ gaˇ aˬ yawꞈ maꞈ iˇ-euˬ meh.

⁷Aˬ yawꞈ maꞈ Moˇseˬ-ahˇ ehˇ nehˬ-eu, “Nga maꞈ-aˬ, shiˇ taˬ-euˬ jeˬ-ahˇ toeˬ ciˆ gʼaˬ-euˬ miˇ neh maˬ shawˇ-eu tsawˇ haˬ pyeuꞈ-eu ma. Ehˇ kʼawꞈ, Iˇsaˬleˬlaˆ tsawˇ haˬ deuˬ nehˬ-ehˇ tiˬ kawˆ loꞈ-ehˇ Sahˬpaˬ Miˬyehˇ-ahˇ lawˇ-eu shehˇ-eu jeˬ nga maꞈ maˬ mˇ kʼmˬ-a loˇ.”

⁸Moˇseˬ ehˇ-eu, “Naw maꞈ-euˬ gaˇ kawˆ-ahˇ taꞈ leˇ-awˇ Sahˬpaˬ Miˬyehˇ ngaˬ-ahˇ dawˬ maˬ biꞈ laꞈ kʼoeˇ keuˆ ni dawˬ tawˬ siˬ.”

⁹Kʼoeˇ naˇ, Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

¹⁰“Iˇsaˬleˬlaˆ tsawˇ haˬ-ahˇ heu loꞈ-ehˇ ehˇ nehˬ-awˬ. Naw maꞈ maˬ kaˬ, naw maꞈ-euˬ zaˬ deuˬ uˆ deuˬ maˬ kaˬ, tsawˇ haˬ tiˬ gʼaˬ na shiˇ taˬ-euˬ tiˬ jeˬ paˬ-ahˇ toeˬ ciˆ-euˬ miˇ neh maˬ shawˇ-eu maˬ ehˇ, gaˇ mahˇ kaˬ gaˇ gaˇ ma doˆ-iˇ-euˬ maˬ ehˇ, Baˬsaˬkaˬ Bawˬ-iˬ heu loꞈ-ehˇ gʼeh nya meh.

¹¹Nah tsaˬ tsoˆ taˬ-euˬ aˇ yamˬ-ahˇ ba la tiˬ siˬ nahˬ-ehˇ, ba la nyiˬ siˬ tiˬ siˬ tseˇ oeˬ nah uˬ ciꞈ uˬ taw paw aˬ yawꞈ maꞈ bawˬ-iˬ gʼeh nya meh. Yawˇ-euˬ shaˬ jiˇ nehˬ-ehˇ yaw kʼaˬ kʼaˬ-eu ka gʼawˬ ka dzaˇ aˬ yawꞈ maꞈ ya dzaˬ meh.

¹²Dzaˇ kʼoeˇ deuˬ yawˬ nah yawˬ uˬ bya maˬ ya bi jaˆ bya-eu uˬ taꞈ, jeˬ zaˬ-euˬ shaˬ yoeˬ kʼawꞈ ma ya laˆ kʼehꞈ-a. Zahˇ sahˇ kʼoꞈ kʼaˇ jaˆ-eu loꞈ-ehˇ tsaˬ ni Baˬsaˬkaˬ bawˬ-iˬ ya gʼeh meh.

¹³Ehˇ kʼawꞈ, tsawˇ haˬ aˬ geu gʼaˬ maˬ kaˬ, zahˇ sahˇ kʼoꞈ-ahˇ taꞈ leˇ-eu laꞈ kʼoeˇ shawˇ-eu tsawˇ haˬ pyeuꞈ-eu uˬ taꞈ, gaˇ ma maˬ doˆ-iˇ-euˬ kʼawꞈ, Baˬsaˬkaˬ Bawˬ-iˬ maˬ gʼeh ni jawˇ naˇ, ngaˬ-euˬ tsawˇ haˬ lehˇ maˬ paˇ sawˇ nya meh. Aˬ jeˬ miˇ neh ehˇ naˇ, nah tsaˬ tsoˆ taˬ-euˬ aˇ yamˬ-ahˇ, ngaˬ-ahˇ lawˇ-eu shehˇ-eu jeˬ aˬ yawꞈ maˬ mˇ-a. Aˬ yawꞈ-euˬ iˬ baˇ baˬ da neh kʼaˇ pyeuꞈ laˇ-euˬ jeˬ-ahˇ aˬ yawꞈ ya daˬ meh.

¹⁴“Naw maꞈ nehˬ-ehˇ jawˇ luꞈ-eu boeˇ miˬ siˬ kʼaˬ tiˬ gʼaˬ na Baˬsaˬkaˬ Bawˬ-iˬ gʼeh mawꞈ naˇ, zahˇ sahˇ kʼoꞈ kʼaˇ jaˆ-eu loꞈ-ehˇ tsaˬ ni aˬ yawꞈ ya mˇ meh. Naw maꞈ-euˬ tsawˇ haˬ maˬ ehˇ, boeˇ miˬ siˬ kʼaˬ maˬ ehˇ, zahˇ sahˇ kʼoꞈ kʼoeˇ-ahˇ tiˬ kawˆ loꞈ-ehˇ ya caw teh meh.”

¹⁵Sahˬpaˬ Miˬyehˇ jawˇ-eu Sehˬ gʼawˆ gʼoˆ tsoꞈ gʼaˬ ngeh nah, mˬ dmˇ zaꞈ le-awˇ, kʼoeˇ gaˇ dehˬ kaˬ le-euˬ meh. Uˬ ciꞈ ciꞈ le ngeh neh aˇ dahˬ beh -awˇ, uˬ bya bya laˇ ngeh yamˬ-ahˇ keuˆ ni, mˬ dmˇ kʼoeˇ miˬ dzaˬ-ahˇ duˇ-eu meh.

¹⁶Kʼoeˇ gaˇ dehˬ kaˬ taˬ-euˬ mˬ dmˇ kʼoeˇ-aˬ, aˬ myah luꞈ uˬ ciꞈ ciꞈ le naˇ miˬ dzaˬ-ahˇ duˇ duˇ-ehˇ jaˆ-eu meh.

¹⁷Mˬ dmˇ kʼoeˇ yaw goˇ-ahˇ kʼaˇ le daˆ ngeh, Iˇsaˬleˬlaˆ tsawˇ haˬ deuˬ luˆ-iˇ-awˇ, mˬ dmˇ kʼoeˇ kʼaˇ zaꞈ ka le-eu jawˇ duˬ-ahˇ aˬ yawꞈ maꞈ jawˇ naˬ-euˬ meh.

¹⁸Sahˬpaˬ Miˬyehˇ dawˬ biꞈ-awˇ kʼaˇ bi luˆ-iˇ ngeh Iˇsaˬleˬlaˆ tsawˇ haˬ deuˬ luˆ-iˇ-awˇ, aˬ yawꞈ dawˬ biꞈ-awˇ kʼaˇ bi naˬ ngeh aˬ yawꞈ maꞈ naˬ-euˬ meh. Mˬ dmˇ kʼoeˇ Sehˬ gʼawˆ kʼoeˇ taˆ kʼaˇ jaˆ kʼoeˇ keuˆ ni, aˬ yawꞈ maꞈ sehˬ gʼawˆ gʼawˆ-awˇ kʼaˇ jawˇ naˬ luꞈ-eu tsahˇ-ahˇ ya jawˇ tawˬ-eu meh.

¹⁹Mˬ dmˇ kʼoeˇ Sehˬ gʼawˆ kʼoeˇ taˆ aˇ yamˬ gʼawˬ myahˇ ni jaˆ ngeh, Iˇsaˬleˬlaˆ tsawˇ haˬ deuˬ Sahˬpaˬ Miˬyehˇ dawˬ biꞈ taˬ-euˬ gaˇ naˇ haˬ geuꞈ-eu laꞈ kʼoeˇ, maˬ luˆ-iˇ ni gʼawˬ myahˇ ni jawˇ-eu meh.

²⁰Tiˬ poˆ na, mˬ dmˇ kʼoeˇ Sehˬ gʼawˆ kʼoeˇ taˆ tiˬ nah nyiˬ nah tehꞈ-ehˇ naˬ-eu meh. Aˬ joˆ-ehˇ pyeuꞈ laˇ-eu kʼawꞈ, Sahˬpaˬ Miˬyehˇ neh dawˬ kʼaˇ biꞈ-euˬ loꞈ-ehˇ aˬ yawꞈ maꞈ naˬ-awˇ, Sahˬpaˬ Miˬyehˇ neh dawˬ kʼaˇ biꞈ-euˬ loꞈ-ehˇ aˬ yawꞈ maꞈ luˆ-iˇ-euˬ meh.

²¹Tiˬ poˆ na, uˬ ciꞈ uˬ taw paw aˇ dahˬ beh-awˇ, uˬ shawˬ paw keuˆ ni tehꞈ-ehˇ mˬ dmˇ kʼoeˇ naˬ-eu meh. Mˬ dmˇ kʼoeˇ daˆ leˇ-eu nehˬ-ehˇ aˬ yawꞈ maꞈ kʼawꞈ ya luˆ-iˇ-eu meh. Mˬ dmˇ kʼoeˇ kʼaˇ daˆ leˇ ngeh aˬ yawꞈ maꞈ ya luˆ-iˇ-eu meh.

²²Nyiˬ nah myahˇ-eu maˬ ehˇ, ba la tiˬ siˬ myahˇ-eu maˬ ehˇ, tiˬ kʼoꞈ myahˇ-eu maˬ ehˇ, kʼoeˇ myah maˬ tseˇ myahˇ-eu maˬ ehˇ, mˬ dmˇ kʼoeˇ Sehˬ gʼawˆ kʼoeˇ taˆ kʼaˇ naˬ luꞈ kʼoeˇ keuˆ ni, aˬ yawꞈ maꞈ maˬ luˆ-iˇ ni jawˇ-euˬ meh. Ehˇ kʼawꞈ, mˬ dmˇ kʼoeˇ kʼaˇ daˆ leˇ ngeh aˬ yawꞈ maꞈ luˆ-iˇ-euˬ meh.

²³Moˇseˬ-ahˇ gʼoe-awˇ Sahˬpaˬ Miˬyehˇ neh dawˬ biꞈ taˬ-eu gaˇ naˇ haˬ geuꞈ-eu laꞈ kʼoeˇ, jawˇ naˬ-eu maˬ ehˇ, luˆ-iˇ-eu maˬ ehˇ, aˬ yawꞈ maꞈ mˇ-euˬ meh.