Read Akha Miˇkaˬ 2 Bible Online

Miˇkaˬ 2 - Akha bible

Miˇkaˬ 2

¹Yaw noeˬ-ehˇ yuꞈ-awˇ yaw haiˬ jeˬ mˇ-eu gʼaˇ duˬ saˇ sawˇ luꞈ-eu tsawˇ haˬ deuˬ kʼoeˇ taˆ guˆ-eu gaˆ-eu jeˬ keuˆ le tehꞈ-a. Uˬ bya bya laˇ-awˇ, yaw haiˬ jeˬ mˇ-eu gʼaˇ duˬ yehꞈ laˇ ngeh jawˇ, aˬ yawꞈ maꞈ neh saˇ sawˇ taˬ-euˬ jeˬ tiˬ poˆ tehꞈ-ehˇ mˇ-eu meh.

²Aˬ yawꞈ maꞈ deh ma geuꞈ mawꞈ ngeh, aˬ cawˬ-ahˇ kʼaˆ geuꞈ-euˬ meh. Aˬ yawꞈ maꞈ nymˇ geuꞈ mawꞈ ngeh, aˬ cawˬ-euˬ nymˇ yuˇ geuꞈ-euˬ meh. Tsawˇ haˬ tiˬ gʼaˬ-iˬ yawˬ ha-euˬ nymˇ jiˇ hawˇ-eu nymˇ dahˬ myawˬ gahˬ deuˬ aˬ yawꞈ maꞈ-euˬ laꞈ-ahˇ maˬ ya ahˇ leˇ ni maˬ tuˆ tehˬ ziꞈ nya-aˬ.

³Kʼoeˇ miˇ neh, Sahˬpaˬ Miˬyehˇ ehˇ-eu, “Naw maꞈ kʼoeˇ taˆ luˬ-iˇ seˇ-iˇ-eu jeˬ keuˆ le ni ngaˇ lehˬ hmˬ luꞈ-awˇ, naw maꞈ maˬ cehˆ buˬ nya-a. Guˆ-eu gaˆ-eu jeˬ naw maꞈ-ahˇ tahˬ puˬ le-awˇ, naw maꞈ nui ma huiˬ huiˬ-ehˇ maˬ paˇ dehꞈ nya meh.

⁴Aˇ nah kʼoeˇ nah-ahˇ naw maꞈ-ahˇ naˬ gʼa-eu caˇ dawˬ aˬ cawˬ caˇ-eu laꞈ kʼoeˇ, naw maꞈ neh ya daˬ-euˬ jeˬ gʼaˇ duˬ noeˬ shaˬ-eu gaˇ kawˆ heu loꞈ-ehˇ dawˬ kawˬ kawˬ-awˇ caˇ tehꞈ-a. ‘Nga maꞈ bi laˆ deuˬ dui dui-awˇ, geuꞈ-eu jeˬ maˬ paˇ ahˇ miˇ-a. Nga maꞈ-euˬ miˇ tsaˬ kʼawꞈ, Sahˬpaˬ Miˬyehˇ neh yuˇ doˆ-awˇ, nga maꞈ-ahˇ nyehꞈ gʼeh-euˬ deuˬ-ahˇ, aˬ yawꞈ neh biꞈ ahˇ nehˬ-euˬ meh.’ lehˇ caˇ tehꞈ-a.”

⁵Kʼoeˇ naˇ, Sahˬpaˬ Miˬyehˇ-euˬ tsawˇ haˬ deuˬ-ahˇ miˇ tsaˬ kʼoeˇ deuˬ paˇ biꞈ kʼoꞈ ngeh nah, naw maꞈ-ahˇ miˇ tsaˬ maˬ paˇ oꞈ meh.

⁶Ngaˬ neh ehˇ-euˬ dawˬ-ahˇ gaˬ-euˬ deuˬ ngaˬ-ahˇ dawˬ mehˬ mehˬ laˇ-awˇ ehˇ-eu, “Nga maꞈ-ahˇ dawˬ mehˬ taˬ mehˬ. Gaˇ kawˆ heu deuˬ maˬ mehˬ ni jawˇ-awˬ. Nga maꞈ daˬ ga ni Miˬyehˇ maˬ mˇ-aˇ.

⁷Iˇsaˬleˬlaˆ tsawˇ haˬ deuˬ yaˬ kʼehˇ yaˬ-eu jeˬ-ahˇ ya daˬ meh lehˇ nawˇ noeˬ te loˇ. Sahˬpaˬ Miˬyehˇ maˬ oˇ oꞈ coeˇ-ehˇ pyeuꞈ laˇ taˬ loˇ. Kʼoeˇ loꞈ-ehˇ gʼeh-eu jeˬ aˬ yawꞈ aˬ diˇ aˬ maˇ mˇ tehꞈ-a loˇ. Yaw tsaˬ yaw dawˇ dawˇ-ehˇ dehꞈ-eu deuˬ-ahˇ aˬ yawꞈ dawˬ yaw muiˬ ngehˬ cawˬ-eu maˬ ngeuˇ-a loˇ.”

⁸Sahˬpaˬ Miˬyehˇ ehˇ-eu, “Muiˇ-eu tsawˇ haˬ deuˬ-ahˇ jahˇ nehˬ-eu loꞈ-ehˇ ngaˬ-euˬ tsawˇ haˬ deuˬ-ahˇ naw maꞈ jahˇ nehˬ-eu meh. Guiˇ deuˆ-iˇ-awˇ gʼoꞈ laˇ-euˬ tsawˇ haˬ deuˬ, iˇ kahˇ gʼoꞈ keuˆ laˇ-euˬ miˇ neh kʼahˬ lahˇ kʼaˇ maˬ paˇ za ma lehˇ noeˬ-eu meh. Ehˇ kʼawꞈ, dziˇ dzoˆ dzoˆ nehˬ-euˬ aˇ poeˬ, aˬ yawꞈ maꞈ dm luꞈ-eu pehˇ kʼahˬ lehˆ-awˇ bi biꞈ daˇ taˬ-eu lehˇ naw maꞈ loꞈ luꞈ meh.

⁹Ngaˬ-euˬ tsawˇ jeuˬ zaˬ miˬ zaˬ deuˬ-ahˇ aˬ yawꞈ maꞈ gaˬ-eu nymˇ jiˇ laꞈ kʼoeˇ neh naw maꞈ teh dzeh-awˇ, ngaˬ neh aˬ yawꞈ maꞈ-ahˇ laꞈ sawˬ biꞈ taˬ-euˬ aˬ buˇ aˬ li deuˬ-ahˇ naw maꞈ maˬ shiˇ tiˬ ziˇ tahˇ joe joe-euˬ meh.

¹⁰Tsawˬ tuˇ-awˇ doˆ-iˇ-awˬ. Naw maꞈ gʼaˇ duˬ buˬ-iˇ law-iˇ-eu gaˇ ma maˬ paˇ dahˇ meh. Naw maꞈ-euˬ iˬ baˇ baˬ da neh jawˇ duˬ heu tsahˇ ya piˬ ya byoˆ-iˇ meh.

¹¹“Naw maꞈ gʼaˇ duˬ aˬ gaꞈ dzaˇ uiˇ hawˇ-eu jiˇ baˬ yoeˇ le tehꞈ-a lehˇ jaˬ myawꞈ myawꞈ myawꞈ-ehˇ cah-eu Miˬyehˇ gʼaˇ duˬ ngehˬ dah-eu deuˬ-ahˇ tsawˇ haˬ heu deuˬ mawꞈ-eu meh.

¹²“Ehˇ kʼawꞈ, kʼaˇ dzeuˇ-iˇ-euˬ naw maꞈ Iˇsaˬleˬlaˆ tsawˇ haˬ deuˬ-ahˇ ngaˇ kuˇ uiˬ ma. Kuˆ-ahˇ gʼoꞈ uˇ laˇ-eu yawˇ deuˬ loꞈ-ehˇ naw maꞈ-ahˇ ngaˇ tiˬ gaˇ tehꞈ-ehˇ sheuˬ uiˬ ma. Gaˆ dzaˬ duˬ-ahˇ yawˇ tiˬ byah ni gaˆ luꞈ-eu loꞈ-ehˇ, naw maꞈ miˇ kʼahˬ laꞈ kʼoeˇ tsawˇ haˬ paˇ myaˬ laˇ tehꞈ-a.”

¹³Aˬ yawꞈ maꞈ-ahˇ Miˬyehˇ gaˇ ma pah nehˬ-awˇ, aˬ cawˬ neh nyehꞈ gʼeh-euˬ miˇ kʼahˬ laꞈ kʼoeˇ aˬ yawꞈ maꞈ-ahˇ sheuˬ doˆ nehˬ tehꞈ-a. Meuˬ meuˬ lahˇ-ahˇ aˬ yawꞈ maꞈ tahˬ paˆ doˆ-awˇ, ya buˬ ya law-iˇ tehꞈ-a. Aˬ yawꞈ maꞈ-euˬ sahˬ paˬ pyeuꞈ-eu Sahˬpaˬ Miˬyehˇ-euˬ mawˇ do aˬ yawꞈ maꞈ-ahˇ sheuˬ doˆ gʼeh tehꞈ-a.