Read Akha Miˇkaˬ 6 Bible Online

Miˇkaˬ 6 - Akha bible

Miˇkaˬ 6

¹Iˇsaˬleˬlaˆ tsawˇ jeuˬ nehˬ-ehˇ Sahˬpaˬ Miˬyehˇ ja gaˇ naˇ haˬ sheˇ. Sahˬpaˬ Miˬyehˇ-oˇ, tuˇ-awˇ nawˇ ja-eu lehˇ gʼeh-eu jeˬ pyehˬ kʼawˬ-awˬ. Nawˬ neh ja-euˬ dawˬ deuˬ gawˬ jawˬ gawˬ duˇ deuˬ-ahˇ bi gaˬ yawˬ.

²Gawˬ jawˬ deuˬ hawˇ-eu ziꞈ dah ni jaˆ-eu miˇ tsaˬ tahˬ kʼawˇ heu-euˬ zeuˇ dahˇ deuˬ-oˇ, Sahˬpaˬ Miˬyehˇ dawˬ ja ja gaˇ naˇ haˬ sheˇ. Sahˬpaˬ Miˬyehˇ Iˇsaˬleˬlaˆ tsawˇ haˬ nehˬ-ehˇ ja paˬ-ehˇ gʼeh-eu jeˬ jaˆ meh. Iˇsaˬleˬlaˆ tsawˇ jeuˬ nehˬ-ehˇ aˬ yawꞈ pyehˇ paˬ-ehˇ gʼeh-eu gaˇ kawˆ jaˆ-eu meh.

³Sahˬpaˬ Miˬyehˇ ehˇ-eu, “Ngaˬ-euˬ tsawˇ haˬ deuˬ-oˇ, naw maꞈ-ahˇ ngaˇ aˬ jeˬ mˇ lehˬ taˬ-euˬ jaˆ ta. Naw maꞈ-ahˇ ngaˇ ciˬ baꞈ ciˬ pi-euˬ jeˬ jaˆ ta loˇ. Ehˇ haw sheˇ.

⁴Iˇjiˇtuˆ miˇ kʼahˬ laꞈ kʼoeˇ neh naw maꞈ-ahˇ ngaˇ sheuˬ doˆ laꞈ-euˬ ma. Naw maꞈ aˬ cawˬ zaˬ kʼaˆ geuꞈ luꞈ gaˇ ngaˇ ka kʼoꞈ le-euˬ ma. Naw maꞈ-ahˇ bi sheuˬ gʼeh-eu lehˇ, Moˇseˬ, Aˬloˬ, Miˇliˬyaˬ aˬ ha maꞈ-ahˇ ngaˇ pyehˬ gʼeh leꞈ-euˬ ma.

⁵Ngaˬ-euˬ tsawˇ haˬ deuˬ-oˇ, Mawˇbaˆ sahˬ paˬ Baˬlehˇ naw maꞈ-ahˇ aˬ joˆ-ehˇ jahˇ nehˬ-eu lehˇ gʼeh-euˬ gaˇ kawˆ hawˇ-eu, Beˬyoˇ-euˬ aˬ li Baˬlamˬ neh aˬ yawꞈ-ahˇ aˬ joˆ-ehˇ ehˇ kʼoꞈ nehˬ-euˬ gaˇ kawˆ-ahˇ naw maꞈ taˬ ngehˇ. Aˬkaˬshaˇ lehˇ ehˇ-eu jawˇ duˬ-ahˇ sehˬ gʼawˆ gʼawˆ-awˇ naˬ-euˬ tsahˇ-ahˇ neh Giˇlaˇgaˬlaˇ-ahˇ iˇ-eu gaˇ pehˇ-ahˇ pyeuꞈ laˇ-euˬ gaˇ kawˆ-ahˇ shaˇ noeˬ haw sheˇ. Gaˇ kawˆ heu deuˬ-ahˇ shaˇ noeˬ-awˇ, naw maꞈ-ahˇ ka kʼoꞈ-eu gʼaˇ duˬ ngaˇ aˬ jeˬ mˇ yaꞈ-euˬ gaˇ noeˬ keuˆ-awˬ.”

⁶Mˬ taˆ Miˬyehˇ pyeuꞈ-eu Sahˬpaˬ Miˬyehˇ-ahˇ ngaˇ uˬ duˬ tahˬ laˇ ngeh, aˬ yawꞈ gʼaˇ duˬ aˬ jeˬ ya hehˇ laꞈ nmˇ. Muiˬ dui dui-eu mawˇ neˇ mawˇ zaˬ tsahˇ laꞈ-awˇ, miˬ dzaˬ-ahˇ dzah puiˆ-awˇ ya lawˇ nehˬ nmˇ loˇ.

⁷Yawˇ aˬ buˬ aˇ heˇ aˇ muiˇ mawˇ hawˇ-eu lawˇ baˬ aˇ heˇ gawˆ-ahˇ yoeˇ luꞈ-eu iˇ cuꞈ myaˆ ni ahˇ-eu saˬ loˬ tsiˇ deuˬ-ahˇ ngaˇ yuˇ laꞈ nehˬ naˇ, Sahˬpaˬ Miˬyehˇ nui kʼahˇ shiˇ-eu duˇ loˇ. Ngaˬ-euˬ iˬ baˇ shawˇ-eu gʼaˇ duˬ ngaˬ li aˬ yuiꞈ gʼaˬ aˬ yawꞈ-ahˇ ya lawˇ nehˬ nmˇ loˇ.

⁸Kʼoeˇ loꞈ-ehˇ maˬ ngeuˇ-a. Aˬ geu jeˬ muiˬ-eu gaˇ kawˆ Sahˬpaˬ Miˬyehˇ aˬ dui-ahˇ dzawˇ mehˬ taˬ-euˬ meh. Aˬ dui maꞈ laꞈ kʼoeˇ Sahˬpaˬ Miˬyehˇ geuꞈ mawꞈ-eu jeˬ-aˬ, yaw tsaˬ yaw dawˇ jeˬ-ahˇ mˇ-eu jeˬ, aˬ myah luꞈ ziꞈ-eu gʼoeˇ-eu gaˬ-eu jeˬ hawˇ-eu, nui ma nahˬ yu ni taˬ-awˇ Miˬyehˇ-ahˇ cawˬ cawˬ taꞈ-eu jeˬ, heu deuˬ meh.

⁹Sahˬpaˬ Miˬyehˇ-ahˇ guˆ-eu tsawˇ haˬ-aˬ, tsawˇ gahˇ ahˇ-eu tsawˇ haˬ meh. Yeˬluˇsaˬlehˬ meuˬ-ahˇ Sahˬpaˬ Miˬyehˇ guˇ-awˇ ehˇ-eu, “Meuˬ laꞈ kʼoeˇ uiˬ leˇ taˬ-euˬ tsawˇ haˬ deuˬ naˇ haˬ yawˬ.

¹⁰Haiˬ-eu tsawˇ haˬ deuˬ-euˬ nymˇ-ahˇ maˬ tsaˬ maˬ dawˇ-eu laꞈ kʼoeˇ laˆ za taˬ-euˬ pyuˇ shuiˇ jaˆ luꞈ meh. Ngaˇ bye dui dui-eu jeˬ pyeuꞈ-eu maˬ tsaˬ-eu kuˬ pehˬ daˇ dza deuˬ-ahˇ aˬ yawꞈ maꞈ zmˬ-eu meh.[2]

¹¹Maˬ tsaˬ-eu paˆ yawˬ hawˇ-eu lu jawꞈ-i zmˬ-eu deuˬ-ahˇ ngaˇ aˬ joˆ-ehˇ iˬ baˇ pyehˬ nehˬ nmˇ.

¹²Naw maꞈ-euˬ smˇ muiˬ smˇ baw deuˬ iˇ shaˬ zaˬ-ahˇ gahˇ dzaˬ-awˇ, naw maꞈ dawˬ tawˆ luꞈ jaˬ myawꞈ mehˇ shuiˇ tehꞈ meh.

¹³Naw maꞈ-euˬ iˬ baˇ baˬ da neh naw maꞈ ya piˬ ya byoˆ-iˇ ni ngaˇ mˇ dahˬ beh gʼaˬ-euˬ ma.

¹⁴Naw maꞈ dzaˬ kʼawꞈ, dehˆ laˇ-eu maˬ baw-ehˇ, mehꞈ mehꞈ-ehˇ ya shaˬ tehꞈ-a. Naw maꞈ myawˬ baꞈ doˆ kʼawꞈ, maˬ baꞈ dzeuˇ nya-aˇ. Naw maꞈ yuˇ doˆ dzeuˇ-eu lehˇ kʼaˇ leh jeh-eu jeˬ-ahˇ, guiˇ deuˆ-eu laꞈ kʼoeˇ ngaˇ bi laˆ cawˆ jiˇ ma.

¹⁵Naw maꞈ cehˇ ka kʼawꞈ, maˬ ya yehˬ dzaˬ-aˇ. Saˬ loˬ tsiˇ lehˬ doˆ kʼawꞈ, maˬ ya zmˬ-aˇ. Aˬ gaꞈ dzaˇ uiˇ jahˇ kʼawꞈ, maˬ ya dawˇ haw-aˇ.

¹⁶Sahˬ paˬ Awˇmaˬliˇ hawˇ-eu aˬ yawꞈ-euˬ aˬ li sahˬ paˬ Aˬhaˆ aˬ nyaꞈ maˬ tsaˬ maˬ dawˇ-eu jeˬ mˇ gaˇ naw maꞈ caw teh-euˬ miˇ neh, naw maꞈ kʼoeˇ taˆ kʼoeˇ loꞈ-ehˇ keuˆ le tehꞈ-a. Aˬ yawꞈ nyaꞈ kʼaˇ dehꞈ yaꞈ-euˬ loꞈ-ehˇ naw maꞈ caw teh-awˇ dehꞈ-eu miˇ neh, luˬ-iˇ seˇ-iˇ-eu jeˬ naw maꞈ kʼoeˇ taˆ ngaˇ bi keuˆ le-awˇ, yawˬ gʼaˬ na luꞈ naw maꞈ-ahˇ yehˬ bawˬ sehˇ lu-ehˇ ehˇ niˇ gʼa tehꞈ-a. Aˬ cawˬ tsawˇ jeuˬ deuˬ naw maꞈ-ahˇ ja bu ja doeˇ tehꞈ-a.”