Read Akha Naˬhmˬ 1 Bible Online

Naˬhmˬ 1 - Akha bible

Naˬhmˬ 1

¹Heu-aˬ, Eˇlaˬkawˇshaˆ meuˬ-ahˇ jawˇ-eu Naˬhmˬ neh, Niˇnaˬbeˬ meuˬ gaˇ kawˆ yaw sahˇ laꞈ kʼoeˇ ya siˬ ya mawˇ-euˬ jeˬ pyeuꞈ-eu meh.

²Sahˬpaˬ Miˬyehˇ pyeuꞈ-eu Miˬyehˇ, myaˆ naˆ-eu nui ma ahˇ-eu meh. Yawꞈ-ahˇ puiˬ-eu deuˬ-ahˇ kʼehˬ-awˇ, yawꞈ-ahˇ jahˇ gʼeh haw-eu deuˬ-ahˇ, nui ma pehˇ-awˇ laꞈ poˆ poˆ meh.

³Sahˬpaˬ Miˬyehˇ baoˬ zawˇ huiˬ-awˇ, nui ma pehˇ laˇ-eu maˬ kawˇ-a. Ehˇ kʼawꞈ iˬ baˇ mˇ-eu deuˬ-ahˇ, maˬ kʼehˬ-ehˇ maˬ bi dzeuˇ-iˇ-a. Sahˬpaˬ Miˬyehˇ iˇ-eu gaˇ ma, mˬ jeˬ jaˬ lehˇ oe gʼeh leꞈ-awˇ, mˬ kʼoeˇ taˆ tmˬ luꞈ-eu mˬ dmˇ, aˬ yawꞈ cah pyuˬ-euˬ kʼaˬ lehˇ meh.

⁴Laˆ shaˆ-ahˇ aˬ yawꞈ dawˬ biꞈ-awˇ, laˆ shaˆ iˇ cuꞈ bi gui-iˇ-awˇ, lawˇ baˬ iˇ cuꞈ gui jiˇ-eu meh. Gaˬlaˬmeˬlaˇ gawˬ jawˬ koˆ-iˇ, Baˬshaˬ deh ga gui-iˇ jiˇ-awˇ, Leˬbaˬnoˬ gawˬ jawˬ-ahˇ poˬ-eu, aˇ yehˆ nyoeˬ jiˇ koˆ jiˇ-eu meh.

⁵Sahˬpaˬ Miˬyehˇ jawˇ-eu mehˬ shi, gawˬ jawˬ luˆ laˇ nyeh laˇ jiˇ-awˇ, gawˬ duˇ guiˇ ka byoˆ jiˇ-eu meh. Sahˬpaˬ Miˬyehˇ oe-eu mehˬ shi, miˇ tsaˬ tahˬ kʼawˇ miˇ luˆ luˆ-awˇ, miˇ tsaˬ zaˬ yaw juˬ juˬ-eu meh.

⁶Aˬ yawꞈ nui ma pehˇ-eu jeˬ-ahˇ, dehꞈ dzeuˇ nya-eu aˬ suˇ jawˇ ta. Nui pehˇ miˬ lmˇ shehˆ daˆ leꞈ ngeh, lo gahˬ lo guˇ byaˆ ka le-awˇ, kʼaˬ lehˇ loꞈ-ehˇ meuˇ jiˇ-eu meh.

⁷Sahˬpaˬ Miˬyehˇ muiˬ dui dui meh. shaˬ zahˬ naꞈ-eu aˇ yamˬ laꞈ kʼoeˇ, yawꞈ-euˬ tsawˇ haˬ-ahˇ haw piˇ-awˇ, yawꞈ-ahˇ tahˬ shaˇ leˇ-eu deuˬ-ahˇ, bo saˆ ngehˬ gʼeh dah teˬ-eu meh.

⁸Iˇ jeuˬ jeuˬ ma oe-eu loꞈ-ehˇ, yawꞈ-ahˇ muiˇ-eu tsawˇ haˬ deuˬ-ahˇ, tiˬ saˬ tiˬ li laˆ cawˆ-eu meh. Yawꞈ-ahˇ ciˬ daˬ leˇ-eu deuˬ-ahˇ, tsawˇ shiˇ uˬ kʼawˇ maˬ bi dzeuˇ-a.

⁹Sahˬpaˬ Miˬyehˇ-ahˇ bahˬ-eu jeˬ, nawˇ mˇ ma lehˇ noeˬ-eu ngeuˇ naˇ, yaw cawˆ jeˬ ya tahˬ puˬ tehꞈ-a. Aˬ yawꞈ-ahˇ bahˬ-eu jeˬ mˇ naˇ, tiˬ poˆ taꞈ-ehˇ maˬ mˇ dzeuˇ nya.

¹⁰Aˬ gah gʼoˆ yoeˬ jehˆ bymˇ loꞈ-ehˇ, keuˬ dzeh gaˇ nawˇ ya daˬ tehꞈ-a.

¹¹Sahˬpaˬ Miˬyehˇ-ahˇ ciˬ daˬ-awˇ, yaw haiˬ jeˬ mˇ mawꞈ-eu tiˬ gʼaˬ, Niˇnaˬbeˬ meuˬ-ahˇ jawˇ-eu meh.

¹²Sahˬpaˬ Miˬyehˇ ehˇ leꞈ-euˬ-aˬ, “Aˬshuˇliˆ tsawˇ haˬ gʼaˬ kʼaˆ-awˇ, tsawˇhaˬ myaˬ dui behˇ dui dui kʼawꞈ, bi laˆ cawˆ-awˇ byoˆ jiˇ tehꞈ-a. Naw maꞈ-ahˇ ngaˇ kʼehˬ dzeuˇ-euˬ kʼawꞈ, mehˬ hu paw maˬ paˇ kʼehˬ nehˬ ma.

¹³Aˬ yawꞈ neh nawˬ-ahˇ ciˬ pi-euˬ, kʼaˆ behˆ kʼoeˇ ngaˇ lehˆ dzeh nehˬ-awˇ, nawˬ-ahˇ paꞈ tawꞈ taˬ-euˬ aˇ caˆ, ngaˇ puiˇ dzeh ma” lehˇ ehˇ-eu meh.

¹⁴Niˇnaˬbeˬ meuˬ-ahˇ taꞈ leˇ-awˇ, Sahˬpaˬ Miˬyehˇ ehˇ taˬ-euˬ-aˬ, “Nawˬ-euˬ tsawˇ myahˇ pi ka gʼeh-eu, zaˬ maˬ jawˇ-ehˇ pyeuꞈ-iˇ tehꞈ-a. Nawˬ-euˬ miˬ yehˇ deuˬ-euˬ nymˇ-ahˇ, tahˬ pahˬ aˬ ma mawˇ kawˇ kʼoeˇ deuˬ, ngaˇ laˆ piˬ laˆ byoˆ jiˇ nehˬ ma. Nawˇ doeˇ dui dui-eu baˬ da neh, nawˬ-euˬ lmˬ bymˇ ngaˇ lehˬ hmˬ ma.”

¹⁵Gawˬ jawˬ uˬ du oe ka luꞈ-eu, laˬ kʼaˬ cehˇ-eu dawˬ tsaꞈ le-euˬ, dawˬ dzawˇ mˇ-eu gʼaˬ-ahˇ haw yawˬ. Gʼaˬ leˇ-euˬ gaˇ kawˆ dzawˇ-eu lehˇ, aˬ yawꞈ oe ka luꞈ gaˇ haw yawˬ. Yuˇdaˆ miˇ kʼahˬ-oˇ, bawˬ-iˬ gʼeh-awˬ. Naw maꞈ saˇ jaˇ dzaˬ taˬ-euˬ jeˬ, Miˬyehˇ-ahˇ paˇ mˇ kʼoꞈ nehˬ-awˬ. Naw maꞈ-ahˇ muiˇ-eu haiˬ-eu deuˬ, naw maꞈ-ahˇ guiˇ maˬ deuˆ nya ni, laˆ piˬ laˆ byoˆ jiˇ nehˬ-euˬ meh.