Read Akha Naˬhmˬ 2 Bible Online

Naˬhmˬ 2 - Akha bible

Naˬhmˬ 2

¹Niˇnaˬbeˬ nawˇ ya cawˆ-iˇ meh. Nawˬ-ahˇ deuˆ-eu lehˇ oe luꞈ meh. Taˆ laꞈ kʼoeˇ tsawˇ haˬ bi jawˇ-awˬ. Gaˇ ma-ahˇ yaw muiˇ bi loꞈ-awˬ. Guiˇ deuˆ-eu lehˬ hmˬ dah taˬ-awˬ.

²Muiˇ-eu deuˬ neh laˆ cawˆ nehˬ-awˇ, uˬ pyaˬ uˬ laꞈ juˆ dzeh jiˇ-euˬ, Iˇsaˬleˬlaˆ tsawˇ jeuˬ-euˬ baoˬ, Yaˬkoˆ-euˬ yaw shehꞈ kʼahˬ sehˇ kʼoeˇ, Sahˬpaˬ Miˬyehˇ biꞈ kʼoꞈ tehꞈ-a.

³Muiˇ-eu deuˬ-euˬ guiˇ maꞈ yehˇ deuˬ, dehˬ daˬ duˬ yaw neˇ baꞈ luꞈ-awˇ, mehˬ tsoeˬ yaw neˇ dm luꞈ-eu meh. Guiˇ deuˆ-eu lehˬ hmˬ dah taˬ-awˇ, mahˬ laˆ lawˬ guiˇ nyiˬ ni jaˆ-awˇ, mahˬ deuˬ liˆ liˆ-ehˇ teuˆ luꞈ meh.

⁴Meuˬ-euˬ lehˆ kawˆ gaˇ ma doe ni, kʼoeˇ paw heu paw maˬ siˬ laˇ ni, laˆ lawꞈ teh sehˇ dui dui-eu meh. Miˬ dzaˬ loꞈ-ehˇ naˇ guiˇ guiˇ-awˇ, mˬ myawꞈ loꞈ-ehˇ kawˇ dui dui meh.

⁵Yaw huiˬ yaw mahˇ geuꞈ-eu deuˬ-ahˇ, dawˬ biꞈ-awˇ mehˬ hu bi le ngeh, sahˬ tiꞈ tiꞈ-awˇ pehˆ toˆ-euˬ meh. Meuˬ lahˇ jaˆ gaˇ coeˬ keuˆ gʼeh-awˇ, awˆ byaˆ duˬ ciˬ daˬ taˬ-euˬ meh.

⁶Lawˇ baˬ lahˇ kʼehˬ dehˬ pah leꞈ-awˇ, Sahˬ paˬ hawˇ nymˇ luiˬ laˇ tehꞈ-a.

⁷Sahˬ paˬ ma-ahˇ aˬ cawˬ nyehꞈ-awˇ, zaˬ kʼaˆ deuˬ noeˬ shaˬ-eu miˇ neh, yawˬ ha-euˬ kʼahˬ-ahˇ teˇ teˇ-ehˇ, kʼaˬ kʼoeˬ zaˬ loꞈ-ehˇ mahˇ tehꞈ-a.

⁸Iˇ tsahˇ daˬ paˆ doˆ-euˬ loꞈ-ehˇ, Niˇnaˬbeˬ tsawˇ haˬ teuˆ byaˆ-awˇ, “Taˬ cehˆ. Taˬ cehˆ” lehˇ guˇ nehˬ kʼawꞈ, tiˬ gʼaˬ-iˬ maˬ ciˬ pyawˇ haw-aˇ.

⁹Pyuˇ deuˬ ceh geuꞈ yuˇ geuꞈ jiˇ-awˬ. Shuiˇ deuˬ nawˬ geuꞈ kʼaˆ geuꞈ jiˇ-awˬ. Aˇ poeˬ kʼaˆ-eu pyuˇ shuiˇ myawˬ gahˬ maˬ ehˇ jiˇ coeˇ ni jaˆ luꞈ meh.

¹⁰Niˇnaˬbeˬ meuˬ laˆ cawˆ jiˇ-awˇ, geuꞈ-eu tiˬ pawꞈ-iˬ maˬ ahˇ-a. Nui ma ga ka byoˆ taˬ jiˇ-awˇ, pawˬ tsuiꞈ yaw dzuˬ dzuˬ jiˇ-euˬ meh. Gʼaˬ tiˬ pawꞈ-iˬ maˬ paˇ ahˇ-ehˇ, myaˆ pyawˬ-ahˇ shiˬ maˬ paˇ dahˬ meh.

¹¹Aˇ hu Niˇnaˬbeˬ meuˬ heu meuˬ, aˇ laˬ jaˬ shiˇ byoe-ahˇ duˇ meh. Aˇ laˬ jaˬ shiˇ aˬ buˬ aˬ ma, aˇ mah kaˬ gaˇ gaˆ byoˆ gʼeh kʼawꞈ, zaˬ deuˬ maˬ byoˆ maˬ laˆ-iˇ ni, bo huiˬ cu huiˬ nehˬ nya-euˬ meh.

¹²Bawˇ tsahˬ jeˬ zaˬ-ahˇ kawꞈ sehꞈ-awˇ, shaˬ jiˇ cehˬ paˆ cehˬ shaˆ doˆ-awˇ, miˬ sawˇ zaˬ deuˬ bi dzaˬ-euˬ meh. Aˬ yawꞈ-euˬ lo kʼahˬ tiˬ byah ni, shaˬ jiˇ shaˬ jehꞈ sha byah-euˬ meh.

¹³Dawˬ tawˆ kʼoeˇ taˆ Sahˬpaˬ Miˬyehˇ, Niˇnaˬbeˬ-ahˇ heu loˇ ehˇ meh. “Mahˬ laˆ lawˬ deuˬ ngaˇ keuˬ dzeh-awˇ, yehˇ deuˬ guiˇ bi deuˆ sehꞈ jiˇ ma. Aˬ cawˬ-ahˇ nawˬ neh ceh geuꞈ-euˬ, yawˬ jeˬ na luꞈ ngaˇ yuˇ kʼoꞈ ma. Miˇ tsaˬ kʼoeˇ taˆ nawˇ baoˬ huiˬ-euˬ, kʼawˇ taꞈ kʼawˇ teˇ maˬ paˇ doˆ meh.”