Read Akha Naˬhmˬ 3 Bible Online

Naˬhmˬ 3 - Akha bible

Naˬhmˬ 3

¹Tahˇ joe joe-awˇ smˇ muiˬ muiˬ-euˬ, mehˇ shuiˇ shuiˇ-awˇ tsawˇ haˬ sehꞈ-euˬ, meuˬ heu meuˬ guiˬ lahˬ doeˇ tehꞈ-a.

²Naˇ haˬ sheˇ aˬ jeˬ teˇ saˇ nya. Yahˬ caˆ neh sheu juiꞈ-eu teˇ saˇ, laˆ lawˬ daˇ kʼahˇ buiˇ-eu teˇ saˇ, mahˬ pyehˬ teh sehˇ luꞈ-eu teˇ saˇ, mahˬ laˆ lawˬ cehˆ luꞈ-eu teˇ saˇ, naˬ bawˬ bawˬ ni gaˬ laˇ miˇ-a.

³Gahˬ, mi cehˇ guiˇ nyiˬ ni baꞈ-awˇ, mahˬ dziˬ-eu deuˬ coeˬ uˇ leꞈ ngeh, tsawˇ shiˇ duˬ gahˬ pu cu cu-awˇ, tsawˇ shiˇ-ahˇ tsawˇ shiˇ pehˆ toˆ-ehˇ, shiˇ tsaˬ maˬ paˇ tsoˆ jiˇ coeˇ meh.

⁴Aˇ gʼehˇ muiˬ-awˇ aˬ cawˬ mawꞈ-eu, miˇ tsaˬ zaˬ baˬ ya baw uiˬ-awˇ, aˬ yawꞈ zaˬ kʼaˆ bi geuꞈ jiˇ-euˬ, Niˇnaˬbeˬ meh maˬ laˇ meuˬ-aˬ, kʼehˬ-eu kʼaˆ-eu jeˬ daˬ luꞈ meh.

⁵Dawˬ tawˆ kʼoeˇ taˆ Sahˬpaˬ Miˬyehˇ, Niˇnaˬbeˬ-ahˇ heu loˇ ehˇ meh. “Niˇnaˬbeˬ meuˬ-ahˇ ngaˇ kʼehˬ ma. Miˇ tsaˬ tsawˇ jeuˬ dawˬ tawˆ mehˬ shi, nawˬ-ahˇ ngaˇ mehˬ tsoeˬ lehˆ dzeh-awˇ, neˇ myawˆ ni bi shaꞈ dawˇ sehꞈ ma.

⁶Nawˬ-ahˇ ngaˇ yehˬ bawˬ-ehˇ gʼeh-awˇ, yaw jawꞈ yaw laꞈ shehˆ daˆ nehˬ-awˇ, aˬ cawˬ mehˬ shi daˬ bi ga ma.

⁷Nawˬ-ahˇ kʼaˇ haw mawˇ le-euˬ deuˬ, kuiˇ toꞈ naˇ kʼah paw ciˬ kʼoꞈ-awˇ, ‘Niˇnaˬbeˬ meuˬ cawˆ jiˇ taˬ ngaˇ. Aˬ suˇ gʼaˬ gʼawˬ shaˬ gaˬ nehˬ nmˇ. Aˬ suˇ gʼaˬ ngehˬ gʼeh nehˬ nmˇ’ lehˇ, naˇ kʼah ciˬ pyawˇ-awˇ ehˇ tehꞈ-a.”

⁸Niˬlaˇ lawˇ baˬ lawˇ deh jaˆ-awˇ, iˇ cuꞈ tiˬ jawˬ loꞈ piˇ taˬ-euˬ, Deˬbiˇ meuˬ kʼoeˇ meuˬ naˆ maˬ tseˇ, Niˇnaˬbeˬ nawˇ maˬ gaˇ te loˇ.

⁹Suˬdaˬ miˇ kʼahˬ, Liˆbyaˇ miˇ kʼahˬ, Iˇjiˇtuˆ miˇ kʼahˬ dawˬ tawˆ luꞈ, Deˬbiˇ-euˬ laꞈ jeuˬ shaˇ duˬ meh.

¹⁰Ehˇ kʼawꞈ, aˬ yawꞈ-ahˇ paꞈ tawꞈ-awˇ, bi nyehꞈ byoˆ-euˬ maˬ ngeuˇ-a loˇ. Gaˇ gʼoꞈ gaˇ tsmˇ kʼaˇ tsmˇ le gaˇ, aˬ yawꞈ-euˬ zaˬ bi diˬ sehꞈ-awˇ, aˬ yuiꞈ aˬ tsu bi geuꞈ-euˬ deuˬ, tiˬ paw tiˬ gʼaˬ shmˇ caˆ paꞈ-awˇ, bi tsahˇ byoˆ-euˬ maˬ ngeuˇ-a loˇ.

¹¹Niˇnaˬbeˬ nawˇ jiˇ baˬ yehꞈ-awˇ, nawˬ-ahˇ muiˇ-eu deuˬ maˬ mawˇ gaˇ, cehˆ zaꞈ-eu lehˇ leh jeh tehꞈ-a.

¹²Nawˬ-euˬ taˆ yaw ziꞈ dawˬ tawˆ luꞈ, aˇ siˬ awꞈ laˇ yaˇ laˇ jiˇ-euˬ, siˬ guˬ aˇ bawˇ tiˬ bawˇ loꞈ-ehˇ, kʼaˬ meh mˇ nga-awˇ ngawˬ zuˆ ngeh, kʼaˬ meh-ahˇ ga ahˇ jiˇ tehꞈ-a.

¹³Nawˬ-euˬ yehˇ deuˬ nawˬ-euˬ mehˬ shi, zaˬ miˬ zaˬ loꞈ-ehˇ pyeuꞈ jiˇ-awˇ, miˇ kʼahˬ-ahˇ maˬ loꞈ piˇ nya-ehˇ, meuˬ-euˬ lahˇ kʼehˬ doˆ coˆ dahˇ-awˇ, lahˇ kʼehˬ gʼoˆ bahˬ gʼoˆ shoˆ dawˬ tawˆ, muiˇ-eu deuˬ dzah puiˆ dzeh tehꞈ-a.

¹⁴Guiˇ deuˆ le gaˇ ciˬ daˬ nya ni, iˇ cuꞈ tiˬ byah kʼawꞈ ahˇ taˬ-awˇ, nawˬ-euˬ guiˇ daˬ laˆ ziꞈ taˬ-awˬ. Shaˬ jehˆ yaw jmˬ tsaˬ byaˆ tehˆ-awˇ, nawˬ-euˬ guiˇ daˬ gawˬ ziꞈ taˬ-awˬ.

¹⁵Nawˇ aˇ naˆ ni teuˆ dui dui kʼawꞈ, miˬ dzaˬ neh maˬ bi puiˆ sehꞈ naˇ, guiˇ deuˆ gaˇ bi deuˆ sehꞈ tehꞈ-a. Nyehˇ bahˇ sahˬ lahˬ teuꞈ-eu loꞈ-ehˇ, nawˬ-ahˇ teuꞈ cuˬ byoˆ jiˇ tehꞈ-a. Nyehˇ bahˇ loꞈ-ehˇ nawˇ behˇ laˇ-awˇ,

¹⁶mˬ taˆ aˬ guiˇ deuˬ myaˆ maˬ tseˇ, nawˬ-euˬ baw gaꞈ myaˬ laˇ-euˬ meh. Ehˇ kʼawꞈ, nyehˇ bahˇ dahˇ diˬ diˬ-awˇ, zaw byoˆ zaw laˆ jiˇ-eu loꞈ-ehˇ, aˬ yawꞈ maꞈ byoˆ-iˇ jiˇ-euˬ meh.

¹⁷Nawˬ-euˬ yaw huiˬ yaw mahˇ deuˬ-aˬ, yaw gaˆ gaˆ-eu aˇ nah tiˬ nah, kaˇ pyawˇ-ahˇ dawꞈ uiˬ laˇ taˬ-euˬ, nyehˇ bahˇ baˬ maꞈ-ahˇ duˇ-eu meh. Ehˇ kʼawꞈ nahˇ tsaˇ tsoꞈ laˇ ngeh nah, aˬ yawꞈ maꞈ zaw byoˆ jiˇ gʼeh-awˇ, iˇ zaˇ laˇ zaˇ maˬ paˇ siˬ meh.

¹⁸Huiˬ-eu Aˬshuˇliˆ sahˬ paˬ-oˇ, nawˬ-euˬ gaˇ mˇ-eu sahˬ paˬ deuˬ, yuꞈ byoˆ shiˇ byoˆ shiˇ laˆ jiˇ-awˇ, nawˬ-euˬ miˇ kʼahˬ zaˬ dawˬ tawˆ luꞈ, haw luiˆ nehˬ-eu gʼaˬ maˬ jawˇ ehˇ, gawˬ jawˬ doe ni cehˆ byaˆ-euˬ meh.

¹⁹Nawˬ-euˬ maˇ kʼehˬ maˇ naˇ yaw naꞈ, tiˬ jeˬ-iˬ maˬ laˆ taˬ nya-a. Nawˬ neh kʼehˬ nehˬ kʼaˆ nehˬ-euˬ gaˇ, maˬ daˬ haw ni dehꞈ dzeuˇ nya-euˬ, tiˬ gʼaˬ-iˬ maˬ jawˇ-eu miˇ neh, nawˬ-euˬ guiˬ lahˬ doeˇ-eu gaˇ kawˆ, kʼaˇ ya gaˬ-euˬ tsawˇ haˬ dawˬ tawˆ, laꞈ kʼawˆ tehˆ-awˇ cehˇ gʼa tehꞈ-a.