Read Akha Haˬbaˬkuˆ 2 Bible Online

Haˬbaˬkuˆ 2 - Akha bible

Haˬbaˬkuˆ 2

¹Ngaˬ neh ehˇ-euˬ dawˬ kʼoeˇ deuˬ-ahˇ, Sahˬpaˬ Miˬyehˇ ehˇ kʼoꞈ leꞈ gaˇ, nymˇ goˇ uˬ du ngaˇ loꞈ leˇ-awˇ, dawˬ tmˇ mˇ-eu shaˇ sawˇ leˇ ma.

²Sahˬpaˬ Miˬyehˇ ehˇ kʼoꞈ leꞈ-euˬ, “Ngaˬ neh nawˬ-ahˇ pah mehˬ-euˬ jeˬ, yaw awˇ laꞈ-ehˇ gui doˆ nya ni, tsaˬ byaˆ kʼoeˇ taˆ toeˬ boꞈ taˬ-awˬ.

³Ngaˇ pah mehˬ-eu jeˬ keuˆ le-eu, aˇ yamˬ maˬ tsaˬ laˇ-euˬ miˇ neh, boꞈ doˆ-awˇ tiˬ kʼehˬ dawˬ tawˬ siˬ. Ngaˇ pah mehˬ-eu jeˬ keuˆ le-eu, aˇ yamˬ dawˬ peh peh laˇ-euˬ meh. Yaw kawˇ maˬ keuˆ le gaˇ duˇ kʼawꞈ, tiˬ kʼehˬ dawˬ-awˇ haw tsoˆ taˬ yawˬ. Gʼawˬ myahˇ ni maˬ paˇ nyi naˬ ni, keuˆ le luꞈ-eu yaw duˬ baw meh.

⁴Gaˇ kawˆ kʼoeˇ-aˬ, heu loꞈ-ehˇ meh. Miˬyehˇ-ahˇ saˇ jaˇ maˬ puiˬ-eu, yaw tsaˬ yaw dawˇ deuˬ ya dehꞈ-awˇ, yaw haiˬ deuˬ maˬ dzeuˇ-iˇ nya-a.”

⁵Jiˇ baˬ maˇ tsaꞈ saˇ jaˇ maˬ jawˇ. Aˇ gah kʼoeˇ gah jawˇ naˬ maˬ mˇ. Pyuˇ shuiˇ nui kʼahˇ ciˇ tahˬ miˇ oˆ, aˬ yawꞈ shiˇ ngeh nui kʼahˇ maˬ jiˇ. Tsawˇ jeuˬ dawˬ tawˆ deuˆ gʼaˬ jiˇ-awˇ, miˇ tsaˬ zaˬ paꞈ uiˬ jiˇ-euˬ meh.

⁶Kʼaˇ jawˇ kʼaˇ deuˬ yawꞈ-ahˇ bye-awˇ, yaˬ kʼehˇ maˬ toˇ-ehˇ jawˇ nmˇ loˇ. “Aˬ cawˬ-euˬ pyuˇ shuiˇ baꞈ uiˬ-awˇ, smˇ muiˬ aˬ da geuꞈ-eu gʼaˬ-oˇ, nawˇ dehꞈ dzaˬ-eu aˇ nah aˇ yamˬ, nymˇ le-euˬ siˬ nya ma loˇ” lehˇ, yaˬ kʼehˇ yaˬ gaˇ ya daˬ tehꞈ-a.

⁷Nawˬ-ahˇ dziˇ dzoˆ poˆ kʼoꞈ-eu deuˬ, ja pyuˬ ni tsawˬ tuˇ laˇ jiˇ-awˇ, nawˇ yaw dzuˬ gah ni ya guˆ-eu, nawˬ-ahˇ muiˇ-eu deuˬ noeˬ laˇ ngeh, aˬ cawˬ yaw haiˬ mˇ poˆ laˇ gaˇ, nawˇ ya daˬ-eu yaw duˬ baw meh.

⁸Miˇ kʼahˬ tsawˇ jeuˬ gʼawˬ mya ni-ahˇ, nawˇ nawˬ dzaˬ kʼaˆ dzaˬ-euˬ miˇ neh, kʼaˇ buˬ kʼaˇ law-iˇ-euˬ kʼoeˇ deuˬ, nawˬ-ahˇ paˇ daˆ poˆ laˇ tehꞈ-a. Miˇ tsaˬ-ahˇ nawˇ yaw haiˬ mˇ-awˇ, tsawˇ haˬ shiˬ laˆ yoeˇ-euˬ miˇ neh, meuˬ deuˬ kʼoeˇ taˆ kʼaˆ myawˬ mˇ-awˇ, kʼaˆ dzaˇ dzaˬ-euˬ jaˆ-eu miˇ neh, nawˬ-ahˇ paˇ daˆ poˆ laˇ tehꞈ-a.

⁹Yawˬ ha nymˇ jiˇ smˇ muiˬ muiˬ ni, maˬ sui maˬ dawˇ gaˇ poˆ za-awˇ, guˆ-eu gaˆ-eu jeˬ-ahˇ dzeuˇ ni, yaw goˇ-ahˇ bahˬ sheu-euˬ tsawˇ haˬ, yaw kʼaˆ-ehˇ ya noeˬ shaˬ tehꞈ-a.

¹⁰Aˬ cawˬ-ahˇ nawˇ yaw doeˇ jahˇ-eu, nawˬ-euˬ nymˇ jiˇ myaˆ pyawˬ cawˆ-awˇ, nawˬ-euˬ uˬ kʼawˇ deuˬ laˇ tehꞈ-a.

¹¹Kaˇ pyawˇ kʼaˬ lo nawˬ-ahˇ guˇ-awˇ, daˇ kawˬ pyaꞈ dmˬ guˇ caw tehꞈ-a.

¹²Tsawˇ haˬ shiˬ neh meuˬ teˬ dzaˬ-awˇ, iˬ baˇ mˇ-awˇ pu tsoˆ-euˬ deuˬ, yaw kʼaˆ-ehˇ ya noeˬ shaˬ tehꞈ-a. Tsawˇ haˬ neh bawˬ toˆ toˆ-euˬ jeˬ, miˬ dzaˬ puiˆ dzeh nehˬ gaˇ duˇ-awˇ,

¹³miˇkʼahˬ tsawˇjeuˬ shaˬdoeˇ-euˬ kʼoeˇ, gaˇ dahˇ tsoeˬ leˇ duˬ maˬ jaˆ ni, Baoˬ huiˬ-eu Sahˬpaˬ Miˬyehˇ neh, noeˬ tsehˆ daˇ tsehˆ jiˇ taˬ-euˬ meh.

¹⁴Sahˬpaˬ Miˬyehˇ yaw shehꞈ kʼahˬ sehˇ, huiˬ-eu meh lehˇ siˬ nya-eu jeˬ, laˆ shaˆ iˇ cuꞈ byah-eu loꞈ-ehˇ, miˇ tsaˬ kʼoeˇ taˆ byah-iˇ tehꞈ-a.

¹⁵Aˬ cawˬ-ahˇ jiˇ baˬ laˆ yehꞈ-awˇ, neˇ myawˆ ni teuˆ gaˇ haw-eu lehˇ, nawˇ jiˇ baˬ kʼaˇ-euˬ baˬ da neh, yaw kʼaˆ-ehˇ ya noeˬ shaˬ tehꞈ-a.

¹⁶Nawˇ jiˇ baˬ yehꞈ yehꞈ-ehˇ teuˆ-awˇ, aˬ cawˬ maˬ taˬ huiˬ-eu uˬ taꞈ, daˬ ga-awˇ ya shaꞈ dawˇ tehꞈ-a. Sahˬpaˬ Miˬyehˇ laꞈ maˇ laꞈ-ahˇ, ciˬ-eu kʼmˬ maˬ nawˇ ya dawˇ-awˇ, aˇ dzehˬ dzeuˇ ni daˬ ga tehꞈ-a.

¹⁷Leˬbaˬnoˬ sahˬ kʼaˆ nawˇ tuˇ-euˬ, nawˬ-ahˇ tuˇ poˆ gaˇ ya daˬ-awˇ, bawˇ tsahˬ jeˬ zaˬ-ahˇ nawˇ sehꞈ-euˬ, jeˬ zaˬ nawˬ-ahˇ paˇ sehꞈ tehꞈ-a. Tsawˇ haˬ-euˬ shiˬ nawˇ sehꞈ yoeˇ-awˇ, miˇ tsaˬ-ahˇ nawˇ kʼehˬ-euˬ miˇ neh, kʼoeˇ loꞈ-ehˇ ya daˬ poˆ tehꞈ-a.

¹⁸Tsawˇ haˬ-euˬ aˬ laꞈ neh tehˆ-euˬ, tahˬ pahˬ aˬ ma aˬ jeˬ tsoeˬ ta. Jaˬ myawꞈ myawꞈ-eu mawˇ kawˇ kʼoeˇ deuˬ, gaˇ dahˇ tsoeˬ-eu aˬ gaˇ jaˆ ta. Yawˬ ha neh pyaꞈ doˆ tehˆ doˆ-euˬ, dawˬ maˬ ngehˬ nya-eu mawˇ kawˇ-ahˇ, yawˬ ha uˬ duˬ paˇ tahˬ-eu nga.

¹⁹Daˇ kawˬ mawˇ kawˇ noeˬ laˇ-awˬ lehˇ, kʼaˬ lo mawˇ kawˇ tuˇ laˇ-awˬ lehˇ, ehˇ-eu gʼaˬ ya noeˬ shaˬ tehꞈ-a. Tahˬ pahˬ aˬ ma mawˇ kawˇ kʼoeˇ deuˬ, nawˬ-ahˇ aˬ jeˬ ehˇ nehˬ nya ta. Pyuˇ hawˇ-eu shuiˇ yaw taˬ-euˬ kʼawꞈ, saꞈ gʼawˇ nya-eu jeˬ maˬ ngeuˇ-a.

²⁰Ehˇ kʼawꞈ huiˬ-eu Sahˬpaˬ Miˬyehˇ, yawꞈ-euˬ muiˬ-eu nymˇ shawˇ pyeuꞈ-eu, Uˬ duˬ tahˬ nymˇ laꞈ kʼoeˇ jawˇ meh. Miˇ tsaˬ zaˬ yawˬ gʼaˬ yawˬ na luꞈ, aˬ yawꞈ mehˬ shi ciˬ cuˇ jawˇ-awˬ.