Read Akha Haˬbaˬkuˆ 3 Bible Online

Haˬbaˬkuˆ 3 - Akha bible

Haˬbaˬkuˆ 3

¹Heu-aˬ, Miˬyehˇ gʼaˇ duˬ ngehˬ dah-eu Haˬbaˬkuˆ neh guiˬ lahˬ shaˇ-euˬ dawˬ meh.

²“Sahˬpaˬ Miˬyehˇ nawˬ-euˬ tsawˇ myahˇ, tsawˇ myahˇ huiˬ-eu ngaˇ ya gaˬ-awˇ, Sahˬpaˬ Miˬyehˇ nawˇ mˇ-euˬ gaˇ, ngaˬ-ahˇ zahˬ dui dui leˇ miˇ-a. Aˇ hu mˇ-euˬ huiˬ-eu gaˇ deuˬ, iˬ nah paˇ mˇ poˆ nehˬ laꞈ yawˬ. Nawˇ nui ma pehˇ dui dui ngeh kʼawꞈ, gʼawˬ shaˬ gaˬ-eu taˬ byehˇ nehˬ laꞈ.

³Eˬdoˬ paw neh Miˬyehˇ oe meh. Muiˬ-eu shawˇ-eu aˬ dui Miˬyehˇ, Paˬlaˬ gawˬ jawˬ paw neh oe meh. Mˬ-ahˇ yaw shehꞈ kʼahˬ sehˇ byah-awˇ, miˇ tsa ja ceuˬ-eu dawˬ byah meh.

⁴Mˬ myawꞈ myawꞈ ngeh bya-eu loꞈ-ehˇ, aˬ yawꞈ oe-eu yaw shehꞈ bya-awˇ, baoˬ tuˆ zaꞈ-euˬ aˬ laꞈ kʼoeˇ laꞈ, yaw shehꞈ bya cehˆ ni jaˆ-eu meh.

⁵Aˬ yawꞈ oe-eu kuiˇ toꞈ mehˬ hu, naˇ gawˇ gawˇ ma yaw jaw oe-awˇ, Aˬ yawꞈ iˇ-eu kuiˇ toꞈ mehˬ nah, shaˆ shiˇ naˇ gawˇ caw teh-eu meh.

⁶Aˬ yawꞈ naˬ ngeh miˇ luˆ luˆ-awˇ, aˬ yawꞈ myaˆ haw ciˬ pyawˇ leꞈ ngeh, miˇ tsaˬ zaˬ yaw dzuˬ dzuˬ-eu meh. Aˇ hu aˬ yawꞈ cah-euˬ gaˇ ma, gawˬ jawˬ jawˬ oeˇ deuˬ byaˆ le-awˇ, gawˬ duˇ duˇ mawˬ coˬ le-eu meh.

⁷Kuˇshaˬ tsawˇ jeuˬ guˆ dui dui-awˇ, Miˇdiˬyaˬ tsawˇ haˬ dawˬ tawˆ luꞈ, yaw dzuˬ dzuˬ gaˇ ngaˇ mawˇ-euˬ ma.

⁸Sahˬpaˬ Miˬyehˇ nui ma pehˇ-eu, lawˇ baˬ lawˇ gawˆ kʼoeˇ deuˬ-a loˇ. Nawˇ nui ma daˆ laˇ ni jahˇ-euˬ, iˬ ma laˆ shaˆ lah ma-a loˇ. Kʼoeˇ taˆ mˬ dmˇ-ahˇ nawˇ dziˬ-awˇ, jaˬ lehˇ lehˇ ma laˆ lawˬ dziˬ-awˇ, muiˇ-eu deuˬ-ahˇ deuˆ gʼaˬ-euˬ meh.

⁹Nawˬ-euˬ kaˆ-ahˇ nawˇ ngoꞈ daˆ-awˇ, kaˆ myaˬ yuˇ daˆ-awˇ loꞈ-eu meh. Miˇ tsaˬ paˆ-iˇ shaˆ-iˇ jiˇ ni, lawˇ baˬ neh nawˇ kawˆ paˆ-euˬ meh.

¹⁰Gawˬ jawˬ deuˬ nawˬ-ahˇ ya mawˇ ngeh, guˆ dui dui-awˇ yaw dzuˬ dzuˬ meh. Mˬ-ahˇ iˇ cuꞈ shehˆ dzeh leꞈ-awˇ, miˇ oˆ iˇ cuꞈ teˇ saˇ mahˇ-awˇ, iˇ luˆ dzeh goˇ daˆ leꞈ-eu meh.

¹¹Nawˬ-euˬ kaˆ myaˬ mˬ myawꞈ myawꞈ-awˇ, nawˬ-euˬ gahˬ naˇ guiˇ guiˇ laˇ gaˇ, ba la nahˇ ma naˬ leˇ-euˬ meh.

¹²Nawˇ nui ma pehˇ dui dui laˇ-awˇ, miˇ tsaˬ nyiˬ tsehˆ-ehˇ iˇ-euˬ meh.

¹³Nawˬ-euˬ tsawˇ haˬ kʼoeˇ deuˬ hawˇ-eu, nawˬ neh tseˇ doˆ-euˬ sahˬpaˬ-ahˇ, ka kʼoꞈ-eu lehˇ nawˇ iˇ-euˬ meh. Haiˬ-eu sahˬ paˬ-ahˇ kʼoˆ coˬ-awˇ, gʼaˬ zaˬ gʼaˬ kʼehˇ dawˬ tawˆ luꞈ-ahˇ, nawˇ laˆ piˬ laˆ byoˆ nehˬ-euˬ meh.

¹⁴Cehˆ zaꞈ taˬ-euˬ yaw shaˬ zaˬ-ahˇ, nyehꞈ dzaˬ-eu lehˇ noeˬ tsoˆ taˬ-awˇ, jaˬ lehˇ lehˇ zeuˆ loꞈ-ehˇ oe-eu, guiˇ maꞈ kʼoeˇ maꞈ-euˬ aˬ yuiꞈ-ahˇ, aˬ yawꞈ-euˬ gahˬ nawˇ yuˇ doˆ-awˇ, uˬ duˬ joeˬ tsoˆ doˆ nehˬ-euˬ meh.

¹⁵Iˬ ma laˆ shaˆ iˇ cuꞈ kʼoeˇ taˆ, nawˇ mahˬ pyehˬ teh sehˇ doˆ gʼeh ngeh, boeˇ loeˇ yoˆ yoˆ-ehˇ jaˆ-eu meh.

¹⁶Gaˇ kawˆ kʼoeˇ ngaˇ ya gaˬ gʼaˬ ngeh, gʼawˇ mawˇ mawˇ lah yaw dzuˬ dzuˬ-awˇ, mehˬ luˬ mehˬ ma shaˬ dehꞈ dehꞈ nya. Shaˬ yoeˬ shaˬ laꞈ peuˬ-iˇ jiˇ-awˇ, kuiˇ toꞈ yaˇ laˇ jiˇ-euˬ miˇ-a. Ngaˬ-ahˇ guiˇ deuˆ le-eu deuˬ-ahˇ, Miˬyehˇ kʼehˬ nehˬ-eu aˇ nah-ahˇ, ciˬ cuˇ ni ngaˇ dawˬ luꞈ-eu ma.

¹⁷Siˬ guˬ aˇ yehˆ maˬ yehˆ le-ehˇ, aˬ gaꞈ aˇ siˬ maˬ siˬ le kʼawꞈ, Saˬ loˬ aˇ siˬ maˬ sahˇ le-ehˇ, dzaˬ la gʼo cehˇ maˬ za le kʼawꞈ, ciˬ myehꞈ hawˇ-eu yawˇ shiˇ jiˇ-awˇ, mawˇ neˇ mawˇ kuˆ ciˬ cuˇ jaˆ kʼawꞈ,

¹⁸Sahˬpaˬ Miˬyehˇ pyeuꞈ-eu Miˬyehˇ, ka kʼoꞈ le gaˇ ngaˇ noeˬ tmˬ-awˇ, laˬ kʼaˬ cehˇ taˆ ni jawˇ-euˬ ma.

¹⁹Sahˬpaˬ Miˬyehˇ ngaˬ-euˬ Miˬyehˇ, ngaˬ-euˬ gʼaˬ kʼaˆ duˬ pyeuꞈ-eu ma. Kʼaˬ tsehˆ loꞈ-ehˇ kuiˇ toꞈ ziꞈ-awˇ, yaw goˇ-ahˇ daˆ keuˆ leˇ nya ni, aˬ yawꞈ ngaˬ-ahˇ gʼaˬ biꞈ-eu meh.