Read Akha Zeˬpaˬniˇ 2 Bible Online

Zeˬpaˬniˇ 2 - Akha bible

Zeˬpaˬniˇ 2

¹Shaꞈ dawˇ maˬ baw-eu tsawˇ jeuˬ-oˇ, tiˬ gaˇ uiˬ laˇ bymˇ laˇ jiˇ-awˇ,

²kʼaˬ puiˬ loꞈ-ehˇ bi yaˇ dzeh-eu, aˇ nah maˬ keuˆ le mi naˆ-ehˇ, Sahˬpaˬ Miˬyehˇ nui ma pehˇ-eu, naw maꞈ maˬ ya daˬ mi naˆ-ehˇ, Sahˬpaˬ Miˬyehˇ nui ma daˆ-eu, naw maꞈ maˬ tahˬ puˬ mi naˆ-ehˇ, nui ma-ahˇ noeˬ-awˇ dehꞈ paˇ-awˬ.

³Sahˬpaˬ Miˬyehˇ dawˬ naˇ haˬ-awˇ, nui nahˬ nui yu ahˇ-eu deuˬ-oˇ, Sahˬpaˬ Miˬyehˇ-ahˇ shaˇ caw-awˬ. Yaw tsaˬ yaw dawˇ jeˬ-ahˇ poˆ-awˬ. Nui nahˬ nui yu ahˇ-awˇ dehꞈ-awˬ. Sahˬpaˬ Miˬyehˇ nui ma pehˇ gaˇ, nawˇ ya buˬ-iˇ-eu baw tehꞈ-a.

⁴Gaˬzaˬ meuˬ tsawˇ haˬ maˬ jawˇ-ehˇ, Aˬshaˇgaˬloˇ meuˬ byoˆ-iˇ meh. Aˬshaˬdoˇ meuˬ-ahˇ jawˇ-eu deuˬ, nah kʼoeˆ laꞈ kʼoeˇ bi teh byoˆ-awˇ, Eˇkaˬloˬ meuˬ-ahˇ jawˇ-eu deuˬ, meuˬ laꞈ nyiˇ bi teh dzeh tehꞈ-a.

⁵Laˆ shaˆ lawˇ deh tiˬ li jawˇ-eu, naw maꞈ Piˇliˇtiˆ tsawˇ haˬ deuˬ, yaw kʼaˆ-ehˇ ya noeˬ shaˬ tehꞈ-a. Sahˬpaˬ Miˬyehˇ yaˇ kʼaˬ daˇ-awˇ, tiˬ gʼaˬ-iˬ maˬ bi dzeuˇ-iˇ ni, laˆ cawˆ nehˬ gaˇ ya daˬ tehꞈ-a.

⁶Laˆ shaˆ lawˇ deh naw maꞈ miˇ kʼahˬ, yawˇ bo-eu deuˬ sehˬ gʼawˆ gʼawˆ-awˇ, yawˇ gaˆ dzaˬ duˬ pyeuꞈ-iˇ tehꞈ-a.

⁷Buˬ-iˇ-euˬ Yuˇdaˆ tsawˇ haˬ deuˬ, naw maꞈ miˇ kʼahˬ jawˇ geuꞈ tehꞈ-a. Aˬ yawꞈ maꞈ kʼoeˇ gaˇ yawˇ bo-awˇ, Aˬshaˇgaˬloˇ meuˬ-euˬ nymˇ deuˬ, aˬ yawꞈ maꞈ yuꞈ duˬ pyeuꞈ tehꞈ-a. Sahˬpaˬ Miˬyehˇ pyeuꞈ-eu Miˬyehˇ, aˬ yawꞈ maꞈ-ahˇ dah teˬ nehˬ-awˇ, paˇ bi dehꞈ doˆ dzaˬ laˇ tehꞈ-a.

⁸Sahˬpaˬ Miˬyehˇ ehˇ-eu, “Mawˇbaˆ hawˇ-eu Aˬmoˬ tsawˇ jeuˬ, ngaˬ-euˬ tsawˇ haˬ-ahˇ ehˇ doeˇ-awˇ, miˇ kʼahˬ ceh geuꞈ ma lehˇ lmˬ-eu, ngaˬ-euˬ naˬ bawˇ gaˬ taˬ-euˬ ma.

⁹Ngaˇ Baoˬ huiˬ-eu Sahˬpaˬ Miˬyehˇ, Iˇsaˬleˬlaˆ tsawˇ jeuˬ kʼoeˇ taˆ, Miˬyehˇ kʼaˇ pyeuꞈ luꞈ kʼoeˇ keuˆ ni, Mawˇbaˆ hawˇ-eu Aˬmoˬ tsawˇ jeuˬ, Sawˇdoˬ Gawˇmawˇlaˆ meuˬ loꞈ-ehˇ, kʼehˬ nehˬ kʼaˆ nehˬ gaˇ bi daˬ ma. Saˬ deuꞈ duˬ kʼahˬ pyeuꞈ-iˇ jiˇ-awˇ, yaˇ moꞈ neh bi uˆ tehˬ byoˆ-awˇ, yaˇ ziˇ yaw cawˆ-ehˇ jaˆ tehꞈ-a. Buˬ-iˇ-euˬ ngaˬ-euˬ tsawˇ haˬ deuˬ, miˇ kʼahˬ kʼoeˇ deuˬ ya geuꞈ tehꞈ-a.”

¹⁰Sahˬpaˬ Miˬyehˇ-euˬ tsawˇ haˬ-ahˇ, yehˬ bawˬ-ehˇ ehˇ nehˬ-euˬ miˇ neh, kʼoeˇ loꞈ-ehˇ ya daˬ poˆ tehꞈ-a.

¹¹Sahˬpaˬ Miˬyehˇ aˬ yawꞈ maꞈ-ahˇ, yaw kʼaˆ-ehˇ laˆ guˆ nehˬ tehꞈ-a. miˇ taˆ miˬyehˇ dawˬ tawˆ luꞈ-ahˇ, SahˬpaˬMiˬyehˇ laˆ cawˆ jiˇ-awˇ, miˇtsaˬtsawˇjeuˬtsawˇca dawˬtawˆ, yawˬ ha jawˇ-eu miˇ kʼahˬ laꞈ kʼoeˇ, aˬ yawꞈ-ahˇ uˬ duˬ tahˬ tehꞈ-a.

¹²Suˬdaˬ miˇ kʼahˬ zaˬ deuˬ-ahˇ kʼawꞈ, Sahˬpaˬ Miˬyehˇ sehꞈ dzeh tehꞈ-a.

¹³Laꞈ taˆ paw aˬ laꞈ cawˬ ja-awˇ, Aˬsuˇliˆ meuˬ laˆ cawˆ tehꞈ-a. Niˇnaˬbeˬ meuˬ ciˬ cuˇ saˆ ni, kʼaˇ shuiꞈ deh ga pyeuꞈ-iˇ tehꞈ-a.

¹⁴Bawˇ tsahˬ jeˬ zaˬ kʼaˇ jawˇ kʼaˇ deuˬ, meuˬ gʼahˇ lahˇ ceh yuꞈ le tehꞈ-a. Nymˇ coeˬ doe ni dzeˇ ngawˇ dawꞈ-awˇ, laˇ gʼoˆ-ahˇ awꞈ-aꞈ mahˇ le tehꞈ-a. Ziꞈ dui dui-eu shuˬ liˇ pyaꞈ dmˬ, neˇ law ni ga zaˇ mawˇ tehꞈ-a.

¹⁵Baoˬ huiˬ gʼaˬ kʼaˆ kʼahˬ sehˇ jehˆ-awˇ, Meuˬ ziꞈ ngaˇ taꞈ maˬ jaˆ ma lehˇ, guˆ kʼaˇ maˬ za lehˇ duˇ-euˬ meuˬ, kʼoeˇ naˆ ni ga byoˆ leꞈ tehꞈ-a. Tsawˇ teˇ maˬ ya gaˬ-eu meuˬ tsoeˬ, bawˇ tsahˬ jeˬ zaˬ yuꞈ duˬ pyeuꞈ-awˇ, kʼaˇ iˇ kʼaˇ laˇ tsehˆ-eu tsawˇ haˬ, laꞈ du cawˬ doˆ-awˇ lmˬ tehꞈ-a.