Read Akha Haˬgaiˇ 1 Bible Online

Haˬgaiˇ 1 - Akha bible

Haˬgaiˇ 1

¹Paˇshaˇ miˇ kʼahˬ-ahˇ sahˬ paˬ Daˬliˇ uˆ lahˇ-euˬ nyiˬ kʼoꞈ tiˬ kʼoꞈ ba la koꞈ siˬ tiˬ siˬ yaw beh nah-ahˇ, Haˬgaiˇ lehˇ myahˇ-euˬ Miˬyehˇ gʼaˇ duˬ ngehˬ dah-eu gʼaˬ jawˇ gaˇ, Sahˬpaˬ Miˬyehˇ-euˬ dawˬ keuˆ le-euˬ meh. Dawˬ kʼoeˇ deuˬ-aˬ, Yuˇdaˆ miˇ kʼahˬ-ahˇ uˆ lahˇ luꞈ-eu gʼaˬ pyeuꞈ-eu Shaˬtiˇlaˆ-euˬ aˬ li Zeˬluˇbaˬbeˬlaˇ hawˇ-eu, piˇ ma yaw huiˬ gʼaˬ pyeuꞈ-eu Yeˬhawˇzaˬdaˆ-euˬ aˬ li Yawˇshuˆ gʼaˇ duˬ pyeuꞈ-eu meh.

²“Uˬ duˬ tahˬ nymˇ nymˇ ma tsoˆ muiˬ-eu aˇ yamˬ maˬ keuˆ laˇ-aˬ siˬ lehˇ, tsawˇ haˬ teu deuˬ ehˇ luꞈ meh” lehˇ, Haˬgaiˇ-ahˇ Sahˬpaˬ Miˬyehˇ ehˇ nehˬ-euˬ meh.

³Kʼoeˇ naˇ, Miˬyehˇ gʼaˇ duˬ ngehˬ dah-eu Haˬgaiˇ-ahˇ gʼoe-awˇ, dawˬ heu deuˬ Sahˬpaˬ Miˬyehˇ biꞈ leꞈ-euˬ meh.

⁴“Ngaˬ-euˬ Uˬ duˬ tahˬ nymˇ nymˇ ma yaw pyaˆ-ehˇ jaˆ luꞈ ngeh, naw maꞈ nymˇ muiˬ tsoˆ-awˇ ya jawˇ ta loˇ.

⁵Naw maꞈ kʼoeˇ taˆ aˬ jeˬ keuˆ le-euˬ nya lehˇ shaˇ noeˬ haw sheˇ.

⁶Naw maꞈ cehˇ ka myaˬ-euˬ kʼawꞈ, ui cuiˆ maˬ ngeuˇ naˇ maˬ ya yehˬ-a. Naw maꞈ dzaˬ ngeh maˬ dehˆ-ehˇ, dawˇ ngeh maˬ tmˬ-eu uˬ taꞈ, dm ngeh maˬ lmˇ-a. Naw maꞈ jeˬ gʼaˬ pyuˇ shuiˇ poˆ za kʼawꞈ, pyuˇ pawˬ behˆ yaw pehꞈ-ahˇ dawˆ ahˇ gaˇ duˇ meh.

⁷Aˬ jeˬ miˇ neh kʼoeˇ loꞈ-ehˇ gʼeh-eu nga lehˇ naw maꞈ-ahˇ siˬ laˇ miˇ-a loˇ.

⁸Gawˬ jawˬ-ahˇ daˇ kawˬ shaˇ leˇ-awˇ, Uˬ duˬ tahˬ nymˇ nymˇ ma tsoˆ muiˬ-awˬ. Kʼoeˇ loꞈ-ehˇ jahˇ naˇ, ngaˇ nui kʼahˇ shiˇ-awˇ, ngaˬ-ahˇ kʼoeˇ gaˇ uˬ duˬ paˇ ya tahˬ tehꞈ-a.

⁹“Naw maꞈ cehˇ gʼawˬ mya ni mˇ za ma lehˇ noeˬ kʼawꞈ, ui cuiˆ tehꞈ-ehˇ za le-eu meh. Naw maꞈ cehˇ pi kʼoꞈ leꞈ ngeh, ngaˇ baw dzeh-euˬ ma. Aˬ jeˬ miˇ neh ngaˇ kʼoeˇ loꞈ-ehˇ jahˇ-euˬ nga lehˇ duˇ-eu nya. Ngaˬ-euˬ Uˬ duˬ tahˬ nymˇ nymˇ ma yaw pyaˆ-ehˇ jaˆ ngeh, naw maꞈ yawˬ ha-euˬ nymˇ laꞈ kʼoeˇ gaˇ myaˬ luꞈ-eu miˇ neh, ngaˇ kʼoeˇ loꞈ-ehˇ jahˇ-euˬ ma.

¹⁰Kʼoeˇ miˇ neh, uˬ yehˇ maˬ yehˇ le, ceuˬ maˬ ga le-ehˇ, sahˬ lahˬ maˬ dehꞈ doˆ laˇ nya-a.

¹¹Deh ga hawˇ-eu gawˬ jawˬ-ahˇ maˬ ehˇ, cehˇ yaˇ hawˇ-eu aˬ gaꞈ yaˇ-ahˇ maˬ ehˇ, saˬ loˬ tsiˇ aˇ bawˇ bawˇ yaˇ hawˇ-eu sahˬ lahˬ dawˬ tawˆ luꞈ kʼoeˇ taˆ maˬ ehˇ, tsawˇ haˬ hawˇ-eu jeˬ zaˬ kʼoeˇ taˆ maˬ ehˇ, naw maꞈ neh kʼaˇ ka-euˬ yawˬ jeˬ na luꞈ kʼoeˇ taˆ maˬ ehˇ, uˬ yehˇ maˬ bi yehˇ le ni ngaˇ jahˇ-euˬ ma.”

¹²Kʼoeˇ naˇ, Shaˬtiˇlaˆ-euˬ aˬ li Zeˬluˇbaˬbeˬlaˇ hawˇ-eu piˇ ma yaw huiˬ gʼaˬ pyeuꞈ-eu Yeˬhawˇzaˬdaˆ-euˬ aˬ li Yawˇshuˆ maˬ ehˇ, Baˬbuˇloˬ miˇ kʼahˬ-ahˇ neh gʼoꞈ doˆ laˇ-euˬ tsawˇ haˬ dawˬ tawˆ luꞈ maˬ ehˇ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh kʼaˇ ehˇ nehˬ-euˬ loꞈ-ehˇ mˇ-euˬ meh. Aˬ yawꞈ maꞈ Sahˬpaˬ Miˬyehˇ-ahˇ guˆ-eu laꞈ kʼoeˇ, Sahˬpaˬ Miˬyehˇ gʼaˇ duˬ ngehˬ dah-eu Haˬgaiˇ-euˬ dawˬ-ahˇ naˇ haˬ geuꞈ-euˬ meh.

¹³Kʼoeˇ naˇ, “Ngaˇ naw maꞈ nehˬ-ehˇ jawˇ ma” lehˇ, Sahˬpaˬ Miˬyehˇ neh ehˇ-euˬ dawˬ kʼoeˇ dawˬ, Sahˬpaˬ Miˬyehˇ gʼaˇ duˬ ngehˬ dah-eu Haˬgaiˇ neh aˬ yawꞈ maꞈ-ahˇ ehˇ nehˬ-euˬ meh.

¹⁴Kʼoeˇ naˇ, Yuˇdaˆ miˇ kʼahˬ-ahˇ uˆ lahˇ-eu gʼaˬ pyeuꞈ-eu Shaˬtiˇlaˆ-euˬ aˬ li Zeˬluˇbaˬbeˬlaˇ, piˇ ma yaw huiˬ gʼaˬ pyeuꞈ-eu Yeˬhawˇzaˬdaˆ-euˬ aˬ li Yawˇshuˆ hawˇ-eu, Baˬbuˇloˬ miˇ kʼahˬ-ahˇ neh gʼoꞈ doˆ le-euˬ tsawˇ haˬ dawˬ tawˆ luꞈ-euˬ nui ma-ahˇ Sahˬpaˬ Miˬyehˇ ciˬ tuˇ nehˬ-awˇ, aˬ yawꞈ maꞈ dawˬ tawˆ luꞈ, aˬ yawꞈ maꞈ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma tsoˆ-euˬ meh.

¹⁵Daˬliˇ sahˬ paˬ geuꞈ-euˬ nyiꞈ kʼoꞈ tiˬ kʼoꞈ ba la koꞈ siˬ tiˬ siˬ nyiˬ tseˇ oeˬ nah-ahˇ, aˬ yawꞈ maꞈ kʼoeˇ loꞈ-ehˇ mˇ-euˬ meh.