Read Akha Zaˬkaˬliˇ 12 Bible Online

Zaˬkaˬliˇ 12 - Akha bible

Zaˬkaˬliˇ 12

¹Heu-aˬ, mˬ toˆ pyeh-awˇ, miˇ tsaˬ tahˬ kʼawˇ beh-awˇ, tsawˇ haˬ zaˬ-ahˇ dehꞈ-eu saꞈ laˇ biꞈ-euˬ gʼaˬ pyeuꞈ-eu Sahˬpaˬ Miˬyehˇ-euˬ dawˬ meh. Iˇsaˬleˬlaˆ miˇ kʼahˬ-ahˇ Sahˬpaˬ Miˬyehˇ heu loꞈ-ehˇ ehˇ-eu meh.

²“Yeˬluˇsaˬlehˬ meuˬ-ahˇ aˬ gaꞈ dzaˇ uiˇ kʼmˬ maˬ loꞈ-ehˇ ngaˇ bi pyeuꞈ laˇ-awˇ, dawˬ peh jawˇ-eu tsawˇ jeuˬ deuˬ bi dawˇ yehꞈ jiˇ ma. Yeˬluˇsaˬlehˬ meuˬ-ahˇ aˬ yawꞈ maꞈ loꞈ jawˬ ngeh, Yuˇdaˆ miˇ kʼahˬ laꞈ kʼoeˇ kʼaˇ jaˆ-eu meuˬ deuˬ-ahˇ kʼawꞈ loꞈ jawˬ tehꞈ-a.

³Ehˇ kʼawꞈ, aˇ yamˬ kʼoeˇ yamˬ keuˆ laˇ ngeh, Yeˬluˇsaˬlehˬ meuˬ-ahˇ kah dui dui-eu kʼaˬ lo lo ma tiˬ siˬ loꞈ-ehˇ bi pyeuꞈ laˇ-awˇ, baꞈ diˇ-eu lehˇ kʼaˇ leh jeh-eu tsawˇ jeuˬ aˬ geu jeuˬ maˬ kaˬ, laˆ tahˬ laˆ naˇ tehꞈ-a. Miˇ kʼahˬ tsawˇ jeuˬ dawˬ tawˆ luꞈ gm leˇ-awˇ, Yeˬluˇsaˬlehˬ meuˬ-ahˇ guiˇ deuˆ tehꞈ-a.

⁴Aˇ yamˬ kʼoeˇ yamˬ keuˆ laˇ ngeh, aˬ yawꞈ maꞈ-euˬ dziˬ mahˬ deuˬ-ahˇ ngaˇ laˆ guˆ nehˬ-awˇ, mahˬ dziˬ-eu yehˇ deuˬ tsawˇ uˬ bi uˬ-iˇ jiˇ ma. Yuˇdaˆ tsawˇ haˬ deuˬ-ahˇ ngaˇ haw piˇ nehˬ-awˇ, muiˇ-eu deuˬ-euˬ mahˬ deuˬ myaˆ behꞈ bi behꞈ-iˇ jiˇ ma.

⁵Kʼoeˇ ngeh, ‘Baoˬ huiˬ-eu Miˬyehˇ pyeuꞈ-eu Sahˬpaˬ Miˬyehˇ-aˬ, Yeˬluˇsaˬlehˬ meuˬ-ahˇ jawˇ-eu aˬ yawꞈ-euˬ tsawˇ haˬ deuˬ-ahˇ gʼaˬ biꞈ-eu ngaˇ’ lehˇ, Yuˇdaˆ tsawˇ jeuˬ tsawˇ ca deuˬ tiˬ jeuˬ tiˇ jeuˬ ehˇ tehꞈ-a.

⁶“Aˇ yamˬ kʼoeˇ yamˬ keuˆ laˇ ngeh jawˇ, Yuˇdaˆ tsawˇ jeuˬ tsawˇ ca deuˬ-ahˇ, aˇ bawˇ sahˬ kʼaˆ hawˇ-eu cehˇ myah laˇ-euˬ cehˇ yaˇ-ahˇ puiˆ-eu miˬ dzaˬ loꞈ-ehˇ bi pyeuꞈ laˇ ma. Dawˬ peh jaˆ-eu miˇ kʼahˬ dawˬ tawˆ luꞈ-ahˇ aˬ yawꞈ maꞈ laˆ cawˆ jiˇ tehꞈ-a. Yeˬluˇsaˬlehˬ tsawˇ haˬ deuˬ-aˬ, meuˬ laꞈ kʼoeˇ saˇ lehˆ ni ya jawˇ tehꞈ-a.

⁷“Daˬbiˇ-euˬ zaˬ deuˬ uˆ deuˬ hawˇ-eu, Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ Yuˇdaˆ miˇ kʼahˬ naˆ maˬ tseˆ yaw shehꞈ kʼahˬ sehˇ maˬ bi huiˬ dzehˬ-eu gʼaˇ duˬ, Yuˇdaˆ guiˇ maꞈ deuˬ aˬ cawˬ jeˬ hu guiˇ deuˆ gʼaˬ ni, Sahˬpaˬ Miˬyehˇ pyeuꞈ-eu ngaˇ jahˇ ma.

⁸Aˇ yamˬ kʼoeˇ yamˬ keuˆ laˇ ngeh, Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ Sahˬpaˬ Miˬyehˇ haw piˇ-awˇ, gʼaˬ baˬ dui dui-eu tsawˇ haˬ tiˬ gʼaˬ-ahˇ keuˆ ni, Daˬbiˇ naˆ ni gʼaˬ ahˇ tehꞈ-a. Daˬbiˇ-euˬ zaˬ deuˬ uˆ deuˬ, Sahˬpaˬ Miˬyehˇ-euˬ gʼaˬ kʼehˇ loꞈ-ehˇ maˬ ehˇ, Miˬyehˇ-euˬ mawˇ do loꞈ-ehˇ maˬ ehˇ, aˬ yawꞈ maꞈ-ahˇ sheuˬ gʼeh tehꞈ-a.

⁹Aˇ yamˬ kʼoeˇ yamˬ keuˆ laˇ ngeh, Yeˬluˇsaˬlehˬ meuˬ-ahˇ guiˇ deuˆ-eu lehˇ kʼaˇ leh jeh-eu miˇ kʼahˬ yawˬ kʼahˬ na luꞈ ngaˇ laˆ cawˆ ma.

¹⁰“Daˬbiˇ-euˬ zaˬ deuˬ uˆ deuˬ hawˇ-eu, Yeˬluˇsaˬlehˬ meuˬ-ahˇ jawˇ-eu tsawˇ haˬ nui deuˬ-ahˇ, gʼawˬ shaˬ gaˬ-eu nui ma hawˇ-eu uˬ duˬ tahˬ-eu nui ma bi ahˇ ma. Aˬ yawꞈ maꞈ neh tsawˆ sehꞈ-euˬ tsawˇ haˬ-ahˇ aˬ yawꞈ maꞈ haw-awˇ, zaˬ tiˬ gʼaˬ tehꞈ-ehˇ jawˇ-eu bi shiˇ-euˬ loꞈ-ehˇ tsawˇ ngoeˇ ngoeˇ nehˬ tehꞈ-a. Dehꞈ beh beh le-euˬ aˬ li bi shiˇ-euˬ loꞈ-ehˇ, tsawˇ ngoeˇ ngoeˇ dui dui tehꞈ-a.

¹¹Aˇ yamˬ kʼoeˇ yamˬ keuˆ laˇ ngeh, Yeˬluˇsaˬlehˬ meuˬ laꞈ kʼoeˇ tsawˇ ngoeˇ ngoeˇ-euˬ kʼoeˇ-aˬ, Meˬgiˇdoˬ deh ga-ahˇ jaˆ-eu Haˬdaˬleˬmoˬ-ahˇ[3] tsawˇ ngoeˇ ngoeˇ nehˬ-eu loꞈ-ehˇ teˇ saˇ kʼaˆ dui dui tehꞈ-a.

¹²Miˇ kʼahˬ kʼahˬ lah-ehˇ, yawˬ ha tsawˇ jeuˬ yawˬ ha, miˬ zaˬ yo zaˬ tiˬ gaˇ jawˇ-awˇ tsawˇ ngoeˇ ngoeˇ tehꞈ-a. Daˬbiˇ aˇ jeuˬ hawˇ-eu aˬ yawꞈ maꞈ-euˬ miˬ zaˬ deuˬ maˬ ehˇ, Naˬdaˬ aˇ jeuˬ hawˇ-eu aˬ yawꞈ maꞈ-euˬ miˬ zaˬ deuˬ maˬ ehˇ,

¹³Leˬbiˇ aˇ jeuˬ hawˇ-eu aˬ yawꞈ maꞈ-euˬ miˬ zaˬ deuˬ maˬ ehˇ, Shiˇmiˇ aˇ jeuˬ hawˇ-eu aˬ yawꞈ maꞈ-euˬ miˬ zaˬ deuˬ maˬ ehˇ,

¹⁴tsawˇ jeuˬ nui deuˬ hawˇ-eu aˬ yawꞈ maꞈ-euˬ miˬ zaˬ deuˬ maˬ ehˇ, tsawˇ ngoeˇ ngoeˇ tehꞈ-a.”