Read Akha Zaˬkaˬliˇ 14 Bible Online

Zaˬkaˬliˇ 14 - Akha bible

Zaˬkaˬliˇ 14

¹Sahˬpaˬ Miˬyehˇ yaˇ kʼaˬ daˇ-eu aˇ nah peh laˇ luꞈ meh. Kʼoeˇ ngeh, Yeˬluˇsaˬlehˬ meuˬ-ahˇ tahˇ joe deh-awˇ, deh za-euˬ myawˬ gahˬ deuˬ naw maꞈ mehˬ shi biˇ geuꞈ gaˇ ya mawˇ tehꞈ-a.

²Tsawˇ jeuˬ dawˬ tawˆ luꞈ-ahˇ Sahˬpaˬ Miˬyehˇ sheuˬ uiˬ laꞈ-awˇ, Yeˬluˇsaˬlehˬ meuˬ-ahˇ guiˇ bi deuˆ tehꞈ-a. Meuˬ-ahˇ guiˇ deuˆ gʼaˬ-awˇ, nymˇ laꞈ kʼoeˇ jaˆ-eu myawˬ gahˬ yuˇ geuꞈ-awˇ, zaˬ miˬ zaˬ deuˬ-ahˇ yehˬ bawˬ-ehˇ gʼeh tehꞈ-a. Tsawˇ haˬ tiˬ paˆ ehˇ gʼaˬ ni bi nyehꞈ byoˆ gʼeh-awˇ, meuˬ laꞈ kʼoeˇ tiˬ paˆ jawˇ yaꞈ tehꞈ-a.

³Kʼoeˇ naˇ, Sahˬpaˬ Miˬyehˇ doˆ-iˇ-awˇ, aˇ hu ba guiˇ deuˆ haw-euˬ loꞈ-ehˇ, tsawˇ jeuˬ kʼoeˇ deuˬ-ahˇ guiˇ deuˆ tehꞈ-a.

⁴Kʼoeˇ ngeh jawˇ, Yeˬluˇsaˬlehˬ meuˬ-euˬ nahˇ ma doˆ kʼehˬ paw jaˆ-eu Saˬloˬ gawˬ jawˬ-ahˇ aˬ yawꞈ yawꞈ tehꞈ-a. Kʼoeˇ naˇ, Saˬloˬ gawˬ jawˬ kʼoeˇ nahˇ ma doˆ kʼehˬ ga kʼehˬ-ehˇ nyiˬ paˆ paˆ-iˇ-awˇ, yaw kaˬ-ahˇ gʼaˬ lawˬ lawˬ ma jaˆ le tehꞈ-a. Gawˬ jawˬ tiˬ paˆ laꞈ taˆ paw pyawˬ-ahˇ jiˆ daˆ leˇ-awˇ, tiˬ paˆ laꞈ oˆ paw pyawˬ-ahˇ jiˆ ka-iˇ tehꞈ-a.

⁵Gawˬ jawˬ-ahˇ nyiˬ paˆ biˇ paˆ-euˬ gʼaˬ lawˬ kʼoeˇ caw caw-ehˇ, naw maꞈ cehˆ dzeuˇ nya tehꞈ-a. Aˇ hu Yuˇdaˆ miˇ kʼahˬ-ahˇ sahˬ paˬ Awˇziˇ uˆ lahˇ luꞈ ngeh miˇ luˆ luˆ laˇ-awˇ, naw maꞈ-euˬ aˬ poeˬ aˬ bawˇ deuˬ cehˆ-euˬ loꞈ-ehˇ, naw maꞈ kʼawꞈ ya cehˆ tehꞈ-a. Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, mˬ taˆ gʼaˬ kʼehˇ dawˬ tawˆ luꞈ sheuˬ-awˇ oe tehꞈ-a.

⁶Aˇ nah aˇ yamˬ kʼoeˇ keuˆ laˇ ngeh, yaw gaˆ gaˆ-awˇ ngehˇ ga-eu maˬ baw-a.

⁷Yaw zahˇ tiˬ pawꞈ-iˬ maˬ paˇ jaˆ-ehˇ, uˬ ciꞈ paw kʼawꞈ nah gʼahˇ loꞈ-ehˇ yaw shehꞈ bya tehꞈ-a. Kʼoeˇ loꞈ-ehˇ pyeuꞈ laˇ-eu aˇ yamˬ Sahˬpaˬ Miˬyehˇ tehꞈ-ehˇ siˬ nya-eu meh.

⁸Aˇ nah kʼoeˇ nah keuˆ le ngeh jawˇ, Yeˬluˇsaˬlehˬ meuˬ-ahˇ neh, dehꞈ-eu iˇ cuꞈ yoeˇ doˆ le-awˇ, nahˇ ma doˆ kʼehˬ paw pyawˬ-ahˇ jaˆ-eu iˬ ma laˆ shaˆ-ahˇ tiˬ paˆ yoeˇ ahˇ tehꞈ-a. Iˇ cuꞈ kʼoeˇ, tsahˬ gaˆ jawˇ la maˬ baw ni, aˬ myah luꞈ yoeˇ tehꞈ-a.

⁹Kʼoeˇ naˇ, miˇ tsaˬ dawˬ tawˆ luꞈ kʼoeˇ taˆ Sahˬpaˬ Miˬyehˇ sahˬ paˬ geuꞈ-awˇ uˆ lahˇ tehꞈ-a. Kʼoeˇ ngeh jawˇ, tsawˇ haˬ yawˬ gʼaˬ na luꞈ Miˬyehˇ-ahˇ tehꞈ-ehˇ uˬ duˬ tahˬ-awˇ, Miˬyehˇ-euˬ tsawˇ myahˇ tiˬ myahˇ tehꞈ-ehˇ jaˆ tehꞈ-a.

¹⁰Laꞈ taˆ paw jaˆ-eu Geˬdaˬ meuˬ-ahˇ neh, laꞈ oˆ paw jaˆ-eu Leˬmoˬ meuˬ-ahˇ keuˆ ni, miˇ kʼahˬ kʼahˬ lah ni saˇ lehˆ ni laˆ pyeuꞈ tehꞈ-a. Yeˬluˇsaˬlehˬ meuˬ-aˬ, dawˬ peh jaˆ-eu miˇ gahˬ deuˬ kʼoeˇ taˆ goˇ ca ni jaˆ tehꞈ-a. Meuˬ-euˬ jawˇ zaˇ-aˬ, Beˬyaˬmiˬ lahˇ kʼehˬ-ahˇ neh, yaw beh lahˇ kʼehˬ tiˬ kʼehˬ jaˆ-euˬ laꞈ coeˇ lahˇ kʼehˬ-ahˇ keuˆ ni hawˇ-eu, Haˬnaˬneˬlaˇ nymˇ goˇ-ahˇ neh, sahˬ paˬ-euˬ aˬ gaꞈ dzaˇ uiˇ lehˬ duˬ-ahˇ keuˆ ni jeˇ tehꞈ-a.

¹¹Meuˬ laꞈ kʼoeˇ jawˇ-eu tsawˇ haˬ deuˬ, luˬ-iˇ seˇ-iˇ-eu jeˬ-ahˇ guˆ kʼaˇ maˬ za ni, nui saˇ oꞈ-eu laꞈ kʼoeˇ ya dehꞈ tehꞈ-a.

¹²Yeˬluˇsaˬlehˬ meuˬ-ahˇ guiˇ kʼaˇ deuˆ laˇ-euˬ miˇ kʼahˬ dawˬ tawˆ luꞈ kʼoeˇ taˆ, guˆ dui dui laˇ paˬ-ehˇ gʼeh-eu naˇ gawˇ Sahˬpaˬ Miˬyehˇ bi keuˆ le tehꞈ-a. Aˬ yawꞈ maꞈ yaw dehꞈ-ehˇ jawˇ luꞈ ngeh shaˬ jiˇ buꞈ shoˆ jiˇ-awˇ, myaˆ nuiˆ hawˇ-eu mehˬ laˇ buꞈ-iˇ tehꞈ-a.

¹³Aˇ yamˬ kʼoeˇ yamˬ keuˆ laˇ ngeh, aˬ yawꞈ maꞈ maˬ noeˬ maˬ maˆ-ehˇ pyeuꞈ-iˇ ni Sahˬpaˬ Miˬyehˇ jahˇ-awˇ, aˬ yawꞈ gʼaˬ yawꞈ, yawˬ ha dawˬ peh kʼaˇ jawˇ-eu tsawˇ haˬ-ahˇ dawꞈ dawꞈ-ehˇ ceh tehꞈ-a.

¹⁴Yuˇdaˆ tsawˇ haˬ deuˬ-aˬ, Yeˬluˇsaˬlehˬ meuˬ-ahˇ loꞈ piˇ-awˇ guiˇ deuˆ tehꞈ-a. Miˇ kʼahˬ dawˬ tawˆ luꞈ-euˬ pyuˇ shuiˇ myawˬ gahˬ deuˬ aˬ yawꞈ maꞈ deuˆ za tehꞈ-a. Shuiˇ, pyuˇ hawˇ-eu, dm gʼaˬ dm lmˇ deuˬ, maˬ ehˇ jiˇ coeˇ ni za tehꞈ-a.

¹⁵Guˆ dui dui laˇ paˬ-ehˇ gʼeh-eu naˇ gawˇ deuˬ, mahˬ deuˬ, mahˬ shaˆ lawˬ deuˬ, law taw deuˬ hawˇ-eu, mahˬ tahˬ laˆ deuˬ kʼoeˇ taˆ keuˆ le tehꞈ-a. Muiˇ-eu deuˬ-euˬ sehˬ gʼawˆ laꞈ kʼoeˇ kʼaˇ jawˇ-eu jeˬ zaˬ dawˬ tawˆ luꞈ kʼoeˇ taˆ, naˇ gawˇ kʼoeˇ keuˆ le tehꞈ-a.

¹⁶Kʼoeˇ naˇ, Yeˬluˇsaˬlehˬ meuˬ-ahˇ guiˇ kʼaˇ deuˆ laˇ-euˬ miˇ kʼahˬ deuˬ laꞈ kʼoeˇ, maˬ shiˇ ni kʼaˇ dzeuˇ-iˇ-euˬ tsawˇ haˬ dawˬ tawˆ luꞈ, kʼoeˇ gaˇ le-awˇ, Baoˬ huiˬ-eu Sahˬpaˬ Miˬyehˇ pyeuꞈ-eu sahˬ paˬ-ahˇ uˬ duˬ tahˬ-awˇ, Sehˬ gʼawˆ-euˬ Bawˬ-iˬ gʼeh leˇ tehꞈ-a.

¹⁷Kʼoeˇ gaˇ maˬ le-ehˇ, Baoˬ huiˬ-eu Sahˬpaˬ Miˬyehˇ pyeuꞈ-eu sahˬ paˬ-ahˇ uˬ duˬ maˬ tahˬ leˇ-eu miˇ kʼahˬ kʼoeˇ taˆ, uˬ yehˇ maˬ yehˇ ni mˬ gʼmˇ gʼmˇ tehꞈ-a.

¹⁸Iˇjiˇtuˆ tsawˇ haˬ deuˬ Sehˬ gʼawˆ-euˬ Bawˬ-iˬ maˬ gʼeh leˇ naˇ, Bawˬ-iˬ kʼoeˇ gʼeh gaˇ maˬ kʼaˇ le-eu tsawˇ jeuˬ kʼoeˇ taˆ, Sahˬpaˬ Miˬyehˇ bi keuˆ le-eu naˇ gawˇ-ahˇ, aˬ yawꞈ maꞈ kʼawꞈ ya daˬ tehꞈ-a.

¹⁹Iˇjiˇtuˆ miˇ kʼahˬ hawˇ-eu, miˇ kʼahˬ nui deuˬ dawˬ tawˆ luꞈ, Sehˬ gʼawˆ-euˬ Bawˬ-iˬ maˬ gʼeh naˇ, kʼoeˇ loꞈ-ehˇ kʼehˬ nehˬ gaˇ ya daˬ tehꞈ-a.

²⁰Aˇ nah aˇ yamˬ kʼoeˇ yamˬ keuˆ le ngeh, mahˬ-euˬ jaˇ cuˇ-ahˇ keuˆ ni, “Sahˬpaˬ Miˬyehˇ-ahˇ a nehˬ-euˬ ma” lehˇ boꞈ myahˬ taˬ-euˬ gaˇ ya mawˇ tehꞈ-a. Uˬ duˬ tahˬ nymˇ nymˇ ma laꞈ kʼoeˇ jaˇ dzahˇ-eu oeˬ lahˬ deuˬ kʼawꞈ, lawˇ duˬ-euˬ mehˬ shi jaˆ-eu naˬ bo loꞈ-ehˇ muiˬ-eu shawˇ-eu mˇ myawˬ pyeuꞈ tehꞈ-a.

²¹Yeˬluˇsaˬlehˬ meuˬ hawˇ-eu Yuˇdaˆ miˇ kʼahˬ laꞈ kʼoeˇ kʼaˇ jaˆ-eu oeˬ lahˬ dawˬ tawˆ luꞈ, Baoˬ huiˬ-eu Sahˬpaˬ Miˬyehˇ-ahˇ uˬ duˬ tahˬ gaˇ geuꞈ-eu gʼaˇ duˬ yuˇ doˆ-awˇ bi jaˆ tehꞈ-a. Lawˇ-eu shehˇ-eu jeˬ mˇ-eu tsawˇ haˬ deuˬ, oeˬ lahˬ kʼoeˇ deuˬ yuˇ-awˇ lawˇ-euˬ shehˇ-euˬ shaˬ jiˇ caꞈ gaˇ zmˬ tehꞈ-a. Aˇ nah aˇ yamˬ kʼoeˇ keuˆ laˇ ngeh, Baoˬ huiˬ-eu Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ, jeˬ gaꞈ gaꞈ-eu tsawˇ haˬ tiˬ gʼaˬ-iˬ maˬ jawˇ ni pyeuꞈ-iˇ tehꞈ-a.