Read Akha Zaˬkaˬliˇ 3 Bible Online

Zaˬkaˬliˇ 3 - Akha bible

Zaˬkaˬliˇ 3

¹Yaw sahˇ laꞈ kʼoeˇ ya siˬ ya mawˇ-eu jeˬ laꞈ kʼoeˇ, Sahˬpaˬ Miˬyehˇ ngaˬ- ahˇ heu loꞈ-ehˇ paˇ bi mawˇ laꞈ-euˬ meh. Piˇ ma yaw huiˬ gʼaˬ pyeuꞈ-eu Yawˇshuˆ-aˬ, Sahˬpaˬ Miˬyehˇ-euˬ mˬ taˆ gʼaˬ kʼehˇ dawˬ peh yawꞈ luꞈ-awˇ, aˬ yawꞈ-euˬ dawˬ peh nehꞈ saˬdaˬ yawꞈ luꞈ-awˇ, aˬ yawꞈ-ahˇ yaˇ kʼaˬ ja-eu lehˇ gʼeh-eu meh.

²Mˬ taˆ gʼaˬ kʼehˇ kʼoeˇ gʼaˬ Saˬdaˬ-ahˇ ehˇ-eu, “Saˬdaˬ-oˇ, Sahˬpaˬ Miˬyehˇ nawˬ- ahˇ kʼehˬ luꞈ-uˇ. Yeˬluˇsaˬlehˬ meuˬ-ahˇ gaˬ-eu Sahˬpaˬ Miˬyehˇ nawˬ-ahˇ kʼehˬ luꞈ-uˇ. Tsawˇ haˬ heu gʼaˬ-aˬ, miˬ dzaˬ doꞈ luꞈ-eu tsawˬ bu-ahˇ gʼeu doˆ-euˬ miˬ dzaˬ miˬ kawˬ-ahˇ duˇ-eu meh.”

³Yawˇshuˆ-aˬ, mehˬ tsoeˬ yaw jawꞈ dm-awˇ kʼoeˇ gaˇ yawꞈ luꞈ-eu meh.

⁴“Tsawˇ haˬ heu gʼaˬ dm luꞈ-eu mehˬ tsoeˬ yaw jawꞈ lehˆ dzeh nehˬ-awˬ” lehˇ, mˬ taˆ gʼaˬ kʼehˇ kʼoeˇ gʼaˬ aˬ yawꞈ-euˬ mehˬ shi yawꞈ luꞈ-eu deuˬ- ahˇ ehˇ nehˬ-euˬ meh. Kʼoeˇ naˇ, “Nawˬ-euˬ iˬ baˇ ngaˇ yuˇ dzeh gʼaˬ-awˇ, ngaˇ nawˬ-ahˇ mehˬ tsoeˬ yaw muiˬ bi dm ma” lehˇ, Yawˇshuˆ-ahˇ aˬ yawꞈ ehˇ nehˬ-euˬ meh.

⁵Yawˇshuˆ-ahˇ uˬ dzahˬ yaw shawˇ bi dzahˬ-eu gʼaˇ duˬ, aˬ yawꞈ mehˬ shi yawꞈ luꞈ-eu kʼoeˇ deuˬ-ahˇ aˬ yawꞈ dawˬ biꞈ ngeh, aˬ yawꞈ maꞈ Yawˇshuˆ-ahˇ uˬ dzahˬ bi dzahˬ-awˇ, mehˬ tsoeˬ yaw shuiꞈ bi dm-euˬ meh. kʼoeˇ ngeh, Sahˬpaˬ Miˬyehˇ-euˬ mˬ taˆ gʼaˬ kʼehˇ kʼoeˇ gʼaˬ kʼoeˇ gaˇ yawꞈ luꞈ-eu meh.

⁶Kʼoeˇ naˇ, mˬ taˆ gʼaˬ kʼehˇ kʼoeˇ gʼaˬ Yawˇshuˆ-ahˇ heu loꞈ-ehˇ ehˇ nehˬ- euˬ meh.

⁷“Baoˬ huiˬ-eu Sahˬpaˬ Miˬyehˇ nawˬ-ahˇ heu loꞈ-ehˇ ehˇ-eu meh. Ngaˬ-euˬ zahˇ dawˬ kʼoꞈ dawˬ mehˬ nah nawˇ caw teh-awˇ, ngaˬ neh bi mˇ-euˬ gaˇ deuˬ- ahˇ nawˇ mˇ naˇ, ngaˬ-euˬ Uˬ duˬ tahˬ nymˇ nymˇ ma hawˇ-eu kʼoeˇ-euˬ lahˇ laꞈ kʼoeˇ jaˆ-eu muiˬ-eu gaˇ deuˬ-ahˇ nawˇ ya haw ya pyaˆ-awˇ, ngaˬ-euˬ mehˬ shi jawˇ-eu mˬ taˆ gʼaˬ kʼehˇ deuˬ-euˬ shaˇ dawˬ-ahˇ ngaˇ naˇ haˬ nehˬ-euˬ loꞈ-ehˇ, nawˬ-euˬ shaˇ dawˬ-ahˇ kʼawꞈ ngaˇ naˇ haˬ nehˬ ma.

⁸Piˇ ma yaw huiˬ gʼaˬ pyeuꞈ-eu Yawˇshuˆ hawˇ-eu, Yawˇshuˆ-euˬ gaˇ mˇ cawˬ pyeuꞈ-eu Yawˇshuˆ mehˬ shi nuiˇ luꞈ-eu piˇ ma deuˬ naˇ haˬ sheˇ. Naw maꞈ- aˬ, mehˬ hu paw yaw muiˬ jeˬ keuˆ le-eu gaˇ kawˆ, saˇ kiˇ pyeuꞈ-eu meh. Aˇ bawˇ uˬ pyaˬ lehˇ myahˇ-euˬ ngaˬ-euˬ zaˬ kʼaˆ, naw maꞈ-ahˇ ngaˇ mehˬ nehˬ ma.

⁹Pyawˬ ma shiꞈ pyawˬ baw-eu kʼaˬ lo tiˬ siˬ Yawˇshuˆ mehˬ shi ngaˇ bi jaˆ ma. Kʼoeˇ-euˬ kʼoeˇ taˆ ngaˇ sahˬ boꞈ toeˬ boꞈ-awˇ, tiˬ nah laꞈ kʼoeˇ tehꞈ- ehˇ miˇ kʼahˬ heu kʼahˬ-euˬ iˬ baˇ ngaˇ tsiˬ shawˇ ma.

¹⁰Aˇ nah kʼoeˇ nah keuˆ le ngeh, naw maꞈ yawˬ gʼaˬ na luꞈ, yawˬ ha dawˬ peh jawˇ-eu tsawˇ haˬ deuˬ-ahˇ, yawˬ ha-euˬ aˬ gaꞈ baw duˆ uˬ moˆ hawˇ-eu siˬ guˬ maˇ sheuˇ aˇ bawˇ uˬ moˆ kuˇ uiˬ-awˇ, nui ma saˇ lehˆ ni ya dehꞈ tehꞈ- a.”