Read Akha Zaˬkaˬliˇ 4 Bible Online

Zaˬkaˬliˇ 4 - Akha bible

Zaˬkaˬliˇ 4

¹Ngaˬ-ahˇ dawˬ ngehˬ cawˬ le-euˬ mˬ taˆ gʼaˬ kʼehˇ kʼoeˇ gʼaˬ tiˬ poˆ paˇ oe-awˇ, yuꞈ kʼaˆ luꞈ-eu tsawˇ haˬ-ahˇ laˆ noeˬ-eu loꞈ-ehˇ, ngaˬ-ahˇ laˆ noeˬ le-eu meh.

²“Nawˇ aˬ jeˬ mawˇ teˬ” lehˇ aˬ yawꞈ ngaˬ-ahˇ naˇ haˬ laˇ ngeh, ngaˇ heu loꞈ-ehˇ ehˇ kʼoꞈ nehˬ-euˬ ma. “Shuiˇ neh jahˇ taˬ-euˬ tsiˇ kʼmˬ doꞈ taˬ duˬ mawˇ-euˬ ma. Tsiˇ kʼmˬ doꞈ taˬ duˬ kʼoeˇ hmˬ-euˬ uˬ du, tsiˇ shehˆ ahˇ duˬ naˬ bo jaˆ-awˇ, tsiˇ kʼmˬ shiꞈ kʼmˬ dahˇ-eu meh. Tsiˇ kʼmˬ aˬ yawꞈ kʼmˬ yawꞈ, tsiˇ diꞈ shiꞈ hmˬ tsoꞈ kʼaˇ za-eu meh.

³Tsiˇ kʼmˬ doꞈ taˬ duˬ kʼoeˇ hmˬ-euˬ dawˬ peh, saˬ loˬ aˇ bawˇ nyiˬ bawˇ kʼoeˇ paˆ heu paˆ-ehˇ bawˇ-eu mawˇ-euˬ ma.”

⁴Kʼoeˇ naˇ, “ Ngaˬ neh ya mawˇ-euˬ gaˇ kawˆ heu deuˬ, dawˬ tsuiꞈ aˬ jeˬ-a” lehˇ, mˬ taˆ gʼaˬ kʼehˇ kʼoeˇ gʼaˬ-ahˇ ngaˇ naˇ haˬ-euˬ ma.

⁵“ Gaˇ kawˆ heu dawˬ tsuiꞈ nawˇ maˬ siˬ nya te loˇ” lehˇ, aˬ yawꞈ ngaˬ-ahˇ naˇ haˬ laˇ ngeh, “Maˬ siˬ nya nya” lehˇ, ngaˇ ehˇ kʼoꞈ nehˬ-eu ma.

¹⁰Mˬ taˆ gʼaˬ kʼehˇ kʼoeˇ gʼaˬ ngaˬ-ahˇ heu loꞈ-ehˇ ehˇ-eu meh. “Tsiˇ kʼmˬ heu shiꞈ kʼmˬ-aˬ, miˇ tsaˬ dawˬ tawˆ luꞈ-ahˇ mawˇ jiˇ nya-eu Sahˬ paˬ Miˬyehˇ-euˬ myaˆ nuiˆ shiꞈ nuiˆ meh.”

¹¹Kʼoeˇ naˇ, aˬ yawꞈ-ahˇ ngaˇ heu loꞈ-ehˇ naˇ haˬ-euˬ ma. “Tsiˇ kʼmˬ doꞈ taˬ duˬ-euˬ gaˇ dzeˇ, kʼoeˇ paˆ heu paˆ-ehˇ jaˆ-eu saˬ loˬ aˬ bawˇ kʼoeˇ nyiˬ bawˇ aˬ jeˬ-ahˇ ehˇ mawꞈ ta.

¹²Saˬ loˬ tsiˇ shehˆ ahˇ duˬ shuiˇ bawˬ law kʼoeˇ nyiˬ law dawˬ peh jaˆ-eu saˬ loˬ uˬ pyaˬ kʼoeˇ nyiˬ pyaˬ aˬ jeˬ-ahˇ ehˇ mawꞈ ta.”

¹³“Gaˇ kawˆ heu-euˬ dawˬ tsuiꞈ nawˇ maˬ siˬ nya te loˇ” lehˇ aˬ yawꞈ ngaˬ-ahˇ naˇ haˬ laˇ ngeh, “Maˬ siˬ nya nya” lehˇ ehˇ kʼoꞈ nehˬ-euˬ ma.

¹⁴“Kʼoeˇ-aˬ, miˇ tsaˬ dawˬ tawˆ luꞈ-ahˇ uˆ lahˇ-eu Sahˬpaˬ Miˬyehˇ-euˬ gaˇ bi mˇ-eu gʼaˇ duˬ, Miˬyehˇ neh tsiˇ lehꞈ-awˇ tseˇ doˆ taˬ-eu tsawˇ haˬ nyiˬ gʼaˬ-ahˇ ehˇ mawꞈ-eu meh” lehˇ, aˬ yawꞈ ehˇ-eu meh. Kʼoeˇ naˇ, aˬ yawꞈ ehˇ-eu, “Heu-aˬ, Zeˬluˇbaˬbeˬlaˇ-ahˇ Sahˬpaˬ Miˬyehˇ neh ehˇ nehˬ-eu dawˬ pyeuꞈ-awˇ, ‘Baoˬ hawˇ-eu gʼaˬ neh gʼaˬ leˇ nya-eu maˬ ngeuˇ-a. Ngaˬ-euˬ yaw sahˇ baˬ da neh tehꞈ-ehˇ gʼaˬ leˇ nya-eu meh’ lehˇ ehˇ-eu meh. Nawˬ-euˬ mehˬ shi gawˬ jawˬ jawˬ ma kaˬ luꞈ kʼawꞈ, byoˆ-iˇ jiˇ tehꞈ-a. Uˬ duˬ tahˬ nymˇ nymˇ ma nawˇ paˇ tsoˆ gʼaˬ nya-awˇ, aˇ saˬ saˬ-eu kʼaˬ lo kʼoeˇ siˬ ciˬ daˆ-awˇ gawˬ ngeh, miˇ kʼahˬ zaˬ deuˬ ‘ Guiˬ lahˬ huiˬ dui dui ngaˇ. Guiˬ lahˬ huiˬ dui dui ngaˇ’ lehˇ guˇ tehꞈ-a.” Sahˬpaˬ Miˬyehˇ-euˬ dawˬ, ngaˇ jawˇ gaˇ heu loꞈ-ehˇ paˇ keuˆ le-euˬ meh. “Zeˬluˇbaˬbeˬlaˇ Uˬ duˬ tahˬ nymˇ nymˇ ma gawˬ-eu aˇ dahˬ beh-euˬ meh. Aˇ saˬ saˬ ngeh keuˆ ni aˬ yawꞈ mˇ pyeuꞈ nya tehꞈ-a. Kʼoeˇ loꞈ-ehˇ gawˬ gʼaˬ ngeh, ngaˬ neh nawˬ-ahˇ pyehˬ gʼeh leꞈ-euˬ nga lehˇ, miˇ kʼahˬ zaˬ deuˬ siˬ duˬ tehˬ-a. G(...)