Read Akha Zaˬkaˬliˇ 5 Bible Online

Zaˬkaˬliˇ 5 - Akha bible

Zaˬkaˬliˇ 5

¹Ngaˇ tiˬ paw paˇ haw gʼeh ngeh, zaw luꞈ-eu sahˬ boꞈ paˇ yoˆ tiˬ yoˆ mawˇ-euˬ ma.

²“Nawˇ aˬ jeˬ mawˇ teˬ” lehˇ, mˬ taˆ gʼaˬ kʼehˇ kʼoeˇ gʼaˬ naˇ haˬ laˇ ngeh, “Yaw mahˇ paw nyiˬ tseˇ caˆ byah-awˇ, yaw jeˇ paw tseˇ caˆ byah-eu sahˬ boꞈ paˇ yoˆ tiˬ yoˆ zaw luꞈ gaˇ mawˇ-euˬ ma” lehˇ ngaˇ ehˇ kʼoꞈ nehˬ-euˬ ma.

³Kʼoeˇ naˇ, aˬ yawꞈ heu loꞈ-ehˇ ehˇ-eu meh. “Miˇ tsaˬ tahˬ kʼawˇ doe ni yaˬ kʼehˇ yaˬ taˬ-euˬ dawˬ deuˬ, sahˬ boꞈ paˇ yoˆ kʼoeˇ yoˆ laꞈ kʼoeˇ boꞈ ahˇ taˬ-euˬ meh. Smˇ kʼoeˬ yawˬ gʼaˬ na luꞈ paˬ tseuˆ tseuˆ dzeh gaˇ ya daˬ-eu gaˇ kawˆ tiˬ paw paˆ boꞈ taˬ-awˇ, jaˬ myawꞈ myawꞈ-awˇ kamˬ-eu tsawˇ haˬ yawˬ gʼaˬ na luꞈ kʼawꞈ, paˬ tseuˆ tseuˆ dzeh gaˇ ya daˬ-eu gaˇ kawˆ tiˬ paw paˆ boꞈ taˬ-euˬ meh.

⁴Baoˬ huiˬ-eu Sahˬpaˬ Miˬyehˇ neh yaˬ kʼehˇ yaˬ-euˬ heu pyehˬ kʼawˬ gʼeh-awˇ, smˇ kʼoeˬ yawˬ gʼaˬ na luꞈ-euˬ nymˇ hawˇ-eu, jaˬ myawꞈ myawꞈ-awˇ kamˬ-eu tsawˇ haˬ yawˬ gʼaˬ na luꞈ-euˬ nymˇ-ahˇ uˇ keuˆ-iˇ-eu uˬ taꞈ, nymˇ kʼoeˇ deuˬ-euˬ laꞈ kʼoeˇ jawˇ-awˇ, luˬ-iˇ seˇ-iˇ-eu jeˬ bi keuˆ le tehꞈ-a lehˇ, Sahˬpaˬ Miˬyehˇ ehˇ-eu meh.”

⁵Mˬ taˆ gʼaˬ kʼehˇ kʼoeˇ gʼaˬ mehˬ hu paw paˇ doˆ le-awˇ, “Aˬ jeˬ oe luꞈ nga lehˇ haw sheˇ” lehˇ, ngaˬ-ahˇ ehˇ-eu meh.

⁶“Aˬ jeˬ-a” lehˇ ngaˇ naˇ haˬ ngeh, “Pawˬ tuˇ meh. Pawˬ tuˇ heu siˬ-aˬ, miˇ kʼahˬ kʼahˬ lah ni-euˬ iˬ baˇ dah zaˇ meh” lehˇ ehˇ-eu meh.

⁷Pawˬ tuˇ kʼoeˇ siˬ-aˬ, za siˬ neh jahˇ-euˬ kʼawˬ pymˬ tsoꞈ-eu meh. Ngaˇ haw haw-ehˇ jawˇ ngeh, kʼawˬ pymˬ kʼoeˇ pah laˇ-awˇ, laꞈ kʼoeˇ paw zaˬ miˬ zaˬ tiˬ gʼaˬ nuiˇ luꞈ-eu meh.

⁸“Zaˬ miˬ zaˬ heu gʼaˬ-aˬ, maˬ sui maˬ dawˇ-eu jeˬ pyeuꞈ-eu meh” lehˇ, mˬ taˆ gʼaˬ kʼehˇ kʼoeˇ gʼaˬ ehˇ-awˇ, pawˬ tuˇ laꞈ kʼoeˇ paˇ dehˬ ahˇ kʼoꞈ nehˬ-awˇ, kʼawˬ pymˬ pymˬ tehˬ-euˬ meh.

⁹Ngaˇ paˇ haw daˆ leꞈ ngeh, hahˬ byaꞈ-euˬ aˬ dahˇ loꞈ-ehˇ gʼaˬ kʼaˆ dui dui-eu aˬ dahˇ tsoꞈ-eu zaˬ miˬ zaˬ nyiˬ gʼaˬ, ngaˇ jawˇ paw zaw ka leꞈ gaˇ ya mawˇ-euˬ ma. Aˬ yawꞈ nyaꞈ pawˬ tuˇ kʼoeˇ siˬ tsi-awˇ paˇ zaw daˆ kʼoꞈ leꞈ-euˬ meh.

¹⁰“Aˬ geu paw tsi gʼeh-eu lehˇ gʼeh ta” lehˇ, mˬ taˆ gʼaˬ kʼehˇ kʼoeˇ gʼaˬ-ahˇ ngaˇ naˇ haˬ-euˬ ma.

¹¹Mˬ taˆ gʼaˬ kʼehˇ kʼoeˇ gʼaˬ ehˇ-eu, “Baˬbuˇloˬ miˇ kʼahˬ-ahˇ tsi gʼeh-awˇ, pawˬ tuˇ kʼoeˇ siˬ gʼaˇ duˬ, kʼoeˇ gaˇ uˬ duˬ tahˬ nymˇ tiˬ nymˇ tsoˆ-eu lehˇ gʼeh-eu meh. Uˬ duˬ tahˬ nymˇ kʼoeˇ nymˇ tsoˆ gʼaˬ naˇ, pawˬ tuˇ kʼoeˇ siˬ kʼoeˇ gaˇ bi jaˆ-awˇ, uˬ duˬ tahˬ tehꞈ-a.”