Read Akha Zaˬkaˬliˇ 7 Bible Online

Zaˬkaˬliˇ 7 - Akha bible

Zaˬkaˬliˇ 7

¹Sahˬ paˬ Daˬliˇ uˆ lahˇ-eu oeˬ kʼoꞈ tiˬ kʼoꞈ ba la gʼoeˬ siˬ tiˬ siˬ pyeuꞈ-eu Kiˇsaˬlehˆ ba la oeˬ nah-ahˇ Sahˬpaˬ Miˬyehˇ-euˬ dawˬ ngaˇ jawˇ gaˇ keuˆ le-euˬ meh.

²Beˬdaˬlaˇ meuˬ-ahˇ jawˇ-eu tsawˇ haˬ deuˬ, Sahˬleˬzaˬ hawˇ-eu Leˬgmˬmeˬlehˆ aˬ nyaꞈ hawˇ-eu aˬ yawꞈ maꞈ-euˬ tsawˇ haˬ deuˬ pyehˬ gʼeh laꞈ-awˇ, Sahˬpaˬ Miˬyehˇ guiˬ lahˬ biꞈ laꞈ ni, Uˬ duˬ tahˬ nymˇ nymˇ ma laꞈ kʼoeˇ guiˬ lahˬ bi shaˇ laˇ-awˇ,

³piˇ ma deuˬ hawˇ-eu Miˬyehˇ gʼaˇ duˬ ngehˬ dah-eu deuˬ-ahˇ heu loꞈ-ehˇ bi naˇ haˬ laˇ-euˬ meh. “Dzeuˇ laˇ ngeh nga maꞈ neh gʼawˬ mya kʼoꞈ gʼawˬ mya la mˇ dzeuˇ yaꞈ-euˬ loꞈ-ehˇ, Uˬ duˬ tahˬ nymˇ nymˇ ma cawˆ-iˇ-euˬ gaˇ noeˬ keuˆ -awˇ, ba la ngaˬ siˬ tiˬ siˬ-ahˇ maˬ dzaˬ-eu zahˇ jahˇ-awˇ tsawˇ ngoeˇ ngoeˇ-eu jeˬ paˇ mˇ daˆ leꞈ-awˬ loˇ.”

⁴Ngaˇ jawˇ gaˇ keuˆ le-euˬ Sahˬpaˬ Miˬyehˇ-euˬ dawˬ-aˬ, heu loꞈ-ehˇ meh.

⁵“Miˇ kʼahˬ zaˬ deuˬ hawˇ-eu piˇ ma deuˬ-ahˇ heu loꞈ-ehˇ ehˇ nehˬ-awˬ. Dzeuˇ laˇ-euˬ heu shiꞈ tseˇ kʼoꞈ aˇ yamˬ laꞈ kʼoeˇ, ba la ngaˬ siˬ tiˬ siˬ hawˇ-eu shiꞈ siˬ tiˬ siˬ-ahˇ, maˬ dzaˬ-eu zahˇ jahˇ-awˇ tsawˇ ngoeˇ ngoeˇ-euˬ-aˬ, ngaˬ-ahˇ taˬ huiˬ-euˬ jeˬ maˬ ngeuˇ-a.

⁶Kʼoeˇ uˬ taꞈ, aˬ yawꞈ maꞈ paˇ dzaˬ paˇ dawˇ ngeh kʼawꞈ, aˬ yawꞈ maꞈ-ahˇ tmˬ leˇ-eu gʼaˇ duˬ tehꞈ meh.”

⁷Dawˬ heu dawˬ-aˬ, Yeˬluˇsaˬlehˬ meuˬ dehꞈ dzaˬ dui dui-awˇ tsawˇ haˬ behˇ dui dui ngeh yamˬ-ahˇ, Miˬyehˇ gʼaˇ duˬ ngehˬ dah-euˬ deuˬ-ahˇ gʼoeˇ-awˇ, Sahˬpaˬ Miˬyehˇ neh ehˇ dzeuˇ yaꞈ-euˬ dawˬ meh. Kʼoeˇ ngeh yamˬ-ahˇ, meuˬ meuˬ ma dawˬ peh jaˆ-eu meuˬ deuˬ laꞈ kʼoeˇ tehꞈ-ehˇ maˬ ngeuˇ ni, miˇ kʼahˬ laꞈ oˆ dzaˬ hawˇ-eu nahˇ ma ga kʼehˬ paw gawˬ jawˬ dawˬ dahˬ-ahˇ keuˆ ni tsawˇ haˬ jawˇ byah jiˇ-euˬ meh.

⁸Sahˬpaˬ Miˬyehˇ-euˬ dawˬ, Zaˬkaˬliˇ jawˇ gaˇ heu loꞈ-ehˇ keuˆ le-euˬ meh.

⁹“Aˇ hu ba ngaˬ-euˬ tsawˇ haˬ deuˬ-ahˇ ngaˇ heu loꞈ-ehˇ dawˬ biꞈ-euˬ ma. ‘Yaw tsaˬ yaw dawˇ jeˬ-ahˇ naw maꞈ tuˆ tehˬ taˬ-awˇ, aˬ cawˬ-ahˇ gʼawˬ shaˬ gaˬ-eu nui ma ya ahˇ meh.

¹⁰Miˬ coeˬ miˬ ma deuˬ, muˇ coe aˬ nmˇ deuˬ, naw maꞈ nehˬ-ehˇ jawˇ luꞈ-eu aˬ cawˬ tsawˇ jeuˬ deuˬ hawˇ-eu, shaˬ-eu zahˬ-eu tsawˇ haˬ deuˬ-ahˇ taˬ kʼehˬ taˬ kʼaˆ nehˬ. Tiˬ gʼaˬ tiˇ gʼaˬ laˆ coeˬ laˆ ciˆ-eu jeˬ taˬ mˇ’ lehˇ dawˬ biꞈ-euˬ ma.

¹¹“Ehˇ kʼawꞈ, ngaˬ-euˬ tsawˇ haˬ deuˬ nui ma gʼahˇ-awˇ, maˬ naˇ haˬ geuꞈ-ehˇ, naˬ bawˇ dehˬ tsoeˬ taˬ-euˬ meh.

¹²Aˬ yawꞈ maꞈ-euˬ nui ma kʼaˬ lo loꞈ-ehˇ gʼahˇ-awˇ, aˇ hu ba dehꞈ dzeuˇ yaꞈ-euˬ Miˬyehˇ gʼaˇ duˬ ngehˬ dah-euˬ deuˬ-ahˇ gʼoe-awˇ ngaˬ neh aˬ yawꞈ maꞈ-ahˇ mehˬ nehˬ tsoˆ nehˬ-euˬ dawˬ deuˬ-ahˇ aˬ yawꞈ maꞈ maˬ naˇ haˬ geuꞈ-euˬ miˇ neh, ngaˇ nui ma pehˇ-euˬ ma.

¹³Ngaˬ neh ehˇ-euˬ dawˬ-ahˇ aˬ yawꞈ maꞈ maˬ naˇ haˬ-euˬ miˇ neh, aˬ yawꞈ maꞈ-euˬ guiˬ lahˬ shaˇ dawˬ-ahˇ ngaˇ maˬ naˇ haˬ.

¹⁴Jaˬ lehˇ lehˇ ma baw-eu loꞈ-ehˇ, aˬ yawꞈ maꞈ-ahˇ aˬ cawˬ miˇ kʼahˬ doe ni baw dzeh gʼeh-awˇ bi jawˇ byaˆ jiˇ-awˇ, muiˬ-eu miˇ kʼahˬ heu kʼahˬ laꞈ kʼoeˇ tsawˇ haˬ tiˬ gʼaˬ-iˬ maˬ dzeˇ ni bi pyeuꞈ-iˇ-euˬ ma.”