Read Akha Maꞈtehˬ 10 Bible Online

Maꞈtehˬ 10 - Akha bible

Maꞈtehˬ 10

¹Kʼoeˇ naˇ, Yeˬsuˇ-aˬ, aˬ yawꞈ-euˬ zaˬ lahˇ tseˇ nyiꞈ gʼaˬ-ahˇ kuˇ uiˬ-awˇ, nehꞈ yaw jawꞈ deuˬ-ahˇ teh doˆ-eu baoˬ hawˇ-eu, naˇ gawˇ yawˬ jeˬ na luꞈ-ahˇ laˆ taˬ nya-eu baoˬ biꞈ nehˬ-euˬ meh.

²Gʼaˬ kʼehˇ tseˇ nyiꞈ gʼaˬ-euˬ tsawˇ myahˇ-aˬ, heu loꞈ-ehˇ meh. Beˬtuˆluˆ lehˇ kuˇ-eu Siˇmoˬ hawˇ-eu Aˬdehˬlehˬ aˬ nyaꞈ mehˇ nmˇ, Zeˬbeˬdehˇ-euˬ aˬ li Yaˬkoˆ hawˇ-eu Yoˇhaˬ aˬ nyaꞈ mehˇ nmˇ,

³Piˇluˇpuˆ hawˇ-eu Baˬtawˇlaˬmehˇ, Toˇmaˆ hawˇ-eu kawˬ taꞈ-eu tsawˇ haˬ pyeuꞈ-eu Maꞈtehˬ, Aˬlaˬpehˇ-euˬ aˬ li Yaˬkoˆ hawˇ-eu Taˬdehˇ,

⁴Kaˬnaˬniˇ aˇ muˇ[14] -ahˇ taꞈ-eu Siˇmoˬ hawˇ-eu, aˇ nah Yeˬsuˇ-ahˇ ahˬ dzaˬ-euˬ gʼaˬ pyeuꞈ-eu YuˇdaˆIˇsaˬgaˬliˬoˆ heu deuˬ meh.

⁵Gʼaˬ kʼehˇ tseˇ nyiꞈ gʼaˬ-ahˇ Yeˬsuˇ heu loꞈ-ehˇ dawˬ biꞈ-awˇ kʼehˇ gʼeh-euˬ meh. “Yuˇdaˆ tsawˇ jeuˬ maˬ ngeuˇ-eu aˬ cawˬ tsawˇ jeuˬ deuˬ jawˇ gaˇ naw maꞈ taˬ iˇ. Saˬmaˬliˆ tsawˇ haˬ-euˬ meuˬ deuˬ-ahˇ kʼawꞈ taˬ iˇ.

⁶Iˇsaˬleˬlaˆ tsawˇ jeuˬ laꞈ kʼoeˇ, byoˆ-iˇ taˬ-euˬ yawˇ deuˬ-ahˇ duˇ-eu deuˬ jawˇ gaˇ naw maꞈ iˇ-awˬ.

⁷Miˬyehˇ Miˇkʼahˬ keuˆ le shaw-iˬ-eu gaˇ kawˆ dawˬ mehˬ mehˬ-iˇ-awˬ.

⁸Naˇ-eu tsawˇ haˬ deuˬ-ahˇ laˆ taˬ nehˬ-awˇ, shiˇ-euˬ tsawˇ haˬ deuˬ-ahˇ laˆ dehꞈ nehˬ-awˬ. Coiˬ doi naˇ-eu tsawˇ haˬ deuˬ-ahˇ bi shawˇ laˇ-awˇ[15] , nehꞈ uˇ-eu tsawˇ haˬ deuˬ-ahˇ nehꞈ teh doˆ nehˬ-awˬ. Kʼoeˇ loꞈ-ehˇ mˇ nya-eu baoˬ naw maꞈ aˇ poeˬ maˬ biꞈ ni za-euˬ loꞈ-ehˇ, aˇ poeˬ maˬ yuˇ ni yawꞈ ngehꞈ-ehˇ caw ba nehˬ-awˬ.

⁹Shuiˇ maˇ byaˆ, pyuˇ maˇ byaˆ, guiˬ shuiˇ maˇ byaˆ deuˬ, naw maꞈ-euˬ joꞈ paꞈ-ahˇ dawˆ ahˇ-awˇ yuˇ gʼeh-eu maˬ loˬ-a.

¹⁰Pehˇ tahˬ maˬ ehˇ, pehˇ kʼahˬ hawˇ-eu sehˬ nawˆ aˇ dzehˬ maˬ ehˇ, gawˬ yoeˬ maˬ ehˇ, yuˇ gʼeh-eu maˬ loˬ-a. Aˬ jeˬ miˇ neh ehˇ naˇ, gaˇ mˇ-eu tsawˇ haˬ-aˬ, yawˬ ha kʼaˇ loˬ-eu jeˬ za geuˇ-eu meh.

¹¹“Naw maꞈ meuˬ tiˬ meuˬ na-ahˇ iˇ keuˆ ngeh maˬ ehˇ, pu tiˬ pu na-ahˇ iˇ keuˆ ngeh maˬ ehˇ, naw maꞈ-ahˇ ha geuꞈ mawꞈ-eu tsawˇ haˬ poˆ mawˇ-awˇ, kʼoeˇ gaˇ kʼaˇ jawˇ kʼoeˇ keuˆ ni, tsawˇ haˬ kʼoeˇ gʼaˬ-euˬ nymˇ-ahˇ jawˇ-awˬ.

¹²Nymˇ tiˬ nymˇ-ahˇ naw maꞈ uˇ leˇ ngeh, ‘Nui saˇ oꞈ luꞈ-uˇ’ lehˇ dawˬ cawˬ puˬ nehˬ-awˬ.

¹³Nymˇ kʼoeˇ nymˇ laꞈ kʼoeˇ jawˇ-eu nymˇ kʼahˬ zaˬ deuˬ naw maꞈ-ahˇ ha geuꞈ nehˬ laꞈ naˇ, naw maꞈ neh dawˬ cawˬ puˬ nehˬ-euˬ nui saˇ oꞈ-eu jeˬ, kʼoeˇ gaˇ jaˆ yaꞈ luꞈ-uˇ. Ehˇ kʼawꞈ, aˬ yawꞈ maꞈ naw maꞈ-ahˇ maˬ ha geuꞈ nehˬ laꞈ naˇ, naw maꞈ neh dawˬ cawˬ puˬ nehˬ-euˬ nui saˇ oꞈ-eu jeˬ, naw maꞈ-ahˇ paˇ gʼoꞈ kʼoꞈ le luꞈ-uˇ.

¹⁴Nymˇ kʼoeˇ nymˇ-euˬ nymˇ kʼahˬ zaˬ deuˬ maˬ ehˇ, meuˬ kʼoeˇ meuˬ-ahˇ jawˇ-eu tsawˇ haˬ deuˬ maˬ ehˇ, tiˬ gʼaˬ-iˬ naw maꞈ-ahˇ maˬ ha geuꞈ nehˬ laꞈ-ehˇ, naw maꞈ dawˬ mehˬ mehˬ gaˇ maˬ naˇ haˬ nehˬ laꞈ naˇ, kʼoeˇ gaˇ neh doˆ-iˇ ngeh, aˬ kuiˇ pehˬ zaˬ-ahˇ lehꞈ-eu kʼaˬ lehˇ sawˆ kʼaˇ nehˬ yaꞈ-awˬ.[16]

¹⁵Ngaˇ naw maꞈ-ahˇ maˇ jawˆ ni ehˇ nehˬ nyaˇ. Yaˇ kʼaˬ daˇ-eu aˇ nah keuˆ le ngeh, Sawˇdoˬ meuˬ hawˇ-eu Gawˇmawˇlaˆ meuˬ[17] -ahˇ kʼehˬ nehˬ-euˬ naˆ maˬ tseˇ, meuˬ kʼoeˇ meuˬ-ahˇ Miˬyehˇ kʼehˬ nehˬ tehꞈ-a.”

¹⁶“Naˇ haˬ sheˇ. Kʼaˬ yehˇ yehˇ maꞈ jawˇ gaˇ yawˇ-ahˇ pyehˬ uˇ gʼeh-eu loꞈ-ehˇ, naw maꞈ-ahˇ ngaˇ pyehˬ gʼeh-eu ma. Aˇ lawˇ loꞈ-ehˇ yaw gahˇ gahˇ-ehˇ dehꞈ-awˇ, kʼaˬ kʼoeˬ loꞈ-ehˇ aˬ cawˬ-ahˇ maˬ coeˬ maˬ ciˆ ni yahˇ yahˇ-ehˇ jawˇ-awˬ.

¹⁷Yaw kʼaˆ kʼaˆ-ehˇ yahˇ-awˬ. Aˬ jeˬ miˇ neh ehˇ naˇ, naw maꞈ-ahˇ paꞈ-awˇ, yaˇ kʼaˬ daˇ-eu nymˇ-ahˇ tsahˇ gʼeh-eu tsawˇ haˬ jawˇ tehꞈ-a. Yuˇdaˆ tsawˇ haˬ-euˬ uˬ duˬ tahˬ nymˇ laꞈ kʼoeˇ, naw maꞈ-ahˇ aˬ yawꞈ maꞈ yahˬ caˆ neh juiꞈ tehꞈ-a.

¹⁸Naw maꞈ ngaˬ-euˬ mehˬ nah caw teh-eu baˬ da neh, aˬ cawˬ naw maꞈ-ahˇ paꞈ-awˇ, uˆ lahˇ-eu sahˬ paˬ sahˬ ma deuˬ jawˇ gaˇ gʼeu gʼeh tehꞈ-a. Kʼoeˇ loꞈ-ehˇ pyeuꞈ laˇ-eu laꞈ kʼoeˇ, sahˬ paˬ sahˬ ma kʼoeˇ deuˬ hawˇ-eu, Yuˇdaˆ tsawˇ haˬ maˬ ngeuˇ-eu deuˬ-ahˇ naw maꞈ laˬ kʼaˬ cehˇ-eu guiˬ lahˬ dawˬ ya mehˬ tehꞈ-a.

¹⁹Aˬ cawˬ naw maꞈ-ahˇ yaˇ kʼaˬ bi daˇ-eu lehˇ a nehˬ ngeh, naw maꞈ dawˬ aˬ geu dawˬ ya ngehˬ-awˇ, aˬ joˆ-ehˇ ya ehˇ nehˬ-eu gaˇ kawˆ kʼahˬ taˬ lahˇ. Aˇ yamˬ tsaˬ laˇ ngeh, naw maꞈ ya ngehˬ-eu dawˬ deuˬ, naw maꞈ-ahˇ biꞈ nehˬ laꞈ tehꞈ-a.

²⁰Aˬ jeˬ miˇ neh ehˇ naˇ, naw maꞈ ya ngehˬ ya tmˇ-eu dawˬ deuˬ-aˬ, naw maꞈ-euˬ dawˬ maˬ ngeuˇ-a. Naw maꞈ-euˬ Aˬda neh kʼehˇ gʼeh leꞈ-euˬ Yaw sahˇ Miˬyehˇ naw maꞈ laꞈ kʼoeˇ jawˇ-awˇ ngehˬ-eu dawˬ pyeuꞈ-eu meh.

²¹“Mehˇ nmˇ yaw kaˬ tiˬ gʼaˬ tiˇ gʼaˬ bi shiˇ ni ahˬ dzaˬ-awˇ, aˬ da deuˬ kʼawꞈ zaˬ deuˬ-ahˇ kʼoeˇ loꞈ-ehˇ jahˇ nehˬ-eu jeˬ keuˆ le tehꞈ-a. Zaˬ deuˬ yawˬ ha-euˬ aˬ da aˬ ma bi shiˇ-eu jeˬ toˆ tehꞈ-a.

²²Naw maꞈ ngaˬ-ahˇ gʼoe-eu baˬ da neh, tsawˇ haˬ dawˬ tawˆ luꞈ naw maꞈ-ahˇ muiˇ tehꞈ-a. Ehˇ kʼawꞈ, aˇ saˬ saˬ ngeh keuˆ ni ziꞈ-eu tsawˇ haˬ-aˬ, ka kʼoꞈ-eu jeˬ za tehꞈ-a.

²³Meuˬ tiˬ meuˬ laꞈ kʼoeˇ, aˬ caw naw maꞈ-ahˇ kʼehˬ laˇ naˇ, yawˬ meuˬ yawˬ-ahˇ cehˆ-awˬ. Iˇsaˬleˬlaˆ miˇ kʼahˬ laꞈ kʼoeˇ jaˆ-eu meuˬ yawˬ meuˬ na luꞈ-ahˇ naw maꞈ gaˇ maˬ mˇ jiˇ mi naˆ-ehˇ, Tsawˇhaˬ-euˬ Zaˬmaˇ oe keuˆ tehꞈ-a lehˇ, ngaˇ naw maꞈ-ahˇ maˇ jawˆ ni ehˇ-eu ma.

²⁴“Mehˬ-eu saˬ laˬ naˆ maˬ tseˇ huiˬ dzehˬ-eu gʼaˬ zaˬ gʼaˬ kʼehˇ maˬ jawˇ-a. Baw leˬ naˆ maˬ tseˇ huiˬ dzehˬ-eu zaˬ kʼaˆ kʼawꞈ maˬ jawˇ-a.

²⁵Kʼoeˇ miˇ neh, gʼaˬ kʼehˇ gʼaˬ yawˬ ha-euˬ saˬ laˬ hui ni huiˬ keuˆ leˇ nya naˇ, nui kʼahˇ shiˇ-eu tsaˬ-awˇ, zaˬ kʼaˆ gʼaˬ yawˬ ha-euˬ baw leˬ hui ni huiˬ keuˆ leˇ nya naˇ, nui kʼahˇ shiˇ-eu tsaˬ tehꞈ-a. Nymˇ sahˇ aˬ da gʼaˬ-ahˇ Beˬlaˇzeˬbuˇlaˆ[18] lehˇ kuˇ naˇ, nymˇ kʼahˬ zaˬ deuˬ-ahˇ kʼoeˇ naˆ maˬ tseˇ doeˇ-eu tsawˇ myahˇ kuˇ-eu tsaˬ tehꞈ-a.

²⁶“Kʼoeˇ miˇ neh, tsawˇ haˬ kʼoeˇ deuˬ-ahˇ taˬ guˆ. Nymˬ-mˇ kʼaˇ dehˬ kaˬ taˬ-euˬ yawˬ jeˬ na luꞈ pah dzeh-awˇ, kʼaˇ zaꞈ taˬ-euˬ yawˬ jeˬ na luꞈ siˬ duˬ laˇ tehꞈ-a.

²⁷Ngaˬ neh naw maꞈ-ahˇ zahˇ tsui ni gʼeh gaˇ ehˇ nehˬ-euˬ dawˬ heu deuˬ, nah gʼahˇ paw bya cehˆ ni gʼeh gaˇ naw maꞈ paˇ ya ehˇ poˆ-awˇ, ngaˬ neh naw maꞈ-ahˇ kʼoeˬ saˆ nehˬ-euˬ dawˬ heu deuˬ, naw maꞈ nymˇ mˬ kʼoeˇ taˆ daˆ leˇ-awˇ ya guˇ gaˬ tehꞈ-a.

²⁸Gʼawˇ mawˇ-ahˇ sehꞈ nya kʼawꞈ, saꞈ laˇ-ahˇ maˬ sehꞈ nya-eu tsawˇ haˬ-ahˇ taˬ guˆ. Ehˇ kʼawꞈ, gʼawˇ mawˇ hawˇ-eu saꞈ laˇ heu nyiˬ jeˬ luꞈ-ahˇ, shiˬ buiˇ lah ma laꞈ kʼoeˇ laˆ cawˆ nya-eu gʼaˬ pyeuꞈ-eu Miˬyehˇ-ahˇ guˆ-awˬ.

²⁹Jaˆ tseuˆ nyiˬ mawˇ-euˬ pehˆ saˬ tiˬ pehˆ taꞈ-ehˇ maˬ poeˬ kʼawꞈ, naw maꞈ-euˬ Aˬda pyeuꞈ-eu Miˬyehˇ nui ma maˬ tsaˬ naˇ, jaˇ tseuˆ kʼoeˇ tiˬ mawˇ-iˬ miˇ tsa ga le-awˇ shiˇ gaˇ maˬ keuˆ-a.

³⁰Naw maꞈ-euˬ uˬ duˬ tsehˇ kahˇ-ahˇ keuˆ ni aˬ yawꞈ gui duˬ taˬ jiˇ-euˬ meh.

³¹Kʼoeˇ miˇ neh, naw maꞈ taˬ guˆ. Myaˬ dui dui-eu jaˇ tseuˆ baˬ maꞈ naˆ maˬ tseˇ, Miˬyehˇ mehˬ shi naw maꞈ poeˬ dzehˬ-eu meh.

³²“Tsawˇ haˬ tiˬ gʼaˬ na ngaˬ-ahˇ ha geuꞈ-eu ma lehˇ tsawˇ haˬ zaˬ deuˬ-euˬ mehˬ shi ehˇ naˇ, tsawˇ haˬ kʼoeˇ gʼaˬ ngaˬ-ahˇ ha geuꞈ-euˬ meh lehˇ, mˬ kʼoeˇ taˆ ngaˬ Da-euˬ mehˬ shi ngaˇ ehˇ ma.

³³Ehˇ kʼawꞈ, tsawˇ haˬ tiˬ gʼaˬ na ngaˬ-ahˇ maˬ ha geuꞈ lehˇ tsawˇ haˬ zaˬ deuˬ mehˬ shi ehˇ naˇ, tsawˇ haˬ kʼoeˇ gʼaˬ ngaˬ-ahˇ maˬ ha geuꞈ-aˬ lehˇ, mˬ kʼoeˇ taˆ ngaˬ Da-euˬ mehˬ shi ngaˇ ehˇ ma.

³⁴“Miˇ tsaˬ kʼoeˇ taˆ nui saˇ oꞈ-eu jeˬ hehˇ leꞈ-eu gʼaˇ duˬ ngaˇ oe-euˬ meh lehˇ taˬ noeˬ. Nui saˇ oꞈ-eu jeˬ hehˇ leꞈ-eu lehˇ oe-euˬ maˬ ngeuˇ. Mi cehˇ yuˇ leꞈ-eu lehˇ ngaˇ oe-euˬ ma.

³⁵Aˬ li deuˬ aˬ da-ahˇ muiˇ ni maˬ ehˇ, aˬ buˇ deuˬ aˬ ma-ahˇ muiˇ ni maˬ ehˇ, kuiˬ ma deuˬ boeˇ miˬ aˬ ma-ahˇ muiˇ ni maˬ ehˇ, ngaˇ oe-euˬ ma.

³⁶Aˬ cawˬ naˆ maˬ tseˇ yawˬ ha-euˬ nymˇ kʼahˬ zaˬ deuˬ yawˬ ha-ahˇ muiˇ laˇ tehꞈ-a.

³⁷“Ngaˬ-ahˇ gaˬ-eu naˆ maˬ tseˇ, yawˬ ha-euˬ aˬ da aˬ ma-ahˇ gaˬ dzehˬ-eu tsawˇ haˬ aˬ geu gʼaˬ maˬ kaˬ, ngaˬ-euˬ gʼaˬ kʼehˇ geuꞈ-eu maˬ geuˇ-a. Ngaˬ-ahˇ gaˬ-eu naˆ maˬ tseˇ, yawˬ ha-euˬ aˬ buˇ aˬ li-ahˇ gaˬ-eu tsawˇ haˬ aˬ geu gʼaˬ maˬ kaˬ, ngaˬ-euˬ gʼaˬ kʼehˇ geuꞈ-eu maˬ geuˇ-a.

³⁸Yawˬ ha-euˬ laꞈ yaꞈ baꞈ-awˇ ngaˬ-euˬ mehˬ nah maˬ caw teh laˇ-eu tsawˇ haˬ aˬ geu gʼaˬ maˬ kaˬ, ngaˬ-euˬ gʼaˬ kʼehˇ geuꞈ-eu maˬ geuˇ-a.

³⁹Yawˬ ha-euˬ saꞈ laˇ dehꞈ-eu jeˬ za nya ni leh jeh-eu tsawˇ haˬ aˬ geu gʼaˬ maˬ kaˬ, saꞈ laˇ dehꞈ-eu jeˬ-ahˇ smˬ-iˇ-awˇ, ngaˬ-euˬ gʼaˇ duˬ yawˬ ha-euˬ saꞈ laˇ dehꞈ-eu jeˬ smˬ-iˇ-euˬ tsawˇ haˬ aˬ geu gʼaˬ maˬ kaˬ, saꞈ laˇ dehꞈ-eu jeˬ za tehꞈ-a.

⁴⁰“Naw maꞈ-ahˇ kʼaˇ ha geuꞈ-eu tsawˇ haˬ-aˬ, ngaˬ-ahˇ ha geuꞈ gaˇ duˇ-awˇ, ngaˬ-ahˇ kʼaˇ ha geuꞈ-eu tsawˇ haˬ-aˬ, ngaˬ-ahˇ kʼehˇ gʼeh leꞈ-euˬ gʼaˬ-ahˇ ha geuꞈ gaˇ duˇ-eu meh.

⁴¹Miˬyehˇ gʼaˇ duˬ ngehˬ dah-eu tsawˇ haˬ-ahˇ, Miˬyehˇ gʼaˇ duˬ ngehˬ dah-eu tsawˇ haˬ pyeuꞈ-eu miˇ neh ha geuꞈ-eu ma lehˇ noeˬ siˬ nya-awˇ ha-eu tsawˇ haˬ aˬ geu gʼaˬ maˬ kaˬ, Miˬyehˇ gʼaˇ duˬ ngehˬ dah-eu kʼoeˇ gʼaˬ loꞈ-ehˇ guiˬ lahˬ za tehꞈ-a. Yaw tsaˬ yaw dawˇ tsawˇ haˬ-ahˇ, yaw tsaˬ yaw dawˇ tsawˇ haˬ pyeuꞈ-eu miˇ neh ha geuꞈ-eu ma lehˇ noeˬ siˬ nya-awˇ ha-eu tsawˇ haˬ aˬ geu gʼaˬ maˬ kaˬ, yaw tsaˬ yaw dawˇ tsawˇ haˬ kʼoeˇ gʼaˬ loꞈ-ehˇ guiˬ lahˬ za tehꞈ-a.

⁴²Ngaˬ-euˬ mehˬ nah caw teh-eu tsawˇ haˬ deuˬ laꞈ kʼoeˇ, aˬ cawˬ naˆ maˬ tseˇ nyiˇ teˬ dzehˬ-eu tiˬ gʼaˬ-ahˇ kʼawꞈ, ngaˬ-euˬ mehˬ nah caw teh-eu tsawˇ haˬ pyeuꞈ-eu miˇ neh bi dawˇ-eu ma lehˇ noeˬ siˬ nya-awˇ, iˇ cuꞈ iˇ tsehꞈ tiˬ kʼmˬ tehꞈ-ehˇ bi dawˇ-euˬ kʼawꞈ, kʼoeˇ loꞈ-ehˇ kʼaˇ bi dawˇ-eu tsawˇ haˬ aˬ geu gʼaˬ maˬ kaˬ, aˬ diˇ aˬ maˇ guiˬ lahˬ za tehꞈ-a lehˇ, ngaˇ naw maꞈ-ahˇ maˇ jawˆ ni ehˇ-eu ma.”