Read Akha Maꞈtehˬ 15 Bible Online

Maꞈtehˬ 15 - Akha bible

Maꞈtehˬ 15

¹Kʼoeˇ naˇ, Paˬliˬsehˇ deuˬ hawˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ Yeˬsuˇ jawˇ gaˇ laˇ-awˇ, heu loꞈ-ehˇ ehˇ-eu meh.

²“Aˬ poeˬ aˬ piˬ deuˬ neh mehˬ ka leꞈ-euˬ jeˬ-ahˇ, nawˬ-euˬ zaˬ lahˇ deuˬ aˬ jeˬ miˇ neh maˬ naˇ haˬ geuꞈ ta. Aˬ yawꞈ maꞈ hawˬ dzaˬ ngeh, zahˇ sahˇ kʼoꞈ jaˆ-eu loꞈ-ehˇ aˬ laꞈ maˬ dzuiꞈ nga.”

³Yeˬsuˇ ehˇ-eu, “Aˬ jeˬ miˇ neh Miˬyehˇ neh biꞈ taˬ-euˬ dawˬ deuˬ-ahˇ naw maꞈ maˬ naˇ haˬ geuꞈ ni, aˇ hu ba neh tawˬ ka leꞈ-euˬ zahˇ oeˇ-ahˇ tehꞈ-ehˇ leh jeh te.

⁴‘Nawˬ da nawˬ ma-ahˇ yaw zeu ya baw meh’ lehˇ hawˇ-eu, ‘Yawˬ ha-euˬ aˬ da aˬ ma-ahˇ yaˬ kʼehˇ yaˬ-eu tsawˇ haˬ, sehꞈ gaˇ ya daˬ tehꞈ-a’ lehˇ, Miˬyehˇ neh ehˇ taˬ-euˬ jaˆ-eu meh.

⁵Ehˇ kʼawꞈ, ‘Naw maꞈ-ahˇ biꞈ paˬ-ehˇ gʼeh-eu jeˬ Miˬyehˇ-ahˇ biꞈ dzeuˇ-euˬ ma lehˇ, yawˬ ha-euˬ aˬ da aˬ ma-ahˇ ehˇ nehˬ-eu tsawˇ haˬ-aˬ, aˬ da aˬ ma-ahˇ yaw zeu baw-eu maˬ loˬ-a’ lehˇ, naw maꞈ mehˬ-eu tsoˆ-eu meh.

⁶Naw maꞈ kʼoeˇ loꞈ-ehˇ ehˇ-eu laꞈ kʼoeˇ, aˇ hu ba neh tawˬ ka leꞈ-euˬ zahˇ oeˇ-ahˇ tehꞈ-ehˇ leh jeh-awˇ, Miˬyehˇ neh biꞈ taˬ-euˬ dawˬ deuˬ-ahˇ naw maꞈ yaw zeu maˬ baw-a.

⁷Awꞈ-aꞈ tahˬ kʼoˬ-ahˇ duˇ-eu tsawˇ haˬ[23] deuˬ-oˇ, Miˬyehˇ gʼaˇ duˬ ngehˬ dah-eu Iˇsaˬyaˇ neh naw maꞈ gaˇ kawˆ ehˇ taˬ-euˬ aˇ naˆ ni tsaˬ-eu nga.

⁸‘Tsawˇ haˬ heu deuˬ-euˬ mehˬ boeˬ neh, ngaˬ-ahˇ taˬ huiˬ taˬ mahˇ-eu kʼawꞈ, aˬ yawꞈ maꞈ-euˬ nui ma laꞈ kʼoeˇ, ngaˬ-ahˇ gaˇ mahˇ kaˬ dui dui meh.

⁹Yawꞈ maꞈ ngaˬ-ahˇ uˬ duˬ tahˬ-eu, tiˬ jeˬ-iˬ gaˇ dahˇ maˬ tsoeˬ-a. Yawꞈ maꞈ mehˬ-eu zahˇ sahˇ kʼoꞈ deuˬ, tsawˇ haˬ neh beh-euˬ zahˇ meh lehˇ, Miˬyehˇ ehˇ taˬ-euˬ jaˆ-eu meh.’ ”

¹⁰Kʼoeˇ naˇ, Yeˬsuˇ tsawˇ haˬ aˇ maꞈ-ahˇ kuˇ uiˬ-awˇ ehˇ nehˬ-eu, “Naˇ haˬ-awˇ gʼoˆ shaw geuꞈ-awˬ.

¹¹Tsawˇ haˬ zaˬ-ahˇ maˬ shawˇ ni bi pyeuꞈ-iˇ-eu jeˬ-aˬ, kʼaˬ meh laꞈ kʼoeˇ ahˇ-iˇ-eu jeˬ maˬ ngeuˇ-a. Kʼaˬ meh laꞈ kʼoeˇ neh doˆ le-euˬ jeˬ meh.”

¹²Kʼoeˇ ngeh, zaˬ lahˇ deuˬ aˬ yawꞈ jawˇ gaˇ laˇ-awˇ ehˇ-eu, “Nawˬ neh ngehˬ-euˬ dawˬ teu dawˬ Paˬliˬsehˇ deuˬ-ahˇ zaw leˇ-eu nawˇ siˬ nya ma loˇ.”

¹³Yeˬsuˇ ehˇ-eu, “Mˬ kʼoeˇ taˆ jawˇ-eu ngaˬ Da neh maˬ ka taˬ-euˬ aˇ bawˇ yawˬ bawˇ na luꞈ, gʼawˇ lehˆ dzeh gaˇ ya daˬ tehꞈ-a.

¹⁴Aˬ yawꞈ maꞈ gʼaˇ duˬ kʼahˬ taˬ lahˇ. Aˬ yawꞈ maꞈ-aˬ, myaˆ behꞈ deuˬ-ahˇ sheuˬ gʼeh-eu myaˆ behꞈ behꞈ-eu aˬ yuiꞈ aˬ tsu meh. Myaˆ behꞈ neh myaˆ behꞈ-ahˇ sheuˬ gʼeh naˇ, nyiˬ gʼaˬ luꞈ duˬ kʼahˬ-ahˇ ga ahˇ tehꞈ-a.”

¹⁵Beˬtuˆluˆ ehˇ-eu, “Dawˬ teu dawˬ-euˬ dawˬ tsuiꞈ nga maꞈ gʼoˆ shaw nya ni tiˬ poˆ ehˇ mehˬ laꞈ sheˇ.”

¹⁶Kʼoeˇ ngeh, aˬ yawꞈ maꞈ-ahˇ Yeˬsuˇ heu loꞈ-ehˇ ehˇ nehˬ-euˬ meh. “Naw maꞈ gʼeh iˬ nah keuˆ ni maˬ gʼoˆ shaw nya laˇ teˬ siˬ loˇ.

¹⁷Kʼaˬ meh laꞈ kʼoeˇ kʼaˇ ahˇ-iˇ-eu jeˬ baw ma laꞈ kʼoeˇ ahˇ-iˇ-awˇ, kʼoeˇ gaˇ neh tiˬ tiˇ saˇ-iˬ tiˬ tiˆ, laꞈ nyiˇ iˇ doˆ gʼeh-eu naw maꞈ maˬ siˬ nya te loˇ.

¹⁸Ehˇ kʼawꞈ, kʼaˬ meh-ahˇ kʼaˇ doˆ le-eu jeˬ-aˬ, nui ma laꞈ kʼoeˇ neh doˆ laˇ-awˇ, tsawˇ haˬ zaˬ-ahˇ maˬ shawˇ ni bi pyeuꞈ-iˇ-eu meh.

¹⁹Aˬ jeˬ miˇ neh ehˇ naˇ, nui ma laꞈ kʼoeˇ neh doˆ laˇ-euˬ jeˬ-aˬ, aˬ cawˬ-ahˇ sehꞈ-eu, aˬ cawˬ-euˬ miˬ zaˬ yo zaˬ-ahˇ bahˬ-eu, heu loꞈ-ehˇ gʼeh-eu maˬ muiˬ maˬ jaˬ-eu nui noeˬ deuˬ hawˇ-eu, tahˇ joe joe-eu, jaˬ myawꞈ myawꞈ-eu, aˬ cawˬ-ahˇ maˬ ngeuˇ-eu jeˬ dehˬ lehꞈ-eu, heu loꞈ-ehˇ gʼeh-eu maˬ tsaˬ maˬ dawˇ-eu nui noeˬ nui loˆ deuˬ meh.

²⁰Gaˇ kawˆ heu deuˬ-aˬ, tsawˇ haˬ zaˬ-ahˇ maˬ tsaˬ maˬ dawˇ ni bi pyeuꞈ-iˇ-eu gaˇ kawˆ deuˬ meh. Ehˇ kʼawꞈ, aˬ yawꞈ maꞈ naw maꞈ-ahˇ ehˇ-eu loꞈ-ehˇ, a laꞈ maˬ dzuiꞈ-ehˇ hawˬ dzaˬ-eu jeˬ-aˬ, tsawˇ haˬ zaˬ-ahˇ maˬ shawˇ ni maˬ bi pyeuꞈ-iˇ nya-a.”

²¹Yeˬsuˇ jawˇ duˬ kʼoeˇ tsahˇ-ahˇ neh doˆ-iˇ-awˇ, Duˇlu meuˬ hawˇ-eu Siˇdoˬ meuˬ-euˬ gahˬ kaˬ-ahˇ iˇ-euˬ meh.

²²Miˇ kʼahˬ kʼoeˇ kʼahˬ-ahˇ jawˇ-eu Kaˬnaˬ tsawˇ jeuˬ zaˬ miˬ zaˬ tiˬ gʼaˬ aˬ yawꞈ jawˇ gaˇ laˇ-awˇ, “Daˬbiˇ-euˬ Zaˬmaˇ-oˇ, ngaˬ-ahˇ gʼawˬ shaˬ gaˬ nehˬ laꞈ sheˇ. Ngaˬ buˇ-ahˇ nehꞈ uˇ leˇ taˬ-awˇ, uˇ gawˇ laˇ paˬ-ehˇ shaˬ dui dui luꞈ meh” lehˇ guˇ-awˇ ehˇ-eu meh.

²³Ehˇ kʼawꞈ, Yeˬsuˇ dawˬ tiˬ dawˬ-iˬ maˬ ngehˬ cawˬ nehˬ-a. Kʼoeˇ ngeh, aˬ yawꞈ-euˬ zaˬ lahˇ deuˬ aˬ yawꞈ jawˬ gaˇ laˇ-awˇ ehˇ-eu, “Tsawˇ haˬ teu gʼaˬ-ahˇ tiˬ poˆ teh dzeh sheˇ. Aˬ yawꞈ aˬ dui maꞈ-euˬ mehˬ nah caw teh caw teh-ehˇ, maˬ naˬ leˇ ni toˆ-ehˇ guˇ guˇ-ehˇ cah luꞈ-eu meh.”

²⁴Yeˬsuˇ ehˇ-eu, “Ngaˬ-ahˇ kʼehˇ gʼeh leꞈ-euˬ-aˬ, byoˆ-iˇ-euˬ yawˇ deuˬ pyeuꞈ-eu Iˇsaˬleˬlaˆ tsawˇ jeuˬ gʼaˇ duˬ tehꞈ meh.”

²⁵Kʼoeˇ ngeh jawˇ, zaˬ miˬ zaˬ kʼoeˇ gʼaˬ aˬ yawꞈ-euˬ aˬ kuiˇ dawˬ peh pawˬ tsuiꞈ pawˬ dmˬ dmˬ-awˇ, “Sahˬ paˬ-oˇ, ngaˬ-ahˇ ngehˬ gʼeh nehˬ laꞈ-awˬ” lehˇ ehˇ-eu meh.

²⁶Yeˬsuˇ ehˇ-eu, “Zaˬ dzaˬ luꞈ-eu kaˬ muˇ yuˇ doˆ-awˇ, aˬ kuiˬ-ahˇ biꞈ-eu maˬ tsaˬ-a.”

²⁷Zaˬ miˬ zaˬ kʼoeˇ gʼaˬ ehˇ-eu, “Sahˬ paˬ-oˇ, nawˇ ehˇ-eu tsaˬ meh. Ehˇ kʼawꞈ, aˬ kuiˬ-aˬ, yaw sahˇ gʼaˬ-euˬ hawˬ jeh-ahˇ neh ga le-euˬ dzaˬ ngehˬ dawˇ dzeh deuˬ-ahˇ ya gʼoˆ dzaˬ-eu tehꞈ-ehˇ kʼawꞈ, nui kʼahˇ shiˇ meh.”

²⁸Kʼoeˇ ngeh jawˇ, zaˬ miˬ zaˬ kʼoeˇ gʼaˬ-ahˇ Yeˬsuˇ ehˇ nehˬ-eu, “Nawˇ-aˬ, jah-eu gʼaˬ kʼaˆ dui dui-eu zaˬ miˬ zaˬ tiˬ gʼaˬ law hawˇ nga. Nawˇ kʼaˇ bi pyeuꞈ mawꞈ-eu loꞈ-ehˇ nawˬ-euˬ gʼaˇ duˬ pyeuꞈ laˇ luꞈ-uˇ.” Kʼoeˇ loꞈ-ehˇ ehˇ gʼaˬ ngeh, aˬ yawꞈ-euˬ aˬ buˇ kʼoeˇ gʼaˬ tiˬ poˆ tehꞈ-ehˇ taˬ leˇ-euˬ meh.

²⁹Jawˇ duˬ kʼoeˇ tsahˇ-ahˇ neh Yeˬsuˇ doˆ-iˇ-awˇ, Gaˬliˬlehˇ lah lah dzeˇ caw caw-ehˇ iˇ gʼeh-euˬ meh. Kʼoeˇ naˇ, gawˬ duˇ tiˬ duˇ-ahˇ daˆ leˇ-awˇ nuiˇ-euˬ meh

³⁰Tsawˇ haˬ aˇ maꞈ maꞈ ma Yeˬsuˇ jawˇ gaˇ uiˬ laˇ-euˬ meh. Kuiˇ shiˇ laꞈ shiˇ shiˇ-eu deuˬ, myaˆ behꞈ deuˬ, kuiˇ kuˆ deuˬ, a dzawˬ deuˬ hawˇ-eu, naˇ-eu tsawˇ haˬ gʼawˬ mya ni aˬ yawꞈ maꞈ sheuˬ laꞈ-awˇ, Yeˬsuˇ mehˬ shi sheuˬ uiˬ taˬ-euˬ meh. Kʼoeˇ ngeh, aˬ yawꞈ maꞈ-ahˇ Yeˬsuˇ naˇ gawˇ laˆ taˬ nehˬ-euˬ meh.

³¹Aˬ dzawˬ deuˬ dawˬ ngehˬ nya laˇ-awˇ, kuiˇ kuˆ laꞈ kuˆ kuˆ-eu deuˬ muiˬ laˇ-awˇ, kuiˇ shiˇ laꞈ shiˇ shiˇ-eu deuˬ cah nya laˇ-awˇ, myaˆ behꞈ deuˬ myaˆ nuiˆ mawˇ laˇ-euˬ gaˇ ya mawˇ ngeh, aˬ yawꞈ maꞈ zahˬ dui dui leˇ-euˬ meh. Kʼoeˇ ngeh, Iˇsaˬleˬlaˆ tsawˇ jeuˬ-euˬ Miˬyehˇ-ahˇ aˬ yawꞈ maꞈ ja ceuˬ-euˬ meh.

³²Yeˬsuˇ aˬ yawꞈ-euˬ zaˬ lahˇ deuˬ-ahˇ kuˇ uiˬ-awˇ, heu loꞈ-ehˇ ehˇ nehˬ-euˬ meh. “Tsawˇ haˬ heu deuˬ-ahˇ ngaˇ gʼawˬ shaˬ gaˬ miˇ-a. Aˬ yawꞈ maꞈ ngaˬ nehˬ-ehˇ jawˇ luꞈ-eu smˬ nah byah laˇ-awˇ, aˬ yawꞈ maꞈ dzaˬ-eu tiˬ jeˬ-iˬ maˬ paˇ jaˆ meh. Aˬ yawꞈ maꞈ-ahˇ tiˬ jeˬ-iˬ maˬ dzaˬ-ehˇ maˬ bi gʼoꞈ-iˇ mawꞈ nya. Gaˇ pehˇ-ahˇ gʼaˬ juˬ dui dui-iˇ gaˇ kʼahˬ laˇ nya.”

³³Zaˬ lahˇ deuˬ aˬ yawꞈ-ahˇ ehˇ-eu, “Heu loꞈ-ehˇ gʼeh-eu bawˇ tsahˬ bawˇ dahˇ kʼaˇ shuiꞈ deh yaˇ laꞈ kʼoeˇ, tsawˇ haˬ heu myaˆ ni-ahˇ bi dzaˬ bi dawˇ loꞈ-eu gʼaˇ duˬ, dzaˬ dzaˬ dawˇ dawˇ aˬ gaˇ laˬ-iˇ nmˇ.”

³⁴Yeˬsuˇ ehˇ-eu, “Naw maꞈ kaˬ muˇ aˇ myaˆ ni ahˇ te.” Aˬ yawꞈ maꞈ ehˇ-eu, “Kaˬ muˇ shiꞈ yaˆ hawˇ-eu ngaˬ shaˬ ui cuiˆ ahˇ-eu tehꞈ ma.”

³⁵Kʼoeˇ ngeh, Yeˬsuˇ tsawˇ haˬ aˇ maꞈ maꞈ ma-ahˇ dawˬ biꞈ-awˇ, miˇ tsa bi nuiˇ-euˬ meh.

³⁶Kʼoeˇ naˇ, kaˬ muˇ kʼoeˇ shiꞈ yaˆ hawˇ-eu ngaˬ shaˬ kʼoeˇ deuˬ aˬ yawꞈ yuˇ-awˇ, Miˬyehˇ-euˬ guiˬ lahˬ-ahˇ ja ceuˬ gʼaˬ miˇ tsa, ngawˬ pyehˬ-awˇ, zaˬ lahˇ deuˬ-ahˇ biꞈ-awˇ, tsawˇ haˬ aˇ maꞈ-ahˇ bi biˇ nehˬ-euˬ meh.

³⁷Tsawˇ haˬ dawˬ tawˆ luꞈ tiˬ dehˆ dzaˬ-euˬ uˬ taꞈ, dzehˬ laˇ-euˬ deuˬ-ahˇ zaˬ lahˇ deuˬ paˇ gʼoˆ uiˬ ngeh, kʼaˆ puˬ shiꞈ puˬ byah laˇ-euˬ meh.

³⁸Zaˬ miˬ zaˬ hawˇ-eu zaˬ deuˬ maˬ gui ahˇ-ehˇ, kʼaˇ dzaˬ-euˬ tsawˇ haˬ deuˬ oeˬ heˇ gʼaˬ byah-eu meh.

³⁹Kʼoeˇ naˇ, tsawˇ haˬ aˇ maꞈ kʼoeˇ deuˬ-ahˇ bi gʼoꞈ-iˇ-awˇ, aˬ yawꞈ-aˬ lawˬ dziˬ-awˇ, Maˬgaˬdaˬ miˇ kʼahˬ-ahˇ iˇ gʼeh-euˬ meh.