Read Akha Maꞈtehˬ 19 Bible Online

Maꞈtehˬ 19 - Akha bible

Maꞈtehˬ 19

¹Gaˇ kawˆ kʼoeˇ deuˬ Yeˬsuˇ mehˬ nehˬ gʼaˬ ngeh, Gaˬliˬlehˇ miˇ kʼahˬ-ahˇ neh doˆ-iˇ-awˇ, Yawˇdaˬ lawˇ baˬ nui baˬ paw jaˆ-eu Yuˇdaˆ miˇ kʼahˇ-ahˇ iˇ-euˬ meh.

²Tsawˇ haˬ aˇ maꞈ gʼawˬ mya ni aˬ yawꞈ-euˬ mehˬ nah caw teh-awˇ, kʼoeˇ gaˇ aˬ yawꞈ maꞈ-ahˇ naˇ gawˇ laˆ taˬ nehˬ-euˬ meh.

³Paˬliˬsehˇ tiˬ paˆ na deuˬ aˬ yawꞈ jawˇ gaˇ laˇ-awˇ, aˬ yawꞈ-ahˇ lahˇ ju kʼmˇ mawꞈ-eu miˇ neh heu loꞈ-ehˇ naˇ haˬ-euˬ meh. “Aˬ jeˬ gaˇ kawˆ baˬ da neh maˬ kaˬ, kʼaˬ dzeˇ zaˬ tiˬ gʼaˬ yawˬ ha-euˬ miˬ zaˬ-ahˇ kʼoꞈ naˇ, Zahˇ dawˬ kʼoꞈ dawˬ-ahˇ tsaˬ meh loˇ.”

⁴Yeˬsuˇ ehˇ-eu, “Aˇ dahˬ beh ngeh, Beh-euˬ yaw sahˇ gʼaˬ tsawˇ haˬ zaˬ-ahˇ beh ngeh neh, kʼaˬ dzeˇ zaˬ hawˇ-eu zaˬ miˬ zaˬ lehˇ beh-euˬ gaˇ kawˆ, Jaˇliꞈ laꞈ kʼoeˇ naw maꞈ maˬ gui mawˇ-aˬ loˇ.

⁵Kʼoeˇ baˬ da neh, kʼaˬ dzeˇ zaˬ-aˬ, yawˬ ha-euˬ aˬ da aˬ ma-ahˇ gʼawˬ-iˇ-awˇ, yawˬ ha-euˬ miˬ zaˬ nehˬ-ehˇ dehꞈ taꞈ-eu laꞈ kʼoeˇ, nyiˬ gʼaˬ-euˬ tiˬ shiˬ tiˬ shaˬ tehꞈ-ehˇ ya pyeuꞈ laˇ meh lehˇ, Miˬyehˇ neh ehˇ taˬ-euˬ-meh.

⁶Kʼoeˇ miˇ neh, aˬ nyaꞈ-aˬ, nyiˬ gʼaˬ maˬ paˇ ngeuˇ meh. Tiˬ shiˬ tiˬ shaˬ tehꞈ meh. Miˬyehˇ neh yuˇ dzoeˇ taˬ-euˬ gaˇ tsawˇ haˬ zaˬ maˬ ya laˆ gʼawˬ-a.”

⁷Paˬliˬsehˇ deuˬ ehˇ-eu, “Toˆ-ehˇ ngeuˇ naˇ, kʼaˬ dzeˇ zaˬ tiˬ gʼaˬ miˬ zaˬ kʼoꞈ-eu sahˬ boꞈ tiˬ dzeh biꞈ-awˇ, yawˬ ha-euˬ miˬ zaˬ-ahˇ teh gʼoꞈ nya meh lehˇ, Moˇseˬ-euˬ zahˇ dawˬ kʼoꞈ dawˬ laꞈ kʼoeˇ aˬ jeˬ miˇ neh ehˇ taˬ ta.”

⁸Yeˬsuˇ ehˇ-eu, “Naw maꞈ nui ma gʼahˇ-awˇ naˬ bawˇ tuˇ-eu miˇ neh, Moˇseˬ naw maꞈ-ahˇ miˬ zaˬ kʼoꞈ-eu aˬ kawˬ-aˬ biꞈ-euˬ meh. Ehˇ kʼawꞈ, mˬ beh miˇ beh ngeh maˇ diˇ-aˬ, kʼoeˇ loꞈ-ehˇ maˬ ngeuˇ-a.

⁹Naw maꞈ-ahˇ ngaˇ heu loꞈ-ehˇ ehˇ-eu ma. Tsawˇ haˬ tiˬ gʼaˬ na, yawˬ ha-euˬ miˬ zaˬ aˬ cawˬ nehˬ-ehˇ maˬ bahˬ-euˬ gaˇ kʼoꞈ dzeh-awˇ, miˬ zaˬ yawˬ gʼaˬ yawˬ sheuˬ paˇ naˇ, zaˬ miˬ zaˬ kʼoeˇ gʼaˬ-ahˇ bahˬ-euˬ meh.”

¹⁰Zaˬ lahˇ deuˬ Yeˬsuˇ-ahˇ ehˇ-eu, “Sheuˬ dahˬ dzaˬ-eu jeˬ teu naˆ naˆ-ehˇ shaˬ-eu ngeuˇ naˇ, maˬ sheuˬ dahˬ dzaˬ ni jawˇ-eu zaˬ dzehˬ ngaˇ.”

¹¹Yeˬsuˇ ehˇ-eu, “Heu loꞈ-ehˇ mehˬ taˬ tsoˆ taˬ-euˬ gaˇ kawˆ heu-aˬ, yawˬ gʼaˬ na luꞈ gʼaˇ duˬ maˬ ngeuˇ-a. Miˬ yehˇ neh gaˇ kawˆ heu-ahˇ noeˬ mawˇ nya-eu jeˬ biꞈ taˬ-euˬ deuˬ gʼaˇ duˬ tehꞈ meh.

¹²Miˬ zaˬ maˬ sheuˬ-eu gaˇ kawˆ, tiˬ gʼaˬ tiˇ gʼaˬ maˬ duˇ-a. Tiˬ paˆ na deuˬ dehꞈ le ngeh neh kʼoeˇ loꞈ-ehˇ seu le-euˬ meh. Tiˬ paˆ na deuˬ-aˬ, tsawˇ haˬ zaˬ neh jahˇ-euˬ gaˇ kawˆ baˬ da neh maˬ sheuˬ ni jawˇ-eu meh. Tiˬ paˆ na deuˬ-aˬ, Mˬtaˆ Miˇkʼahˬ gʼaˇ duˬ miˬ zaˬ maˬ sheuˬ ni jawˇ-eu meh. Mehˬ taˬ tsoˆ taˬ-euˬ gaˇ kawˆ heu deuˬ-ahˇ ha geuꞈ nya-eu deuˬ ha geuꞈ luꞈ-uˇ.”

¹³Kʼoeˇ naˇ, Yeˬsuˇ neh aˬ laꞈ baꞈ daˆ-awˇ guiˬ lahˬ bi biꞈ-eu gʼaˇ duˬ, zaˬ yaw nyiˇ tiˬ deuˬ-ahˇ Yeˬsuˇ jawˇ gaˇ sheuˬ laꞈ-euˬ meh. Zaˬ sheuˬ ha laˇ-euˬ tsawˇ haˬ kʼoeˇ deuˬ-ahˇ zaˬ lahˇ deuˬ neh dehˬ-euˬ meh.

¹⁴Kʼoeˇ ngeh, Yeˬsuˇ ehˇ-eu, “Zaˬ deuˬ-ahˇ maˬ laˆ tsoeˬ ni ngaˇ jawˇ gaˇ bi laˇ-awˬ. Aˬ jeˬ miˇ neh ehˇ naˇ, Mˬtaˆ Miˇkʼahˬ-aˬ, aˬ yawꞈ maꞈ loꞈ-ehˇ gʼeh-eu deuˬ-ahˇ oꞈ- eu meh.”

¹⁵Zaˬ kʼoeˇ deuˬ-euˬ kʼoeˇ taˆ Yeˬsuˇ aˬ laꞈ baꞈ daˆ nehˬ yaꞈ-awˇ, kʼoeˇ gaˇ neh doˆ-iˇ-euˬ meh.

¹⁶Tiˬ poˆ-aˬ, tsawˇ haˬ tiˬ gʼaˬ Yeˬsuˇ jawˇ gaˇ laˇ-awˇ ehˇ-eu, “Saˬ laˬ-oˇ, mˬ maˬ maˬ byaˆ zaˇ ziˇ dehꞈ-eu jeˬ-ahˇ za nya ni, gaˇ yaw muiˬ aˬ geu jeˬ ngaˇ ya mˇ ta.”

¹⁷Yeˬsuˇ ehˇ-eu, “Yaw muiˬ jeˬ-euˬ gaˇ kawˆ, aˬ jeˬ miˇ neh nawˇ ngaˬ-ahˇ naˇ haˬ te. Muiˬ-eu-aˬ, Miˬyehˇ tiˬ gʼaˬ tehꞈ meh. Dehꞈ-eu jeˬ laꞈ kʼoeˇ nawˇ uˇ leˇ mawꞈ naˇ, zahˇ dawˬ kʼoꞈ dawˬ-ahˇ caw teh-awˬ.”

¹⁸A yawꞈ ehˇ-eu, “Zahˇ dawˬ kʼoꞈ dawˬ aˬ geu deuˬ-ahˇ ya caw teh ta.” Yeˬsuˇ ehˇ-eu, “Tsawˇ haˬ taˬ sehꞈ. Aˬ cawˬ-euˬ miˬ zaˬ-ahˇ taˬ bahˬ taˬ muˆ. Smˇ kʼoeˬ taˬ kʼoeˬ. Aˬ cawˬ gaˇ kawˆ maˬ ngeuˇ gaˇ keuˆ ni saˇ kiˇ taˬ kamˬ.

¹⁹Yawˬ ha-euˬ aˬ da aˬ ma-ahˇ yaw zeu baw-awˬ. Yawˬ haˇ yawˬ ha gaˬ-eu loꞈ-ehˇ, yawˬ ha-ahˇ taꞈ-eu tsawˇ haˬ deuˬ-ahˇ gaˬ-awˬ lehˇ ehˇ-eu zahˇ dawˬ kʼoꞈ dawˬ heu deuˬ-ahˇ caw teh-awˬ.”

²⁰Zaˬ guˬ kʼoeˇ gʼaˬ ehˇ-eu, “Zahˇ dawˬ kʼoꞈ dawˬ dawˬ tawˆ luꞈ-ahˇ ngaˇ caw teh luꞈ-eu ma. Ngaˇ aˬ geu jeˬ paˇ ya mˇ ta siˬ.”

²¹Yeˬsuˇ ehˇ-eu, “Nawˇ ehˇ kʼaˇ maˬ za ni byah-eu tsawˇ haˬ pyeuꞈ mawꞈ naˇ, nawˇ kʼaˇ jaˆ-eu jeˬ dawˬ tawˆ luꞈ ahˬ-iˇ-awˇ, ahˬ za-euˬ pyuˇ kʼoeˇ yuˇ-awˇ shaˬ zaˬ zahˬ zaˬ deuˬ-ahˇ biˇ nehˬ-awˬ. Mˬ kʼoeˇ taˆ nawˬ-euˬ pyuˇ shuiˇ myawˬ gahˬ jaˆ laˇ tehꞈ-a. Kʼoeˇ naˇ, paˇ gʼoꞈ poˆ laˇ-awˇ ngaˬ-euˬ mehˬ nah caw teh laˇ-awˬ.”

²²Dawˬ kʼoeˇ dawˬ-ahˇ ya gaˬ ngeh, zaˬ guˬ kʼoeˇ gʼaˬ nui ma cawˆ dui dui-awˇ gʼoꞈ-iˇ-euˬ meh. Aˬ jeˬ miˇ neh ehˇ naˇ, aˬ yawꞈ smˇ muiˬ muiˬ dui dui-eu meh.

²³Kʼoeˇ ngeh, zaˬ lahˇ deuˬ-ahˇ Yeˬsuˇ heu loꞈ-ehˇ ehˇ nehˬ-euˬ meh. “Ngaˇ naw maꞈ-ahˇ maˇ jawˆ ni ehˇ-eu ma. Smˇ muiˬ smˇ baw deuˬ Mˬtaˆ Miˇkʼahˬ-ahˇ uˇ leˇ-eu shaˬ dui dui meh.

²⁴Ngaˇ tiˬ poˆ paˇ ehˇ duˬ nehˬ nyaˇ. Smˇ muiˬ smˇ baw tiˬ gʼaˬ Miˬyehˇ Miˇkʼahˬ-ahˇ uˇ leˇ-eu-aˬ, law taw tiˬ mawˇ aˬ gʼawꞈ gʼawꞈ naˬ-ahˇ uˇ leˇ-eu naˆ maˬ tseˇ kʼaˆ dzehˬ-eu meh.”

²⁵Dawˬ kʼoeˇ dawˬ-ahˇ zaˬ lahˇ deuˬ ya gaˬ ngeh, zahˬ dui dui leˇ-awˇ ehˇ-eu, “Toˆ-ehˇ ngeuˇ naˇ, ka kʼoꞈ-eu jeˬ-ahˇ za nya-eu tsawˇ haˬ aˬ suˇ gʼaˬ jawˇ nmˇ.”

²⁶Yeˬsuˇ aˬ yawꞈ maꞈ-ahˇ haw tsoˆ-awˇ ehˇ-eu, “Heu-aˬ, tsawˇ haˬ zaˬ jahˇ nya-eu jeˬ maˬ ngeuˇ-a. Ehˇ kʼawꞈ, Miˬyehˇ maˬ jahˇ nya-eu tiˬ jeˬ-iˬ maˬ jaˆ-a.”

²⁷Kʼoeˇ ngeh, Beˬtuˆluˆ ehˇ-eu, “Haw sheˇ. Nga maꞈ kʼaˇ jaˆ-eu yawˬ jeˬ na luꞈ byehˇ dzeh yaꞈ jiˇ-awˇ, nawˬ-euˬ mehˬ nah caw teh laˇ-euˬ maˬ ngeuˇ nga loˇ. Nga maꞈ aˬ jeˬ za nmˇ.”

²⁸Aˬ yawꞈ maꞈ-ahˇ Yeˬsuˇ ehˇ nehˬ-eu, “Miˇ tsaˬ tahˬ kʼawˇ yaw shuiꞈ paˇ laˇ-awˇ, yaw shehꞈ kʼahˬ sehˇ huiˬ-eu dzoeˬ dzaˬ nuiˇ mahˬ kʼoeˇ taˆ Tsawˇhaˬ-euˬ Zaˬmaˇ nuiˇ le ngeh, ngaˬ-euˬ mehˬ nah caw teh-eu naw maꞈ tseˇ nyiꞈ gʼaˬ kʼawꞈ, dzoeˬ dzaˬ nuiˇ mahˬ kʼoeˇ taˆ nuiˇ-awˇ, Iˇsaˬleˬlaˆ tsawˇ jeuˬ tseˇ nyiꞈ jeuˬ kʼoeˇ taˆ ya uˆ lahˇ tehꞈ-a.

²⁹Ngaˬ-euˬ mehˬ nah caw teh laˇ-eu gʼaˇ duˬ, yawˬ ha-euˬ nymˇ, mehˇ nmˇ, dmˇ ma, aˬ da, aˬ ma, aˬ buˇ aˬ li, myawˬ dahˬ yaˇ dahˬ, heu deuˬ dawˬ tawˆ luꞈ-ahˇ byehˇ dzeh yaꞈ-euˬ tsawˇ haˬ aˬ geu gʼaˬ maˬ kaˬ, yawˬ ha neh kʼaˇ byehˇ yaꞈ-euˬ jeˬ tiˬ yaˇ bymˇ paˇ za dzehˬ-eu uˬ taꞈ, mˬ maˬ maˬ byaˆ zaˇ ziˇ dehꞈ-eu jeˬ za tehꞈ-a.

³⁰Ehˇ kʼawꞈ, heu ziˇ-ahˇ aˬ cawˬ mehˬ hu jawˇ luꞈ-eu tsawˇ haˬ gʼawˬ mya ni, aˬ kaˇ kaˇ ziˇ-ahˇ aˬ cawˬ mehˬ nah ya jawˇ-awˇ, heu ziˇ-ahˇ aˬ cawˬ mehˬ nah jawˇ luꞈ-eu tsawˇ haˬ gʼawˬ mya ni, aˬ kaˇ kaˇ ziˇ-ahˇ aˬ cawˬ mehˬ hu ya jawˇ tehꞈ-a.