Read Akha Maꞈtehˬ 24 Bible Online

Maꞈtehˬ 24 - Akha bible

Maꞈtehˬ 24

¹Yeˬsuˇ Uˬ duˬ tahˬ nymˇ nymˇ ma-ahˇ neh doˆ-iˇ luꞈ ngeh, aˬ yawꞈ-euˬ zaˬ lahˇ deuˬ aˬ yawꞈ jawˇ gaˇ laˇ-awˇ, Uˬ duˬ tahˬ nymˇ nymˇ ma-euˬ lahˇ laꞈ kʼoeˇ jaˆ-eu nymˇ deuˬ-ahˇ toeˬ mehˬ-euˬ meh.

²Aˬ yawꞈ maꞈ-ahˇ Yeˬsuˇ ehˇ nehˬ-eu, “Nymˇ heu deuˬ-ahˇ naw maꞈ mawˇ luꞈ meh. Ngaˇ naw maꞈ-ahˇ maˇ jawˆ ni ehˇ nehˬ nyaˇ. Nymˇ kʼaˇ gawˬ taˬ-euˬ kʼaˬ lo heu deuˬ tiˬ siˬ kʼoeˇ taˆ tiˬ siˬ maˬ jaˆ ziꞈ nya ni byaˆ-iˇ jiˇ gaˇ keuˆ tehꞈ-a.”

³Saˬloˬ gawˬ jawˬ-ahˇ Yeˬsuˇ nuiˇ luꞈ ngeh, zaˬ lahˇ deuˬ tehꞈ-ehˇ aˬ yawꞈ jawˇ gaˇ laˇ-awˇ ehˇ-eu, “Uˬ duˬ tahˬ nymˇ nymˇ ma cawˆ-iˇ-eu aˇ yamˬ kʼoeˇ aˬ myah keuˆ le ta lehˇ ehˇ nehˬ laꞈ sheˇ. Miˇ tsaˬ heu aˇ saˬ saˬ-eu dawˬ peh peh laˇ-awˇ, nawˇ zaꞈ le-eu aˇ yamˬ keuˆ le-euˬ nga lehˇ, aˬ jeˬ-ahˇ haw-awˇ ya siˬ nmˇ.”

⁴Yeˬsuˇ ehˇ-eu, “Tsawˇ haˬ tiˬ gʼaˬ-iˬ naw maꞈ-ahˇ gaˇ ma maˬ bi sheuˬ bahˬ ni, yaw gahˇ gahˇ-ehˇ dehꞈ-awˬ.

⁵Ngaˬ-euˬ gʼaˇ duˬ ngehˬ dah le-euˬ ma lehˇ ehˇ-eu tsawˇ haˬ gʼawˬ mya ni doˆ le-awˇ, ‘Ngaˇ Ka li ma’ lehˇ yawˬ haˇ yawˬ ha ehˇ-eu laꞈ kʼoeˇ, tsawˇ haˬ gʼawˬ mya ni-ahˇ gaˇ ma sheu bahˬ gʼeh tehꞈ-a.

⁶Dawˬ peh guiˇ deuˆ luꞈ-eu teˇ saˇ hawˇ-eu, gaˇ mahˇ kaˬ gaˇ guiˇ deuˆ-eu gaˇ kawˆ naw maꞈ-ahˇ gaˬ laˇ tehꞈ-a. Ehˇ kʼawꞈ, naw maꞈ taˬ tsawˬ guˆ-iˇ. Kʼoeˇ loꞈ-ehˇ gʼeh-eu jeˬ yaw beh keuˆ le tehꞈ-a. Ehˇ kʼawꞈ, aˇ saˬ saˬ-eu aˇ yamˬ keuˆ le-euˬ maˬ ngeuˇ-a siˬ.

⁷Miˇ kʼahˬ tiˬ kʼahˬ tiˇ kʼahˬ guiˇ deuˆ-awˇ, tsawˇ jeuˬ tiˬ jeuˬ tiˇ jeuˬ ceh tehꞈ-a. Mehꞈ-eu shuꞈ-eu jeˬ hawˇ-eu miˇ luˆ luˆ-eu jeˬ, yawˬ gaˇ na luꞈ keuˆ le tehꞈ-a.

⁸Heu deuˬ dawˬ tawˆ luꞈ, zaˬ baw-eu lehˇ gʼeh ngeh, uˬ maˆ naˇ dahˬ beh laˇ-eu loꞈ-ehˇ tehꞈ-a siˬ.

⁹Kʼoeˇ naˇ, naw maꞈ-ahˇ paꞈ-awˇ, bi kʼehˬ bi kʼaˆ-eu gʼaˇ duˬ hawˇ-eu, bi sehꞈ-eu gʼaˇ duˬ a nehˬ gaˇ ya daˬ tehꞈ-a. Naw maꞈ ngaˬ-ahˇ jah-eu baˬ ba neh, tsawˇ jeuˬ dawˬ tawˆ luꞈ naw maˬ-ahˇ muiˇ tehꞈ-a.

¹⁰Tsawˇ haˬ gʼawˬ mya ni, yawˬ ha-euˬ jah-eu jeˬ-ahˇ byehˇ dzeh tehꞈ-a. Aˬ yawꞈ maꞈ tiˬ gʼaˬ tiˇ gʼaˬ saˇ jaˇ puiˬ-awˇ, tiˬ gʼaˬ tiˇ gʼaˬ muiˇ tehꞈ-a.

¹¹Miˬyehˇ gʼaˇ duˬ ngehˬ dah-eu jaˬ myawꞈ deuˬ gʼawˬ mya ni doˆ le-awˇ, tsawˇ haˬ gʼawˬ mya ni-ahˇ gaˇ ma sheuˬ bahˬ gʼeh tehꞈ-a.

¹²Yaw haiˬ jeˬ kʼoeˇ loꞈ-ehˇ myaˬ laˇ-awˇ, tsawˇ haˬ zaˬ-euˬ gʼoeˇ-eu gaˬ-eu jeˬ coꞈ-iˇ tehꞈ-a.

¹³Ehˇ kʼawꞈ, aˇ saˬ saˬ ngeh keuˆ ni kamˬ coeˇ-eu tsawˇ haˬ deuˬ ka kʼoꞈ-eu jeˬ za tehꞈ-a.

¹⁴Kʼoeˇ naˇ, miˇ tsaˬ tahˬ kʼawˇ heu doe ni, Miˬyehˇ Miˇkʼahˬ gaˇ kawˆ laˬ kʼaˬ cehˇ-eu guiˬ lahˬ dawˬ mehˬ doe tehꞈ-a. Kʼoeˇ dzeuˇ ngeh, aˇ saˬ saˬ-eu aˇ yamˬ keuˆ le tehꞈ-a.

¹⁵“Miˬyehˇ gʼaˇ duˬ ngehˬ dah-eu Daˬyeˬlaˆ neh ehˇ taˬ-euˬ ‘Guˆ dui dui laˇ paˬ-ahˇ gʼeh-eu yaw jawꞈ jeˬ’[36] -ahˇ naw maꞈ ya mawˇ tehꞈ-a. Yaw jawꞈ jeˬ kʼoeˇ, muiˬ-eu shawˇ-eu jawˇ duˬ-ahˇ ka tuˇ taˬ-awˇ jaˆ tehꞈ-a.” (Jaˇliꞈ gui-eu deuˬ dawˬ heu dawˬ-euˬ dawˬ tsuiꞈ gʼoˆ shaw luꞈ-uˇ.)[37]

¹⁶“Kʼoeˇ ngeh, Yuˇdaˆ miˇ kʼahˬ-ahˇ jawˇ-eu tsawˇ haˬ deuˬ gawˬ jawˬ paw ya cehˆ daˆ meh.

¹⁷Nymˇ mˬ kʼoeˇ taˆ jawˇ luꞈ-eu tsawˇ haˬ, nymˇ laꞈ kʼoeˇ zaꞈ uˇ-iˇ-awˇ myawˬ laˬ doˆ laˬ-iˇ-eu maˬ dah-aˇ.

¹⁸Yaˇ ngeh jawˇ-eu tsawˇ haˬ iˇ kahˇ-ahˇ mehˬ tsoeˬ cehˆ laˬ-iˇ-eu maˬ dah-aˇ.

¹⁹Aˇ nah aˇ yamˬ kʼoeˇ keuˆ le ngeh, aˬ nyiˇ pi luꞈ-eu zaˬ miˬ zaˬ deuˬ hawˇ-eu, zaˬ nahˬ aˬ ma deuˬ shaˬ zahˬ naꞈ dui dui tehꞈ-a.

²⁰Naw maꞈ ya cehˆ-eu aˇ nah aˇ yamˬ kʼoeˇ, tsahˬ gaˆ yamˬ hawˇ-eu Jawˇ nah-ahˇ maˬ bi tsaˬ laˇ-eu gʼaˇ duˬ, Miˬyehˇ-ahˇ guiˬ lahˬ shaˇ-awˬ.

²¹Aˬ jeˬ miˇ neh ehˇ naˇ, kʼoeˇ ngeh poˆ keuˆ le-eu guˆ-eu gaˆ-eu jeˬ kʼoeˇ-aˬ, miˇ tsaˬ tahˬ kʼawˇ heu aˇ dahˬ beh ngeh neh kʼaˇ keuˆ le dzeuˇ yaꞈ-euˬ jeˬ hawˇ-eu, aˬ kaˇ kʼaˇ keuˆ le-eu jeˬ dawˬ tawˆ luꞈ naˆ maˬ tseˇ, guˆ dui dui laˇ paˬ-ehˇ gʼeh-eu meh.

²²Ehˇ kʼawꞈ, aˇ nah aˇ yamˬ kʼoeˇ Miˬyehˇ neh laˆ nymˇ taˬ-euˬ meh. Aˬ yawꞈ neh kʼoeˇ loꞈ-ehˇ maˬ laˆ nymˇ law nmˇ-aˬ, tsawˇ haˬ tiˬ gʼaˬ-iˬ maˬ dzeuˇ-iˇ nya-aˇ. Aˬ yawꞈ neh tseˇ doˆ-euˬ tsawˇ haˬ deuˬ gʼaˇ duˬ shaˇ noeˬ-awˇ, aˇ nah aˇ yamˬ kʼoeˇ nymˇ le ni aˬ yawꞈ jahˇ-euˬ meh.

²³“‘Haw-awˬ. Ka li heu gaˇ jawˇ ngaˇ. Kʼoeˇ gaˇ jawˇ ngaˇ’ lehˇ, tsawˇ haˬ tiˬ gʼaˬ na ehˇ laˇ gaˇ naw maꞈ taˬ jah.

²⁴Aˬ jeˬ miˇ neh ehˇ naˇ, Ka li jaˬ myawꞈ deuˬ hawˇ-eu, Miˬyehˇ gʼaˇ duˬ ngehˬ dah-eu jaˬ myawꞈ deuˬ doˆ le tehꞈ-a. Aˬ yawꞈ maꞈ zahˬ dui dui leˇ paˬ-ehˇ gʼeh-eu jeˬ hawˇ-eu, kʼaˆ jeˬ-ehˇ gʼeh-eu jeˬ mˇ mehˬ-eu laꞈ kʼoeˇ, gʼeh nya naˇ, Miˬyehˇ neh tseˇ doˆ-euˬ tsawˇ haˬ deuˬ-ahˇ kʼawꞈ mehˇ shuiˇ shuiˇ tawˆ-awˇ, gaˇ ma sheuˬ bahˬ gʼeh tehꞈ-a.

²⁵Naˇ haˬ-awˬ. Aˇ yamˬ maˬ keuˆ laˇ mi naˇ-ehˇ, gaˇ kawˆ heu deuˬ naw maꞈ-ahˇ ngaˇ ehˇ nehˬ taˬ-eu ma.

²⁶“‘Haw le-awˬ. Aˬ yawꞈ bawˇ tsahˬ bawˇ dahˇ-ahˇ jawˇ luꞈ meh’ lehˇ, naw maꞈ-ahˇ aˬ cawˬ ehˇ laˇ ngeh, naw maꞈ taˬ iˇ. ‘Haw laˇ-awˬ. Aˬ yawꞈ kuˆ lawˆ laꞈ kʼoeˇ dzuˇ zaꞈ luꞈ meh’ lehˇ, aˬ cawˬ ehˇ gaˇ naw maꞈ taˬ jah.

²⁷Aˬ jeˬ miˇ neh ehˇ naˇ, Tsawˇhaˬ-euˬ Zaˬmaˇ oe ngeh, nahˇ ma doˆ kʼehˬ paw mˬ myawꞈ myawꞈ-eu nahˇ ma ga kʼehˬ paw bya keuˆ-iˇ gaˇ duˇ tehꞈ-a.

²⁸“Tsawˇ shiˇ kʼaˇ ga gaˇ kʼaˬ dzeˇ jeˬ shiˇ uiˬ le tehꞈ-a.

²⁹“Guˆ-eu gaˆ-eu aˇ nah aˇ yamˬ kʼoeˇ keuˆ le gʼaˬ-euˬ nehˬ-ehˇ, nahˇ ma zahˇ tsui ni pyeuꞈ-iˇ-awˇ, ba la yaw shehꞈ maˬ paˇ bya-ehˇ, aˬ guiˇ deuˬ mˬ kʼoeˇ taˆ neh ga ka le-awˇ, mˬ kʼoeˇ taˆ-euˬ baoˬ dawˬ tawˆ luꞈ nyeh laˇ yaˇ laˇ jiˇ tehꞈ-a.

³⁰Kʼoeˇ ngeh, Tsawˇhaˬ-euˬ Zaˬmaˇ oe luꞈ-eu gaˇ kawˆ mˬ kʼoeˇ taˆ bi siˬ bi mawˇ tehꞈ-a. Tsawˇhaˬ-euˬ Zaˬmaˇ mˬ dmˇ dziˬ-awˇ, baoˬ hawˇ-eu yaw shehꞈ kʼahˬ sehˇ tiˬ byah ni oe luꞈ gaˇ ya mawˇ ngeh, miˇ tsaˬ zaˬ deuˬ ngoeˇ tehꞈ-a.

³¹Daˇ heh baw-eu teˇ saˇ yaw kʼaˆ-ehˇ mahˇ doˆ laˇ-awˇ, aˬ yawꞈ-euˬ mˬ taˆ gʼaˬ kʼehˇ deuˬ-ahˇ miˇ ma oeˬ coeˇ oeˬ pyawˬ-ahˇ aˬ yawꞈ pyehˬ gʼeh-awˇ, mˬ dzeˇ miˇ dzeˇ heu coeˇ kʼoeˇ coeˇ doˆ ni jawˇ luꞈ-eu aˬ yawꞈ neh tseˇ doˆ-euˬ tsawˇ haˬ deuˬ bi sheuˬ uiˬ laꞈ tehꞈ-a.

³²“Siˬ guˬ aˇ bawˇ-ahˇ haw-awˇ, yamˬ law toꞈ-awˬ. Laꞈ myaˆ myaˆ laˇ-awˇ baw nmˬ nmˬ doˆ laˇ naˇ, jawˇ la doˆ le meh lehˇ naw maꞈ siˬ nya meh.

³³Kʼoeˇ loꞈ-ehˇ duˇ ni, gaˇ kawˆ kʼoeˇ deuˬ dawˬ tawˆ luꞈ-ahˇ naw maꞈ ya mawˇ ngeh, aˇ yamˬ peh le luꞈ-awˇ[38] , laˇ gʼoˆ dawˬ peh tah tehˬ le taˬ-euˬ gaˇ kawˆ naw maꞈ siˬ nya-awˬ.

³⁴Nymˬ-mˇ dehꞈ luꞈ-eu tsawˇ haˬ heu deuˬ maˬ shiˇ jiˇ mi naˆ-ehˇ, kʼoeˇ deuˬ dawˬ tawˆ luꞈ keuˆ le tehꞈ-a lehˇ, naw maꞈ-ahˇ ngaˇ maˇ jawˆ ni ehˇ-eu ma.

³⁵Mˬ hawˇ-eu miˇ tsaˬ maˬ jaˆ coeˇ ni ya byoˆ-iˇ tehꞈ-a. Ehˇ kʼawꞈ, ngaˬ-euˬ dawˬ tiˬ jawˇ-iˬ maˬ byoˆ-iˇ-aˇ.

³⁶Aˇ nah aˇ yamˬ kʼoeˇ aˬ myah keuˆ le-eu tsawˇ haˬ tiˬ gʼaˬ-iˬ maˬ siˬ nya-a. Mˬ taˆ gʼaˬ kʼehˇ deuˬ maˬ ehˇ, Zaˬmaˇ maˬ ehˇ[39] , maˬ siˬ nya-a. Aˬda Miˬyehˇ tiˬ gʼaˬ tehꞈ-ehˇ siˬ nya-eu meh.

³⁷Tsawˇhaˬ-euˬ Zaˬmaˇ zaꞈ le-eu-aˬ, Noˇaˬ-euˬ ziˇ-ahˇ keuˆ le-euˬ jeˬ-ahˇ duˇ tehꞈ-a.

³⁸Iˇ cuꞈ maˬ dahˬ pymˬ dah-euˬ jeˬ hu heu myaˆ nah laꞈ kʼoeˇ, Noˇaˬ lawˬ laꞈ kʼoeˇ daˆ uˇ leˇ ngeh nah keuˆ ni, tsawˇ haˬ zaˬ deuˬ dzaˬ byawˬ dawˇ byawˬ-awˇ, sheuˬ dahˬ dzaˬ taꞈ-eu maˬ tsehˆ leˇ-a.

³⁹Iˇ cuꞈ huiˬ le-awˇ, aˬ yawꞈ maꞈ-ahˇ dehˬ dzaˬ gʼeh ngeh keuˆ ni, aˬ jeˬ keuˆ le-euˬ aˬ yawꞈ maꞈ-ahˇ maˬ siˬ leˇ-a. Tsawˇhaˬ-euˬ Zaˬmaˇ oe ngeh kʼawꞈ, kʼoeˇ gaˇ duˇ tehꞈ-a.

⁴⁰Kʼoeˇ ngeh, tsawˇ haˬ nyiˬ gʼaˬ yaˇ mˬ luꞈ gaˇ, tiˬ gʼaˬ-ahˇ Tsawˇhaˬ-euˬ Zaˬmaˇ neh sheuˬ gʼeh-awˇ, tiˬ gʼaˬ-ahˇ byehˇ yaꞈ tehꞈ-a.

⁴¹Zaˬ miˬ zaˬ nyiˬ gʼaˬ cehˇ tahˬ tahˬ luꞈ gaˇ, tiˬ gʼaˬ-ahˇ sheuˬ gʼeh-awˇ, tiˬ gʼaˬ-ahˇ byehˇ yaꞈ tehꞈ-a.

⁴²“Naw maꞈ-euˬ Sahˬpaˬ aˬ geu ngeh nah oe-eu naw maꞈ maˬ siˬ nya-eu miˇ neh, yaw beuˇ beuˇ-ehˇ jawˇ-awˬ.

⁴³Smˇ kʼoeˬ kʼoeˬ laˇ-eu aˇ yamˬ-ahˇ nymˇ sahˇ gʼaˬ siˬ nya law nmˇ-aˬ, smˇ kʼoeˬ-ahˇ iˇ kahˇ laꞈ kʼoeˇ maˬ bi uˇ keuˆ laˇ ni, yaw beuˇ beuˇ-ehˇ jawˇ-awˇ loꞈ kʼmˬ taˬ-eu yaw duˬ baw tehꞈ-a lehˇ naw maꞈ siˬ nya meh.

⁴⁴Kʼoeˇ miˇ neh, naw maꞈ aˬ myah luꞈ lehˬ hmˬ dah taˬ-awˬ. Aˬ jeˬ miˇ neh ehˇ naˇ, naw maꞈ maˬ noeˬ maˬ duˬ-ehˇ jawˇ luꞈ ngeh, Tsawˇhaˬ-euˬ Zaˬmaˇ oe tehꞈ-a.

⁴⁵“Saˇ jaˇ ziꞈ-awˇ noeˬ dahˇ doe-eu zaˬ kʼaˆ aˬ geu gʼaˬ-a. Aˬ yawꞈ-aˬ, zaˬ kʼaˆ nui deuˬ-ahˇ aˇ yamˬ tsaˬ tsaˬ ni bi dzaˬ bi dawˇ-awˇ bi haw bi pyaˆ-eu gʼaˇ duˬ, baw leˬ neh kʼehˇ taˬ-euˬ zaˬ kʼaˆ kʼoeˇ gʼaˬ meh.

⁴⁶Baw leˬ gʼaˬ gʼoꞈ le ngeh, zaˬ kʼaˆ kʼoeˇ gʼaˬ kʼoeˇ loꞈ-ehˇ mˇ mˇ-ehˇ jawˇ-eu ya mawˇ naˇ, zaˬ kʼaˆ kʼoeˇ gʼaˬ aˇ naˆ ni guiˬ lahˬ huiˬ nmˇ.

⁴⁷Baw leˬ kʼoeˇ gʼaˬ zaˬ kʼaˆ kʼoeˇ gʼaˬ-ahˇ, aˬ yawꞈ-euˬ pyuˇ shuiˇ myawˬ gahˬ dawˬ tawˆ luꞈ kʼoeˇ taˆ haw-eu pyaˆ-eu gʼaˬ bi geuꞈ-eu yaw duˬ baw tehꞈ-a lehˇ, naw maꞈ-ahˇ ngaˇ ehˇ-eu ma.

⁴⁸Ehˇ kʼawꞈ, aˬ yawꞈ maˬ muiˬ-eu zaˬ kʼaˆ pyeuꞈ lawˬ naˇ, ‘Ngaˬ-euˬ baw leˬ yaw awˬ awˬ-ehˇ maˬ gʼoꞈ le-aˇ’ lehˇ, yawˬ haˇ yawˬ ha ehˇ tehꞈ-a.

⁴⁹Kʼoeˇ naˇ, aˬ yawꞈ-euˬ cawˬ zaˬ kʼaˆ kʼoeˇ deuˬ-ahˇ aˬ yawꞈ diˬ-awˇ, dzaˬ yehꞈ dawˇ yehꞈ-eu tsawˇ haˬ deuˬ nehˬ-ehˇ dzaˬ byawˬ dawˇ byawˬ byawˬ byawˬ-ehˇ jawˇ naˇ,

⁵⁰tiˬ nah keuˆ laˇ ngeh, zaˬ kʼaˆ kʼoeˇ gʼaˬ maˬ noeˬ maˬ duˇ-ehˇ jawˇ gaˇ, baw leˬ gʼaˬ gʼoꞈ keuˆ le tehꞈ-a.

⁵¹Kʼoeˇ ngeh jawˇ, baw leˬ gʼaˬ neh zaˬ kʼaˆ kʼoeˇ gʼaˬ-ahˇ shiˇ taw tehˬ ni diˬ-awˇ, awꞈ-aˬ tahˬ kʼoˬ-ahˇ duˇ-eu tsawˇ haˬ deuˬ[40] ya mˇ-eu shaˬ zahˬ aˬ yawꞈ-ahˇ bi mˇ tehꞈ-a. Kʼoeˇ gaˇ, aˬ yawꞈ ngoeˇ-awˇ seuˬ teuꞈ teuꞈ-ehˇ ya jawˇ tehꞈ-a.