Read Akha Maꞈtehˬ 26 Bible Online

Maꞈtehˬ 26 - Akha bible

Maꞈtehˬ 26

¹Yeˬsuˇ gaˇ kawˆ kʼoeˇ deuˬ dawˬ tawˆ luꞈ mehˬ nehˬ tsoˆ nehˬ gʼaˬ ngeh, zaˬ lahˇ deuˬ-ahˇ heu loꞈ-ehˇ ehˇ nehˬ-euˬ meh.

²“Nyiˬ nah dzeuˇ naˇ, Baˬsaˬkaˬ Bawˬ-iˬ gʼeh-eu aˇ yamˬ keuˆ le-euˬ naw maꞈ siˬ nya meh. Kʼoeˇ ngeh, Tsawˇhaˬ-euˬ Zaˬmaˇ-ahˇ laꞈ yaꞈ kʼoeˇ taˆ bi taꞈ sehꞈ-eu gʼaˇ duˬ a nehˬ tehꞈ-a.”

³Kʼoeˇ naˇ, piˇ ma aˬ yuiꞈ gʼaˬ hawˇ-eu miˇ kʼahˬ zaˬ-euˬ aˬ yuiꞈ aˬ tsu deuˬ, Piˇ ma Yaw huiˬ gʼaˬ pyeuꞈ-eu Gaˬyaˬpaˇ-euˬ nymˇ-ahˇ uiˬ leˇ-euˬ meh.

⁴Yeˬsuˇ-ahˇ ciˬ cuˇ ni paꞈ-awˇ sehꞈ-eu gʼaˇ duˬ, aˬ yawꞈ maꞈ bawˬ kʼoeˬ-euˬ meh.

⁵Aˬ yawꞈ maꞈ ehˇ-eu, “Bawˬ-iˬ gʼeh luꞈ ngeh, aˬ dui maꞈ aˬ yawꞈ-ahˇ maˬ nyehꞈ nya nga siˬ. Kʼoeˇ loꞈ-ehˇ jahˇ naˇ, miˇ kʼahˬ zaˬ luiˬ gʼa laˇ gaˇ ya guˆ nga.”

⁶Beˬtaˬniˇ pu-ahˇ jawˇ-eu Siˇmoˬ lehˇ myahˇ-euˬ coiˬ doi tiˬ gʼaˬ-euˬ nymˇ-ahˇ Yeˬsuˇ jawˇ luꞈ-eu meh.

⁷Yeˬsuˇ hawˬ jawˬ jawˬ luꞈ ngeh, zaˬ miˬ zaˬ tiˬ gʼaˬ aˇ poeˬ kʼaˆ dui dui-eu tsiˇ yaw saw jeˬ dahˬ-eu lo pyuˇ maˇ tsaꞈ ciˬ laꞈ-awˇ, Yeˬsuˇ-euˬ uˬ duˬ-ahˇ shehˆ daˆ nehˬ-euˬ meh.

⁸Zaˬ lahˇ deuˬ kʼoeˇ gaˇ mawˇ ngeh, nui ma laꞈ kʼoeˇ maˬ jawˇ tehˬ coeˇ-ehˇ ehˇ-eu, “Aˬ jeˬ miˇ neh aˇ poeˬ teu naˆ naˆ-ehˇ kʼaˆ-eu jeˬ-ahˇ teu loꞈ-ehˇ shehˆ cawˆ te.

⁹Tsiˇ teu ahˬ law nmˇ-aˬ, pyuˇ gʼawˬ mya ni za tehꞈ-a. Pyuˇ kʼoeˇ yuˇ-awˇ shaˬ zaˬ zahˬ zaˬ deuˬ-ahˇ caw ba nehˬ law nmˇ-aˬ, aˇ naˆ ni gaˇ dahˇ tsoeˬ leˇnmˇ.”

¹⁰Aˬ yawꞈ maꞈ kʼoeˇ loꞈ-ehˇ ehˇ luꞈ-eu Yeˬsuˇ siˬ nya-awˇ, heu loꞈ-ehˇ ehˇ nehˬ-euˬ meh. “Aˬ jeˬ miˇ neh zaˬ miˬ zaˬ teu gʼaˬ-ahˇ naw maꞈ laˆ bahˬ te. Aˬ yawꞈ ngaˬ-ahˇ heu loꞈ-ehˇ jahˇ nehˬ laꞈ-euˬ heu-aˬ, muiˬ dui dui meh.

¹¹Shaˬ-eu zahˬ-eu tsawˇ haˬ deuˬ naw maꞈ nehˬ-ehˇ aˬ myah luꞈ jawˇ tehꞈ-a. Ehˇ kʼawꞈ, ngaˇ naw maꞈ nehˬ-ehˇ aˬ myah luꞈ jawˇ-eu maˬ ngeuˇ.

¹²Aˬ yawꞈ heu loꞈ-ehˇ jahˇ-eu-aˬ, ngaˬ-euˬ gʼawˇ mawˇ-ahˇ lmˬ bymˇ laꞈ kʼoeˇ bi baꞈ pahˬ-eu gʼaˇ duˬ, tsiˇ yaw saw jeˬ shehˆ daˆ-awˇ laˆ saˆ nehˬ laꞈ-euˬ jeˬ pyeuꞈ-eu meh.

¹³Miˇ tsaˬ tahˬ kʼawˇ heu doe ni, Laˬ kʼaˬ cehˇ-eu Guiˬ lahˬ dawˬ heu kʼaˇ mehˬ keuˆ gaˇ, zaˬ miˬ zaˬ heu gʼaˬ neh mˇ-euˬ gaˇ kawˆ heu-ahˇ aˬ cawˬ ja-awˇ, aˬ yawꞈ-ahˇ noeˬ keuˆ tehꞈ-a lehˇ, naw maꞈ-ehˇ ngaˇ maˇ jawˆ ni ehˇ-eu ma.”

¹⁴Kʼoeˇ naˇ, zaˬ lahˇ tseˇ nyiꞈ gʼaˬ laꞈ kʼoeˇ, Yuˇdaˆ Iˇsaˬgaˬliˬoˆ lehˇ myahˇ-euˬ gʼaˬ, piˇ ma aˬ yuiꞈ deuˬ jawˇ gaˇ le-euˬ meh.

¹⁵“Yeˬsuˇ-ahˇ naw maꞈ-euˬ aˬ laꞈ laꞈ kʼoeˇ a nehˬ naˇ, naw maꞈ ngaˬ-ahˇ aˬ jeˬ biꞈ te” lehˇ, piˇ ma aˬ yuiꞈ kʼoeˇ deuˬ-ahˇ aˬ yawꞈ naˇ haˬ ngeh, aˬ yawꞈ maꞈ aˬ yawꞈ-ahˇ pyuˇ maˇ byaˆ smˬ tseˇ byaˆ biꞈ nehˬ-euˬ meh.

¹⁶Kʼoeˇ ngeh nah neh naˇ, Yeˬsuˇ-ahˇ aˬ yawꞈ maꞈ-euˬ aˬ laꞈ laꞈ kʼoeˇ a nehˬ-eu gʼaˇ duˬ aˬ myah yehꞈ laˇ nga lehˇ, Yuˇdaˆ jawˬ luꞈ-eu meh.

¹⁷Dehˬ tseˬ maˬ ahˇ-eu Kaˬ muˇ dzaˬ-eu Bawˬ-iˬ aˇ dahˬ beh ngeh nah, zaˬ lahˇ deuˬ Yeˬsuˇ jawˇ gaˇ laˇ-awˇ ehˇ-eu, “Nawˇ nga maꞈ-ahˇ Baˬsaˬkaˬ dzaˬ byawˇ aˬ gaˇ bi lehˬ hmˬ mawꞈ-eu nya.”

¹⁸Aˬ yawꞈ ehˇ-eu, “Meuˬ-ahˇ jawˇ-eu tsawˇ haˬ tiˬ gʼaˬ jawˇ gaˇ iˇ-awˇ, ‘Saˬ laˬ nyaˇ-eu nawˬ-euˬ nymˇ-ahˇ Baˬsaˬkaˬ Bawˬ-iˬ gʼeh mawꞈ nya jeˇ’ lehˇ ehˇ nehˬ-iˇ-awˬ.”

¹⁹Yeˬsuˇ neh ehˇ nehˬ-euˬ loꞈ-ehˇ zaˬ lahˇ deuˬ mˇ-awˇ, Baˬsaˬkaˬ dzaˬ byawˇ laˆ dawˆ-euˬ meh.

²⁰Uˬ ciꞈ uˬ taw taw le ngeh, Yeˬsuˇ hawˇ-eu zaˬ lahˇ tseˇ nyiꞈ gʼaˬ hawˬ jawˬ jawˬ leˇ-euˬ meh.

²¹Aˬ yawꞈ maꞈ dzaˬ luꞈ dawˇ luꞈ ngeh Yeˬsuˇ ehˇ-eu, “Naw maꞈ laꞈ kʼoeˇ tiˬ gʼaˬ ngaˬ-ahˇ ahˬ dzaˬ tehꞈ-a lehˇ, naw maꞈ-ahˇ ngaˇ maˇ jawˆ ni ehˇ-eu ma.”

²²Zaˬ lahˇ deuˬ noeˬ shaˬ-eu laꞈ kʼoeˇ, “Sahˬpaˬ-oˇ, ngaˬ-ahˇ ehˇ te loˇ” lehˇ, tiˬ gʼaˬ saˇ-iˬ tiˬ gʼaˬ aˬ yawꞈ-ahˇ naˇ haˬ-eu meh.

²³Yeˬsuˇ ehˇ-eu,“Ngaˬ nehˬ-ehˇ gʼawˬ nyoeˇ kʼmˬ maˬ taꞈ-eu gʼaˬ, ngaˬ-ahˇ aˬ cawˬ-euˬ aˬ laꞈ laꞈ kʼoeˇ a nehˬ tehꞈ-a.

²⁴Tsawˇhaˬ-euˬ Zaˬmaˇ-aˬ, Jaˇliꞈ laꞈ kʼoeˇ ehˇ taˬ-euˬ loꞈ-ehˇ ya shiˇ tehꞈ-a. Ehˇ kʼawꞈ, Tsawˇhaˬ-euˬ Zaˬmaˇ-ahˇ ahˬ dzaˬ-euˬ kʼoeˇ gʼaˬ ya noeˬ shaˬ dui dui tehꞈ-a. Aˬ yawꞈ maˬ dehꞈ le-euˬ law nmˇ-aˬ, aˬ yawꞈ gʼaˇ duˬ muiˬ dzehˬ tehꞈ-a.”

²⁵Yeˬsuˇ-ahˇ aˬ cawˬ-euˬ aˬ laꞈ laꞈ kʼoeˇ a nehˬ-euˬ gʼaˬ pyeuꞈ-eu Yuˇdaˆ ehˇ-eu, “Saˬ laˬ-oˇ, ngaˇ-a loˇ.” Yeˬsuˇ ehˇ-eu, “Nawˇ ehˇ ngaˇ tawˇ.”

²⁶Aˬ yawꞈ maꞈ ciꞈ hawˬ dzaˬ luꞈ ngeh, Yeˬsuˇ kaˬ muˇ yuˇ-awˇ, Miˬyehˇ-euˬ guiˬ lahˬ-ahˇ ja ceuˬ-euˬ meh. Kʼoeˇ naˇ, kaˬ muˇ kʼoeˇ ngawˬ pyehˬ-awˇ, “Heu-aˬ, ngaˬ-euˬ gʼawˇ mawˇ ma. Yuˇ-awˇ dzaˬ-awˬ” lehˇ ehˇ-awˇ biˇ nehˬ-euˬ meh.

²⁷Kʼoeˇ naˇ, aˬ yawꞈ kʼmˬ maˬ ciˬ-awˇ, Miˬyehˇ-euˬ guiˬ lahˬ-ahˇ ja ceuˬ-euˬ meh. Kʼoeˇ naˇ, aˬ yawꞈ maꞈ-ahˇ ciˬ nehˬ-awˇ, heu loꞈ-ehˇ ehˇ nehˬ-euˬ meh. “Yawˬ gʼaˬ na luꞈ ciˬ-awˇ dawˇ-awˬ.

²⁸Heu-aˬ, tsawˇ haˬ gʼawˬ mya ni-euˬ iˬ baˇ bi buˬ bi law-iˇ-eu gʼaˇ duˬ yoeˇ le-euˬ, Miˬyehˇ-euˬ dawˬ ma saˇ jaˇ-ahˇ taꞈ-eu ngaˬ-euˬ shiˬ ma.

²⁹Ngaˬ Da-euˬ Miˇkʼahˬ laꞈ kʼoeˇ, naw maꞈ nehˬ-ehˇ aˬ gaꞈ dzaˇ uiˇ yaw shuiꞈ ya dawˇ taꞈ-eu aˇ nah maˬ keuˆ laˇ kʼoeˇ keuˆ ni, aˬ gaꞈ dzaˇ uiˇ heu ngaˇ maˬ paˇ dawˇ ma lehˇ, naw maꞈ-ahˇ ngaˇ ehˇ-eu ma.”

³⁰Kʼoeˇ naˇ, aˬ yawꞈ maꞈ ja ceuˬ-eu caˇ dawˬ tiˬ bymˇ caˇ gʼaˬ-awˇ, Saˬloˬ gawˬ jawˬ-ahˇ le-euˬ meh.

³¹Kʼoeˇ naˇ, aˬ yawꞈ maꞈ-ahˇ Yeˬsuˇ heu loꞈ-ehˇ ehˇ nehˬ-euˬ meh. “Nymˇ ciꞈ naw maꞈ dawˬ tawˆ luꞈ ngaˬ-ahˇ byehˇ dzeh-awˇ cehˆ tehꞈ-a. Aˬ jeˬ miˇ neh ehˇ naˇ, ‘Yawˇ bo-eu yaw sahˇ-ahˇ Miˬyehˇ sehꞈ-awˇ, yawˇ yawˇ maꞈ cehˆ byaˆ jiˇ tehꞈ-a’ lehˇ, Jaˇliꞈ laꞈ kʼoeˇ ehˇ taˬ-euˬ meh.

³²Ehˇ kʼawꞈ, ngaˇ shiˇ-euˬ kʼawꞈ, Miˬyehˇ ngaˬ-ahˇ paˇ bi gʼoꞈ dehꞈ laˇ-awˇ, naw maꞈ-euˬ mehˬ hu Gaˬliˬlehˇ miˇ kʼahˬ-ahˇ ngaˇ iˇ tawˬ ma.”

³³Beˬtuˆluˆ Yeˬsuˇ-ahˇ ehˇ-eu, “Aˬ cawˬ nawˬ-ahˇ byehˇ dzeh-awˇ cehˆ jiˇ kʼawꞈ, ngaˇ nawˬ-ahˇ maˬ byehˇ dzeh.”

³⁴Yeˬsuˇ Beˬtuˆluˆ-ahˇ ehˇ nehˬ-eu, “Nymˇ ciꞈ ya poeˇ maˬ doeˇ laˇ mi naˆ-ehˇ, nawˇ ngaˬ-ahˇ maˬ siˬ lehˇ smˬ poˆ keuˆ ni pyehˇ tehꞈ-a lehˇ, ngaˇ nawˬ-ahˇ maˇ jawˆ ni ehˇ-eu ma.”

³⁵Beˬtuˆluˆ ehˇ-eu,“Ngaˇ nawˬ nehˬ-ehˇ ya shiˇ paˬ-ehˇ tsaˬ laˇ kʼawꞈ, ‘Nawˬ-ahˇ ngaˇ maˬ siˬ’ lehˇ tiˬ jawˇ-iˬ maˬ ehˇ.” Zaˬ lahˇ dawˬ tawˆ luꞈ kʼawꞈ, kʼoeˇ loꞈ-ehˇ ehˇ-eu meh.

³⁶Kʼoeˇ naˇ, Yeˬsuˇ hawˇ-eu aˬ yawꞈ-euˬ zaˬ lahˇ deuˬ, Geˬseˬmaˬniˇ lehˇ kuˇ-eu jawˇ duˬ-ahˇ iˇ-awˇ, Zaˬ lahˇ deuˬ-ahˇ Yeˬsuˇ ehˇ nehˬ-eu, “Naw maꞈ heu gaˇ nuiˇ tawˬ-awˬ. Ngaˇ kʼoeˇ paw dzeˇ guiˬ lahˬ shaˇ-iˇ la.”

³⁷Beˬtuˆluˆ hawˇ-eu Zeˬbeˬdehˇ-euˬ aˬ li nyiˬ gʼaˬ-ahˇ aˬ yawꞈ sheuˬ-awˇ iˇ-euˬ meh. Aˬ yawꞈ noeˬ shaˬ dui dui-awˇ, nui ma laꞈ kʼoeˇ shaˬ zahˬ mˇ dui dui luꞈ-eu meh.

³⁸Aˬ ha smˇ gʼaˬ-ahˇ aˬ yawꞈ ehˇ nehˬ-eu, “Ngaˬ-euˬ nui ma shaˬ zahˬ mˇ-eu shiˇ taw tehˬ ni miˇ-a. Heu gaˇ jawˇ-awˇ, ngaˬ nehˬ-ehˇ loꞈ tawˬ-awˬ.”

³⁹Aˬ yawꞈ ui cuiˆ iˇ jiˆ-awˇ, baˬ ba miˇ tsa tuˆ ni awˆ byaˆ-awˇ, heu loꞈ-ehˇ guiˬ lahˬ shaˇ-euˬ meh. “Ngaˬ Da-oˇ, shaˬ zahˬ naꞈ dui dui-eu kʼmˬ maˬ heu-ahˇ dzeuˇ-iˇ nya naˇ, bi dzeuˇ-iˇ laꞈ. Ehˇ kʼawꞈ, ngaˬ-euˬ nui noeˬ taˬ bi pyeuꞈ. Nawˬ-euˬ nui noeˬ bi pyeuꞈ-awˬ.”

⁴⁰Kʼoeˇ naˇ, zaˬ lahˇ kʼoeˇ smˇ gʼaˬ jawˇ gaˇ aˬ yawꞈ gʼoꞈ-iˇ ngeh, yuꞈ kʼaˆ taˬ-euˬ gaˇ ya mawˇ-euˬ meh. Aˬ yawꞈ Beˬtuˆluˆ-ahˇ ehˇ nehˬ-eu, “Nawˬ ha smˇ gʼaˬ naˬ liˬ tiˬ laꞈ byah ni tehꞈ-ehˇ kʼawꞈ ngaˬ nehˬ-ehˇ maˬ loꞈ caw nya ni aˬ joˆ-ehˇ gʼeh ta.

⁴¹Muˇ juˇ juˇ-eu mehˬ nah naw maꞈ maˬ ya caw teh gʼeh ni, guiˬ lahˬ shaˇ-awˇ yaw beuˇ beuˇ-ehˇ jawˇ-awˬ. Nui ma keuˆ kʼawꞈ, gʼawˇ mawˇ gʼaˬ baˬ meh.”

⁴²Yeˬsuˇ tiˬ poˆ paˇ iˇ-awˇ, “Ngaˬ Da-oˇ, shaˬ zahˬ naꞈ dui dui-eu kʼmˬ maˬ heu-ahˇ ngaˇ maˬ dawˇ-ehˇ maˬ bi dzeuˇ-iˇ nya naˇ, nawˇ nui ma tsaˬ-eu loꞈ-ehˇ bi pyeuꞈ-awˬ” lehˇ guiˬ lahˬ paˇ shaˇ poˆ-iˇ-euˬ meh.

⁴³Aˬ yawꞈ tiˬ poˆ paˇ gʼoꞈ le ngeh, zaˬ lahˇ kʼoeˇ smˇ gʼaˬ myaˆ nuiˆ maˬ byeh diˇ coeˇ-ehˇ yuꞈ kʼaˆ taˬ-euˬ gaˇ paˇ ya mawˇ-euˬ meh.

⁴⁴Aˬ yawꞈ maꞈ jawˇ gaˇ neh Yeˬsuˇ paˇ doˆ-iˇ-awˇ, smˬ poˆ tiˬ poˆ guiˬ lahˬ paˇ shaˇ-iˇ-euˬ meh.

⁴⁵Kʼoeˇ naˇ, zaˬ lahˇ deuˬ jawˇ gaˇ aˬ yawꞈ paˇ gʼoꞈ le-awˇ, heu loꞈ-ehˇ ehˇ nehˬ-euˬ meh. “Naw maꞈ nymˬ-mˇ keuˆ ni yuꞈ kʼaˆ-awˇ gʼaˬ naˬ naˬ luꞈ te siˬ loˇ. Haw yawˬ. Tsawˇhaˬ-euˬ Zaˬmaˇ-ahˇ iˬ baˇ zaˬ-euˬ aˬ laꞈ laꞈ kʼoeˇ a nehˬ-eu aˇ yamˬ keuˆ le-euˬ meh.

⁴⁶Tuˇ-awˬ. Iˇ kaˇ-euˇ. Haw sheˇ. Ngaˬ-ahˇ ahˬ dzaˬ-eu lehˇ gʼeh-eu gʼaˬ heu gaˇ oe keuˆ taˬ-euˬ ngaˇ.”

⁴⁷Yeˬsuˇ dawˬ ngehˬ gʼaˬ-eu maˬ dah ni, zaˬ lahˇ tseˇ nyiꞈ gʼaˬ laꞈ kʼoeˇ ahˇ-eu Yuˇdaˆ lehˇ myahˇ-euˬ gʼaˬ oe keuˆ-euˬ meh. Mi cehˇ hawˇ-eu daˇ kawˬ baꞈ luꞈ-eu tsawˇ haˬ aˇ maꞈ maꞈ ma tiˬ maꞈ, aˬ yawꞈ nehˬ-ehˇ oe-euˬ meh. Piˇ ma aˬ yuiꞈ deuˬ hawˇ-eu aˬ yuiꞈ aˬ tsu geuꞈ-eu deuˬ neh aˬ yawꞈ maꞈ-ahˇ kʼehˇ gʼeh leꞈ-euˬ meh.

⁴⁸“Ngaˇ mehˬ cuˇ cuˇ nehˬ-eu gʼaˬ-aˬ, naw maꞈ poˆ luꞈ-eu kʼoeˇ gʼaˬ meh de. Kʼoeˇ gʼaˬ-ahˇ nyehꞈ-awˬ” lehˇ, Yeˬsuˇ-ahˇ ahˬ dzaˬ taˬ-euˬ zaˬ lahˇ kʼoeˇ gʼaˬ neh, tsawˇ haˬ kʼoeˇ maꞈ-ahˇ ehˇ nehˬ taˬ-euˬ meh.

⁴⁹Yuˇdaˆ-aˬ, Yeˬsuˇ jawˇ gaˇ dawˇ coe ni iˇ-awˇ, “Saˬ laˬ-oˇ, nawˬ-ahˇ nui saˇ oꞈ luꞈ-uˇ” lehˇ ehˇ-awˇ, mehˬ cuˇ cuˇ nehˬ-euˬ meh.

⁵⁰Yeˬsuˇ aˬ yawꞈ-ahˇ ehˇ nehˬ-eu, “Cawˬ-oˇ, nawˇ mˇ luꞈ-eu jeˬ yaw kawˇ-ehˇ mˇ-awˬ.” Kʼoeˇ naˇ, aˬ yawꞈ maꞈ oe-awˇ, Yeˬsuˇ-ahˇ nyehꞈ-awˇ, deuˇ geuˆ ni dawꞈ cuꞈ taˬ-euˬ meh.

⁵¹Yeˬsuˇ nehˬ-ehˇ jawˇ luꞈ-eu tiˬ gʼaˬ mi cehˇ gʼawˇ doˆ-awˇ, Piˇ ma Yaw huiˬ gʼaˬ-euˬ zaˬ kʼaˆ-ahˇ coeˇ-awˇ, naˬ paꞈ coeˇ tsehˆ-euˬ meh.

⁵²Yeˬsuˇ ehˇ-eu, “Nawˬ-euˬ mi cehˇ-ahˇ tawˆ kʼawˆ laꞈ kʼoeˇ soeˬ ahˇ kʼoꞈ-awˬ. Mi cehˇ-ahˇ nui ma huiˬ-eu tsawˇ haˬ dawˬ tawˆ luꞈ, mi cehˇ laꞈ-ahˇ ya shiˇ tehꞈ-a.

⁵³Ngaˬ-ahˇ bi caw ba le-eu gʼaˇ duˬ, ngaˬ Da-ahˇ ngaˇ kuˇ gaˬ nya-awˇ, mˬ taˆ gʼaˬ kʼehˇ guiˇ maꞈ tseˇ nyiꞈ maꞈ dzehˬ ni, ngaˇ jawˇ gaˇ aˬ yawꞈ tiˬ poˆ tehꞈ-ehˇ pyehˬ leꞈ nya meh lehˇ, nawˇ maˬ siˬ nya te loˇ.

⁵⁴Ehˇ kʼawꞈ, kʼoeˇ loꞈ-ehˇ jahˇ naˇ, heu loꞈ-ehˇ pyeuꞈ laˇ meh ehˇ taˬ-euˬ Jaˇliꞈ dawˬ kawˬ kʼoeˇ aˬ joˆ-ehˇ byah laˇ nya nmˇ.”

⁵⁵Kʼoeˇ naˇ, tsawˇ haˬ aˇ maꞈ kʼoeˇ maꞈ-ahˇ Yeˬsuˇ heu loꞈ-ehˇ ehˇ nehˬ-euˬ meh. “Smˇ kʼoeˬ tahˇ joe-ahˇ nyehꞈ-eu loꞈ-ehˇ, naw maꞈ mi cehˇ hawˇ-eu daˇ kawˬ baꞈ-awˇ ngaˬ-ahˇ ya nyehꞈ le ta loˇ. Uˬ duˬ tahˬ nymˇ nymˇ ma laꞈ kʼoeˇ ngaˇ yawˬ nah na luꞈ nuiˇ-awˇ mehˬ nehˬ tsoˆ nehˬ luꞈ kʼawꞈ, naw maꞈ ngaˬ-ahˇ maˬ nyehꞈ le-a.

⁵⁶Ehˇ kʼawꞈ, Miˬyehˇ gʼaˇ duˬ ngehˬ dah-eu deuˬ neh Jaˇliꞈ laꞈ kʼoeˇ kʼaˇ boꞈ taˬ-euˬ loꞈ-ehˇ byah laˇ ni, heu loꞈ-ehˇ bi pyeuꞈ laˇ-euˬ meh.” Kʼoeˇ ngeh, zaˬ lahˇ dawˬ tawˆ luꞈ, aˬ yawꞈ-ahˇ byehˇ dzeh yaꞈ-awˇ cehˆ jiˇ-euˬ meh.

⁵⁷Yeˬsuˇ-ahˇ nyehꞈ-euˬ tsawˇ haˬ kʼoeˇ deuˬ, Yeˬsuˇ-ahˇ Piˇ ma Yaw huiˬ gʼaˬ pyeuꞈ-eu Gaˬyaˬpaˇ-euˬ nymˇ-ahˇ sheuˬ gʼeh-euˬ meh. Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu aˬ yuiꞈ aˬ tsu geuꞈ luꞈ-eu deuˬ, kʼoeˇ gaˇ uiˬ leˇ taˬ-euˬ meh.

⁵⁸Beˬtuˆluˆ-aˬ, naˇ kʼah paw ui cuiˆ gaˇ mahˇ kaˬ gaˇ cah-awˇ, Piˇ ma Yaw huiˬ gʼaˬ-euˬ nymˇ-ahˇ gawˬ lahˇ taˬ-euˬ laꞈ kʼoeˇ paw keuˆ ni caw teh keuˆ gʼeh-euˬ meh. Aˬ yawꞈ lahˇ laꞈ kʼoeˇ uˇ leˇ-awˇ, Yeˬsuˇ-ahˇ aˬ cawˬ aˬ joˆ-ehˇ jahˇ nehˬ-eu tiˬ saˬ tiˬ li haw-eu gʼaˇ duˬ, kʼoeˇ gaˇ loꞈ piˇ-eu yehˇ deuˬ nehˬ-ehˇ ga dzuˇ leˇ-euˬ meh.

⁵⁹Piˇ ma aˬ yuiꞈ deuˬ hawˇ-eu, Baꞈ dzah[41] aˇ muˇ muˇ lah-ehˇ, Yeˬsuˇ-ahˇ yaw lehˬ poˆ doˆ-awˇ sehꞈ-eu lehˇ leh jeh-eu meh.

⁶⁰Ehˇ kʼawꞈ, aˬ yawꞈ maꞈ Yeˬsuˇ-euˬ yaw lehˬ maˬ poˆ doˆ nya-a. Tsawˇ haˬ gʼawˬ mya ni mehˬ shi paw doˆ laˇ-awˇ, jaˬ myawꞈ myawꞈ-ehˇ ja laˇ kʼawꞈ, aˬ yawꞈ-euˬ yaw lehˬ maˬ poˆ doˆ nya-a. Aˇ saˬ saˬ laˇ jawˬ-ehˇ, tsawˇ haˬ nyiˬ gʼaˬ mehˬ shi paw doˆ laˇ-euˬ meh.

⁶¹Aˬ yawꞈ nyaꞈ ehˇ-eu, “Tsawˇ haˬ teu gʼaˬ, Miˬyehˇ-euˬ Uˬ duˬ tahˬ nymˇ nymˇ ma-ahˇ deh pyaˆ dzeh jiˇ-awˇ, smˬ nah laꞈ kʼoeˇ paˇ tsoˆ kʼoꞈ nya ma lehˇ ehˇ-eu meh.”

⁶²Kʼoeˇ ngeh, Piˇ ma Yaw huiˬ gʼaˬ tuˇ laˇ-awˇ ehˇ-eu, “Tsawˇ haˬ teu nyiˬ gʼaˬ nawˬ-ahˇ teu loꞈ-ehˇ ehˇ laˇ gaˇ, nawˇ ehˇ kʼoꞈ nehˬ-eu dawˬ maˬ jaˆ loˇ.”

⁶³Ehˇ kʼawꞈ, Yeˬsuˇ dawˬ maˬ ngehˬ ni ciˬ cuˇ ni jawˇ-eu meh. Piˇ ma Yaw huiˬ gʼaˬ dawˬ tiˬ poˆ paˇ ehˇ-eu, “Dehꞈ luꞈ-eu Miˬyehˇ-euˬ tsawˇ myahˇ uˬ moˆ, ngaˇ nawˬ-ahˇ heu loꞈ-ehˇ bi kamˬ-eu ma. Nawˇ, Ka li lehˇ ehˇ-eu Miˬyehˇ-euˬ Zaˬmaˇ ngeuˇ ma loˇ.”

⁶⁴Yeˬsuˇ ehˇ-eu, “Nawˇ ehˇ luꞈ ngaˇ tawˇ. Ehˇ kʼawꞈ, naw maꞈ dawˬ tawˆ luꞈ-ahˇ ngaˇ heu loꞈ-ehˇ ehˇ-eu ma. Aˬ kaˇ naˇ, Tsawˇhaˬ-euˬ Zaˬmaˇ-aˬ, Baoˬ huiˬ-eu Miˬyehˇ-euˬ aˇ maˇ paw nuiˇ luꞈ gaˇ maˬ ehˇ, mˬ taˆ mˬ dmˇ dziˬ-awˇ oe gaˇ maˬ ehˇ, naw maꞈ ya mawˇ tehꞈ-a.”

⁶⁵Dawˬ kʼoeˇ dawˬ-ahˇ ya gaˬ ngeh, Piˇ ma Yaw huiˬ gʼaˬ yawˬ ha dm luꞈ-eu mehˬ tsoeˬ gʼeu pyaˬ-awˇ ehˇ-eu, “Tsawˇ haˬ heu gʼaˬ Miˬyehˇ-ahˇ yehˬ bawˬ sehˇ lu-ehˇ ehˇ-euˬ meh. Saˇ kiˇ yawˬ jeˬ yawˬ maˬ paˇ loˬ meh. Aˬ yawꞈ Miˬyehˇ-euˬ tsawˇ myahˇ-ahˇ yehˬ bawˬ sehˇ lu-ehˇ ehˇ-euˬ naw maꞈ ya gaˬ-euˬ meh.

⁶⁶Naw maꞈ-ahˇ aˬ joˆ-ehˇ noeˬ-eu nya.” Aˬ yawꞈ maꞈ ehˇ-eu, “Aˬ yawꞈ lehˬ dui dui-awˇ, shiˇ-eu geuˇ meh.”

⁶⁷Kʼoeˇ naˇ, aˬ yawꞈ maꞈ aˬ yawꞈ-euˬ myaˆ pyawˬ-ahˇ duˬ kʼaˬ kʼa daˆ-awˇ diˬ-euˬ meh. Tiˬ paˆ na deuˬ aˬ yawꞈ-euˬ baˬ ba-ahˇ tehˆ-awˇ heu loꞈ-ehˇ naˬ gʼa nehˬ-euˬ meh.

⁶⁸“Ka li-oˇ, Miˬyehˇ gʼaˇ duˬ ngehˬ dah nya-eu jeˬ maˇ-iˬ, nawˬ-ahˇ naˬ tehˆ tehˆ nehˬ laꞈ-euˬ aˬ suˇ gʼaˬ nga lehˇ tsaˬ haw sheˇ.”

⁶⁹Nymˇ tiˬ jawˬ lahˇ gawˬ taˬ-euˬ laꞈ kʼoeˇ, gaˇ dzeˇ paw Beˬtuˆluˆ nuiˇ luꞈ ngeh, zaˬ miˬ zaˬ zaˬ kʼaˆ tiˬ gʼaˬ aˬ yawꞈ jawˇ gaˇ oe-awˇ ehˇ-eu, “Nawˇ jiˇ, Gaˬliˬlehˇ tsawˇ haˬ Yeˬsuˇ nehˬ-ehˇ jawˇ-euˬ tsawˇ haˬ meh.”

⁷⁰Aˬ yawꞈ maꞈ dawˬ tawˆ luꞈ-euˬ mehˬ shi Beˬtuˆluˆ tsawˇ pyehˇ pyehˇ-awˇ ehˇ-eu, “Nawˇ ehˇ-eu gaˇ kawˆ teu ngaˇ maˬ siˬ nya nya.”

⁷¹Kʼoeˇ naˇ, lahˇ laꞈ kʼoeˇ uˇ leˇ-eu gʼoˆ kʼehˬ dawˬ peh aˬ yawꞈ cehˆ jiˆ-iˇ-awˇ jawˇ-euˬ meh. Zaˬ miˬ zaˬ zaˬ kʼaˆ tiˬ gʼaˬ aˬ yawꞈ-ahˇ paˇ mawˇ-awˇ, kʼoeˇ gaˇ jawˇ-eu tsawˇ haˬ kʼoeˇ deuˬ-ahˇ ehˇ-eu, “Teu gʼaˬ Naˬzaˬlehˇ tsawˇ haˬ Yeˬsuˇ nehˬ-ehˇ jawˇ-euˬ tsawˇ haˬ meh.”

⁷²Beˬtuˆluˆ tsawˇ pyehˇ pyehˇ-awˇ paˇ ehˇ-eu, “Tsawˇ haˬ kʼoeˇ gʼaˬ-ahˇ ngaˇ maˬ siˬ lehˇ kamˬ peuˬ ma.”

⁷³Tiˬ kʼehˬ paˇ kaˇ-iˇ ngeh, kʼoeˇ gaˇ yawꞈ luꞈ-eu tsawˇ haˬ deuˬ Beˬtuˆluˆ jawˇ gaˇ oe-awˇ ehˇ-eu, “Ngeuˇ ngaˇ. Nawˇ jiˇ aˬ yawꞈ maꞈ laꞈ kʼoeˇ uˇ-eu tsawˇ haˬ ngaˇ. Nawˇ dawˬ ngehˬ gaˇ naˇ haˬ kʼawꞈ siˬ laˇ miˇ-a.”

⁷⁴Kʼoeˇ ngeh jawˇ, Beˬtuˆluˆ ehˇ-eu, “Ngaˇ jaˬ myawꞈ maˬ myawꞈ lehˇ kamˬ peuˬ ma. Ngaˇ jaˬ myawꞈ myawꞈ lawˬ naˇ, Miˬyehˇ ngaˬ-ahˇ kʼehˬ luꞈ-uˇ. Tsawˇ haˬ kʼoeˇ gʼaˬ-ahˇ ngaˇ maˇ maˇ ni maˬ siˬ nya nya.” Kʼoeˇ loꞈ-ehˇ ehˇ gʼaˬ-eu nehˬ-ehˇ, ya poeˇ doeˇ doˆ laˇ-euˬ meh.

⁷⁵Kʼoeˇ ngeh jawˇ, “Ya poeˇ maˬ doeˇ laˇ mi naˆ-ehˇ, nawˇ ngaˬ-ahˇ maˬ siˬ lehˇ smˬ poˆ keuˆ ni pyehˇ tehꞈ-a” lehˇ, Yeˬsuˇ neh aˬ yawꞈ-ahˇ ehˇ nehˬ-euˬ dawˬ kʼoeˇ dawˬ-ahˇ, Beˬtuˆluˆ noeˬ doˆ leˇ-euˬ meh. Kʼoeˇ naˇ, aˬ yawꞈ laꞈ nyiˇ iˇ doˆ-awˇ, ngoeˇ dui dui-euˬ meh.