Read Akha Maꞈtehˬ 9 Bible Online

Maꞈtehˬ 9 - Akha bible

Maꞈtehˬ 9

¹Kʼoeˇ naˇ, Yeˬsuˇ lawˬ kʼoeˇ laˇ-ahˇ paˇ dziˬ-awˇ, aˬ yawꞈ jawˇ-eu meuˬ-ahˇ gʼoꞈ tsehˆ-iˇ-euˬ meh.

²Kʼoeˇ ngeh, maˬ luˆ nya-ehˇ yuꞈ zaˇ kʼoeˇ taˆ bi yuꞈ taˬ-euˬ kuiˇ shiˇ laꞈ shiˇ shiˇ-euˬ tsawˇ haˬ tiˬ gʼaˬ-ahˇ, aˬ yawꞈ jawˇ gaˇ baꞈ ha le-euˬ meh. Baꞈ ha le-euˬ tsawˇ haˬ kʼoeˇ deuˬ-euˬ jah-eu nui ma-ahˇ Yeˬsuˇ ya mawˇ ngeh, kuiˇ shiˇ laꞈ shiˇ shiˇ-euˬ tsawˇ haˬ kʼoeˇ gʼaˬ-ahˇ, “Aˬ li-oˇ, tiˬjeˬ-iˬ taˬ noeˬ shaˬ. Nawˬ-euˬ iˬ baˇ-ahˇ Miˬyehˇ pyehˬ nehˬ gʼaˬ-euˬ meh lehˇ ngaˇ ehˇ-eu ma” lehˇ ehˇ nehˬ-euˬ meh.

³Kʼoeˇ ngeh, Zahˇ dawˬ kʼoꞈ dawˬ mehˬ-eu saˬ laˬ tiˬ paˆ na deuˬ-aˬ, “Tsawˇ haˬ heu gʼaˬ Miˬyehˇ-euˬ tsawˇ myahˇ ahˬ dzaˬ-eu ngaˇ” lehˇ, nui ma laꞈ kʼoeˇ noeˬ kʼoeˬ-euˬ meh.

⁴Ehˇ kʼawꞈ, aˬ yawꞈ maꞈ-euˬ nui ma laꞈ kʼoeˇ noeˬ luꞈ-eu jeˬ-ahˇ Yeˬsuˇ siˬ nya-awˇ, heu loꞈ-ehˇ ehˇ nehˬ-euˬ meh. “Aˬ jeˬ miˇ neh naw maꞈ-euˬ nui ma laꞈ kʼoeˇ maˬ muiˬ-eu jeˬ shaˇ noeˬ luꞈ te.

⁵‘Nawˬ-euˬ iˬ baˇ-ahˇ Miˬyehˇ pyehˬ nehˬ gʼaˬ-euˬ meh’ lehˇ ehˇ-eu hawˇ-eu, ‘Tuˇ laˇ-awˇ, gaˇ ma cah-awˬ’ lehˇ ehˇ-eu dawˬ heu nyiˬ dawˬ aˬ geu dawˬ awˬ dzehˬ ta.

⁶Tsawˇ haˬ-euˬ Zaˬmaˇ[11] -aˬ, miˇ tsaˬ heu kʼoeˇ taˆ iˬ baˇ pyehˬ nehˬ nya-eu baoˬ ahˇ-eu gaˇ kawˆ, naw maꞈ-ahˇ ngaˇ bi mawˇ duˬ nyaˇ.” Kʼoeˇ naˇ, kuiˇ shiˇ laꞈ shiˇ shiˇ-eu tsawˇ haˬ kʼoeˇ gʼaˬ-ahˇ Yeˬsuˇ ehˇ nehˬ-eu, “Tuˇ-awˇ, nawˬ-euˬ yuꞈ zaˇ baꞈ-awˇ gʼoꞈ-iˇ-awˬ.”

⁷Kʼoeˇ ngeh, tsawˇ haˬ kʼoeˇ gʼaˬ tuˇ laˇ-awˇ, gʼoꞈ-iˇ-euˬ meh.

⁸Tsawˇ haˬ aˇ maꞈ kʼoeˇ deuˬ kʼoeˇ gaˇ ya mawˇ ngeh, guˆ-iˇ-awˇ, tsawˇ haˬ zaˬ-ahˇ kʼoeˇ naˆ ni gʼeh-eu baoˬ biꞈ-euˬ Miˬyehˇ-ahˇ ja ceuˬ-euˬ meh.

⁹Jawˇ duˬ kʼoeˇ tsahˇ-ahˇ neh Yeˬsuˇ luˆ-iˇ-awˇ mehˬ hu paw iˇ luꞈ ngeh, kawˬ taꞈ-eu tsawˇ haˬ pyeuꞈ-eu Maꞈtehˬ lehˇ myahˇ-euˬ gʼaˬ, kawˬ taꞈ-eu nymˇ-ahˇ nuiˇ luꞈ gaˇ aˬ yawꞈ ya mawˇ-euˬ meh. “Ngaˬ-euˬ mehˬ nah caw teh laˇ-awˇ ngaˬ-euˬ zaˬ lahˇ geuꞈ laˇ-awˬ” lehˇ Yeˬsuˇ ehˇ ngeh, Maꞈtehˬ tsawˬ tuˇ laˇ-awˇ, Yeˬsuˇ-euˬ mehˬ nah caw teh gʼeh-euˬ meh.

¹⁰Yeˬsuˇ iˇ kahˇ laꞈ kʼoeˇ hawˬ jeh-ahˇ hawˬ jawˬ jawˬ leˇ ngeh, kawˬ taꞈ-eu tsawˇ haˬ deuˬ hawˇ-eu iˬ baˇ zaˬ gʼawˬ mya ni laˇ-awˇ, Yeˬsuˇ hawˇ-eu aˬ yawꞈ-euˬ zaˬ lahˇ deuˬ nehˬ-ehˇ hawˬ jawˬ jawˬ-euˬ meh.

¹¹Paˬliˬsehˇ[12] deuˬ kʼoeˇ gaˇ ya mawˇ ngeh Yeˬsuˇ-euˬ zaˬ lahˇ deuˬ-ahˇ ehˇ nehˬ-eu, “Naw maꞈ-euˬ saˬ laˬ aˬ jeˬ miˇ neh kʼoeˇ loꞈ-ehˇ gʼeh-eu tsawˇ haˬ deuˬ nehˬ-ehˇ dzaˬ taꞈ dawˇ taꞈ ta.”

¹²Kʼoeˇ loꞈ-ehˇ ehˇ gaˇ Yeˬsuˇ ya gaˬ ngeh, heu loꞈ-ehˇ ehˇ kʼoꞈ nehˬ-euˬ meh. “Jawˇ saˇ doˆ luꞈ-eu deuˬ naˇ gawˇ laˆ saˆ-eu tsawˇ haˬ-ahˇ maˬ loˬ-a. Jawˇ saˇ maˬ doˆ-eu deuˬ tehꞈ-ehˇ naˇ gawˇ laˆ saˆ-eu tsawˇ haˬ-ahˇ loˬ-eu meh.

¹³‘Lawˇ-eu shehˇ-eu jeˬ-ahˇ ngaˇ geuꞈ mawꞈ-eu maˬ ngeuˇ. Gʼawˬ shaˬ gaˬ nya-eu jeˬ-ahˇ ngaˇ geuꞈ mawꞈ-eu ma’ lehˇ, Miˬyehˇ neh ehˇ-euˬ dawˬ kʼoeˇ dawˬ-euˬ dawˬ tsuiꞈ naw maꞈ dzaw duˬ-iˇ-awˬ. Aˬ jeˬ miˇ neh ehˇ naˇ, yaw tsaˬ yaw dawˇ tsawˇ haˬ deuˬ-ahˇ kuˇ-eu lehˇ ngaˇ oe-euˬ maˬ ngeuˇ. Iˬ baˇ zaˬ deuˬ-ahˇ kuˇ-eu lehˇ ngaˇ oe-euˬ ma.”

¹⁴Kʼoeˇ naˇ, Iˇcuꞈshawˇ-eu Yoˇhaˬ-euˬ zaˬ lahˇ deuˬ Yeˬsuˇ jawˇ gaˇ laˇ-awˇ ehˇ-eu, “Nga maꞈ hawˇ-eu Paˬliˬsehˇ deuˬ-aˬ, tiˬ kʼehˬ maˬ taˬ ni maˬ dzaˬ-eu zahˇ jahˇ luꞈ ma. Nawˬ-euˬ zaˬ lahˇ deuˬ aˬ jeˬ miˇ neh kʼoeˇ loꞈ-ehˇ maˬ jahˇ ta.”

¹⁵Yeˬsuˇ ehˇ-eu, “Oeˇ mˇ baˇ gaˇ laˇ-euˬ tsawˇ haˬ deuˬ, miˬ zaˬ sheuˬ daˆ-eu gʼaˬ aˬ yawꞈ maꞈ nehˬ-ehˇ kʼaˇ jawˇ kʼoeˇ keuˆ ni noeˬ shaˬ tehꞈ-a loˇ. Miˬ zaˬ sheuˬ daˆ-eu tsawˇ haˬ kʼoeˇ gʼaˬ aˬ yawꞈ maꞈ nehˬ-ehˇ maˬ ya jawˇ ni bi sheuˬ byoˆ gʼeh-eu tiˬ nah keuˆ le tehꞈ-a. Kʼoeˇ ngeh jawˇ, aˬ yawꞈ maꞈ maˬ dzaˬ-eu zahˇ jahˇ tehꞈ-a.

¹⁶“Tsawˇ haˬ tiˬ gʼaˬ-iˬ mehˬ tsoeˬ yaw cehˇ-ahˇ saˬ paˇ yaw shuiꞈ neh pehˇ tsahˇ maˬ doꞈ-aˇ. Kʼoeˇ loꞈ-ehˇ doꞈ naˇ, pehˇ tsahˇ yaw shuiꞈ kʼoeˇ, mehˬ tsoeˬ yaw cehˇ kʼoeˇ kahˇ-ahˇ yaw beh naˆ maˬ tseˇ paˇ bi pyaˬ-iˇ tehꞈ-a.

¹⁷Kʼoeˇ gaˇ duˇ ni, aˬ gaꞈ dzaˇ uiˇ shehˆ ahˇ-eu shaˬ kʼoˆ iˇ puˬ yaw oeˇ-ahˇ, aˬ gaꞈ dzaˇ uiˇ yaw shuiꞈ maˬ shehˆ ahˇ-aˇ. Kʼoeˇ loꞈ-ehˇ jahˇ naˇ, shaˬ kʼoˆ iˇ puˬ kʼoeˇ puˬ pehꞈ-iˇ-awˇ, aˬ gaꞈ dzaˇ uiˇ yoeˇ kʼaˇ-eu miˇ neh, shaˬ kʼoˆ iˇ puˬ kʼoeˇ cawˆ-iˇ jiˇ tehꞈ-a. Aˬ gaꞈ dzaˇ uiˇ yaw shuiꞈ-ahˇ shaˬ kʼoˆ iˇ puˬ yaw shuiꞈ laꞈ kʼoeˇ ya shehˆ ahˇ-eu meh. Kʼoeˇ loꞈ-ehˇ jahˇ naˇ, nyiˬ jeˬ luꞈ maˬ cawˆ-iˇ ni ya geuꞈ-eu meh.”

¹⁸Aˬ yawꞈ maꞈ-ahˇ Yeˬsuˇ kʼoeˇ loꞈ-ehˇ ehˇ nehˬ luꞈ ngeh, yaw huiˬ yaw mahˇ tiˬ gʼaˬ Yeˬsuˇ jawˇ gaˇ oe-euˬ meh. Yeˬsuˇ-euˬ mehˬ shi aˬ yawꞈ ga byaˆ-awˇ, “Ngaˬ buˇ uˬ soe shiˇ tsehˆ-euˬ meh. Ehˇ kʼawꞈ, nawˇ oe-awˇ aˬ laꞈ tiˬ poˆ baꞈ daˆ nehˬ laꞈ naˇ, aˬ yawꞈ paˇ dehꞈ poˆ laˇ tehꞈ-a” lehˇ ehˇ-eu meh.

¹⁹Yeˬsuˇ tuˇ laˇ-awˇ, tsawˇ haˬ kʼoeˇ gʼaˬ-euˬ mehˬ nah caw teh gʼeh-euˬ meh. Aˬ yawꞈ-euˬ zaˬ lahˇ deuˬ kʼawꞈ, aˬ yawꞈ nehˬ-ehˇ iˇ-euˬ meh.

²⁰Kʼoeˇ ngeh, tseˇ nyiꞈ kʼoꞈ keuˆ ni shiˬ doˆ-eu naˇ gawˇ-ahˇ maˬ tsehˆ leˇ ni ya daˬ luꞈ-eu zaˬ miˬ zaˬ tiˬ gʼaˬ, Yeˬsuˇ-euˬ mehˬ nah miˇ ni caw teh le-awˇ, Yeˬsuˇ-euˬ pehˇ kʼahˬ pehˇ dahˬ-ahˇ toeˬ ciˆ-euˬ meh.

²¹“Aˬ yawꞈ-euˬ pehˇ kʼahˬ pehˇ dahˬ-ahˇ tehꞈ-ehˇ ya toeˬ ciˆ-euˬ kʼawꞈ, ngaˬ-euˬ naˇ gawˇ taˬ leˇ ma” lehˇ, zaˬ miˬ zaˬ kʼoeˇ gʼaˬ nui ma laꞈ kʼoeˇ yawˬ haˇ yawˬ ha ehˇ-eu meh.

²²Yeˬsuˇ nahˇ gʼoꞈ gʼoꞈ haw ngeh, aˬ yawꞈ-ahˇ mawˇ-awˇ, “Aˬ buˇ-oˇ, tiˬ jeˬ-iˬ taˬ noeˬ shaˬ. Nawˬ-euˬ jah-eu nui ma neh nawˬ-ahˇ bi taˬ leˇ-euˬ meh” lehˇ ehˇ nehˬ-euˬ meh. Kʼoeˇ loꞈ-ehˇ ehˇ gʼaˬ-eu maˬ dah ni, zaˬ miˬ zaˬ kʼoeˇ gʼaˬ-euˬ naˇ gawˇ taˬ tsehˆ leˇ-euˬ meh.

²³Yaw huiˬ yaw mahˇ kʼoeˇ gʼaˬ-euˬ nymˇ-ahˇ Yeˬsuˇ le keuˆ ngeh, tsawˇ shiˇ bawˬ law baw-eu deuˬ kʼawꞈ kʼoeˇ gaˇ jawˇ-awˇ, tsawˇ haˬ gʼawˬ mya ni lawꞈ gʼa luꞈ gaˇ ya mawˇ-euˬ meh.

²⁴“Yawˬ gʼaˬ na luꞈ doˆ-iˇ jiˇ-awˬ. Aˬ buˇ heu gʼaˬ shiˇ-euˬ maˬ ngeuˇ-a. Yuꞈ kʼaˆ luꞈ-eu tehꞈ meh” lehˇ Yeˬsuˇ ehˇ ngeh, aˬ yawꞈ maꞈ dawˬ tawˆ luꞈ aˬ yawꞈ-ahˇ uiˇ-eu meh.

²⁵Tsawˇ haˬ kʼoeˇ deuˬ-ahˇ laꞈ nyiˇ bi doˆ-iˇ jiˇ ngeh jawˇ, aˬ buˇ kʼoeˇ gʼaˬ-euˬ kuˆ lawˆ-ahˇ aˬ yawꞈ uˇ leˇ-awˇ, aˬ laꞈ-ahˇ nyehꞈ tehˬ nehˬ ngeh, aˬ buˇ kʼoeˇ gʼaˬ tuˇ laˇ-euˬ meh.

²⁶Gaˇ kawˆ kʼoeˇ miˇ kʼahˬ kʼoeˇ coeˇ coeˇ lah-ehˇ gaˬ doe-iˇ-euˬ meh.

²⁷Jawˇ duˬ kʼoeˇ tsahˇ-ahˇ neh Yeˬsuˇ luˆ-iˇ-awˇ, mehˬ hu paw iˇ luꞈ ngeh, myaˆ behꞈ nyiˬ gʼaˬ aˬ yawꞈ-euˬ mehˬ nah caw teh gʼeh-awˇ, “Daˬbiˇ-euˬ Zaˬmaˇ-oˇ[13], nga nyaꞈ-ahˇ gʼawˬ shaˬ gaˬ nehˬ laꞈ-awˬ” lehˇ guˇ-eu meh.

²⁸Yeˬsuˇ iˇ kahˇ laꞈ kʼoeˇ uˇ leˇ ngeh, myaˆ behꞈ kʼoeˇ nyiˬ gʼaˬ aˬ yawꞈ jawˇ gaˇ laˇ-euˬ meh. “Naw nyaꞈ-ahˇ ngaˇ laˆ taˬ nehˬ nya meh lehˇ naw nyaꞈ jah ma loˇ” lehˇ Yeˬsuˇ naˇ haˬ ngeh, “Sahˬ paˬ-oˇ, nga nyaꞈ jah ma” lehˇ ehˇ-eu meh.

²⁹Kʼoeˇ naˇ, aˬ yawꞈ nyaꞈ-euˬ myaˆ nuiˆ-ahˇ Yeˬsuˇ toeˬ ciˆ-awˇ, “Naw nyaꞈ jah-eu loꞈ-ehˇ pyeuꞈ laˇ luꞈ-uˇ” lehˇ ehˇ nehˬ-euˬ meh.

³⁰Kʼoeˇ ngeh, aˬ yawꞈ nyaꞈ myaˆ nuiˆ mawˇ laˇ-euˬ meh. Aˬ yawꞈ nyaꞈ-ahˇ Yeˬsuˇ ehˇ nehˬ-eu, “Ngaˬ neh naw nyaꞈ-ahˇ myaˆ nuiˆ bi mawˇ laˇ-euˬ gaˇ kawˆ heu, aˬ cawˬ tiˬ gʼaˬ-ahˇ-iˬ maˬ bi siˬ ni yaw kʼaˆ kʼaˆ-ehˇ yahˇ-awˬ.”

³¹Ehˇ kʼawꞈ, aˬ yawꞈ nyaꞈ gʼoꞈ-iˇ-awˇ, Yeˬsuˇ neh mˇ-euˬ gaˇ kawˆ kʼoeˇ miˇ kʼahˬ kʼoeˇ coeˇ coeˇ lah ni ja byah jiˇ-euˬ meh.

³²Myaˆ nuiˆ mawˇ laˇ-euˬ myaˆ behꞈ kʼoeˇ nyiˬ gʼaˬ gʼoꞈ dzeuˇ-euˬ nehˬ-ehˇ, nehꞈ uˇ-eu miˇ neh dawˬ maˬ ngehˬ nya-eu aˬ dzawˬ tiˬ gʼaˬ-ahˇ, Yeˬsuˇ jawˇ gaˇ sheuˬ laꞈ-euˬ meh.

³³Ehˇ kʼawꞈ, nehꞈ teh doˆ nehˬ-euˬ nehˬ-ehˇ tiˬ poˆ tehꞈ-ehˇ, tsawˇ haˬ kʼoeˇ gʼaˬ dawˬ ngehˬ nya laˇ-euˬ meh. Kʼoeˇ ngeh, tsawˇ haˬ dawˬ tawˆ luꞈ zahˬ leˇ-awˇ, “Iˇsaˬleˬlaˆ miˇ kʼahˬ laꞈ kʼoeˇ heu loꞈ-ehˇ mˇ-eu jeˬ tiˬ jawˇ-iˬ maˬ mawˇ haw-aˬ” lehˇ ehˇ-eu meh.

³⁴Ehˇ kʼawꞈ, Paˬliˬsehˇ deuˬ ehˇ-eu, “Nehꞈ Sahˬpaˬ-euˬ baoˬ-ahˇ aˬ yawꞈ gʼoe-awˇ nehꞈ teh doˆ-eu ngaˇ.”

³⁵Meuˬ doe ni, pu doe ni Yeˬsuˇ iˇ-awˇ, uˬ duˬ tahˬ nymˇ laꞈ kʼoeˇ dawˬ mehˬ dawˬ tsoˆ tsoˆ-euˬ meh. Miˬyehˇ Miˇkʼahˬ gaˇ kawˆ laˬ kʼaˬ cehˇ-eu guiˬ lahˬ dawˬ mehˬ-awˇ, naˇ gawˇ yawˬ jeˬ na luꞈ-ahˇ laˆ taˬ nehˬ-euˬ meh.

³⁶Tsawˇ haˬ aˇ maꞈ-ahˇ aˬ yawꞈ ya mawˇ ngeh, gʼawˬ shaˬ haw gaˬ-euˬ meh. Aˬ jeˬ miˇ neh ehˇ naˇ, aˬ yawꞈ maꞈ-aˬ, yawˇ bo-eu yaw sahˇ maˬ baw-eu yawˇ deuˬ loꞈ-ehˇ, guˆ-awˇ gʼaˬ baˬ luꞈ-eu meh.

³⁷Kʼoeˇ ngeh, aˬ yawꞈ-euˬ zaˬ lahˇ deuˬ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Cehˇ myah laˇ taˬ-euˬ gʼawˬ mya ni jaˆ kʼawꞈ, yehˬ-eu tsawˇ haˬ ui cuiˆ tehꞈ meh.

³⁸Kʼoeˇ miˇ neh, aˬ yawꞈ-euˬ cehˇ yehˬ duˬ-ahˇ cehˇ yehˬ zaˬ deuˬ gʼawˬ mya ni bi oe-eu gʼaˇ duˬ, Yaw sahˇ gʼaˬ-ahˇ guiˬ lahˬ shaˇ-awˬ.”