Read Akha Maˬkuˆ 1 Bible Online

Maˬkuˆ 1 - Akha bible

Maˬkuˆ 1

¹Heu-aˬ, Miˬyehˇ-euˬ Zaˬmaˇ Yeˬsuˇ Ka li gaˇ kawˆ Laˬ kʼaˬ cehˇ-eu Guiˬ lahˬ dawˬ meh.[1]

²Gaˇ kawˆ heu-aˬ, Miˬyehˇ gʼaˇ duˬ ngehˬ dah-eu Iˇsaˬyaˇ neh heu loꞈ-ehˇ boꞈ-euˬ gaˇ aˇ dahˬ beh taˬ-euˬ meh. “Miˬyehˇ heu loꞈ-ehˇ ehˇ-eu meh. ‘Haw yawˬ, nawˇ iˇ-eu gaˇ ma-ahˇ, lehˬ hmˬ laˆ saˆ taˬ-eu gʼaˇ duˬ, ngaˬ-euˬ gʼaˬ kʼehˇ tiˬ gʼaˬ-ahˇ ngaˇ, nawˬ-euˬ mehˬ hu pyehˬ gʼeh-eu ma.

³Bawˇ tsahˬ bawˇ dahˇ laꞈ kʼoeˇ jawˇ-awˇ, heu loꞈ-ehˇ tiˬ gʼaˬ guˇ luꞈ meh. SahˬpaˬMiˬyehˇ oe-eu gʼaˇ duˬ, gaˇ ma lehˬ hmˬ laˆ saˆ taˬ-awˬ. Aˬ yawꞈ oe-eu gaˇ ma kʼoeˇ kahˇ, dawˇ coe ni shaˇ dahˇ doˆ taˬ-awˬ.”’

⁴Iˇ cuꞈ shawˇ-eu Yoˇhaˬ bawˇ tsahˬ bawˇ dahˇ-ahˇ doˆ le-awˇ, heu loꞈ-ehˇ dawˬ mehˬ mehˬ-euˬ meh. “Iˬ baˇ noeˬ poˆ-awˇ iˇ cuꞈ shawˇ-awˬ. Miˬyehˇ naw maꞈ-ahˇ iˬ baˇ pyehˬ nehˬ laꞈ tehꞈ-a.”

⁵Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ gʼawˬ mya ni, Yoˇhaˬ dawˬ mehˬ mehˬ gaˇ naˇ haˬ-iˇ-euˬ meh. Aˬ yawꞈ maꞈ yawˬ ha-euˬ iˬ baˇ ja doˆ jiˇ-awˇ, aˬ yawꞈ neh Yawˇdaˬ lawˇ baˬ laꞈ kʼoeˇ iˇ cuꞈ bi shawˇ-euˬ meh.

⁶Yoˇhaˬ-aˬ, law taw caꞈ hm neh zaꞈ taˬ-euˬ mehˬ tsoeˬ dm-awˇ, shaˬ kʼoˆ joꞈ paꞈ paꞈ luꞈ-eu meh. Aˬ yawꞈ dzaˬ-eu dzaˇ-aˬ, nyehˇ bahˇ hawˇ-eu bawˇ tsahˬ byaˬ byaˬ uiˇ meh.

⁷Aˬ yawꞈ dawˬ mehˬ mehˬ-awˇ ehˇ-eu, “Ngaˬ-euˬ mehˬ nah oe luꞈ-eu gʼaˬ-aˬ, ngaˇ naˆ maˬ tseˇ baoˬ huiˬ-eu meh. Ngaˇ-aˬ, aˬ yawꞈ-euˬ sehˬ nawˆ aˇ caˆ-ahˇ awˆ kʼoꞈ-awˇ puiˇ nehˬ-eu tehꞈ-ehˇ kʼawꞈ maˬ geuˇ nya.

⁸Ngaˇ naw maꞈ-ahˇ iˇ cuꞈ laꞈ kʼoeˇ iˇ cuꞈ shawˇ nehˬ-euˬ ma. Ehˇ kʼawꞈ, aˬ yawꞈ-aˬ, Muiˬ-eu shawˇ-eu Yaw sahˇ Miˬyehˇ laꞈ kʼoeˇ iˇ cuꞈ shawˇ nehˬ laꞈ tehꞈ-a.”

⁹Gʼawˬ myahˇ maˬ gʼeh-ehˇ, Gaˬliˬlehˇ miˇ kʼahˬ Naˬzaˬlehˇ meuˬ-ahˇ neh Yeˬsuˇ oe-awˇ, Yawˇdaˬ lawˇ baˬ laꞈ kʼoeˇ Yoˇhaˬ neh iˇ cuꞈ bi shawˇ-euˬ meh.

¹⁰Yeˬsuˇ iˇ cuꞈ laꞈ kʼoeˇ neh doˆ laˇ-eu nehˬ-ehˇ, mˬ pah le-awˇ, Yaw sahˇ Miˬyehˇ kʼaˬ kʼoeˬ loꞈ-ehˇ aˬ yawꞈ kʼoeˇ taˆ zaꞈ le luꞈ gaˇ aˬ yawꞈ ya mawˇ-euˬ meh.

¹¹“Nawˇ-aˬ, ngaˇ zawˇ gaˬ-eu ngaˬ-euˬ Zaˬmaˇ ma. Nawˬ-ahˇ ngaˇ nui kʼahˇ shiˇ dui dui ma” lehˇ, mˬ kʼoeˇ taˆ teˇ saˇ gaˬ doˆ le-euˬ meh.

¹²Tiˬ poˆ tehꞈ-ehˇ, Yaw sahˇ Miˬyehˇ neh Yeˬsuˇ-ahˇ bawˇ tsahˬ bawˇ dahˇ laꞈ kʼoeˇ bi iˇ-euˬ meh.

¹³Bawˇ tsahˬ bawˇ dahˇ laꞈ kʼoeˇ aˬ yawꞈ oeˬ tseˇ nah jawˇ-awˇ, Saˬdaˬ neh muˇ juˇ bi juˇ-euˬ meh. Bawˇ tsahˬ jeˬ zaˬ yaw haiˬ deuˬ kʼawꞈ, kʼoeˇ gaˇ jawˇ-eu meh. Ehˇ kʼawꞈ, mˬ taˆ gʼaˬ kʼehˇ deuˬ aˬ yawꞈ-ahˇ ngehˬ gʼeh nehˬ-euˬ meh.

¹⁴Yoˇhaˬ-ahˇ aˬ cawˬ neh tawˬ laꞈ kʼoeˇ bi nyehꞈ uˇ gʼaˬ ngeh, Gaˬliˬlehˇ miˇ kʼahˬ-ahˇ Yeˬsuˇ iˇ-awˇ, Miˬyehˇ-euˬ Laˬ kʼaˬ cehˇ-eu Guiˬ lahˬ dawˬ mehˬ-iˇ-euˬ meh.

¹⁵Aˬ yawꞈ ehˇ-eu, “Aˇ yamˬ tsaˬ laˇ-euˬ meh. Miˬyehˇ miˇ kʼahˬ keuˆ le-eu dawˬ peh peh laˇ-euˬ meh. Iˬ baˇ noeˬ poˆ-awˇ Laˬ kʼaˬ cehˇ-eu Guiˬ lahˬ dawˬ-ahˇ jah-awˬ.”

¹⁶Gaˬliˬlehˇ lah lah dzeˇ caw caw-ehˇ Yeˬsuˇ iˇ luꞈ ngeh, ngaˬ shaˬ poˆ-eu tsawˇ haˬ pyeuꞈ-eu Siˇmoˬ hawˇ-eu Aˬdehˬlehˬ aˬ nyaꞈ mehˇ nmˇ za dzeh luꞈ gaˇ ya mawˇ-euˬ meh.

¹⁷Aˬ nyaꞈ nmˇ-ahˇ Yeˬsuˇ ehˇ nehˬ-eu, “Ngaˬ-euˬ mehˬ nah caw teh laˇ-awˬ. Ngaˬ shaˬ poˆ-eu tsawˇ haˬ pyeuꞈ-eu naw nyaꞈ nmˇ-ahˇ, tsawˇ haˬ poˆ-eu tsawˇ haˬ bi geuꞈ ma.”

¹⁸Aˬ nyaꞈ nmˇ za byehˇ dzeh yaꞈ-awˇ, tiˬ poˆ tehꞈ-ehˇ aˬ yawꞈ-euˬ mehˬ nah caw teh gʼeh-euˬ meh.

¹⁹Mehˬ hu paw paˇ iˇ gʼeh ngeh, Zeˬbeˬdehˇ-euˬ aˬ li Yaˬkoˆ hawˇ-eu Yoˇhaˬ aˬ nyaꞈ nmˇ-ahˇ paˇ mawˇ-euˬ meh. Aˬnyaꞈ nmˇ-aˬ, lawˬ laꞈ kʼoeˇ uˇ-awˇ, za doꞈ luꞈ-eu meh.

²⁰Mawˇ le-euˬ nehˬ-ehˇ tiˬ poˆ tehꞈ-ehˇ, aˬ nyaꞈ nmˇ-ahˇ Yeˬsuˇ kuˇ-euˬ meh. Kʼoeˇ ngeh, aˬ nyaꞈ nmˇ-aˬ, aˬ da Zeˬbeˬdehˇ hawˇ-eu gʼaˬ mahˇ poeˬ biꞈ-awˇ kʼehˇ taˬ-euˬ tsawˇ haˬ deuˬ-ahˇ, lawˬ laꞈ kʼoeˇ bi jawˇ yaꞈ-awˇ, Yeˬsuˇ-euˬ mehˬ nah caw teh gʼeh-euˬ meh.

²¹Yeˬsuˇ hawˇ-eu aˬ yawꞈ-euˬ zaˬ lahˇ deuˬ Gaˬbeˬneˬoˬ meuˬ-ahˇ iˇ-awˇ, Jawˇ nah[2] keuˆ laˇ ngeh, uˬ duˬ tahˬ nymˇ[3] -ahˇ Yeˬsuˇ le-awˇ, mehˬ nehˬ tsoˆ nehˬ-euˬ meh.

²²Aˬ yawꞈ mehˬ nehˬ tsoˆ nehˬ gaˇ kʼaˇ ya gaˬ-euˬ tsawˇ haˬ deuˬ zahˬ leˇ-euˬ meh. Aˬ jeˬ miˇ neh ehˇ naˇ, aˬ yawꞈ mehˬ-eu tsoˆ-eu kʼoeˇ-aˬ, Zahˇ dawˬ kʼoꞈ dawˬ mehˬ-eu saˬ laˬ deuˬ mehˬ gaˇ maˬ duˇ ni, baoˬ ahˇ-eu laꞈ kʼoeˇ mehˬ-eu jeˬ pyeuꞈ-eu meh.

²³Kʼoeˇ ngeh, nehꞈ yaw jawꞈ uˇ-eu tsawˇ haˬ tiˬ gʼaˬ uˬ duˬ tahˬ nymˇ kʼoeˇ nymˇ laꞈ kʼoeˇ uˇ laˇ-awˇ,

²⁴guˇ guˇ-ehˇ ehˇ-eu, “Naˬzaˬlehˇ tsawˇ haˬ Yeˬsuˇ-oˇ, nawˇ nga maꞈ-ahˇ aˬ jeˬ taꞈ te. Nga maꞈ-ahˇ laˆ cawˆ-eu lehˇ oe teˬ loˇ. Nawˬ-ahˇ ngaˇ siˬ nya ma. Nawˇ-aˬ, Miˬyehˇ-euˬ muiˬ-eu shawˇ-eu gʼaˬ kʼehˇ meh.”

²⁵Yeˬsuˇ aˬ yawꞈ-ahˇ dehˬ-awˇ ehˇ-eu, “Ciˬ cuˇ ni jawˇ-awˇ, tsawˇ haˬ teu gʼaˬ-euˬ laꞈ kʼoeˇ neh doˆ-iˇ-awˬ.”

²⁶Nehꞈ yaw jawꞈ kʼoeˇ mawˇ tsawˇ haˬ kʼoeˇ gʼaˬ-ahˇ yaw kʼaˆ-ehˇ bi teuˆ laˇ-awˇ, tiˬ teˇ guˇ kʼaˆ laˇ-awˇ doˆ-iˇ-euˬ meh.

²⁷Tsawˇ haˬ dawˬ tawˆ luꞈ zahˬ dui dui leˇ-awˇ, tiˬ gʼaˬ tiˇ gʼaˬ heu loꞈ-ehˇ ehˇ-eu meh. “Teu aˬ joˆ-ehˇ gʼeh-eu nga. Mehˬ nehˬ tsoˆ nehˬ-eu yaw shuiꞈ tiˬ jeˬ nga loˇ. Tsawˇ haˬ teu gʼaˬ nehꞈ yaw jawꞈ deuˬ-ahˇ dawˬ biꞈ nya gaˇ keuˆ ni baoˬ ahˇ-awˇ, nehꞈ kʼoeˇ deuˬ aˬ yawꞈ-euˬ dawˬ ya naˇ haˬ-eu nga laˬ.”

²⁸Kʼoeˇ ngeh, Yeˬsuˇ-euˬ gaˇ kawˆ kʼoeˇ, tiˬ poꞈ tehꞈ-ehˇ Gaˬliˬlehˇ miˇ kʼahˬ gaˬ doe-iˇ-euˬ meh.

²⁹Yeˬsuˇ hawˇ-eu aˬ yawꞈ-euˬ zaˬ lahˇ kʼoeˇ deuˬ uˬ duˬ tahˬ nymˇ-ahˇ neh doˆ le-awˇ, Siˇmoˬ hawˇ-eu Aˬdehˬlehˬ pehˬ-euˬ nymˇ-ahˇ iˇ-euˬ meh. Yaˬkoˆ hawˇ-eu Yoˇhaˬ aˬ nyaꞈ gʼeh ahˇ-eu meh.

³⁰Siˇmoˬ-euˬ tsawˇ mawˬ zaˬ miˬ zaˬ gʼaˬ pyaˬ-eu yuꞈ luꞈ-eu meh. Yeˬsuˇ oe keuˆ-euˬ nehˬ-ehˇ, aˬ yawꞈ pyaˬ luꞈ-eu gaˇ kawˆ ehˇ nehˬ-euˬ meh.

³¹Yeˬsuˇ aˬ yawꞈ jawˇ gaˇ iˇ-awˇ, aˬ laꞈ-ahˇ nyehꞈ tehˬ-awˇ gʼeu tuˇ nehˬ-euˬ meh. Kʼoeˇ ngeh, aˬ yawꞈ pyaˬ-eu taˬ leˇ-awˇ, aˬ yawꞈ maꞈ-ahˇ dzaˬ dzaˬ dawˇ dawˇ lehˬ hmˬ laˆ saˆ nehˬ-euˬ meh.

³²Nahˇ ma ga ahˇ-awˇ uˬ ciꞈ ciꞈ le ngeh, naˇ-eu tsawˇ haˬ deuˬ hawˇ-eu nehꞈ uˇ-eu tsawˇ haˬ dawˬ tawˆ luꞈ-ahˇ, Yeˬsuˇ jawˇ gaˇ sheuˬ laꞈ-euˬ meh.

³³Meuˬ kʼoeˇ meuˬ laꞈ kʼoeˇ jawˇ-eu tsawˇ haˬ dawˬ tawˆ luꞈ, nymˇ kʼoeˇ nymˇ mehˬ shi uiˬ laˇ jiˇ-euˬ meh.

³⁴Naˇ gawˇ gʼawˬ mya jeˬ ahˇ-eu tsawˇ haˬ gʼawˬ mya ni-ahˇ Yeˬsuˇ laˆ taˬ nehˬ-awˇ, nehꞈ uˇ-eu tsawˇ haˬ gʼawˬ mya gʼaˬ-ahˇ nehꞈ teh doˆ nehˬ-euˬ meh. Nehꞈ kʼoeˇ deuˬ-ahˇ aˬ yawꞈ dawˬ tiˬ dawˬ-iˬ maˬ bi ngehˬ doˆ laˇ-a. Aˬ jeˬ miˇ neh ehˇ naˇ, aˬ yawꞈ aˬ suˇ gʼaˬ pyeuꞈ-eu nehꞈ kʼoeˇ deuˬ siˬ nya-eu meh.

³⁵Yawˬ shawˬ yawˬ uˬ bya maˬ bya laˇ mi naˆ-ehˇ, Yeˬsuˇ tuˇ-awˇ, nymˇ kʼoeˇ nymˇ-ahˇ neh doˆ-iˇ-euˬ meh. Meuˬ laꞈ nyiˇ iˇ doˆ-awˇ, ciˬ cuˇ ni gʼeh-eu jawˇ duˬ-ahˇ guiˬ lahˬ shaˇ-iˇ-euˬ meh.

³⁶Siˇmoˬ hawˇ-eu cawˬ deuˬ aˬ yawꞈ-ahˇ poˆ-iˇ-euˬ meh.

³⁷Aˬ yawꞈ maꞈ aˬ yawꞈ-ahˇ mawˇ ngeh, “Tsawˇ haˬ yawˬ gʼaˬ na luꞈ nawˬ-ahˇ poˆ luꞈ meh” lehˇ ehˇ nehˬ-euˬ meh.

³⁸Ehˇ kʼawꞈ, Yeˬsuˇ ehˇ-eu, “Aˬ dui maꞈ heu paw jaˆ-eu pu deuˬ-ahˇ ya iˇ meh. Pu kʼoeˇ deuˬ-ahˇ kʼawꞈ, ngaˇ dawˬ mehˬ ya mehˬ-iˇ meh. Aˬ jeˬ miˇ neh ehˇ naˇ, kʼoeˇ gaˇ dawˬ mehˬ mehˬ-iˇ-eu lehˇ ngaˇ oe-euˬ ma.”

³⁹Kʼoeˇ naˇ, Gaˬliˬlehˇ miˇ kʼahˬ doe ni aˬ yawꞈ iˇ-awˇ, uˬ duˬ tahˬ nymˇ laꞈ kʼoeˇ dawˬ mehˬ mehˬ mehˬ-ehˇ cah-awˇ, nehꞈ uˇ-eu tsawˇ haˬ deuˬ-ahˇ nehꞈ teh doˆ nehˬ-euˬ meh.

⁴⁰Coiˬ doi naˇ-eu tsawˇ haˬ tiˬ gʼaˬ Yeˬsuˇ jawˇ gaˇ oe-awˇ, pawˬ tsuiꞈ pawˬ dmˬ dmˬ-awˇ, “Nawˇ jahˇ nehˬ laꞈ mawꞈ naˇ, ngaˇ muiˬ laˇ shawˇ laˇ[4] ni jahˇ nya meh” lehˇ ehˇ-eu meh.

⁴¹Aˬ yawꞈ-ahˇ Yeˬsuˇ gʼawˬ shaˬ haw gaˬ-awˇ, aˬ laꞈ cawˬ ja-awˇ toeˬ ciˆ nehˬ-eu laꞈ kʼoeˇ, “Ngaˇ jahˇ nehˬ mawꞈ-eu ma. Muiˬ laˇ shawˇ laˇ-awˬ” lehˇ ehˇ nehˬ-euˬ meh.

⁴²Coiˬ doi naˇ gawˇ kʼoeˇ ja pyuˬ ni byoˆ-iˇ jiˇ-awˇ, tsawˇ haˬ kʼoeˇ gʼaˬ muiˬ laˇ shawˇ laˇ-euˬ meh.

⁴³Tsawˇ haˬ kʼoeˇ gʼaˬ-ahˇ Yeˬsuˇ yaw kʼaˆ kʼaˆ-ehˇ ehˇ nehˬ-awˇ bi gʼoꞈ-iˇ-euˬ meh.

⁴⁴“Naˇ haˬ sheˇ. Gaˇ kawˆ heu tiˬ gʼaˬ-ahˇ-iˬ taˬ ehˇ nehˬ de. Tiˬ poˆ tehꞈ-ehˇ piˇ ma jawˇ gaˇ le-awˇ, nawˬ-euˬ gʼawˇ mawˇ-ahˇ bi pyehˆ tseˇ haw leˇ-awˬ. Kʼoeˇ naˇ, nawˇ naˇ gawˇ taˬ leˇ-euˬ gaˇ kawˆ tsawˇ haˬ yawˬ gʼaˬ na luꞈ bi siˬ duˬ-eu gʼaˇ duˬ, Moˇseˬ neh dawˬ biꞈ taˬ yaꞈ-euˬ lawˇ-eu shehˇ-eu jeˬ lawˇ-iˇ-awˬ.”

⁴⁵Ehˇ kʼawꞈ, tsawˇ haˬ kʼoeˇ gʼaˬ gʼoꞈ-iˇ-awˇ, gaˇ kawˆ kʼoeˇ yawˬ gaˇ na luꞈ ja doe-iˇ-euˬ meh. Aˬ yawꞈ neh aˇ dzehˬ ja byah dzeuˇ-euˬ miˇ neh, Yeˬsuˇ aˬ cawˬ mawˇ mawˇ-ehˇ meuˬ laꞈ kʼoeˇ maˬ iˇ nya ni pyeuꞈ-iˇ-euˬ meh. Meuˬ-euˬ laꞈ nyiˇ paw ciˬ cuˇ ni gʼeh gaˇ tehꞈ-ehˇ aˬ yawꞈ jawˇ-awˇ, yawˬ paw na luꞈ jawˇ-eu tsawˇ haˬ deuˬ aˬ yawꞈ jawˇ gaˇ laˇ-euˬ meh.