Read Akha Maˬkuˆ 13 Bible Online

Maˬkuˆ 13 - Akha bible

Maˬkuˆ 13

¹Yeˬsuˇ Uˬ duˬ tahˬ nymˇ nymˇ ma laꞈ kʼoeˇ neh doˆ le luꞈ ngeh, aˬ yawꞈ-euˬ zaˬ lahˇ tiˬ gʼaˬ aˬ yawꞈ-ahˇ ehˇ-eu, “Saˬ laˬ-oˇ, haw sheˇ. Kʼaˬ lo heu deuˬ hawˇ-eu nymˇ heu deuˬ aˇ naˆ ni zahˬ leˇ paˬ-ehˇ gʼeh-eu nga.”

²Yeˬsuˇ ehˇ-eu, “Huiˬ dui muiˬ dui dui-eu nymˇ heu deuˬ-ahˇ nawˇ ya mawˇ luꞈ nga laˬ. Nymˇ kʼaˇ gawˬ taˬ-euˬ kʼaˬ lo heu deuˬ tiˬ siˬ-iˬ ma jaˆ ni byaˆ-iˇ jiˇ gaˇ keuˆ tehꞈ-a.”

³Uˬ duˬ tahˬ nymˇ nymˇ ma-euˬ nui baˬ paw jaˆ-eu Saˬloˬ gawˬ jawˬ-ahˇ Yeˬsuˇ nuiˇ luꞈ ngeh, Beˬtuˆluˆ, Yaˬkoˆ, Yoˇhaˬ, Aˬdehˬleh aˬ ha maꞈ tehꞈ-ehˇ ciˬ cuˇ ni laˇ-awˇ naˇ haˬ-eu,

⁴“Kʼoeˇ loꞈ-ehˇ aˬ myah pyeuꞈ laˇ ta lehˇ ehˇ nehˬ laꞈ sheˇ. Kʼoeˇ deuˬ dawˬ tawˆ luꞈ pyeuꞈ laˇ-eu aˇ yamˬ keuˆ le-euˬ nga lehˇ, nga maꞈ aˬ jeˬ-ahˇ haw-awˇ ya siˬ nmˇ.”

⁵Aˬ yawꞈ maꞈ-ahˇ Yeˬsuˇ ehˇ nehˬ-eu, “Tsawˇ haˬ tiˬ gʼaˬ-iˬ naw maꞈ-ahˇ gaˇ ma maˬ bi sheuˬ bahˬ ni yaw gahˇ gahˇ-ehˇ dehꞈ-awˬ.

⁶Ngaˬ-euˬ gʼaˇ duˬ ngehˬ dah le-euˬ ma lehˇ ehˇ-eu tsawˇ haˬ gʼawˬ mya gʼaˬ doˆ le-awˇ, ‘Ngaˇ a yawꞈ ma’ lehˇ ehˇ-eu laꞈ kʼoeˇ, tsawˇ haˬ gʼawˬ mya ni-ahˇ gaˇ ma sheuˬ bahˬ tehꞈ-a.

⁷Dawˬ peh guiˇ deuˆ luꞈ-eu teˇ saˇ hawˇ-eu, gaˇ mahˇ kaˬ gaˇ guiˇ deuˆ luꞈ-eu gaˇ kawˆ naw maꞈ ya gaˬ ngeh, taˬ tsawˬ guˆ-iˇ. Kʼoeˇ loꞈ-ehˇ gʼeh-eu jeˬ yaw beh keu le tehꞈ-a. Ehˇ kʼawꞈ, aˇ saˬ saˬ-eu aˇ yamˬ keuˆ le-euˬ maˬ ngeuˇ-a siˬ.

⁸Miˇ kʼahˬ tiˬ kʼahˬ tiˇ kʼahˬ guiˇ deuˆ-awˇ, tsawˇ jeuˬ tiˬ jeuˬ tiˇ jeuˬ ceh tehꞈ-a. Yawˬ gaˇ na luꞈ miˇ luˆ luˆ-awˇ, mehꞈ-eu shuꞈ-eu jeˬ keuˆ le tehꞈ-a. Heu deuˬ dawˬ tawˆ luꞈ, zaˬ baw-eu lehˇ gʼeh ngeh uˬ maˆ naˇ dahˬ beh laˇ-euˬ loꞈ-ehˇ tehꞈ-a siˬ.

⁹“Naw maꞈ yaw gahˇ gahˇ-ehˇ ya dehꞈ meh. Naw maꞈ-ahˇ aˬ cawˬ paꞈ-awˇ, yaˇ kʼaˬ daˇ-eu saˇ naˇ-ahˇ tsahˇ gʼeh tehꞈ-a. Uˬ duˬ tahˬ nymˇ laꞈ kʼoeˇ naw maꞈ-ahˇ aˬ cawˬ diˬ tehꞈ-a. Naw maꞈ ngaˬ-ahˇ jah-eu jeˬ baˬ da neh, sahˬ paˬ sahˬ ma deuˬ mehˬ shi naw maꞈ ya yawꞈ leˇ-awˇ, saˇ kiˇ ya kamˬ tehꞈ-a.

¹⁰Ehˇ kʼawꞈ, aˇ saˬ saˬ-eu aˇ nah aˇ yamˬ maˬ keuˆ le mi naˆ-ehˇ, tsawˇ haˬ dawˬ tawˆ luꞈ-ahˇ laˬ kʼaˬ cehˇ-eu guiˬ lahˬ dawˬ ya mehˬ doe tehꞈ-a.

¹¹Naw maꞈ-ahˇ aˬ cawˬ paꞈ-awˇ yaˇ kʼaˬ daˇ-eu saˇ naˇ-ahˇ tsahˇ gʼeh ngeh, aˬ joˆ-ehˇ ya ngehˬ ya tmˇ-eu gaˇ kawˆ aˇ yamˬ maˬ keuˆ laˇ mi naˆ-ehˇ kʼahˬ taˬ lahˇ. Aˇ yamˬ keuˆ laˇ ngeh, naw maꞈ-ahˇ kʼaˇ bi ngehˬ-euˬ jeˬ ngehˬ-awˬ. Aˬ jeˬ miˇ neh ehˇ naˇ, naw maꞈ ya ngehˬ-eu dawˬ kʼoeˇ-aˬ, naw maꞈ-euˬ dawˬ maˬ ngeuˇ-a. Muiˬ-eu shawˇ-eu Yaw sahˇ Miˬyehˇ-euˬ dawˬ meh.

¹²Mehˇ nmˇ yaw kaˬ tiˬ gʼaˬ tiˇ gʼaˬ sehꞈ-eu gʼaˇ duˬ aˬ cawˬ-euˬ aˬ laꞈ laꞈ kʼoeˇ a nehˬ tehꞈ-a. Aˬ da deuˬ kʼawꞈ zaˬ deuˬ-ahˇ kʼoeˇ loꞈ-ehˇ jahˇ nehˬ tehꞈ-a. Zaˬ deuˬ aˬ da aˬ ma-ahˇ puiˬ-awˇ sehꞈ tehꞈ-a.

¹³Naw maꞈ ngaˬ-ahˇ jah-eu baˬ da neh, tsawˇ haˬ yawˬ gʼaˬ na luꞈ naw maꞈ-ahˇ bye tehꞈ-a. Ehˇ kʼawꞈ, aˇ saˬ saˬ ngeh keuˆ ni ziꞈ-eu tsawˇ haˬ ka kʼoꞈ-eu jeˬ za tehꞈ-a.

¹⁴“‘Guˆ dui dui laˇ paˬ-ehˇ gʼeh-eu yaw jawꞈ jeˬ’ kʼoeˇ, maˬ bi jaˆ kʼmˬ-eu jawˇ duˬ-ahˇ jaˆ laˇ taˬ-euˬ gaˇ naw maꞈ ya mawˇ tehꞈ-a.” (Jaˇliꞈ gui-eu deuˬ dawˬ heu dawˬ-euˬ dawˬ tsuiꞈ gʼoˆ shaw-awˬ.)[15] “Kʼoeˇ ngeh, Yuˇdaˆ miˇ kʼahˬ-ahˇ jawˇ-eu tsawˇ haˬ deuˬ gawˬ jawˬ paw ya cehˆ daˆ meh.

¹⁵Nymˇ mˬ kʼoeˇ taˆ jawˇ luꞈ-eu tsawˇ haˬ, nymˇ laꞈ kʼoeˇ zaꞈ uˇ-iˇ-awˇ myawˬ yuˇ doˆ laˬ-iˇ-eu maˬ dah-aˇ.

¹⁶Yaˇ ngeh jawˇ-eu tsawˇ haˬ iˇ kahˇ-ahˇ mehˬ tsoeˬ cehˆ laˬ-iˇ-eu maˬ dah-aˇ.

¹⁷Aˇ nah aˇ yamˬ kʼoeˇ keuˆ le ngeh, aˬ nyiˇ pi luꞈ-eu zaˬ miˬ zaˬ deuˬ hawˇ-eu, zaˬ nahˬ aˬ ma deuˬ shaˬ zahˬ naꞈ dui dui tehꞈ-a.

¹⁸Kʼoeˇ loꞈ-ehˇ gʼeh-eu jeˬ bi keuˆ le-eu aˇ yamˬ kʼoeˇ, tsahˬ gaˆ yamˬ-ahˇ maˬ bi tsaˬ laˇ ni, Miˬyehˇ-ahˇ guiˬ lahˬ shaˇ-awˬ.

¹⁹Aˬ jeˬ miˇ neh ehˇ naˇ, kʼoeˇ ngeh poˆ keuˆ le-eu guˆ-eu gaˆ-eu jeˬ kʼoeˇ-aˬ, Miˬyehˇ mˬ beh miˇ beh beh ngeh neh kʼaˇ keuˆ le dzeuˇ yaꞈ-euˬ jeˬ hawˇ-eu, aˬ kaˇ kʼaˇ keuˆ le-eu jeˬ dawˬ tawˆ luꞈ naˆ maˬ tseˇ, guˆ dui dui laˇ paˬ-ehˇ gʼeh-eu meh.

²⁰Ehˇ kʼawꞈ, aˇ nah aˇ yamˬ kʼoeˇ Sahˬpaˬ Miˬyehˇ neh laˆ nymˇ taˬ-euˬ meh. Aˬ yawꞈ kʼoeˇ loꞈ-ehˇ maˬ laˆ nymˇ law nmˇ-aˬ, tsawˇ haˬ tiˬ gʼaˬ-iˬ maˬ dzeuˇ-iˇ nya-aˇ. Aˬ yawꞈ neh tseˇ doˆ-euˬ tsawˇ haˬ deuˬ gʼaˇ duˬ shaˇ noeˬ-awˇ, aˇ nah aˇ yamˬ kʼoeˇ nymˇ le ni aˬ yawꞈ jahˇ-euˬ meh.

²¹“‘Haw-awˬ. Ka li heu gaˇ jawˇ ngaˇ. Kʼoeˇ gaˇ jawˇ ngaˇ’ lehˇ, tsawˇ haˬ tiˬ gʼaˬ na ehˇ laˇ gaˇ naw maꞈ taˬ jah.

²²Ka li jaˬ myawꞈ deuˬ hawˇ-eu, Miˬyehˇ gʼaˇ duˬ ngehˬ dah-eu jaˬ myawꞈ deuˬ oe doˆ tehꞈ-a. Aˬ yawꞈ maꞈ zahˬ leˇ paˬ-ehˇ gʼeh-eu jeˬ hawˇ-eu, kʼaˆ jehˬ-ehˇ gʼeh-eu jeˬ jahˇ mehˬ-eu laꞈ kʼoeˇ, gʼeh nya naˇ, Miˬyehˇ neh tseˇ doˆ-euˬ tsawˇ haˬ deuˬ-ahˇ kʼawꞈ, mehˇ shuiˇ shuiˇ tawˆ-awˇ gaˇ ma sheuˬ bahˬ gʼeh tehꞈ-a.

²³Yaw gahˇ gahˇ-ehˇ dehꞈ-awˬ. Aˇ yamˬ maˬ keuˆ le mi naˆ-ehˇ yawˬ jeˬ na luꞈ naw maꞈ-ahˇ ngaˇ ehˇ nehˬ taˬ-eu ma.

²⁴Guˆ-eu gaˆ-eu aˇ nah aˇ yamˬ kʼoeˇ dzeuˇ-iˇ ngeh jawˇ, nahˇ ma zahˇ tsui ni pyeuꞈ-iˇ-awˇ, ba la yaw shehꞈ maˬ paˇ bya-ehˇ,

²⁵aˬ guiˇ deuˬ mˬ kʼoeˇ taˆ neh ga ka le-awˇ, mˬ kʼoeˇ taˆ-euˬ baoˬ dawˬ tawˆ luꞈ nyeh laˇ yaˇ laˇ jiˇ tehꞈ-a.

²⁶Kʼoeˇ naˇ, Tsawˇhaˬ-euˬ Zaˬ maˇ mˬ dmˇ dziˬ-awˇ, baoˬ yaw shehꞈ kʼahˬ sehˇ tiˬ byah ni oe gaˇ ya mawˇ tehꞈ-a.

²⁷Aˬ yawꞈ-euˬ mˬ taˆ gʼaˬ kʼehˇ deuˬ-ahˇ miˇ ma oeˬ coeˇ oeˬ pyawˬ-ahˇ aˬ yawꞈ pyehˬ gʼeh-awˇ, mˬ dzeˇ miˇ dzeˇ kʼoeˇ dzeˇ heu dzeˇ doˆ ni jawˇ luꞈ-eu, Miˬyehˇ neh tseˇ doˆ-euˬ tsawˇ haˬ deuˬ bi sheuˬ uiˬ laꞈ tehꞈ-a.

²⁸siˬ guˬ aˇ bawˇ-ahˇ haw-awˇ yamˬ law toꞈ-awˬ. Laꞈ myaˆ myaˆ laˇ-awˇ, baw nmˬ nmˬ laˇ naˇ, jawˇ la doˆ le meh lehˇ naw maꞈ siˬ nya meh.

²⁹Kʼoeˇ loꞈ-ehˇ duˇ ni, gaˇ kawˆ kʼoeˇ deuˬ pyeuꞈ laˇ luꞈ gaˇ naw maꞈ ya mawˇ ngeh, miˇ tsaˬ heu aˇ saˬ saˬ-eu aˇ yamˬ keuˆ le luꞈ-eu naw maꞈ siˬ nya-awˬ.

³⁰Nymˬ-mˇ dehꞈ luꞈ-eu tsawˇ haˬ heu deuˬ maˬ shiˇ jiˇ mi naˆ-ehˇ, kʼoeˇ deuˬ dawˬ tawˆ luꞈ pyeuꞈ laˇ tehꞈ-a lehˇ, naw maꞈ-ahˇ ngaˇ maˇ jawˆ ni ehˇ-eu ma.

³¹Mˬ hawˇ-eu miˇ maˬ jaˆ coeˇ-ehˇ byoˆ-iˇ tehꞈ-a. Ehˇ kʼawꞈ, ngaˬ-euˬ dawˬ tiˬ jawˇ-iˬ maˬ byoˆ-iˇ-aˇ.

³²“Aˇ nah aˇ yamˬ kʼoeˇ aˬ geu ngeh keuˆ le-eu tsawˇ haˬ tiˬ gʼaˬ-iˬ maˬ siˬ nya-a. Mˬ taˆ gʼaˬ kʼehˇ deuˬ maˬ ehˇ, Zaˬ maˇ maˬ ehˇ, maˬ siˬ nya-a. Aˬda Miˬyehˇ tiˬ gʼaˬ tehꞈ-ehˇ siˬ nya-eu meh.

³³Aˇ yamˬ kʼoeˇ aˬ geu ngeh keuˆ le-eu naw maꞈ maˬ siˬ nya-eu miˇ neh, yaw gahˇ gahˇ-ehˇ dehꞈ-awˇ, yaw beuˇ beuˇ-ehˇ jawˇ-awˬ.

³⁴Gaˇ kawˆ kʼoeˇ-aˬ, tsawˇ haˬ tiˬ gʼaˬ aˬ yawꞈ-euˬ zaˬ kʼaˆ deuˬ-ahˇ gaˇ biˇ nehˬ yaꞈ-awˇ gaˇ ma doˆ-iˇ gaˇ duˇ tehꞈ-a. Zaˬ kʼaˆ aˬ yawꞈ gʼaˬ yawꞈ-ahˇ gaˇ biꞈ yaꞈ-awˇ, laˇ gʼoˆ-ahˇ loꞈ-eu gʼaˬ-ahˇ yaw beuˇ beuˇ-ehˇ loꞈ-eu gʼaˇ duˬ mehˬ nehˬ yaꞈ-awˇ doˆ-iˇ-euˬ meh.

³⁵Nymˇ sahˇ gʼaˬ gʼoꞈ laˇ-eu aˇ yamˬ naw maꞈ maˬ siˬ nya-eu miˇ neh, noeˬ gahˇ-awˇ jawˇ-awˬ. Uˬ ciꞈ uˬ taw paw maˬ siˬ. Sehˇ gʼahˇ ceh laˇ ngeh maˬ siˬ.

³⁶Naw maꞈ maˬ noeˬ gahˇ naˇ, aˬ yawꞈ ja pyuˬ ni gʼoꞈ keuˆ le ngeh, naw maꞈ yuꞈ kʼaˆ luꞈ gaˇ zaˬ leˇ tehꞈ-a.

³⁷Ngaˇ naw maꞈ-ahˇ ehˇ-eu heu, tsawˇ haˬ dawˬ tawˆ luꞈ-ahˇ ehˇ-eu ma. Yaw beuˇ beuˇ-ehˇ jawˇ-awˬ.”