Read Akha Maˬkuˆ 15 Bible Online

Maˬkuˆ 15 - Akha bible

Maˬkuˆ 15

¹Uˬ bya bya laˇ-euˬ nehˬ-ehˇ, piˇ ma aˬ yuiꞈ deuˬ, tsawˇ mawˬ tsawˇ kʼaˆ deuˬ, Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu, Baꞈdzah aˇ muˇ-ahˇ kʼaˇ uˇ-eu tsawˇ haˬ dawˬ tawˆ luꞈ, yaw kawˇ-ehˇ tahˬ dzoeˇ-awˇ, mehˬ bawˬ mˇ-euˬ meh. Aˬ yawꞈ maꞈ aˬ yawꞈ-ahˇ shmˇ caˆ paꞈ-awˇ, sahˬ paˬ Piˇlaˆ jawˇ gaˇ bi tsahˇ ha-iˇ-euˬ meh.

²Sahˬ paˬ Piˇlaˆ aˬ yawꞈ-ahˇ naˇ haˬ-eu, “Nawˇ Yuˇdaˆ tsawˇ haˬ-euˬ sahˬ paˬ ngeuˇ ma loˇ.” Yeˬsuˇ ehˇ-eu, “Nawˇ ehˇ ngaˇ tawˇ.”

³Kʼoeˇ naˇ, piˇ ma aˬ yuiꞈ deuˬ Yeˬsuˇ gaˇ kawˆ yaw lehˬ gʼawˬ mya jeˬ ja-eu meh.

⁴Sahˬ paˬ Piˇlaˆ aˬ yawꞈ-ahˇ paˇ naˇ haˬ-eu, “Aˬ yawꞈ maꞈ nawˬ-euˬ yaw lehˬ teu naˆ naˆ-ehˇ ja gaˇ naˇ haˬ sheˇ. Nawˇ ehˇ kʼoꞈ nehˬ-eu dawˬ maˬ jaˆ loˇ.”

⁵Ehˇ kʼawꞈ, Yeˬsuˇ dawˬ maˬ tmˇ ni ciˬ cuˇ ni jawˇ-eu miˇ neh, sahˬ paˬ Piˇlaˆ zahˬ leˇ-euˬ meh.

⁶Baˬsaˬkaˬ Bawˬ-iˬ kʼaˇ gʼeh ngeh, tawˬ-ahˇ nyehꞈ uˇ taˬ-euˬ tsawˇ haˬ deuˬ laꞈ kʼoeˇ, miˇ kʼahˬ zaˬ deuˬ bi pyehˬ doˆ mawꞈ-eu tsawˇ haˬ tiˬ gʼaˬ-ahˇ sahˬ paˬ Piˇlaˆ pyehˬ doˆ nehˬ-eu meh.

⁷Aˇ yamˬ kʼoeˇ yamˬ-ahˇ, miˇ kʼahˬ-ahˇ puiˬ-eu jeˬ hawˇ-eu, tsawˇ haˬ-ahˇ sehꞈ-eu jeˬ mˇ-euˬ miˇ neh tawˬ-ahˇ bi nyehꞈ uˇ taˬ-euˬ tsawˇ haˬ tiˬ muˇ jawˇ-eu meh. Baˬlaˬbaˇ lehˇ myahˇ-euˬ tiˬ gʼaˬ kʼawꞈ, aˬ yawꞈ maꞈ nehˬ-ehˇ tawˬ-ahˇ uˇ-eu meh.

⁸Tsawˇ haˬ aˇ maꞈ uiˬ laˇ-awˇ, aˬ yawꞈ kʼoꞈ yawꞈ jahˇ luꞈ-eu loꞈ-ehˇ, tawˬ-ahˇ uˇ-eu tsawˇ haˬ tiˬ gʼaˬ pyehˬ doˆ nehˬ-eu gʼaˇ duˬ, sahˬ paˬ Piˇlaˆ-ahˇ shaˇ laˇ-euˬ meh.

⁹Aˬ yawꞈ maꞈ-ahˇ aˬ yawꞈ naˇ haˬ-eu, “Yuˇdaˆ tsawˇ haˬ-euˬ sahˬ paˬ-ahˇ bi pyehˬ doˆ mawꞈ miˇ-a loˇ.”

¹⁰Piˇ ma aˬ yuiꞈ deuˬ myaˆ naˆ-eu baˬ da neh, Yeˬsuˇ-ahˇ aˬ yawꞈ-euˬ aˬ laꞈ laꞈ kʼoeˇ a nehˬ laˇ-euˬ gaˇ kawˆ, sahˬ paˬ Piˇlaˆ yaw muiˬ paˬ-ehˇ siˬ duˬ taˬ-euˬ meh.

¹¹Ehˇ kʼawꞈ, Baˬlaˬbaˇ-ahˇ bi pyehˬ ni sahˬ paˬ Piˇlaˆ-ahˇ shaˇ-eu gʼaˇ duˬ, tsawˇ haˬ aˇ maꞈ-ahˇ piˇ ma aˬ yuiꞈ deuˬ neh mehˬ gahˇ taˬ-euˬ meh.

¹²Sahˬ paˬ piˇ laˆ aˬ yawꞈ maꞈ-ahˇ paˇ naˇ haˬ-eu, “Toˆ-ehˇ ngeuˇ naˇ, Yuˇdaˆ tsawˇ haˬ-euˬ sahˬ paˬ lehˇ naw maꞈ kuˇ-eu kʼoeˇ gʼaˬ-ahˇ aˬ joˆ-ehˇ bi jahˇ nehˬ mawꞈ-eu nya.”

¹³Aˬ yawꞈ maꞈ guˇ-awˇ ehˇ-eu, “Laꞈ yaꞈ kʼoeˇ taˆ taꞈ sehꞈ-awˬ.”

¹⁴Sahˬ paˬ Piˇlaˆ ehˇ-eu, “Aˬ yawꞈ neh mˇ bahˬ taˬ-euˬ aˬ jeˬ jaˆ ta.” Aˬ yawꞈ maꞈ yaw kʼaˆ-ehˇ paˇ guˇ-awˇ ehˇ-eu, “Laꞈ yaꞈ kʼoeˇ taˆ taꞈ sehꞈ-awˬ.”

¹⁵Sahˬ paˬ Piˇlaˆ-aˬ, tsawˇ haˬ aˇ maꞈ nui kʼahˇ shiˇ ni mˇ nehˬ mawꞈ-eu miˇ neh, Baˬlaˬbaˇ-ahˇ pyehˬ doˆ nehˬ-euˬ meh. Kʼoeˇ naˇ, Yeˬsuˇ-ahˇ yahˬ caˆ neh bi juiꞈ-awˇ, laꞈ yaꞈ kʼoeˇ taˆ bi taꞈ sehꞈ-eu gʼaˇ duˬ a nehˬ-euˬ meh.

¹⁶Yehˇ deuˬ neh Yeˬsuˇ-ahˇ miˇ kʼahˬ sahˬ paˬ-euˬ hawˇ nymˇ gawˬ lahˇ taˬ-euˬ laꞈ kʼoeˇ tsahˇ uˇ gʼeh-awˇ, yehˇ kʼoeˇ maꞈ maꞈ lah-ehˇ kuˇ uiˬ jiˇ-euˬ meh.

¹⁷Aˬ yawꞈ maꞈ Yeˬsuˇ-ahˇ neˇ naˆ naˆ-eu pehˇ kʼahˬ pehˇ mahˇ nyehꞈ dm nehˬ-awˇ, aˬ gah ciˇ ni neh shuiˇ uˬ kʼoˆ loꞈ-ehˇ daˇ kʼahˇ kʼahˇ-awˇ, aˬ yawꞈ-euˬ uˬ duˬ-ahˇ nyehꞈ kʼoˆ nehˬ-euˬ meh.

¹⁸Kʼoeˇ naˇ, aˬ yawꞈ maꞈ aˬ laꞈ baꞈ diˇ-awˇ, aˬ yawꞈ-ahˇ yaw zeu baw nehˬ-eu loꞈ-ehˇ jahˇ niˇ gʼa-awˇ, “Yuˇdaˆ tsawˇ haˬ-euˬ sahˬ paˬ ziˇ baw ziˇ za luꞈ-uˇ” lehˇ ehˇ niˇ gʼa-eu meh.

¹⁹Kʼoeˇ naˇ, aˇ toꞈ aˇ kahˬ neh aˬ yawꞈ-euˬ uˬ duˬ-ahˇ diˬ-awˇ, duˬ kʼaˬ kʼa daˆ kʼa daˆ-ehˇ, aˬ yawꞈ-euˬ mehˬ shi pawˬ tsuiꞈ pawˬ dmˬ dmˬ-awˇ uˬ duˬ tahˬ niˇ gʼa-euˬ meh.

²⁰Aˬ yawꞈ maꞈ aˬ yawꞈ-ahˇ niˇ gʼa dehˆ gʼaˬ ngeh, neˇ naˆ naˆ-eu pehˇ kʼahˬ pehˇ mahˇ kʼoeˇ kahˇ nyehꞈ lehˆ-awˇ, aˬ yawꞈ-euˬ mehˬ tsoeˬ paˇ nyehꞈ dm nehˬ-euˬ meh. Kʼoeˇ naˇ, aˬ yawꞈ-ahˇ laꞈ yaꞈ kʼoeˇ taˆ taꞈ sehꞈ-eu lehˇ tsahˇ doˆ gʼeh-euˬ meh.

²¹Aˬ yawꞈ maꞈ gaˇ pehˇ le luꞈ ngeh, pu paw neh meuˬ-ahˇ laˇ luꞈ-eu Siˇmoˬ lehˇ myahˇ-euˬ gʼaˬ-ahˇ mawˇ-awˇ, yehˇ deuˬ neh aˬ yawꞈ-ahˇ nyehꞈ-awˇ, Yeˬsuˇ-euˬ laꞈ yaꞈ bi baꞈ-euˬ meh. (Siˇmoˬ-aˬ, Kuˇleˬniˬ meuˬ-ahˇ jawˇ-eu meh. Aˬleˬsaˬduˇ hawˇ-eu Luˇpuˇ-euˬ aˬ da meh.)

²²Aˬ yawꞈ maꞈ Yeˬsuˇ-ahˇ Gawˇlaˬgawˇda lehˇ kuˇ-eu jawˇ duˬ-ahˇ sheuˬ gʼeh-euˬ meh. Gawˇlaˬgawˇda lehˇ ehˇ-eu dawˬ tsuiꞈ-aˬ, ‘Uˬ duˬ kʼmˬ’ lehˇ ehˇ mawꞈ-eu meh.

²³Aˬ yawꞈ maꞈ aˬ yawꞈ-ahˇ muˇlaˬ lehˇ kuˇ-eu jaˆ gʼaˬ yaw saw jeˬ keuˬ taˬ-euˬ aˬ gaꞈ dzaˇ uiˇ bi dawˇ-euˬ meh. Ehˇ kʼawꞈ, aˬ yawꞈ maˬ dawˇ-a.

²⁴Kʼoeˇ naˇ, aˬ yawꞈ-ahˇ laꞈ yaꞈ kʼoeˇ taˆ taꞈ tehˬ-awˇ, aˬ yawꞈ-euˬ mehˬ tsoeˬ-ahˇ aˬ yawꞈ maꞈ shehˆ tsaˬ tsaˬ-awˇ biˇ geuꞈ-euˬ meh.

²⁵Aˬ yawꞈ maꞈ aˬ yawꞈ-ahˇ laꞈ yaꞈ kʼoeˇ taˆ taꞈ tehˬ ngeh, uˬ shawˬ paw naˬ liˬ gʼoeˬ laꞈ byah laˇ-euˬ meh.

²⁶“Yuˇdaˆ tsawˇ haˬ-euˬ sahˬ paˬ” lehˇ boꞈ taˬ-euˬ, aˬ yawꞈ-ahˇ yaw lehˬ no-euˬ dawˬ taꞈ myahˬ taˬ-euˬ meh.

²⁷Tahˇ joeˬ nyiˬ gʼaˬ-ahˇ kʼawꞈ, aˬ yawꞈ nehˬ-ehˇ tiˬ kawˆ loꞈ-ehˇ, aˇ maˇ paw tiˬ gʼaˬ, aˇ caˇ paw tiˬ gʼaˬ lehˇ, laꞈ yaꞈ kʼoeˇ taˆ taꞈ tehˬ taˬ-euˬ meh.[18]

²⁸

²⁹Kʼaˇ iˇ kʼaˇ laˇ tsehˆ-eu tsawˇ haˬ deuˬ uˬ duˬ juiꞈ juiꞈ-ehˇ naˬ gʼa-eu, “Aˬ heuˇ. Uˬ duˬ tahˬ nymˇ nymˇ ma deh pyaˆ dzeh-awˇ smˬ nah laꞈ kʼoeˇ paˇ tsoˆ kʼoꞈ nya-eu gʼaˬ-oˇ,

³⁰yawˬ haˇ yawˬ ha ka kʼoꞈ-awˇ laꞈ yaꞈ kʼoeˇ taˆ neh zaꞈ ka le-awˬ tawˇ le.”

³¹Kʼoeˇ loꞈ-ehˇ duˇ ni, piˇ ma aˬ yuiꞈ deuˬ hawˇ-eu, Zahˇ dawˬ kʼoꞈ dawˬ mehˬ-eu saˬ laˬ deuˬ kʼawꞈ, tiˬ gʼaˬ tiˇ gʼaˬ heu loꞈ-ehˇ ehˇ-awˇ, Yeˬsuˇ-ahˇ naˬ gʼa-eu meh. “Aˬ yawꞈ aˬ cawˬ-ahˇ ka kʼoꞈ nya-euˬ kʼawꞈ, yawˬ haˇ yawˬ ha maˬ ka kʼoꞈ nya law hawˇ ngaˬ laˬ.

³²Iˇsaˬleˬlaˆ tsawˇ jeuˬ-euˬ sahˬ paˬ pyeuꞈ-eu Ka li heu gʼaˬ, hehˬ nymˬ-mˇ laꞈ yaꞈ kʼoeˇ taˆ neh zaꞈ ka le gaˇ ya mawˇ law nmˇ-aˬ, aˬ dui maꞈ aˬ yawꞈ-ahˇ jah ma ehˇ lawˬ.” Aˬ yawꞈ nehˬ-ehˇ laꞈ yaꞈ kʼoeˇ taˆ bi taꞈ tehˬ taˬ-euˬ kʼoeˇ nyiˬ gʼaˬ kʼawꞈ, aˬ yawꞈ-ahˇ yehˬ bawˬ sehˇ lu-ehˇ ehˇ-eu meh.

³³Nah loˆ ceh laˇ ngeh, miˇ kʼahˬ kʼoeˇ kʼahˬ kʼahˬ lah-ehˇ zahˇ tsui ni pyeuꞈ-iˇ-awˇ, yaw zahˇ kʼoeˇ naˬ liˬ smˇ laꞈ byah ni jaˆ-euˬ meh.

³⁴Uˬ ciꞈ uˬ taw naˬ liˬ smˇ laꞈ byah laˇ ngeh, Yeˬsuˇ yaw kʼaˆ-ehˇ guˇ-awˇ, “Eˇ liˇ, Eˇliˇ, laˬ maˬ saˬ baˇ taˬ niˬ” lehˇ ehˇ-eu meh. Dawˬ tsuiꞈ-aˬ, “Ngaˬ-euˬ Miˬyehˇ-oˇ, ngaˬ-euˬ Miˬyehˇ-oˇ, aˬ jeˬ miˇ neh ngaˬ-ahˇ byehˇ dzeh nehˬ laꞈ te” lehˇ ehˇ mawꞈ-eu meh.

³⁵Kʼoeˇ gaˇ jawˇ-eu tsawˇ haˬ tiˬ paˆ na deuˬ aˬ yawꞈ guˇ gaˇ gaˬ ngeh, “Naˇ haˬ sheˇ. Aˬ yawꞈ Eˇliˇya-ahˇ kuˇ-eu nya” lehˇ ehˇ-eu meh.

³⁶Aˬ yawꞈ maꞈ laꞈ kʼoeˇ tiˬ gʼaˬ, behˇ baˆ laꞈ daˬ-ahˇ duˇ-eu laˆ shaˆ iˇ jaˬ caˆ luˆ tiˬ luˆ yuˇ-awˇ coeˬ daˆ gʼeh-awˇ, aˬ gaꞈ dzaˇ uiˇ yaw byawˬ-ahˇ laˆ duiˆ-awˇ, aˇ toꞈ aˇ kahˬ-euˬ mehˬ dzaˬ-ahˇ gʼoˆ tehˬ-awˇ, Yeˬsuˇ bi cuˆ dawˇ-eu lehˇ cawˬ miˇ nehˬ-awˇ ehˇ-eu, “Taˬ tehˬ lawˬ siˬ. Eˇliˇya oe-awˇ aˬ yawꞈ-ahˇ laꞈ yaꞈ kʼoeˇ taˆ neh ciˬ ka nehˬ le nga loˇ lehˇ tiˬ kʼehˬ dawˬ haw kaˇ-euˇ.”

³⁷Yeˬsuˇ tiˬ teˇ guˇ kʼaˆ laˇ-awˇ, saꞈ gʼawˇ tsehˆ-euˬ meh.

³⁸Uˬ duˬ tahˬ nymˇ nymˇ ma laꞈ kʼoeˇ taw taˬ-euˬ saˬ paˇ lawˆ kaˬ kʼoeˇ, uˬ duˬ-ahˇ neh dawˬ dahˬ-ahˇ doˆ ni, nyiˬ paˆ paˆ-iˇ-euˬ meh.

³⁹Laꞈ yaꞈ-euˬ mehˬ shi yawꞈ luꞈ-eu yehˇ deuˬ kʼoeˇ taˆ aˬ yuiꞈ geuꞈ-eu gʼaˬ, Yeˬsuˇ saꞈ gʼawˇ tsehˆ gaˇ haw duˬ-awˇ ehˇ-eu, “Tsawˇ haˬ heu gʼaˬ maˇ maˇ ni Miˬyehˇ-euˬ Zaˬmaˇ law hawˇ nga.”

⁴⁰Zaˬ miˬ zaˬ tiˬ deuˬ ui cuiˆ gaˇ mahˇ kaˬ gaˇ jawˇ-awˇ haw luꞈ-eu meh. Maˬliˇ Maˬgaˬdaˬlaˇ, Yaˬkoˆ yaw nyiˇ gʼaˬ hawˇ-eu Yoˇsehˆ aˬ nyaꞈ nmˇ-euˬ aˬ ma Maˬliˇ hawˇ-eu, Saˬloˬmeˬ aˬ ha smˇ gʼaˬ kʼawꞈ, kʼoeˇ gaˇ ahˇ-eu meh.

⁴¹Yeˬsuˇ Gaˬliˬlehˇ miˇ kʼahˬ-ahˇ jawˇ ngeh, aˬ yawꞈ maꞈ aˬ yawꞈ-euˬ mehˬ nah caw teh-awˇ, aˬ yawꞈ-ahˇ caw ba nehˬ-euˬ meh. Aˬ yawꞈ nehˬ-ehˇ Yeˬluˇsaˬlehˬ meuˬ-ahˇ caw teh laˇ-euˬ tsawˇ haˬ deuˬ kʼawꞈ, kʼoeˇ gaˇ ahˇ-eu meh.

⁴²Kʼoeˇ ngeh nah-aˬ, Jawˇ nah-euˬ mehˬ hu ngeh nah pyeuꞈ-eu Lehˬhmˬ-eu aˇ nah meh. Kʼoeˇ miˇ neh, uˬ ciꞈ uˬ taw taw le ngeh,

⁴³Baꞈdzah aˇ muˇ laꞈ kʼoeˇ aˬ cawˬ yaw zeu baw-eu tsawˇ haˬ tiˬ gʼaˬ pyeuꞈ-awˇ, Miˬyehˇ Miˇkʼahˬ keuˆ le gaˇ dawˬ luꞈ-eu gʼaˬ pyeuꞈ-eu Aˬliˇmaꞈtehˬ meuˬ-ahˇ jawˇ-eu Yoˇsehˆ-aˬ, sahˬ paˬ Piˇlaˆ jawˇ gaˇ nui ma kʼaˬ duˬ ni le-awˇ, Yeˬsuˇ-euˬ gʼawˇ mawˇ shaˇ leˇ-euˬ meh.

⁴⁴Yeˬsuˇ shiˇ-euˬ meh lehˇ ehˇ gaˇ ya gaˬ ngeh, sahˬ paˬ Piˇlaˆ zahˬ leˇ-euˬ meh. Kʼoeˇ miˇ neh, guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ tiˬ gʼaˬ-ahˇ kuˇ-awˇ, “Aˬ yawꞈ shiˇ-euˬ tiˬ kʼehˬ kʼawˆ laˇ mehˬ loˇ” lehˇ naˇ haˬ-euˬ meh.

⁴⁵Yaw huiˬ yaw mahˇ kʼoeˇ gʼaˬ aˬ yawꞈ-ahˇ ehˇ duˬ nehˬ ngeh, Yeˬsuˇ-euˬ gʼawˇ mawˇ baꞈ gʼeh nya tehꞈ-a lehˇ, Yoˇsehˆ-ahˇ sahˬ paˬ Piˇlaˆ ehˇ nehˬ-euˬ meh.

⁴⁶Yoˇsehˆ-aˬ, shawˇ jehˆ ni gʼeh-eu saˬ paˇ paˇ pyuˇ zeuˇ-awˇ, Yeˬsuˇ-euˬ gʼawˇ mawˇ baꞈ ka-awˇ, mawˇ tawˆ tawˆ-awˇ, lo guˇ-ahˇ taꞈ byoe-awˇ jahˇ taˬ-euˬ lmˬ bymˇ laꞈ kʼoeˇ baꞈ pahˬ-iˇ-euˬ meh. Kʼoeˇ naˇ, lmˬ bymˇ-euˬ mehˬ kʼehˬ-ahˇ kʼaˬ lo lo ma ngawˬ tsoeˬ yaꞈ-euˬ meh.

⁴⁷Maˬliˇ Maˬgaˬdaˬlaˇ hawˇ-eu, Yoˇsehˆ-euˬ aˬ ma Maˬ liˇ aˬ ha nyaꞈ kʼawꞈ, kʼoeˇ gaˇ haw haw-ehˇ jawˇ-awˇ, Yeˬsuˇ-ahˇ aˬ geu tsahˇ-ahˇ baꞈ pahˬ-euˬ mawˇ duˬ yaꞈ-euˬ meh.